TIMIRTTE 58
Yihoowayyo Awudekka Ammanetta
Tumu Kiristtaaneti Yihoowawu goynnennaadan eta aybinne woy ooninne diggenna mala murttidosona. Neenikka hegaadan murttidoogee qoncce. Yihoowi neeni ayyo ammanettiyoogaa nashshees. (1 Hanidabaa Odiya 28:9 nabbaba.) Neeni ayyo ammanettada deꞌanawu metootanaadan oottana danddayiyaabay aybee, qassi hegawu nena aybi maaddanee?
1. Nuuni Yihoowawu ammanettennaadan harati waati paaccana danddayiyoonaa?
Issi issi asay nuuni Yihoowawu haggaaziyoogaa agganaadan oottanawu malana danddayees. Hegaa mala iitabaa oottiyaageeti oonee? Tumaa aggida issoti issoti nu ammanuwaa xayssanawu Xoossaa dirijjitiyaabaa wordduwaa yootana danddayoosona. Eti kaddidaageeta geetettoosona. Qassi, naagettenna asati tumaa agganaadan oottanawu, haymaanootiyaa kaalettiya amaridaageeti nubaa wordduwaa yootoosona. Nuna eqettiya oonaaranne haasayiyoogee woy eta maxaafaa woykko eti bantta websaytiyan xaafiyoobaa nabbabiyoogee keehi qohiyaaba. Harati Yihoowayyo ammanettidi haggaazennaadan digganawu maliyaageeta xeelliyaagan Yesuusi hagaadan giis: “Etabau hirggoppite; eti qooqe kaalettiya qooqeta; qooqee qooqe kaalettikko, naa77aikka ollan kunddana.”—Maatiyoosa 15:14.
2. Nuuni kuuyiyoobay Yihoowawu ammanettiyaakkonne waati bessana danddayii?
Nuuni Yihoowa siiqiyoogee worddo haymaanootiyaara aybiininne walahettennaadan denttettees. Nu oosoy, nuuni A yara gidido dirijjitee woy nuuni oottiyo aybinne worddo haymaanootiyaara gayttidaba gidana koshshenna. Yihoowi nuna, “Ta asau, [Gita Baabiloonippe] kiyite!” yaagees.—Ajjuutaa 18:2, 4.
LOYTTA AKEEKA
Oonikka neeni Yihoowawu wozanappe ammanettennaadan oottenna mala waatanaakko akeeka. Qassi, neeni Gita Baabiloonippe kiyiyoogan Yihoowawu ammanettiyoogaa waata bessana danddayiyaakko akeeka.
3. Worddo asttamaaretuppe naagetta
Nuuni Yihoowa dirijjitiyaa xeelliyaagan harati yootiyo worddobaa siyikko, waatana koshshii? Leemiso 14:15 nabbabite; yaatidi ha oyshaa tobbite:
Nuuni siyido ubbabaa ammanennaadan naagettiyoy aybissee?
Naaꞌꞌantto Yohaannisa 9-11 nabbabite; yaatidi ha oyshata tobbite:
Nuuni kaddidaageetuura gayttidaagan waatana koshshii?
Nuuni kaddidaageetuura haasayana xayikkonne, eti tamaarissiyoobaa siyana danddayiyo harabay aybee?
Nuuni Yihoowabaanne A dirijjittiyaabaa asay odiyo iitabaa siyikko, ayyo aybi siyettanee?
4. Issi ishay nagaraa oottiyo wode, neeni awudekka Yihoowawu ammanetta
Nuuni galchchan deꞌiya uri gita nagaraa oottidoogaa erikko, ay oottana bessii? Xoossay beni Israaꞌeelatussi immido Higgiyan deꞌiya issi maaraa qoppa. Wogaabaa 5:1 nabbabite.
Ha xiqisee zoriyoogaadan, nuuni issi uri gita nagaraa oottidoogaa erikko, hegaa cimatuyyo yootana koshshees. SHin, etawu yootanaappe kase, izaawu ba nagaraa cimatussi paaxanaadan zoriyoogee kehatettaa bessiyaaba. I yootana xayikko, nuuni Yihoowawu ammanettoos, qassi nu eriyoobaa cimatussi yootoos. Yaatiyoogee hagaappe kaallidi deꞌiyaageeta aggenna siiquwaa siiqiyoogaa waati bessii?
Xoossaa Yihoowa.
Nagaraa oottida ura.
Galchchan deꞌiya harata.
Ne mala Kiristtaanee paaciyan gelikko maadda!
5. Gita Baabiloonikko shiiqoppa
Luqaasa 4:8nne Ajjuutaa 18:4, 5 nabbaba; yaatada ha oyshata zaara:
Taani haꞌꞌikka worddo haymaanootiyaa wogaa kaalliyaanaa?
Taani hara haymaanootiyaara gayttida dirijjitiyan deꞌiyaanaa?
Taani oottiyoobay worddo haymaanootiyaa maaddiyo ginay deꞌii?
Ta deꞌuwan taani worddo haymaanootiyaappe shaahettana koshshiyo harabati deꞌiyoonaa?
Taani ha oyshatuppe awugaanne ee gaada zaarikko, aybin laamettana koshshii?
He ubbaban, ne kahaa qumꞌꞌennabaanne neeni Yihoowawu ammanettiyoogaa bessiyaabaa kuuya.
Issi haymaanoote dirijjitee asaa maaddanawu nena miishshaa oychchiyaakko waatuutee?
ISSI ISSI ASAY HAGAADAN GEES: “Taani tumawu mootettanawu kaddidaageeti Yihoowa Markkatubaa woygiyaakko erana koshshees.”
Hegee loꞌꞌobee? Aybissi?
AY AKEEKADII?
Nuuni Yihoowawu ammanettidi deꞌanawu, nuna balettanawu koyiyageetuura zuppetana koshshenna. Hegaa bollikka, nuuni worddo haymaanootiyaappe muleera shaahettana koshshees.
Zaaretuwaa
Nuuni kaddidaageetu timirttiyaa siyana koshshennay aybissee?
Issi ishay gita nagaraa oottidoogaa erikko nuuni waatana koshshii?
Nuuni worddo haymaanootiyaappe kiyaanaadan odettidabaa azazettanawu waatana danddayiyo?
PILGGA
Harati Yihoowa Markkatubaa wordduwaa yootiyo wode, neeni waatanaakko akeeka.
Issi issi dirijjiteti woy oosoti Gita Baabiloono maaddiyaakkonne shaakka eranawu waatana danddayay?
Eqettiyaageeti nu ammanuwaa shugissanawu giidi ay oottidonaa?
“Taani Naatettaappe Doommada Xoossaa Koyaas” giyaagan, worddo haymaanootiyaappe shaahetti kiyida SHinto qeesiyaabaa nabbaba.
“Geeshsha Maxaafay Asay Laamettanaadan Oottees” (Wochchiyo Keelaa huuphe yohuwaa)