TIMIRTTE 03
Geeshsha Maxaafay Yootiyoobay Tuma Gaada Ammanana Danddayay?
Geeshsha Maxaafay daro hidootaa yooteesinne darobaa zorees. Neeni Geeshsha Maxaafay tamaarissiyoobaa eranawu koyikkonne, I yootiyoobaa ammananawu metootennan waaya aggana. He beni maxaafay yootiyoobaanne zoriyoobaa neeni ammanettana koshshii? Geeshsha Maxaafay yootiyoobay ha wodiyan nuna maaddii, qassi sinttanaabaa I yootiyoobaa nuuni ammanana danddayiyoo? Miilooniyan qoodettiya asay hegaa ammanees. Neeni hegaa pilgganaadan nuuni minttettoos.
1. Geeshsha Maxaafan deꞌiya taariketi tumee?
Geeshsha Maxaafay an deꞌiyaabay “sittanne tuma” gidiyoogaa yootees. (Eranchchaa 12:10) I tumu taariketanne tumuppe deꞌida asaabaa yootees. (Luqaasa 1:3; 3:1, 2 nabbaba.) Taarikiyaa eranchchatinne biittaa bookkidi dumma dummabaa xannaꞌiya daroti Geeshsha Maxaafan odettida issi issi wodeti, asay, sohotinne taariketi tuma gidiyoogaa qonccissidosona.
2. Geeshsha Maxaafay beni xaafettida maxaafa gidikkokka nuna maaddees giyoy aybissee?
Geeshsha Maxaafay darotoo I xaafettiyo wode erettennabaa yootees. Leemisuwawu, I saynisiyaara gayttidabaa yootees. Hegeetuppe dariya baggay tuma gidiyoogaa Geeshsha Maxaafay xaafettido wode daro asay ammanenna. SHin, Geeshsha Maxaafay yootiyoobay likke gidiyoogaa ha wodiyaa saynisee qonccissees. Geeshsha Maxaafay ‘ammanettiyaagaanne meri merinawu deꞌiyaagaa.’—Mazamure 111:8.
3. Geeshsha Maxaafay sinttanaabaa yootiyooban nuuni ammanettana koshshiyoy aybissee?
“Biron hanibeenna yohota” yootiya hiraagati Geeshsha Maxaafan deꞌoosona. (Isiyaasa 46:10) I darobati polettanaappe daro wodiyaa kasetidi yootiis. I ha wodiyan deꞌiya alamiyaa hanotaakka darobaa loytti qonccissiis. Geeshsha Maxaafay yootiyo hiraagatuppe amaridaageeta ha timirttiyan pilggana. Eti tuma gidiyoogee maalaalissiyaaba!
LOYTTA AKEEKA
Ha wodiyaa saynisee Geeshsha Maxaafay yootiyoobaara waani maayettiyaakko akeeka; qassi Geeshsha Maxaafay yootiyo amarida hiraagata pilgga.
4. Saynisee Geeshsha Maxaafay yootiyoobaara maayettees
Daro asay biittaa tuuqi uttidabay deꞌees giidi beni wode ammanees. BIIDUWAA beꞌite.
Iyyooba maxaafan 3,500 gidiya layttappe kase aybi xaafettidaakko akeeka. Iyyooba 26:7 nabbabite; yaatidi ha oyshaa tobbite:
Saꞌay “aibakko bainnasan” kaqettiis giya qofay garamissiyaaba gidiyoy aybissee?
Haattaara gayttidaagan simmi simmi haniyaabaa naaꞌꞌu xeeta gidiya layttappe kase asay loytti akeekibeenna. Gidoppe attin, Geeshsha Maxaafay 3,500 gidiya layttappe kase yootidobaa akeeka. Iyyooba 36:27, 28 nabbabite; yaatidi ha oyshata tobbite:
Akeekanawu metenna ha qofaara gayttidaagan nena maalaaliyaabay aybee?
Neeni nabbabido ha xiqiseti Geeshsha Maxaafaa kaseegaappe aaruwan ammananaadan oottokkonaa?
5. Geeshsha Maxaafay keehi koshshiyaabata kasetidi yootiis
Isiyaasa 44:27–45:2 nabbabite; yaatidi ha oyshaa tobbite:
Baabiloonee kunddanaappe 200 layttaa kasetidi hegaara gayttidaagan Geeshsha Maxaafay ay qonccissidi yootidee?
Parsse Kawoy Qiiroosinne A olanchchati 539n K.K.a Baabiloone katamaa xoonidoogaa taarikee qonccissees. Eti katamay naagettiyo shaafaa harasaa zaaridosona. Eti katamaa penggeti dooyetti uttidaageetuura gelidi, katamaa aynne olettennan oyqqidosona. Katamay xayoosappe 2,500ppe daro layttay aadhdhikkonne, ha wodiyan Baabiloonee laaletti uttiis. Geeshsha Maxaafay kasetidi yootidobaa beꞌa.
Isiyaasa 13:19, 20 nabbabite; yaatidi ha oyshaa tobbite:
Ha hiraagay waani polettidee?
Ha wodiyan Iraaqe giyo biittan deꞌiya laalettida Baabiloone katamaa
6. Ha wodiyan nuuni beꞌiyoobaa Geeshsha Maxaafay kasetidi yootiis
Nuuni ‘wurssetta gallassan’ deꞌiyoogaa Geeshsha Maxaafay yootees. (2 Ximootiyoosa 3:1) Geeshsha Maxaafay wurssetta gallassaabaa kasetidi yootidobaa akeeka.
Maatiyoosa 24:6, 7 nabbabite; yaatidi ha oyshaa tobbite:
Geeshshaa Maxaafay wurssetta gallassaabaa waati qonccissii?
Naaꞌꞌantto Ximootiyoosa 3:1-5 nabbabite; yaatidi ha oyshata tobbite:
Geeshsha Maxaafay wurssetta gallassan deꞌiya daro asaa eeshshay ay mala gidanaagaa qonccissidee?
Ha eeshshatuppe awugeeta beꞌadii?
ISSI ISSI ASAY HAGAADAN GEES: “Geeshsha Maxaafay hayse maxaafa.”
Neeni Geeshsha Maxaafan keehi ammanettanaadan oottiyaabay aybee?
AY AKEEKADII?
Taarikee, sayniseenne hiraagay neeni Geeshsha Maxaafan ammanettanaadan oottoosona.
Zaaretuwaa
Geeshsha Maxaafay coo medhdhi xaafido maxaafeeyye, tumubaa yootiyaabee?
Saynisee yootiyoobay Geeshsha Maxaafaara maayettiyo amaridabati aybee?
Neeni Geeshsha Maxaafay sinttanaabaa kasetidi yootees gaada qoppay? Neeni hegaadan qoppiyoy aybissee?
PILGGA
Saynisee likke gidenna giyoobi Geeshsha Maxaafan deꞌii?
“Saynisee Geeshsha Maxaafaara Maayettii?” (Nu websaytiyan deꞌiyaaba)
‘Wurssetta gallassan’ hanidabay aybee?
“6 Geeshsha Maxaafaa Hiraagata—Polettiiddi Deꞌiyaageeta” (Wochchiyo Keelaa, Tamme 1, 2011)
Geeshsha Maxaafay Giriike Kawotettaabaa yootiyo hiraagay waani polettidaakko akeeka.
Geeshsha Maxaafaa hiraagati issi bitanee he maxaafaabaa qoppiyo qofaa waati laammidaakko akeeka.
“Xoossay Baawa Gaada Qoppaas” (Wochchiyo Keelaa Paydo 5 2017)
a K.K. giyoogee “Kiristtoosappe Kase” giyoogaa, qassi M.L. giyoogee “Maarotettaa Layttaa” giyoogaa.