Nabbabiyaageetu Oyshaa

Beni wode Ayhudatu beeta maqidasiyaa polisee oonee? Eta oosoy aybee?

Qeese gidenna amarida Leewatussi polise gididi oottiyoogaa mala hara oosoti imettoosona. Eti beeta maqidasiyaa wotaaddarata azaziyaagawu azazettoosona. He wotaaddaratu oosuwaa xeelliyaagan Ayhudatu taarikiyaa xaafiya Fayloy hagaadan giis: “Etappe [Leewatuppe] amaridaageeti geliyoosan eqqidi penggiyaa naagiyaageeta, amaridaageeti yan [beeta maqidasiyan] geeshsha sohuwaappe sintta baggan eqqidi bessenna asi eriiddi woy erennan gelennaadan teqqoosona. Amaridaageeti beeta maqidasiyaa heeraa naaganawu yuuyoosona. Eti kayan kayan gallassinne qammi naagoosona.”

Sanhedirina pirdda keettay he wotaaddarati banttana maaddanaadan oychchana danddayees. Bisuwaa gixxana mala Rooma kawotettay paqqadidoy ha citaa xalla.

Wotaaddarati Yesuusa oyqqido wode, beeta maqidasiyan I tamaarissiyo wode eti A ayssi oyqqibeennaakko Yesuusi eta oychchidoogaa, Yoꞌakim Ermiyas giyo Geeshsha Maxaafaa eranchchay qonccissiis. He wotaaddarati beeta maqidasiyaa polise gidennaakko, Yesuusi eta ha oyshaa oychchenna shin. (Maa. 26:55) Guutta wodiyaappe kase Yesuusa oyttidi qashissanawu koyida wotaaddaratikka beeta maqidasiyaa polise giidi he eranchchay qoppees. (Yoh. 7:32, 45, 46) Guyyeppe, beeta maqidasiyaa wotaaddarata azaziyaageenne Ayhuda beeta maqidasiyaa polisee kiitettidaageeta ehaanaadan Sanhedirina pirdda keettay kiittiis. PHawuloosa oyqqidi beeta maqidasiyaappe kare goochchi kessidaagee beeta maqidasiyaa polise gidennan waayi aggana.—Oos. 4:1-3; 5:17-27; 21:27-30.