Immiyoogee Demissiyo Ufayssaa

“OTOBISEE baana danddayees; shin CHayna biittaa bitanee beenna!” Alekisandira Tohossa Amarkkan naaꞌꞌu biittatu zawaa kanttana haniya otobisiyan baydda, he cenggurssaa siyaasu. A aybi haniyaakko beꞌanawu wodhaasu; yaatada CHayna biittaa bitanee zawaa naagiya wotaaddarawu bana gakkida metuwaa Isppeene qaalan yootanawu baaxetiyoogaa beꞌaasu. Alekisandira CHayna qaalaa goꞌettiya Yihoowa Markkatu gubaaꞌiyan shiiqiyo gishshawu, a wokkaale gidada maaddanawu koyaasu.

Bitanee he biittan deꞌiyo maatay deꞌiyo asa gidiyoogaa yootiis; shin a oonatettaa qonccissiya woraqataynne a miishshay wuuqqettiis. Koyro heeran wotaaddaray i yootidobaa ammanibeenna; ubba qassi Alekisandira bessenna ogiyan asaa issisaappe harasaa efiya asa giidi siriis. Wurssettan, i bitanee yootidobaa ammaniis; shin i oonakko qonccissiyaabaa oyqqibeenna gishshawu, qiixaatiyawu miishshaa qanxxana bessiyoogaa yootiis. Awu miishshi baynna gishshawu, Alekisandira ayyo 20 doolaariyaa talꞌꞌaasu. He bitanee o keehi galatiis; qassi 20 doolaareppe dariyaagaa iyyo zaaranaagaa yootiis. Alekisandira gujo miishshaa koyennaagaa yootaasu; qassi oottana bessiyaabaa oottada maaddido gishshawu ufayttaasu. A bitaniyawu Geeshsha Maxaafaa qofay deꞌiyo amarida xuufiyaa immada i Yihoowa Markkatuura Geeshsha Maxaafaa xannaꞌanaadan minttettaasu.

Erenna asawu kehiyoogaa siyiyoogee keehi ufayssees; qassi ubba haymaanootiyan deꞌiya asaynne haymaanootee baynna asaykka hegaadan oottees. Neeni hegaadan asawu keha eray? Yesuusi, “Ekkiyaagaappe immiyaagee anjjettidaagaa” giido gishshawu he oyshaa loytti qoppana koshshees. (Oosuwaa 20:35) Saynisiyaa eranchatikka immiyoogee nena goꞌꞌiyoogaa akeekido gishshawu hegaabaa erana bessees. Ayba ogiyan maaddiyaakko ane beꞌoos.

“UFAISSAN IMMIYA URAA”

Immiyoogeenne ufayssay shaahettennaba gidiyoogee erettidaagaa. Kiitettida PHawuloosi ‘Xoossay ufayssan immiya uraa siiqiyoogaa’ yootiis. I hegaadan giidoy metootida bantta mala Kiristtaaneta maaddanawu kehatettan immida Kiristtaanetubaa yootido wode. (2 Qoronttoosa 8:4; 9:7) PHawuloosi he ishanttinne michontti ufayttiyo gishshawu haratuyyo immidoogaa gidennan, eti immido gishshawu ufayttidoogaa yootiis.

Immiyoogee “ufayttanaadan, haratuura laggetanaadan, ammanettanaadan oottiya nu guuggiyaa kifiliyaa denttettiyo gishshawu nuussi loꞌꞌobay siyettanaadan oottiyoogaa” issi xinaatee qonccissiis. Hara xinaatee “issi urawu miishshaa immiyoogee hegaa baassi goꞌettiyoogaappe aaruwan immida uri keehi ufayttanaadan oottiyoogaa” qonccissiis.

Ne hanotaa gaasuwan neeni hegaadan oottana danddayennabadan qoppa eray? Gidoppe attin, ubba asaykka ‘ufayssan immana’ danddayees. Issi uri wozanappe qoppidi immikko, guuxxin darinkka metoy baawa. Issi Yihoowa Markkiyaa ha maxeetiyaa giigissiyaageetuyyo miishshaa yeddada hagaadan gaada xaafaasu: “Daro layttawu Kawotettaa Addaraashan taani miishshaa loytta immana danddayabeykke. SHin Xoossaa Yihooway taani immidoogaappe darobaa immidi tana anjjiis. . . . Taani Yihoowa oosuwawu imotaa immanaadan intte oottido gishshawu galatays. Hegee taani keehi ufayssiis.”

Immiyoogee miishsha xalla gidenna. Immiyo hara daro ogee deꞌees.

IMMIYOOGEE NE PAYYATETTAWU MAADDEES

Geeshsha Maxaafay, “Keha asi baassi lo77obaa oottees; shin meqettaa iita asi bana qohees” yaagees. (Leemiso 11:17) Keha asay ba wodiyaa, wolqqaanne hegaa mala harabaa ba dosan immees. Hegaadan immiyoogee eta bollay payya gidanaadan oottiyoogaa xalla gidennan, eta deꞌuwaa daro ogiyan maaddees.

Bantta dosan harata maaddiyaageeti darotoo sahettennaagaanne darin unꞌꞌettennaagaa xinaateti qonccissoosona. Eta payyatettay darotoo loꞌꞌo. Kehatettan immiyoogee malttipil isklerosis giyoonne eedisiyaa giyo wolqqaama sahuwaa sahettiyaageetu payyatettaykka loꞌꞌo gidanaadan maaddees. Qassi ushshaa amaliyaa agganawu baaxetiyaageeti harata maaddiyoogee eti darin unꞌꞌettennaadaaninne etawu ushshay zaarettidi amale gidennaadan oottiyoogaakka he xinaatee qonccissiis.

Hegawu gaasoy “qarettiyoogeenne keha gidiyoogee darin unꞌꞌettennaadan oottiyo gishshataassa gidiyoogaa” he xinaatee qonccissees. Immiyoogee keehi hirggennaadan, qassi suuttaara gayttida harggiyawukka maaddana danddayees. Qassi bantta aqo laggeti hayqqidoogeeti harata maaddiyoogee, eti unꞌꞌettiyoogaa sohuwaara agganaadan maaddees.

Immiyoogee neeyyo loꞌꞌo gidiyoogee qoncce.

IMMIYOOGEE HARATIKKA IMMANAADAN DENTTETTEES

Yesuusi bana kaalliyaageeta hagaadan zoriis: “Immite; asay intteyyo immana. Baqqi naaqqidi siilli kunttin, palahidi wora laalettiyaagaa eti intte kiyuwan idinttidi immana. Ayssi giikko, intte immanawu makkiyooban etikka intteyyo makkana.” (Luqaasa 6:38, NW) Neeni immikko, neeni kehatettan immido gishshawu asay galatana danddayees; qassi eti kehiyaageeta gidoosona. Yaatiyo gishshawu, immiyoogee hashetanaadaaninne laggetanaadan denttettees.

Asaa gaytotettaabaa xannaꞌiyaageeti, “bantta xallaa siiqiyoogaa aggidi haratuyyo ubbatoo qoppiya asati haratikka hegaadan oottanaadan denttettiyoogaa” akeekidosona. Qassi “haray atto kehidi oottido keehi maalaalissiyaabaa nabbabiyoogee asay kaseegaappe aaruwan kehanaadan oottees.” Yaatiyo gishshawu, issi xinaatee qonccissidoogaadan, “issi uri oottiyoobay keehi daro asaa, ubba xeetan qoodettiya asaa denttettana danddayees; etappe amaridaageeti he uraa erennaageeta woy aara gaytti erennaageeta gidana danddayoosona.” Issi uri kehatettan oottido issibay hara urikka hegaadan oottanaadan denttettin daro asaa maaddana danddayees. Hegaa mala sohuwan neeni deꞌanawu koyikkii? Ee, daro asay immiyaabaa gidikko, demmiyo goꞌꞌay keehi daro gidees.

Amarkkan Floridan hanidabay hegee keehi goꞌꞌiyoogaa bessees. Wolqqaama gotee he heeraa qohi simmin, qohettidaageeta maaddanawu amarida Yihoowa Markkati bantta dosan biidosona. Eti giigissiyo keettaa bottokonanawu koshshiyaabaa naagiiddi, shoorotuppe issuwaa dirssay moorettidoogaa akeekidi hegaa giigissanawu oychidosona. He shooro bitanee guutta wodiyaappe guyyiyan Yihoowa Markkatu waanna biiruwawu xaafido dabddaabbiyan, “Taani wozanappe galatays. Ha asatu mala keehi loꞌꞌo asi darenna” yaagiis. I keehi nashshiyoogaappe denddidaagan Yihoowa Markkati oottiyo loꞌꞌo oosuwawu amarida miishshaa kiittiis.

IMMIYOOGAN OOPPENNE AADHIYAAGAA MILATA

“Hara asaa maaddanawu koyiyoogee asawu waannaa eeshsha gidiyoogaa” saynisee xannaꞌidi demmidobay loyttidi bessees. Naati “haasayaa doommanaappe kasekka haratuyyo kehiyoogaa” he xinaatee qonccissees. Aybissi? Geeshsha Maxaafay asay ‘Xoossaa leemisuwan’ merettidoogaa, hegeekka asaayyo Xoossaa waanna eeshshati deꞌiyoogaa yootiyoogee he oyshawu zaaro gidees.—Doomettaabaa 1:27.

Nuna medhida Xoossaa Yihoowawu deꞌiya maalaalissiya eeshshatuppe issoy kehatettaa. I nuuyyo deꞌuwaanne nuuni ufayttanaadan koshshiya ubbabaa immiis. (Oosuwaa 14:17; 17:26-28) Nuuni a Qaalaa Geeshsha Maxaafaa xannaꞌiyoogan saluwan deꞌiya nu Aawaanne i nuussi siiquwan halchidobaa erana danddayoos. Nuuni sinttappe ufayttanaadan Xoossay giigissidobaakka he maxaafay yootees.a (1 Yohaannisa 4:9, 10) Xoossaa Yihooway kehatettawu pultto gidiyo gishshawunne neeni a leemisuwan merettido gishshawu, Xoossaagaadan immana koshshiyoogee garamissiyaabaa gidenna; qassi hegee neeyyo loꞌꞌonne i nena nashshanaadan oottiyaaba.—Ibraawe 13:16.

Ha huuphe yohuwaa doomettan ibaa denttido Alekisandiro hassayay? A oottidobay wurssettan ay demissidee? Iira otobisiyan biya hara bitanee a ba miishshaa wora olidabadan iyyo yootikkonne, a maaddido bitanee kataman ba laggetuura gayttidi otobisee eqqiyo wode ippe ekkido 20 doolaariyaa zaari aggiis. Hegaa bollikka, Alekisandira yootidoogaadan he bitanee Geeshsha Maxaafaa xannaꞌiyoogaa doommiis. A Peeru biittan CHayna qaalaa Yihoowa Markkatu gita shiiquwan heezzu aginappe simmin aara gayttada keehi ufayttaasu. He bitanee Alekisandira oottido ubbabawu o galatanawu, onne iira he shiiquwaa biidaageeta ba quma keettan shoobbiis.

Immiyoogeenne harata maaddiyoogee keehi ufayssees. Hegaadan oottaydda, loꞌꞌo imota ubbawu Pultto gidida Xoossaa Yihoowa asay loytti eranaadan maaddiyoogan keehi ufayttana. (Yaaqooba 1:17) Neeni immiyoogan ufayttaydda deꞌay?