Ishatetta Siiquwaa Minttiyoogaa Aggoppite

“Kiristtoosi nuna [siiqidoogaadan,] . . . inttekka siiquwan de7anau bessees.”—EFISOONA 5:2.

1. Yesuusi bana kaalliyaageeta erissiyaabay ayba giidee?

SOOPPE soo biidi Xoossaa Kawotettaa mishiraachuwaa sabbakiyoogee Yihoowa Markkata dummayidi erissiya ooso. Gidikkokka, Kiristtoos Yesuusi bana tumuppe kaalliyaageeta erissiya harabaa yootiis. I: “Taani inttena ooratta azazuwaa azazais; issoi issuwaa siiqite. Taani inttena siiqidoogaadankka, intte issoi issuwaa siiqana bessees. Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis.—Yohaannisa 13:34, 35.

2, 3. Nu Kiristtaane shiiqotun beettiya asata nu ishatetta siiqoy waati bochii?

² Tumu Kiristtaane ishatettaa maabaran deꞌiya siiquwaa mali awaaninne baawa. Maagineetee birataa shiishshidi oyqqiyoogaadan, siiqoy Yihoowa ashkkaratu issippetettaa minttees; ashkke asati tumu goynuwan omoodettanaadankka oottees. Leemisuwau, oottishin ayfee toꞌido, Kaameruune biittan deꞌiya Marselino hanotaa qoppa. A daafay gakki simmin, a ayfee toꞌidoy i kaayiyo gishshataassa giya odoy darosaa gakkiis. Woosa keettaa asttamaareenne yan deꞌiya harati a minttettiyoogaappe woosa keettaappe yedettidosona. Issi Yihoowa Markkay Marselina shiiquwaa shoobbin i mammottiis. Asay a haranttuwaakka yedettanaadan koyibeenna.

³ Marselinoy Kawotettaa Addaraashan hanidaban garamettiis. Gubaaꞌiyaa yameti a ufayssan mokkidosona; qassi siyido Geeshsha Maxaafaa timirtteekka a minttettiis. I gubaaꞌe shiiqotu ubban beettiyoogaa doommiis; Geeshsha Maxaafaa xinaatiyan dichaa bessidi, 2006n xammaqettiis. Ha wodiyan i ba soo asaayyoonne ba shoorotuyyo tumaa yootiiddi deꞌees; qassi amarida asata Geeshsha Maxaafaa xannaꞌissees. Marselinoy Geeshsha Maxaafaa xannaꞌissiyo asati Xoossaa asaa giddon deꞌiya siiquwaa baagaadan akeekanaadan koyees.

4. PHauloosi, “Siiquwan de7anau bessees” yaagido zoriyaa nuuni azazettana koshshiyoy aybissee?

⁴ Nu ishatetta siiqoy ufayssiyaagaa. He siiqoy hegaadan deꞌanaadan nu ubbay nuuppe koyettiyaabaa oottana bessees. Meego wode asay shiiqidi hoꞌꞌiyo, eexxiya tamaa qoppa. Tamaa hoꞌꞌiyaageeti mittaa wottana xayikko tamay toꞌees. Hegaadankka, gubaaꞌiyan issippetettay deꞌanaadan oottiya maalaalissiya siiquwaa nuuni ubbay minttana xayikko, he siiqoy irxxees. Nuuni hegaadan waati oottana danddayiyoo? Kiitettida PHauloosi: “Kiristtoosi nuna siiqidi, ba huuphiyaa Xoossaayyo sawuwaa tonggu giya yarshsho oottidi immidoogaadan, inttekka siiquwan de7anau bessees” yaagidi yootiis. (Efisoona 5:2) Nuuni qoppana koshshiya oyshay, Taani waanada siiquwan deꞌana danddayiyaanaa? yaagiyaagaa.

‘Inttekka Intte Uluwaa Aassi Dooyi Bessite’

5, 6. PHauloosi Qoronttoosa Kiristtaaneti siiquwaa ‘aassanaadan’ zoridoy aybissee?

⁵ Beni Qoronttoosan deꞌiya Kiristtaanetuyyo kiitettida PHauloosi: “Qoronttoosan de7iya asau, nuuni intteyyo qoncciyan yootida; nu uluwaakka inttena bessida; [n]uuni intteyyo xibibookko; xibidaageeti inttena. Nuuni nu uluwaa intteyyo genttibookko; shin intte uluwaa nuuyyo genttidaageeti inttena. Ha77i taani ta naatuyyo haasayiyoogaadan, intteyyo haasayais; nuuni inttena nu uluwaa bessidoogaadan inttekka nuna intte uluwaa aassi dooyidi bessite” yaagidi xaafiis. (2 Qoronttoosa 6:11-13) PHauloosi Qoronttoosan deꞌiya Kiristtaaneti bantta siiquwaa aassanaadan zoridoy aybissee?

⁶ Beni Qoronttoosa gubaaꞌee waanidi eqqidaakko qoppa. PHauloosi Qoronttoosa biidoy 50 M.L. wurssettaa heeraana. PHauloosi yan sabbakiyoogaa doommiyo wode, asaappe yedetay gakkidaba gidikkokka, i hidootaa qanxxibeenna. Keehi gamꞌꞌennan he kataman deꞌiya daroti mishiraachuwaa ammanidosona. PHauloosi ooratta gubaaꞌiyaa tamaarissiiddinne minttettiiddi “issi laittanne usuppun agina” yan takkiis. Qoronttoosa Kiristtaaneta i keehippe siiqiyoogee qoncce. (Oosuwaa 18:5, 6, 9-11) Etikka a siiqanaunne bonchanau bessiya gaasoy deꞌees. Gidikkonne, gubaaꞌiyan deꞌiya issoti issoti akko shiiqokkona. Amaridaageeti i yootiyo qoncce zoriyaa dosennan aggana danddayoosona. (1 Qoronttoosa 5:1-5; 6:1-10) Banttana ‘kiitettida waannata’ giyaageetu zigirssaa harati siyennan waayi aggana. (2 Qoronttoosa 11:5, 6) PHauloosi ba ishatinne michoti ubbay bana siiqanaadan koyiis. Yaatiyo gishshau, eti baakkonne hara Kiristtaanetukko shiiqiyoogan siiquwaa ‘aassanaadan’ woossiis.

7. Nuuni ishatetta siiquwaa waati ‘aassana’ danddayiyoo?

⁷ Nuunishin? Ishatetta siiquwaa bessiyoogaa waatidi ‘aassana’ danddayiyoo? Layttan laggetiyaageeti woykko issi zare gididaageeti issoy issuwaara siiqettanau metootennan aggana danddayoosona. Wodiyaa aattiyooban issi malabaa dooriyaageeti darotoo wodiyaa issippe aattoosona. SHin nuuni issi issi Kiristtaanetuura oottana koyiyoobay haratuura gayttennaadan diggiyaaba gidikko, nuuni siiquwaa ‘aassana’ koshshees. Nuna hagaadan oychiyoogee eratetta: ‘Taani keehippe dosiyoogeetuppe hara ishatuuranne michotuura issi issitoo haggaazuwan woykko haraban shaahettiyaanaa? Kawotettaa Addaraashan, oorattati taayyo lagge gidanau koyro gidaa kunttana bessees gaada etakko darin shiiqikkinaa? Gubaaꞌiyan deꞌiya cimatanne yelagata ubbaa sarotiyaanaa?’

8, 9. Roome 15:7n deꞌiya PHauloosa zoree nuuni ishatetta siiquwaa minttanaadan waati maaddii?

⁸ Issoy issuwaa sarotiyoogaa xeelliyaagan, PHauloosi Roome Kiristtaanetuyyo yootidobay nu ishantta bessiyaagaadan xeellanaadan maaddana danddayees. (Roome 15:7 nabbaba.) He sohuwan, ‘mokkiyoogaa’ geetettida Giriike qaalay, “kehatettan mokkiyoogaa, ba laggetu yame oottiyoogaa” giyoogaa. Beni wode imatta mokkiya keha uri, laggeta ba son mokkiyo wode, eti yiidoogan ufayttidoogaa bessiyaabaa oottees. Kiristtoosi nuna hegaadan mokki ekkiis; nuunikka hara Kiristtaaneta mokki ekkiyoogan a leemisuwaa kaallanaadan zoree imettiis.

⁹ Nuuni Kawotettaa Addaraashaaninne harasan nu ishantta sarotiyo wode, mata wode gayttibeennaageetuura woykko haasayissibeennaageetuura wodiyaa aattana danddayoos. Yaatikko, guutta wodiyau eta ayssi haasayissikkii? Kaalliya shiiquwaa gallassan, haratakka hegaadan haasayissana danddayoos. Guutta wode giddon, nu ishatuppenne michotuppe darotuura ufayssiya ogiyan haasayana danddayoos. Nuuni issi gallassi ubba asaa haasayissana bessees giidi qoppana koshshenna. Nuuni issi issitoo shiiquwan sarotennan aggikko, ooninne lanccana koshshenna.

10. Gubaaꞌiyan deꞌiya ubbau ayba loꞌꞌo injjee deꞌii? Waatidi he injjiyaa loytti goꞌettana danddayiyoo?

¹⁰ Harata sarotiyoogee mokkiyoogau doometta. Hegee ufayssiya ogiyan issoy issuwaara haasayanaadaaninne duuxxenna laggetettaa medhanaadan oottana danddayees. Leemisuwau, gita shiiqotun shiiqidaageeti kase erennaageetuura erettiyaabanne haasayiyaaba gidikko, hara wode hegeetuura gayttanau koyoosona. Kawotetta Addaraashaa bantta dosan keexxiyaageetinne daafay gakkidosan oottiyaageeti, temokruwaa yootiyoogan issoy issuwaa loꞌꞌo eeshshaa eriyo gishshau, darotoo issoy issuwau loꞌꞌo lagge gidoosona. Yihoowa dirijjitiyan duuxxenna laggetettaa medhiyo daro injjee deꞌees. Nuuni siiquwaa ‘aassiyaaba’ gidikko, daro laggeta demmoos; hegee tumu goynuwan nuuni issippe gidanaadan oottiya siiqoy minnanaadan oottees.

Haratuyyo Wodiyaa Immite

11. Marqqoosa 10:13-16n deꞌiyaagaadan Yesuusi leemiso gidiyaabaa ay oottidee?

¹¹ Yesuusi asay akko shiiqanau deexxennaagaa; ubba Kiristtaanetikka hegaadan oottanau baaxetana danddayoosona. Yelidaageeti bantta naata Yesuusakko ehiyoogaa erissiyo ashkkarati digganau malido wode, Yesuusi woygidaakko qoppa. I: “Guutta naati taakko yiyoogaa diggoppite; aissi giikko, Xoossaa kawotettai hageetu malaassa” yaagiis. “Yaagidi guutta naata qoommidi, ba kushiyaa eta bolli huuphiyan huuphiyan wottidi, eta anjjiis.” (Marqqoosa 10:13-16) He guutta naati Gita Asttamaaree etau hegaa mala siiquwaa bessido gishshau, ay keena ufayttidaakko qoppa!  

12. Hara asaara haasayennaadan xube gidiyaabati aybee?

¹² Ubba Kiristtaaneti, ‘Harati tanaara gayttanau koyiyo wode taanikka koyiyoogaa bessiyaanaayye woy darotoo oosoy darido asa milatiyaanaa?’ yaagidi, banttana oychana koshshees. Bala gidenna meezeti issi issitoo nuuni asaara haasayennaadan xube gidana danddayoosona. Leemisuwau, nuuni haratuura deꞌiiddi, darotoo moobayliyaa goꞌettiyaaba woykko muuziqaa ezggiyaaba gidikko, nuuni etaara haasayana koyennaba milatana danddayees. Nuuni haratuura deꞌiiddi, darotoo guutta komppiyuteriyaa goꞌettiyaaba gidikko, etaara haasayana koyennabadan qoppana danddayoosona. ‘Coꞌꞌu gaanau bessiya wodee deꞌiyoogee’ qoncce. SHin nuuni asaara deꞌiyo wodee, ‘haasayanau koshshiyo wode.’ (Eranchchaa 3:7) Issoti issoti, “Taani asaara haasayana koyabeykke” woykko “Taani guuran haasayiyoogaa dosikke” gaana danddayoosona. Gidikkokka, nuuni haasayana koyenna wodiyankka asaara pashkkidi haasayiyoogee, “uuzettenna” siiquwaa qonccissiyoogaa bessees.—1 Qoronttoosa 13:5.  

13. Kiristtaane ishatanne michota Ximootiyoosi waati xeellanaadan PHauloosi minttettidee?

¹³ PHauloosi, yelaga Ximootiyoosi gubaaꞌiyan deꞌiya ubbata bonchana mala minttettiis. (1 Ximootiyoosa 5:1, 2 nabbaba.) Nuunikka nuuppe cimiya Kiristtaaneta nu aayotudaaninne nu aawatudan, yelagata qassi nu ishatudaaninne nu michotudan xeellana bessees. Nuuyyo hagaa mala xeelay deꞌiyaaba gidikko, nu siiqo ishatuppenne michotuppe ooninne nunaara deꞌiiddi boorasenna.

14. Haratuura minttettiya ogiyan haasayiyoogan demmiyo amarida goꞌꞌay aybee?

¹⁴ Nuuni haratuura minttettiya ogiyan haasayiyaaba gidikko, eti ayyaanaabaaninne qofan goꞌettanaadan maaddoos. Issi macara biiruwan oottiya ishay, i Beeteele gelido koyro heeran, Beeteelen deꞌiya gastta ishati aara darotoo haasayanau wodiyaa immidoogaa loytti hassayees. Eta minttettoy Beeteele keettaa asay siiqiyoogee au siyettanaadan oottiis. Beeteelen deꞌiya haratuura haasayiyoogan i eta leemisuwaa kaallanau baaxetees.

Nu Huuphiyaa Kawushshiyoogee Sarotettaa Medhanau Maaddees

15. Nu giddon ooshshay merettana danddayiyoogaa bessiyay aybee?

¹⁵ Beni wode Piliphisiyuusan deꞌiya, Ewodiyoonne Sinxxiikko giyo naaꞌꞌu Kiristtaane michoti bantta giddon merettida metuwaa giigissana danddayibeennaba milatees. (Piliphphisiyuusa 4:2, 3) PHauloosanne Barnnaabaasa giddon merettida ooshshay daro asay eriyooba; qassi amarida wodiyau issoy issuwaappe shaahettanaadan oottiis. (Oosuwaa 15:37-39) Ha taariketi tumu Kiristtaanetu giddonkka ooshshay merettana danddayiyoogaa bessoosona. Nuuni sigettanaadaaninne zaarettidi dabbotaa minttanaadan Yihooway maaddees. SHin i nuuppe issibaa koyees. 

16, 17. (a) Sigettanau ba huuphiyaa kawushshiyoogee ay keena koshshii? (b) Yaaqoobi Eesawaara gayttido hanotay ba huuphiyaa kawushshiyoogaa goꞌꞌaa waati qonccissii?

¹⁶ Neeni kaamiyan issi laggiyaara oge baana koyidabadan qoppa. Intte baanaappe kase, kaamiyaa denttanau neeni qulppiyaa goꞌettana koshshees. Ooyettidaageetikka sigettanau qulppe malabaa koshshees. He qulppe malabay ba huuphiyaa kawushshiyoogaa. (Yaaqooba 4:10 nabbaba.) Kaallidi deꞌiya, Geeshsha Maxaafaa leemisuwan qonccidoogaadan, he qulppe malabay ooyettidaageeti Geeshsha Maxaafaa baaso siraataa oosuwan peeshshanaadan oottees.

¹⁷ Eesawi, ba mentte ishaa Yaaqoobi ba bayratettaa ekkido gishshau, yiillotidi a woranau koyoosappe laatamu layttay aadhiis. He mentteti hegaa keena wodiyaappe simmin gayttana hanoosona; he wode, “Yaaqoobi yayyidi batibatiis.” Yaaqoobi, Eesawi bana worees giidi qoppiis. SHin eti gayttiyo wode, Yaaqoobi, Eesawi qoppibeennabaa oottiis. I ba ishaakko gakkiyo wode, ‘saꞌaa gakki gakkidi ziggiis.’ Hegaappe simmin aybi hanidee? “Eesawi aara gaittanau woxxidi, a qooriyaa qoommidi yeriis. Eti yeekkidosona.” Hegee oli denddennaadan oottiis. Yaaqoobi ba huuphiyaa kawushshido hanotay, Eesawi ba ishaa ixxanaadan oottidabi deꞌikkokka, ixxennaadan maaddiis.—Doomettaabaa 27:41; 32:3-8; 33:3, 4.

18, 19. (a) Ooshshay merettiyo wode, Geeshsha Maxaafaa zoriyaa oosuwan peeshshanau kasetiyoogee koshshiyoy aybissee? (b) Nunaara ooyettida uri koyro loꞌꞌo zaaro zaarana xayikko, hidootaa qanxxana koshshennay aybissee?

¹⁸ Sigettanau maaddiya loꞌꞌo zoree Geeshsha Maxaafan deꞌees. (Maatiyoosa 5:23, 24; 18:15-17; Efisoona 4:26, 27)a Gidikkokka, nuuni nu huuphiyaa kawushshidi he zoriyaa oosuwan peeshshana xayikko, sarotettaa medhana danddayokko. Nuunikka nu huuphiyaa kawushshana danddayiiddi hankko uri ba huuphiyaa kawushshanaadan naagiyoogee maaddenna.

¹⁹ Nuuni sarotettaa medhanau koyro oottidobay issi gaasuwan ushachana xayikko, hidootaa qanxxana koshshenna. Hankko uri bau siyettiyaabaa akeekan qoppanau wodiyaa koshshana danddayees. Yooseefa ishati Yooseefa qohidosona. Eti aara zaaretti gayttanaashin daro layttay aadhiis; i he wode Gibxxe biittan kawuwaappe kaallidi haariyaagaa. SHin wurssettan eti bantta mooruwaa ammanidi, i atto gaanaadan woossidosona. Yooseefi etau atto giis; qassi Yaaqooba naati Yihoowa sunttan xeegettiyo maataa demmida dere gididosona. (Doomettaabaa 50:15-21) Nu ishatuuranne michotuura sarotettan deꞌiyoogan, gubaaꞌiyan issippetettaynne ufayssay deꞌanaadan oottoos.—Qolasiyaasa 3:12-14 nabbaba.

‘Oosuwaaninne Tumatettan Siiqettiyaageeta’ Gidoos

20, 21. Yesuusi ba kiittidoogeetu tohuwaa meeccidoogaappe ay timirtte demmiyoo?

²⁰ Yesuusi hayqqanaappe guuttaa kasetidi ba kiittidoogeetuyyo: “Taani intteyyo oottidoogaadan, inttekka oottana mala, intteyyo leemiso gidaas” yaagiis. (Yohaannisa 13:15) He wode i 12tu tohuwaa meecci simmees. Yesuusi hegaadan oottidoy woga gidido gishshataassa woy kehatetta bessanaassa gidenna. Yohaannisi, Yesuusi tohuwaa meeccido hanotaa yootanaappe kasetidi: “Yesuusi . . . ha sa7an de7iya baageeta ubba wode siiqiis; wurssettai gakkanaassi eta siiqiis” yaagidi xaafiis. (Yohaannisa 13:1) Darotoo ashkkarati oottiyo hegaa mala oosuwaa oottanaadan Yesuusa denttettiday ba erissiyo ashkkarata siiqiyoogaa. Eti bantta huuphiyaa kawushshidi issoy issuwaa siiqiyoogaa bessiyaabaa oottana koshshees. Ee, tumu ishatettaa siiqoy nuuni nu Kiristtaane ishatussinne michotussi qoppanaadan denttettana koshshees.

²¹ Xoossaa Naꞌay a tohuwaa meeccido kiitettida PHeexiroosi, Yesuusi ay tamaarissanau hegaa oottidaakko akeekiis. I: “Tumatettaayyo intte azazettiyoogan, lo77o milatiya iitatetti bainnan, intte ishantta siiqanau intte huuphiyaa geeshshidi, issoi issuwaara minttidi wozanappe siiqettite” yaagidi xaafiis. (1 PHeexiroosa 1:22) Goday a tohuwaa meeccido kiitettida Yohaannisikka: “Ta naatoo, nuuni oosuwaaninne tumatettan siiqettanaappe attin, coo haasayan woikko bolla doonan siiqettanau bessenna” yaagidi xaafiis. (1 Yohaannisa 3:18) Nuuni nu ishatanne michota siiqiyoogaa oosuwan bessiyaageeta gidoos. 

[Footnotes]

Hassayay?

• Nuuni issoy issuwaara ayba ogiyan siiquwaa ‘aassana’ danddayiyoo?

• Haratuyyo wodiyaa immanau nuna aybi maaddana danddayii?

• Ba huuphiyaa kawushshiyoogee sarotettaa medhanau ay keena maaddii?

• Nu mala Kiristtaanetussi qoppanaadan nuna denttettana koshshiyay aybee?

[Sinttaa 25n deꞌiya misiliyaa]

Ne mala Kiristtaaneta ufayssan mokka

[Sinttaa 27n deꞌiya misiliyaa]

Haratuura gayttiyo injjiyaa goꞌetta