Yihoowa Markkati Yesuusa Ammaniyoonaa?

YESUUSA AMMANIYOOGEE KEEHI KOSHSHIYAABA

Alama: Taamiru, ay malee, saro? Hayya, hachi so heeran deꞌaasa.

Taamira: Ee, saro.

Alama: Mati kiyida Wochiyo Keelaanne Beegottite! maxeeteta neeyyo ekkada yaas. Ha maxeetetun deꞌiya huuphe yohota neeni dosennan waaya aggana.

Taamira: Galatays. Taani nena oychanawu koyidobi deꞌiyo gishshawu hachi neeni yiidoogan ufayttaas.

Alama: I aybee, ane oycha.

Taamira: Issi gallassi tanaara oottiyaagaara issibaa haasayida. Neeni tawu immido xuufetubaanne eti keehi loꞌꞌo xuufe gidiyoogaa ayyo yootaas. SHin i ‘Yihoowa Markkati Yesuusa ammanenna gishshawu he xuufiyaa nabbaboppa’ yaagiis. SHin hegee tumee? Neeni yiyo wode taani nena hegaa oychanaagaa ayyo yootaas.

Alama: Neeni tana oychido gishshawu keehi ufayttaas. Neeni hegaa Yihoowa Markkaappe siyanawu koyidoogee loꞌꞌoba. Issi uri ammaniyoobaa eranawu woni a oychiyoogaappe loꞌꞌobi aybi deꞌii?

Taamira: Taanikka hegaadan qoppaas.

Alama: Nuuni Yihoowa Markkati Yesuusa ammanoos. Ubba, Yesuusa ammaniyoogee atotettawu keehi koshshiyoogaa eroos.

Taamira: Taanikka intte a ammaniyoogaa erays; shin tanaara oottiyaagee intte Yesuusa ammanennaagaa yootin eranawu keehi koyaas. Neeninne taani he allaalliyaa tobbi erokko gidennee?

Alama: Yesuusa ammaniyoogee keehi koshshiyoogaa bessiya amarida xiqiseta Geeshsha Maxaafaappe nena bessoo? Ha xiqiseti Yihoowa Markkati haggaazuwan darotoo goꞌettiyoogeeta.

Taamira: He xiqiseti awugeetee?

Alama: Yohaannisa 14:6n deꞌiya, Yesuusi ba huuphen yootidoban doommiyaakko loꞌꞌo. Ha qofay Yesuusi ba kiittidoogeetuppe issuwaara haasayiyo wode yootidoba. Hagaadan gees: “Yesuusi zaaridi, ‘Ogee, tumainne de7oi tana; ta baggaarappe attin, ooninne ta Aawaakko baanau danddayenna’ [yaagiis].” He xiqisee Xoossaakko efiya mexi issi ogee ayba gidiyoogaa yootii?

Taamira: Yesuusa baggaara gidiyoogaa yootees.

Alama: Likke. Qassi Yihoowa Markkati hegaa mintti ammanoosona. Ane nena issibaa oychays: Xoossay koyiyoobay qoncce; issi uri woossiyo wode o sunttan woossana koshshii?

Taamira: Yesuusa sunttan woossana koshshees.

Alama: Tumaa gaadasa. Qassi taani woossiyo wode ubbatoo Yesuusa sunttan woossiyoy hegaassa. Yihoowa Markkati ubbaykka hegaadan woossoosona.

Taamira: Hegaa eriyoogee loꞌꞌoba.

Alama: Nuuni beꞌana hara xiqisee Yohaannisa 3:16. Hegee keehi koshshiya xiqise gidiyo gishshawu Wonggeliyawu waanna qofaa geetettees. Hegaa giyoogee Yesuusi saꞌan deꞌido deꞌuwaabaynne a haggaazuwaabay xaafettidabaa issi xiqisiyan kuuyiyaakko ha xiqisiyaa gidees giyoogaa. Ane he xiqisiyaa nabbabuutee?

Taamira: Ero. Hagaadan gees: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.”

Alama: Galatays. Ha xiqisiyaa qofaa siya eray?

Taamira: Ee, hegaa darotoo nu woosa keettan tamaarissishin siyaas.

Alama: Hegee keehi erettida xiqise. Ane Yesuusi woygidaakko xiqisiyaa akeekan xeella. I asay merinaa deꞌuwaa demmiyoy Xoossay eta siiqiyo gishshataassa gidiyoogaa yootiis; shin ay oottikko demmiyoo?

Taamira: Ammanikko demmoos.

Alama: Ee. Ubba qassi mexi issi naꞌaa, Yesuus Kiristtoosa ammaniyoogan demmoos. Qassi Yesuusa ammaniyoogee merinaa deꞌuwaa demissiyoogaa yootiya ha qofaa taani neessi ehiido ha maxeetiyan sinttaa 2n hagaa beꞌa. Wochiyo Keelaa halchuwaabaa harabaakka yootidi, “nuuni merinaa deꞌuwaa demmana mala hayqqidaagaa, qassi ha wodiyan Xoossaa Kawotettaa Kawo gididi haariya Yesuus Kiristtoosa” ammananaadan ha maxeetee minttettiyoogaa yootees.

Taamira: Ee, tuma! Intte maxeetee ba huuphen Yihoowa Markkati Yesuusa ammaniyoogaa bessees.

Alama: Likke gaadasa.

Taamira: Yaatin, asay inttena Yesuusa ammanokkona giyoy aybissee?

Alama: Asay hegaadan giyo daro gaasoy deꞌana danddayees. Issi issi asay hara asaappe siyiyoogaa xallan hegaadan gees. Woy qassi eta haymaanootiyaa asttamaaree he bala qofaa tamaarissennan aggenna.

Taamira: Taani qassi issi issi asay inttena Yesuusa ammanokkona giyoy intte Yesuusa Markkata gidennan, Yihoowa Markkata geetettiyo gishshataassa gaada qoppays.

Alama: Hegeekka issi gaaso gidana danddayees.

Taamira: Intte Yihoowabaa darobaa yootiyoy aybissee?

“TAANI NE SUNTTAA ETA ERISSAAS”

Alama: Issibay, nuuni Xoossaa Naꞌaa, Yesuusaagaadan Xoossaa sunttaa Yihoowa giidi xeesiyoogee keehi koshshiyoogaa ammanoos. Yesuusi ba Aawaakko woossiyo wode woygidaakko ane beꞌa. Hegee Yohaannisa 17:26n deꞌees. Hayyanaa he xiqisiyaa nabbabuutee?

Taamira: Ero, hagaadan gees: “Neeni tana siiqido siiqoi eta giddon de7ana mala, qassi taanikka eta giddon de7ana mala, taani ne sunttaa eta erissaas; sinttaukka erissana.”

Alama: Galatays. Yesuusi Xoossaa sunttaa erissaas yaagidoogaa akeeka. I hegaadan oottidoy aybisseeshsha?

Taamira: Erikke, aybisseeshsha?

Alama: Hegaa loytti qonccissiya hara xiqisiyaa beꞌana danddayoos. Taani qoppido xiqisee Oosuwaa 2:21. He xiqisee, “Godaa [“Yihoowa,” NW] sunttaa xeesiya ooninne attana” yaagees. Yihoowa sunttaa xeesiyoogee attanawu koshshiyaaba gidikko, Yesuusikka hegee koshshiyaaba gidiyoogaa eriyoogee qoncce.

Taamira: Ee, tuma.

Alama: Yaatiyo gishshawu, Yesuusa kaalliyaageeti Xoossaa sunttaa eriyoogaanne xeesiyoogaa Yesuusi xoqqu oottidi xeellido gaasotuppe issoy hegee eta atotettawu koshshiyaaba gidiyo gishshataassa. Nuuni Yihoowabaa darotoo yootiyo waanna gaasotuppekka issoy hegaa. Nuuni Xoossaa sunttaa erissiyoogeenne haratikka he sunttaa xeesanaadan maaddiyoogee keehi koshshiyaaba giidi qoppoos.

Taamira: SHin asay Xoossaa sunttaa erennabanne a sunttaa xeesennaba gidikkonne, Xoossaabaa denttiyo wode obaa haasayiyaakko erees.

Alama: Hegee tuma gidana danddayees. Gidoppe attin, Xoossay ba sunttaa nuussi yootiyoogan akko shiiqanawu nuuni metootennaadan oottiis.

Taamira: Neeni giyoobay tawu gelibeenna.

Alama: Ane issibaa qoppa: Nuuni Muuse sunttaa erana koshshenna. I Zoꞌo Abaa shaakkida bitaniyaa woy Tammu Azazota ekkida bitaniyaa gidiyoogaa xallaa erana danddayoos. Nohebaykka hegaadaana; a suntta erana koshshiyoy aybissee? I markkabiyaa keexxida, qassi ba soo asaanne mehiyaa doꞌaa ashshida bitaniyaa geetettana danddayees. Haray atto, Yesuus Kiristtoosikka saluwaappe yiidi nu nagaraa gishshawu hayqqidaagaa gidiyoogaa xallaa erana danddayoos. Likke gidennee?

Taamira: Waayi aggana.

Alama: SHin Xoossay nuuni he asatu sunttaa eranaadan oottiis. Eta sunttaa eriyoogee he taarikee nuussi beꞌidobadan keehi qonccanaadan oottiis. Nuuni Muuseera, Noheera woy Yesuusaara gayttibeennaba gidikkonne, eta sunttaa eriyoogee nuussi eti beꞌido uradan keehi qonccanaadan oottiis.

Taamira: Taani kase hegaadan qoppa erikke; shin hegee ammanttiya qofa!

Alama: Yihoowa Markkati Xoossaa sunttaa darotoo xeesiyo hara gaasoy hegaa. Asay Xoossaa Yihoowa akko shiiqana danddayiyo tumuppe deꞌiya Ura giidi ammananaadan maaddanawu koyoos. Hegaadankka, Yesuusi nu atotettawu oottidobaa keehi xoqqu oottidi xeelloos. Hegaa loytti qonccissiya issi xiqisiyaa nabbabana danddayoos.

Taamira: Loꞌꞌo.

Alama: Kasetidi Yohaannisa 14:6 nabbabida. Yesuusi “ogee, tumainne de7oi [bana]” gidiyoogaa yootidoogaa hassaya. Hegaappe guuttaa kasetiya xiqisiyan, Yohaannisa 14:1n i woygidaakko akeeka. He xiqisiyaa wurssettan Yesuusi woygidaakko nabbabuutee?

Taamira: Ero. Hagaadan gees: “Xoossaa ammanite; tanakka ammanite.”

Alama: Galatays. Yaatin tumu ammanoy naaꞌꞌubaappe issuwaa dooridi ammaniyoobee? Hegee woy Yesuusa woy Yihoowa ammaniyoogaa giyoogee?

Taamira: Akkay. Yesuusi nuuni naaꞌꞌaakka ammanana koshshiyoogaa yootiis.

Alama: Tumaa gaadasa. Qassi nuuni Xoossaanne Yesuusa ammanoos giyoogaa xallay gidennaagaa neeni maayiyoogee erettidaba. Nu deꞌoy nuuni eta ammaniyoogaa bessiyaaba gidana koshshiyoogee qoncce.

Taamira: Hegee tuma.

Alama: SHin issi uri Xoossaakka Yesuusakka ammaniyoogaa waatidi bessii? Hegaa hara galla tobbanawu danddayoos.a

Taamira: Daro loꞌꞌo.