Wachtawur ONLAYN LAYBREERIYAA

ONLAYN LAYBREERIYAA

ijwbq huuphe yohuwaa 66
Siꞌoolee Tumuppe Deꞌiyabee? Geeshsha Maxaafay Siꞌooliyabaa Woygii?

Geeshsha Maxaafaabaa Oychchiyoobatu Zaaruwaa

ijwbq huuphe yohuwaa 66

Siꞌoolee Tumuppe Deꞌiyabee? Geeshsha Maxaafay Siꞌooliyabaa Woygii?

Geeshsha Maxaafay yootiyobaa

Daro Geeshsha Maxaafaa birshshettati, issi issi xiqisetun ‘siꞌooliya’ giya qaalaa goꞌettidosona. (Mazamure 16:10; Oosuwaa 2:27) Ha huuphe yohuwan deꞌiya haymaanoote misilee qonccissiyogaadan, daroti siꞌoolee iitati taman merinawu qaxxayettiyo soho giidi ammanoosona. Shin Geeshsha Maxaafay hegaadan tamaarissii?

Ha huuphe yohuwan

Siꞌoolee asay merinawu waayettiyo sohoo?

Chii. Issi issi beni Geeshsha Maxaafatun “siꞌooliya” geetetti birshshettida koyro qaalay, (Ibraawettuwan, “Shiꞌol”; Griikettuwan, “Hedes”) ubba asay hayqqidi moogettiyo “Duufuwa” qonccissiyaba. “Duufuwan” deꞌiyageeti aynne erennaagaa Geeshsha Maxaafay yootees.

Hayqqidaageeti aybanne erokkona, yaatiyo gishshawu waayettana danddayokkona. “Duufuwan [siꞌooliyan] oosoi, woikko halchchoi, woikko eri, woikko aadhdhida eratetti baawa.” (Eranchchaa 9:10) Siꞌoolee waayettidi waassiya asay kumido soho gidenna. Geeshsha Maxaafay hagaadan gees: “Iitati yeellatona; eti duufuwan [siꞌooliyan] gelidi, sirphphi goona.”—Mazamure 31:17; 115:17.
Xoossay nagaraa waagay hayquwa gidiyogaa yootiisippe attin, siꞌooliya taman xuugettiyogaa gibeenna. Xoossay koyro bitanee Addaamee A higgiyawu azazettennan ixxikko qixaatee hayquwa gidiyogaa yootiis. (Doomettaabaa 2:17) Siꞌooliya taman merinawu xuugettiyogaabaa I aybanne yootibeenna. Guyyeppe, Addaame nagaraa ootti simmin, Xoossay qixaatee aybakko assi hagaadan giis: “Neeni baana; neeni baanau simmana.” (Doomettaabaa 3:19) Hegaappe simmin I deꞌon deꞌenna. Xoossay tumuppe Addaama siꞌooliya tamawu yeddiyakko, hegaabaa awu yootanaagee qoncce. Xoossay A higgiyawu azazettennaageeta qaxxayiyo qixaatiya laammibeenna. Addaamee nagaraa oottoosappe daro wodee aadhdhi simmin, Xoossay Geeshsha Maxaafaa xaafidaageetuppe issoy, “Nagarai qanxxiyo miishshai haiquwaa” gaanaadan ayyaanan denttettiis. (Roome 6:23) Hegaappe hara qixaatee koshshenna, ayssi giikko “issi urai haiqqiyo wode nagaraa wolqqai a haarenna.”—Roome 6:7.
Asay merinawu qaxxayettees giyo qofaa keehippe Xoossay ixxees. (Ermmaasa 32:35) Hegaa mala qofay “Xoossai siiqo” giya Geeshsha Maxaafaa timirttiyara maayettenna. (1 Yohaannisa 4:8) Xoossay nuuni merinaa qixaatiya yayyidi gidennan, A siiqiyo gishshawu awu goynnanaadan koyees.—Maatiyoosa 22:36-38.
Loꞌꞌo asati siꞌooliya biidosona. “Siꞌooliya” giya qaalaa goꞌettiya Geeshsha Maxaafaa birshshettati, Yaaqoobanne Iyyooba mala ammanettida asati siꞌooliya baanawu deꞌiyogaa yootidoogaa bessoosona. (Doomettaabaa 37:35; Iyyooba 14:13) Ubba, Yesuus Kiristtoosi hayqqidi denddanaashin siꞌooliyan takkanaagee odettiis. (Oosuwaa 2:31, 32) Yaatiyo gishshawu, Geeshsha Maxaafan “siꞌooliya” geetettiday Duufuwa gidiyogee qoncce.

Dure bitaniyanne Alꞌꞌaazarabaa Yesuusi yootido leemisuwa birshshettay aybee?

Ha leemisuwa yootiday Yesuusa, qassi hegee Luqaasa 16:19-31n xaafettiis. Leemisoti nuuni kandduwabaanne Xoossay issibaa xeelliyo ogiya akeekanaadan maaddoosona. Yaatiyo gishshawu, dure bitaniyabaanne Alꞌꞌaazarabaa yootiya leemisoy tumuppe hanidaba gidenna. (Maatiyoosa 13:34) Ha leemisuwabaa gujjada eranawu, “Dure Bitaneenne Alꞌꞌaazari Oonee?” giya huuphe yohuwa nabbaba.

Siꞌoolee issi uri Xoossaappe shaahettidoogaa bessiyabee?

Chii. Hayqqidaageeti Xoossaappe shaahettidoogaa eroosona giyo timirttee, hayqqidaageeti aybanne erennaagaa yootiya Geeshsha Maxaafaa timirttiyara maayettenna.—Mazamure 146:3, 4; Eranchchaa 9:5.

Siꞌooliyappe kiyida uri deꞌii?

Ee. Hayqqidi duufuwappe (amarida Geeshsha Maxaafatun deꞌiyagaadan, “siꞌooliyappe”) simmin denddida uddufun asatu taarikiya Geeshsha Maxaafay yootees.a He asati siꞌooliyan deꞌiyo wode hanidabaa eriyakko, yan bantta beꞌidobaa yootana shin. Gidoppe attin, etappe ooninne qaxxayettidoogaa woy banttana gakkida hara aybanne yootibookkona. Aybissi? Geeshsha Maxaafay zaari zaaridi yootiyogaadan, eti aybanne erokkona; hegee eti ‘xiskkuwan’ kayridoogaa mala.—Yohaannisa 11:11-14; 1 Qoronttoosa 15:3-6.

a 1 Kawotu Maxaafaa 17:17-24; 2 Kawotu Maxaafaa 4:32-37; 13:20, 21; Maatiyoosa 28:5, 6; Luqaasa 7:11-17; 8:40-56; Yohaannisa 11:38-44; Oosuwaa 9:36-42; 20:7-12.

Siꞌooliyabaa, woy Duufuwabaa yootiya Geeshsha Maxaafaa xiqiseta

Iyyooba 14:13: “Abeet Xoossau, neeni tana duufo [siꞌoole] giddon genttada, . . . taayyo keeruwaa immada, he gallassi tana hassayidabaa gidarkkiishsha!”

Hegee woygiyogee? Ammanettida bitanee Iyyoobi, siꞌooliyan (duufuwan) ba waayiyappe shemppanaagaanne Xoossay he sohuwappe A denttidi deꞌuwa immanaagaa eriis.

Mazamure 145:20: “GODAI bana siiqiyaageeta ubbaa naagees; shin iitata ubbaa xaissana.”

Hegee woygiyogee? Xoossay iitata merinawu xayssana. I eti siꞌooliyan ubbatoo qaxxayettiiddi deꞌanaadan oottenna.

Eranchchaa 9:10: “Neeni baanasan duufuwan [siꞌooliyan] oosoi, woikko halchchoi, woikko eri, woikko aadhdhida eratetti baawa.”

Hegee woygiyogee? Duufuwan woy siꞌooliyan deꞌiyageeti aynne erokkona, qassi waayettana danddayokkona. Hegaa bollikka, Geeshsha Maxaafaa xaafidaagee aadhdhida eratettan yootido qofay loꞌꞌo asatakka gujjiyaba gidiyogee qoncce.

Oosuwaa 2:31: “Kiristtoosa dendduwaa sinttau xeellidi, ‘A shemppoi Si7ooliyan attibeenna; . . .’ giidi yootiis.”

Hegee woygiyogee? Yesuus Kiristtoosi hayqqido wode siꞌooliyan (duufuwan) geliis.

Roome 6:23: “Nagarai qanxxiyo miishshai haiquwaa.”

Hegee woygiyogee? Nagarawu bessiya qixaatee hayquwappe attin, siꞌooliyan waayettiyogaa gidenna.

Ajjuutaa 20:13: “Haiqoinne Si7oolee bantta giddon de7iya haiqqidaageeta immidosona.”

Hegee woygiyogee? Siꞌooliyan deꞌiyay hayqqidaageeta. Eti hayquwappe denddidi zaarettidi deꞌuwan deꞌana.

Ajjuutaa 20:14: “Haiqoinne Si7oolee tama abban yegettidosona.”

Hegee woygiyogee? Siꞌoolee (duufoy) A giddon deꞌiyageeti hayquwappe denddi simmin, merinawu xayana; hegee taman xuugettiyogaa mala. Hegaappe simmin, Addaame nagaraa gaasuwan yiida hayqoy deꞌenna.—Roome 5:12.

Siꞌooliya tamaa timirttee doommido wodiya

Doomettay eeqaa goynuwa: Beni Gibxxeti siꞌooliya taman ammanoosona. Taarikiya eranchchati 16tta xeetu layttaa K.K. heeran xaafettiis giyo, mooguwabaa yootiya Amtuwat (Amduwat) geetettiya maxaafay, “tamaa ollan duge olettiyageetubaa, qassi . . . eti tamaa lacuwppe baqatana danddayennaagaa” yootees.—Ze Ijjipshiyan Heven end Hell.

Beni Kiristtaaneti hegaa tamaarissibookkona: “[Beni Kiristtaaneti] siꞌooliya tamaabaa tamaarissidobaa Ooratta Maachchan nuuni demmana danddayennaagee maalaaliyaba.”—E Dikshinerii of Kiristtiyan Tiꞌoloojjii.

Giriiketu timirttee haymaanoote timirttiyara walahettiis: “Giriiketu timirttiya tamaarida Kiristtaaneti, 2ntto xeetu layttaa [M.L.] baggaappe doommidi, bantta ammanuwa Giriiketu timirttiyara walakkiyogee koshshiyabadan qoppiyogaa doommidosona . . . Aybippenne aaruwan eti dosidoy Pilaatto timirttiya.” (Insaykilooppiidiya Britaanika) He timirttiyan, asay hayqqi simmidi taman xuugettees giyo qofay deꞌees. “Siꞌooliya xeelliyagan Giriike eranchchatu ubbaagaappe aaruwan asay Pilaatto qofaa kaalliis.”—Histoyir des enfers (Ze Historii of Hell).

Harata qaxxayiyogee bessiyaba milatissanawu siꞌooliya tamaa goꞌettidosona: Isppanish Inkiyuzishin geetettiya wodiyan, woosa keettaa timirttiyappe dummatiyabaa ammanoosona geetettidaageeta, “siꞌooliya tamay ay malakko eranaadan” mittan kaqqidi xuuggoosona; hegaadan oottiyoy he asati hayqqanaappe kase bantta nagaraappe simmana gi qoppiyo gishshataassa. (Ze Isppanish Inkiyuzishin, Jin Playda xaafidoogaa) Hegaadankka, Inggilize Kawiya Meera, 300 Protesttantteti mittan kaqettidi xuugettanaadan oottaasu; A hegaadan oottidoy hagaadan gaada ammaniyo gishshaassa gidiyogee odettiis: “sinttappe he asatu shemppoy merinawu siꞌooliya taman xuugettanaagee attenna, hegaa gishshawu ha saꞌan eta taman xuuggiyogan Xoossay iitata qaxxayiyo leemisuwa kaalliyo hara loꞌꞌo ogee baa.”—Yuniversal Histtiriy, Aleksandir Taytleri xaafidoogaa.

Ha wodiyan laamettidabaa: Ha wodiyan issi issi haymaanooteti siꞌooliyabaa minttidi tamaarissiyogaa aggi aggi biidosona; shin hegee eti siꞌooliya tamay worddo timirtte giidi ammaniyo gishshataassa gidennan, bantta haymaanootiya kaalliyageeta ufayssanawu koyiyo gishshataassa. (2 Ximootiyoosa 4:3) “Asay hanqqettennanne yashshenna Xoossaa koyees . . . Ha wodiyan nagaraabaanne mooruwabaa haasayiyogee asay koyennaba.”—Proofeeseriya Jaksen W. Karol.