Yesuusa—I Awuppe Yiidee?

“PHilaaxoosi ba ooso keettaa simmi gelidi Yesuusa, ‘Neeni auppe yaadii?’ yaagidi oichchiis; shin Yesuusi ayyo ainne zaaribeenna.”—YOH. 19:9.

ROOMA asa gidida, biittaa haariya PHenxxeniyaa PHilaaxoosi, ha oyshaa oychidoy Yesuusi hayquwaa pirddau shilootaa sintti shiiqido wode. Yesuusi Israaꞌeela biittan awa heera asakko PHilaaxoosi erees. (Luq. 23:6, 7) Yesuusi hara coo asaappe keehi dumma gidiyoogaakka i erees. Yesuusi hegaappe kase deꞌidaakkonne PHilaaxoosi eranau koyidee? Eeqau goynniya, biittaa haariya he bitanee tumaa siyidi ekkanau koyidee? Hanotay ayba gidikkokka, Yesuusi ayyo zaaranau koyibeenna; qassi PHilaaxoosi tumaanne suure pirddaa kaalliyoogaappe ba oosuwaa oottanau koyiyoogee sohuwaara qoncciis.—Maa. 27:11-26.

Yesuusi auppe yiidaakko wozanappe eranau koyiyaageeti metootennan erana danddayiyoogee ufayssiyaaba. Yesuus Kiristtoosi auppe yiidaakko Geeshsha Maxaafay qoncciyan yootees. Kaallidi deꞌiyaagaa akeekite.

▪ I yelettido sohuwaa Ha wodiyaa layttaa qooday bessiyoogaadan, Yesuusi 2 K.K. ofinttan Yihuda biittan Beetaliheemen bonchissenna sohuwan yelettiis. Asa ubbay mazggabettana mala Augisxxoos Qeesaari awaajjido gishshau, he wode “shahaara” gidida Yesuusa aayyiyaa Mayraamanne i azinay Yooseefi, Yooseefa mayzza aawatu biitti Beetaliheeme biidosona. Asay keehi daro gidiyoogaappe denddidaagan, Mayraamanne Yooseefi shemppiyo soho demmibeenna gishshau, mehee aqiyo sohuwan shemppidosona; Yesuusi yan yelettin mehee kattaa miyo qoriyan zinꞌꞌissidosona.—Luq. 2:1-7.

Xeetan qoodettiya layttappe kase, Yesuusi yelettana sohoy Geeshsha Maxaafan hagaadan odettiis: “Nenoo Efiraataa, Beetaliheeme katamau, neeni Yihudaa katamatu giddon guutta; shin . . . Israa7eela asaa haariyaagee taayyo neeppe kiyana.”a (Mik. 5:2) Yihuda biittan deꞌiya katamatuppe Beetaliheemee keehi guutta gidennan aggenna. SHin ha guutta katamiyaa keehi bonchettana. Yaana geetettida Masee woykko Kiristtoosi Beetaliheemeppe yaana.—Maa. 2:3-6; Yoh. 7:40-42.

▪ I diccido sohuwaa Yesuusantta soo asay Gibxxen guutta wodiyaa takki simmidi, Yerusalaameppe 96 kilo meetire haakkiya Galiila awuraajjan deꞌiya Naazireete katamaa biidosona. He wode Yesuusau layttay heezzaa kumibeenna. Goshshanchati, dorssaa heemmiyaageetinne moliyaa oyqqiyaageeti bantta oosuwaa oottiyo ha loꞌꞌiya heeran, so asaa qooday cora gidido, dure gidenna keettan Yesuusi dicciis.—Maa. 13:55, 56.

Xeetan qoodettiya layttappe kase, Masee “Naazireete asa” geetettanaagaa Geeshsha Maxaafay yootiis. Wonggeliyaa xaafidaageetuppe issuwaa gidida Maatiyoosi, “hananabaa yootiyaageeti, ‘Asai a, “Naazireeta asa” giidi Xeesana’ giidoogee polettana mala” Yesuusantta soo asay Naazireete biidi deꞌidoogaa yootiis. (Maa. 2:19-23) Naazireete asa giyoogee ‘aacaa’ geetettida Ibraysxxe qaalaara gaytotettay deꞌiyo qaala gidennan aggenna. Masee Isseya ‘aacaa,’ giishin Kawuwaa Daawita aawaa Isseya zare gidanaagaa yootiya, Isiyaasa hiraagaa Maatiyoosi yootiiddi deꞌiyoogee qoncce. (Isi. 11:1) Yesuusi Daawita baggaara Isseya zare.—Maa. 1:6, 16; Luq. 3:23, 31, 32.

▪ I auppe yiidee? Yesuusi Beetaliheemen mehee aqiyo sohuwan yelettanaappe daro wodiyaa kasetidi deꞌidoogaa Geeshsha Maxaafay yootees. Qommoora qonccida Mikiyaasa xiqisee kaallidi, “Au denddoi beniisappe doommidi, merinaappe” gidiyoogaa yootees. (Mik. 5:2) Xoossaayyo bayra Naꞌa gidiyoogaadan, Yesuusi asa gididi saꞌaa yaanaappe kase saluwan ayyaana mereta gididi deꞌiis. Yesuusi bari huuphe, ‘Taani saluwaappe yaas’ yaagiis. (Yoh. 6:38; 8:23) Hegee waanidi hanana danddayii?

Yesuusi polo asa gididi yelettanaadan Xoossaa Yihooway geeshsha ayyaanaa baggaara maalaalissiya ogiyan, saluwan deꞌiya ba Naꞌaa deꞌuwaa Mayraamo geetettiya Ayhuda geelaꞌee uluwau aattiis.b Hegaa mala maalaalissiyaabaa oottiyoogee Ubbaa Danddayiya Xoossaa metennaba. Hegaa Mayraamissi qonccissida kiitanchay giidoogaadan, ‘Xoossaassi danddayettennabi baawa.’—Luq. 1:30-35, 37.

Geeshsha Maxaafay Yesuusi auppe yiidaakko yootiyoogaappekka aadhiyaabaa qonccissees. Oyddu Wonggeleti, giishin Maatiyoosa, Marqqoosa, Luqaasanne Yohaannisa Wonggeleti, i waanidi deꞌidaakkokka darobaa yootoosona.

[Tohossa qofata]