Wurssettan, he allaalliyaa xeelliyaagan denddiya ayba sireenne deꞌennaadan koyidaba milatiya ogiyan, Yesuusi: “Intte naa77antto yelettanau bessees” yaagiis. (Yohaannisa 3:7) Yesuusi yootidobaappe akeekiyoogaadan, issi uri “Xoossaa kawotettaa gelanau” naaꞌꞌantto yelettiyoogee koyettiyaabanne bessiyaaba.—Yohaannisa 3:5.

Naaꞌꞌantto Yelettiyoogaa—Issi Aawu Bau Kuuyiyoobee?

NAAꞌꞌANTTO yelettanaadan oottiyay oonee? Issi issi sabaaketi eti yootiyoobaa ezggiya asay naaꞌꞌantto yelettida Kiristtaane gidanaadan minttettiiddi, Yesuusi: “Intte naa77antto yelettanau bessees” giido qaalaa goꞌettoosona. (Yohaannisa 3:7) He sabaaketi he qaalaa azazodan goꞌettidi, “Naaꞌꞌntto yelettite!” yaagoosona. Hegaa gishshau, eti ammaniya asa ubbay Yesuusau azazettanaunne naaꞌꞌantto yelettanau koshshiya tangguwaa ekkana bessees giidi sabbakoosona. Asay naaꞌꞌantto yelettanau bari huuphe doorana danddayees giidi tamaarissoosona. SHin he qofay Yesuusi Niqoodimoosau yootidobaara moggiyaabee?

Yesuusa qaalata akeekan nabbabiyoogee issi asi naaꞌꞌantto yelettanau bari huuphe kuuyana danddayees giidi i tamaarissibeennaagaa bessees. Nuuni hegaadan giyoy aybissee? “Naaꞌꞌantto yelettiyoogaa” geetettidi birshshettida Giriiketto qaalay “bollappe yelettana koshshees” geetettidikka birshshettana danddayees.a Yaatiyo gishshau, he qaalaa maaraadan, naaꞌꞌantto yelettiyoogee “bollappe” yees; hegaa giyoogee “saluwaappe” woykko “Xoossaappe” yees giyoogaa. (Yohaannisa 19:11; Yaaqooba 1:17) Ee, naaꞌꞌantto yelettanaadan oottiyay Xoossaa.—1 Yohaannisa 3:9.

Nuuni “bollappe” giya qonccissuwaa hassayiyaaba gidikko, issi uri bari huuphe naaꞌꞌantto yelettana danddayennaagaa akeekanau metootokko. Asa gidada yelettido hanotaa ane qoppa. Neeni ne huuphe koyada yelettadii? Akkay! Neeni yelettidoy ne aaway nena yelido gishshataassa. Hegaadankka, nuuni naaꞌꞌantto yelettana danddayiyoy Xoossay, saluwan deꞌiya nu Aaway nuuni yelettanaadan oottiyaaba gidikko xallaana. (Yohaannisa 1:13) Kiitettida PHeexiroosi: “Kiristtoosa Aawaa, ba maarotettaa daruwaadankka nuna naa77anttuwaa yelidaagaa . . . galatoos” yaagidi qoncciyan yootidoy hegaassa.—1 PHeexiroosa 1:3.

Hegee Azazoo?

Gidikkokka, issoti issoti ‘Ooninne naaꞌꞌantto yelettanau bari huuphe kuuyennaba gidikko, Yesuusi: “Intte naa77antto yelettanau bessees” giidi azazidoy aybissee?’ yaagidi oychana danddayoosona. Hegee keehippe bessiya oysha. Yesuusa qaalay tumuppe azazo gidikko, nuuni oottana danddayennabaa azaziis giyoogaa. Hegee bessiyaaba milatenna. Yaatikko, intte “naaꞌꞌantto yelettanau” bessees giya qaalaa nuuni ayba ogiyan akeekana koshshii?

He qofay koyro xaafettido doonan azazodan gidennan azazoppe dumma gidida ogiyan qoncciis. Hara guussan, Yesuusi intte “naaꞌꞌantto yelettanau” bessees giido wode, azaziiddi gidennan issi tuma gidida yohuwaa yootiiddi deꞌees. I: “Intte bollappe yelettiyoogee bessiyaaba” yaagiis.—Yohaannisa 3:7, Modern Yang’s Literal Transileeshin.

Qommoora deꞌiya qofaa leemisuwan qonccissanau, kaallidi deꞌiya qofaa beꞌa. Amarida timirtte keettati deꞌiyo issi katamaa qoppa. He timirtte keettatuppe issoy he katamaappe haakkidi deꞌiya sohuwaappe yiya, he biittaa naati tamaariyoogaa. Issi gallassi he biittaa asa gidenna issi yelagay he timirtte keettaa dilekteriyau, “Taani intte timirtte keettan mazggabettanau koyays” yaagiis. Yaatin, dilekteree, “Mazggabettanau, neeni ha biittaa asa gidanau bessees” yaagiis. Dilekteree haasayidobay azazo gidennaagee qoncce. I he tamaariyaa, “Ha biittaa asa gida!” giidi azaziiddi deꞌenna. Dilekteree issi tuma gididabaa, he timirtte keettan tamaaranau koyettiyaabaa yootiiddi deꞌees. Hegaara issi mala ogiyan, Yesuusi “Intte naa77antto yelettanau bessees” yaagido wode, tuma gidida issibaa, “Xoossaa kawotettaa gelanau” issi urappe koyettiyaabaa yootiiddi deꞌees.