1. Yesuusi oonee?

Yesuusi saluwan deꞌiya wolqqaama ayyaana mereta. Xoossaa Yihoowi ubbabaappe koyro A medhdhiis. Hegaa gishshawu, I “merettidabaa ubbaappe aadhdhiya baira Na7a” geetettees. (Qolasiyaasa 1:15) Yihoowi barkka medhdhidoogee Yesuusa xalla gidiyo gishshawu, I Geeshsha Maxaafan Xoossawu “mexi issi Na7aa” geetettiis. (Yohaannisa 3:16) Yesuusi ba Aaway Yihoowi ubbabaa medhdhiyo wode maaddiyoogan aara issippe oottiis. (Leemiso 8:30 nabbaba.) Yesuusi awudekka Yihoowawu mata dabbo gididi deꞌees. I Xoossay kiittidobaanne azazidobaa yootiyoogan A gishshaa haasayiya ‘Qaalaa’ gididi ammanettidi oottees.—Yohaannisa 1:14.

Koyro asati Addaameenne Hewaana Xoossawu azazettibeenna gishshawu, nuuni nagaraa oottoos, waayettoosinne hayqqoos.a Gidikkonne, nuussi hidootay deꞌees. Yihoowi ba Naꞌaa Yesuus Kiristtoosa baggaara nagaraappenne hayquwaappe nuna ashshiyo ogiyaa giigissiis. Yesuusi hayqqidi nuussi wozo gididoogaa Geeshsha Maxaafay yootees. Wozoy issi uraa laꞌa kessanawu imettiya miishshaa. Yesuusi wottiyoobi baynna ba deꞌuwaa wozo oottidi immiis. (Maatiyoosa 20:28 nabbaba.) Yesuusi saꞌan merinawu deꞌiyo maataa ba sheniyan aggi bayiyoogan, Addaameppenne Hewaanippe halida ubbabaa nuuni demmanaadan ogiyaa dooyiis. Inne Yihoowi nuna ay keena siiqiyaakkokka Yesuusi qonccissiis. Ha timirttee Yesuusi hayqqidoogaa neeni wozanappe nashshanaadan oottana.

1. Yesuusi hayqqidoogee ha wodiyan nuna waati maaddii?

Nuuni nagaranchcha gidiyo gishshawu Yihoowa ufayssenna darobaa oottoos. Gidikkonne, nuuni nu nagaran wozanappe zilꞌꞌettidi Yihoowi Yesuus Kiristtoosa baggaara atto gaanaadan oychchikko, qassi he nagaraa zaarettidi oottennaadan wozanappe baaxetikko, Xoossaara dabbotaa minttana danddayoos. (1 Yohaannisa 2:1) Geeshsha Maxaafay, “Kiristtoosi nuna Xoossaakko efaanau, baayyo xillo gidiiddi, makkalanchchatu gishshau, issitoo ubbaa nagarau haiqqiis” yaagees.—1 PHeexiroosa 3:18.

2. Yesuusi hayqqidoogee sinttappe nuna waati maaddanee?

Yihoowi “[Yesuusa] ammaniya ubbai merinaa de7uwaa ekkanaappe attin, xayenna mala” Yesuusi wottiyoobi baynna ba deꞌuwaa immanaadan kiittiis. (Yohaannisa 3:16) Yesuusi wozo gidido gishshawu, Addaamee azazettibeennaagee gattido iitabaa ubbaa Yihoowi mata wode xayssana. Hegaa giyoogee, Yesuusa yarshshuwan nuuni ammanikko, saꞌay gannate gidiyo wode merinawu ufayttidi deꞌana danddayoos giyoogaa!—Isiyaasa 65:21-23.

LOYTTA AKEEKA

3. Yesuusi hayqqidoogee nuna nagaraappenne hayquwaappe laꞌa kessees

BIIDUWAA: Yesuusi Hayqqidoy Aybissee?—SHaaho 1 (2:01)

• Addaamee Xoossawu azazettennan ixxido gishshawu appe halidabay aybee?

Roome 5:12 nabbabite; yaatidi ha oyshaa tobbite:

• Addaamee nagaraa oottidoogee ne bolli ay kaalettidee?

Yohaannisa 3:16 nabbabite; yaatidi ha oyshaa tobbite:

• Yihoowi ba Naꞌaa ha saꞌaa kiittidoy aybissee?

1. Addaamee wottiyoobi baynna asa; shin I nagaraa oottido gishshawu asay ubbay nagaraa ootteesinne hayqqees

2. Yesuusi Xoossawu azazettiya wottiyoobi baynna asa; qassi hegaappe denddidaagan asay nagaraappe geeyidi merinawu deꞌana danddayees

4. Yesuusi hayqqidoogee asa ubbaa maaddana danddayees

BIIDUWAA: Yesuusi Hayqqidoy Aybissee?—SHaaho 2 (2:00)

• Issi uri hayqqiyoogee asa ubbaa waati maaddii?

Koyro Ximootiyoosa 2:5, 6 nabbabite; yaatidi ha oyshaa tobbite:

• Addaamee wottiyoobi baynna asa; shin I nagaraa oottido gishshawu asay ubbay nagaraa ootteesinne hayqqees. Addaameegaadan, Yesuusikka wottiyoobi baynna asa gidiyo gishshawu I oottana danddayidobay aybee?

5. Wozoy Yihoowi neeyyo immido imota

Yihoowa dabboti wozuwaa banttassi imettidabadan xeelloosona. Leemisuwawu, Galaatiyaa 2:20 nabbabite; yaatidi ha oyshaa tobbite:

• Kiitettida PHawuloosi wozuwaa bawu imettidabadan xeelliyoogaa waati bessidee?

Addaamee nagaraa oottido wode Yihoowi inne A zeretta ubbay hayqqanaadan pirddiis. SHin Yihoowi neeni merinawu deꞌana mala, ba Naꞌay hayqqanaadan kiittiis.

Neeni kaallidi deꞌiya xiqiseta nabbabaydda, ba Naꞌay waayettiyo wode Yihoowawu aybi siyettidaakko qoppa. Yohaannisa 19:1-7, 16-18 nabbabite; yaatidi ha oyshaa tobbite:

• Yihoowinne Yesuusi neeyyo oottidoban niyo aybi siyettii?

AY AKEEKADII?

Yesuusi hayqqido gishshawu, Yihoowi nu nagaraa atto gaana danddayees; qassi nuuni merinawu deꞌana danddayoos.

Zaaretuwaa

• Yesuusi hayqqidoy aybissee?

• Wottiyoobi baynna Yesuusa deꞌoy bixe wozo gididoy ayba ogiyaanee?

• Yesuusi hayqqidoogan waana goꞌettana danddayay?

PILGGA

Wottiyoobi baynna Yesuusa deꞌoy wozo geetettiyoy aybissakko akeeka.

“Yesuusa Yarshshoy Waatidi ‘Daro Asaa Wozii’?” (Nu websaytiyan deꞌiyaaba)

Nuuni nagaraappenne hayquwaappe attanawu ay oottana koshshiyaakko akeeka.

“Yesuusi Waati Ashshii?” (Nu websaytiyan deꞌiyaaba)

Yihoowi gita nagaraakka atto gaanee?

“Geeshsha Maxaafaabaa Oychchiyoobatu Zaaruwaa” (Wochchiyo Keelaa huuphe yohuwaa)

Kiristtoosa yarshshuwaabaa eridoogee issi bitanee ba eeshsha laammanaadan waati maaddidaakko akeeka.

“Taani Haꞌꞌi Makkalawu Aylle Gidikke” (Nu websaytiyan deꞌiyaaba)

1. Xoossaynne Kiristtoosi nuussi oottidobaa nashshiyoogaa bessiyo issi ogee aybee?

Geeshsha Maxaafay “[Yesuusa] ammaniya ubbai” merinawu deꞌana danddayiyoogaa yootees. (Yohaannisa 3:16) Ammaniyoogaa aybin bessiyoo? Nuuni kuuyiyoobaaninne oottiyooban nu ammanuwaa bessana koshshees. (Yaaqooba 2:17) Nuuni oottiyoobaynne haasayiyoobay nu ammanuwaa bessiyo wode, Yesuusaaranne A Aawaa Yihoowaara nuuyyo dabbotay minnees.—Yohaannisa 14:21 nabbaba.