11, 12. Heeroodisi PHeexiroosanne hara Kiristtaaneta wayssidoy aybissee, qassi ayba ogiyaanee?

¹¹ He wode he sohuwan deꞌiya PHeexiroosi, mintti woossiyoogee keehippe koshshiyoogaa guyyeppe ba huuphen akeekiis. (Oosuwaa 12:1-6 nabbaba.) Oosuwaa shemppo 12 doomettaa heeran deꞌiya paydotun, Heeroodisi Ayhudatun sabettanau koyido gishshau, Kiristtaaneta wayssidoogaa akeekoos. Yaaqoobi kiitettidaageetuppe issuwaa gidiyoogaanne Yesuusau keehi mata lagge gidiyoogaa Heeroodisi eriyaaba milatees. Yaatiyo gishshau, Heeroodisi “Yaaqooba bisuwan worissiis.” (Paydo 2) Hegaa gishshau, Yesuusi kiittido siiqo ishay hayqqidoogan gubaaꞌee keehippe azzaniis. Hegee ishatussi wolqqaama paace!

13, 14. (a) PHeexiroosi qashettido wode gubaaꞌee ay oottidee? (b) Woosaa xeelliyaagan PHeexiroosau Kiristtaane ishtanne michota gididaageetu leemisuwaappe ay tamaarana danddayiyoo?

¹³ Gubaaꞌee waatana bessiyaakko eriis. Paydo 5y hagaadan gees: “Hegaa gishshau, PHeexiroosi qasho keettan naagettees; shin woosa keettaa asai ayyo minttidi Xoossaa woossees.” Ee, eti bantta siiqo ishau minttidi wozanappe woossidosona. Yaaqooba hayqoy eti hidootaa qanxxanaadankka, bantta woosau waagi baynnabadan qoppanaadankka oottibeenna. Hegaappe dumma ogiyan, Yihoowayyo ammanettidi goynniyaageeti woossiyo woosay keehippe goꞌꞌiyoogaa eridosona. Hegaa mala woosay shiiqidoy a sheniyaadaana gidikko, i zaarees.—Ibr. 13:18, 19; Yaaq. 5:16.

¹⁴ PHeexiroosayyo Kiristtaane ishanne micho gididaageeti oottidobaappe ay tamaariyoo? Naagi uttiyoogee nu xalaalau gidennan, nu ishatussinne michotussikka woossiyoogaa gujjees. (Efi. 6:18) Metoy gakkiiddi deꞌiyo Kiristtaane ishatanne michota ereetii? Issoti issoti yedetaynne meretay gattiyo daafabay gakkishin woykko kawotettay nu oosuwaa teqqishinkka gencciiddi deꞌana danddayoosona. Etayyo wozanappe woossana koshshees. Darin qoncci beettenna metoy gakkiyo harata geella erana danddayeeta. Eti so giddo metuwaa, hidootaa qanxxiyo hanotaa woykko payyatettaa pacaa gencci aattanau baaxetiiddi deꞌana danddayoosona. ‘Woosaa siyiya’ Yihoowakko intte woossiyo wode eta sunttaa xeesidi woossana danddayiyo asata ayssi qoppekketii?—Maz. 65:2.