Deꞌuwaanne Sarotettaa Demmanau Ayyaanay Koyiyoogaadan Deꞌite
‘Geeshsha ayyaanay koyiyoogaadan deꞌiteppe attin, intte asatettay koyiyoogaadan deꞌoppite.’—ROO. 8:4.
1, 2. (a) Kaamiyaa laaggiiddi harabaa oottiya ura ayba daafi gakkii? (b) Ayyaanaaban qofay laalettiyoogee kaalettana danddayiyo daafay aybee?
AMARKKAA kawotettan transpportte kifiliyaa alaafetuppe issoy, “Kaamiyaa laaggiiddi qofaa laaliyaabaa oottiyoogee aakki aakki biyaabanne daro qoho gattiyaaba; qassi layttaappe layttan gujji gujji biyaaba milatees” yaagiis. Kaamiyaa laaggiyaageeti oottana bessiyo waannabaappe, giishin laaggiyoogaappe eta qofaa laalana danddayiyaabaappe issoy moobayliyaa. Issi xinaatiyan oychido heezzu heezzu asaappe issi kusheppe dariyaageeti, laaggiiddi moobayliyan haasayissiya ura kaamiyan domꞌꞌettidoogaa woy domꞌꞌettiichidi attidoogaa yootidosona. Laaggiiddi darobaa oottiyoogee maaddiyaaba milatikkonne, daafabaa kaalettana danddayees.
2 Ayyaanaabankka nuna hegaa malabay gakkana danddayees. Kaamiyaa laaggiiddi qofaa laaliyaabaa oottiya uri daafan yeggiyaabaa darotoo akeekennaagaadan, ayyaanaaban qofay laaletti uttido urikka qohettana danddayees. Kiristtaane ogiyaappenne ayyaanaabaa oosuwaappe nuna wora zaariyaabaa oottanau koyiyaaba gidikko, nu ammanoy laaggiyaabi baynna markkabiyaadan bayana danddayees. (1 Xim. 1:18, 19) Kiitettida PHauloosi Roomen deꞌiya ba mala Kiristtaaneta he daafaabaa akeekissido wode, “Asatettaabaa qoppiyoogee haiquwaa ehees; shin Geeshsha Ayyaanaabaa qoppiyoogee de7uwaanne sarotettaa ehees” yaagiis. (Roo. 8:6) PHauloosi hegaa woyganau giidee? Nuuni ‘asatettaabaa qoppiyoogaa’ aggidi, ‘ayyaanaabaa qoppana’ danddayiyoy ayba ogiyaanee?
Eta “Bolli Pirddi . . . Baawa”
3, 4. (a) PHauloosi bana baaxeyidoogaa xaafidobay aybee? (b) Nuuni PHauloosa hanotaa loyttidi erana koshshiyoy aybissee?
3 PHauloosi Roome Kiristtaanetussi xaafido dabddaabbiyan ikka baaxetiiddi deꞌiyo, ba bollaanne ba wozanaa qofaa giddon denddiya olaabaa yootiis. (Roome 7:21-23 nabbaba.) PHauloosi hegaadan giidoy ba oottidobau gaasoyiyoobaa woy ba hanotan keehippe azzanidoogaa yootanaassa gidenna. I suure gididabaa oottana danddayennaagaa yootanaassakka gidenna. Ubba i, “Aihuda gidenna asaayyo Yesuusi kiittidoogaa” gididi doorettida, ayyaanan tiyettida kayma Kiristtaane. (Roo. 1:1; 11:13) Yaatin, PHauloosi ba baaxiyaabaa xaafidoy aybissee?
4 PHauloosi Xoossaa sheniyaa ba koyiyoogaa keenaa oottana danddayennaagaa ammanidi ekkidoogaa yootana koyiis. Hegaa gaasuwaa i hagaadan giis: “Asai ubbai nagaraa oottiis; ashshiya Xoossaappe haakkidosona.” (Roo. 3:23) PHauloosi Addaame zeretta gidiyoogaadan, polo gidenna gishshau balabaa qaaqqatees. Nuunikka ubbay polo gidenna gishshaunne ubba gallassi aagaa mala hanotaara baaxetiyo gishshau, a qofaa maayana danddayoos. Hegaa bollikka, qofaa laalidi, ‘deꞌuwau efiya xuntta ogiyaappe’ nuuni wora baanaadan oottana danddayiya darobati deꞌoosona. (Maa. 7:14) Gidikkokka, hanotati PHauloosi hidootaa qanxxanaadan oottibookkona; nu hanotaykka hegaa mala.
5. PHauloosi maaduwaanne woppaa demmidoy awuppee?
5 PHauloosi, “Tana . . . ashshanai oonee? Nu Godaa Yesuus Kiristtoosa baggaara Xoossau galatai gido” yaagidi xaafiis. (Roo. 7:24, 25) Hegaappe simmidi, “Kiristtoos Yesuusaara [deꞌiyaageetussi],” giishin tiyettida Kiristtaanetussi xaafiis. (Roome 8:1, 2 nabbaba.) Yihooway ba geeshsha ayyaanaa baggaara, eta ba naata ootti ekkidi, ‘Kiristtoosa bonchchuwaa aara shaakkanaadan’ xeesiis. (Roo. 8:14-17) Xoossaa ayyaanaynne eti Kiristtoosa wozuwaa yarshshuwan ammaniyoogee, PHauloosi yootido baaxiyan eti xoonanaadan maaddees; hegaappe denddidaagan eta “bolli pirddi . . . baawa.” Eti “nagaraa higgiyaa ailletettaappenne haiquwaa higgiyaa ailletettaappe” naxa kiyidosona.
6. Xoossaa ashkkarati ubbay PHauloosi yootidobaa wozanan wottana koshshiyoy aybissee?
6 PHauloosi yootidoy tiyettida Kiristtaanetussa gidikkonne, i Xoossaa ayyaanaabaanne Kiristtoosa wozuwaa yarshshuwaabaa xaafidobay, eti awan deꞌanau hidootiyaageeta gidinkka, Yihoowa ashkkarata ubbaa maaddees. PHauloosi ayyaanay kaalettin he zoriyaa tiyettida Kiristtaanetuyyo yootidaba gidikkokka, i xaafidoogaa Xoossaa ashkkarati ubbay akeekiyoogeenne hegan goꞌettanau baaxetiyoogee keehippe koshshiyaaba.
Xoossay “Asaa Asatettaa Giddon De7iya Nagaraa” Pirddido Ogiyaa
7, 8. (a) Asaa asatettaa gaasuwan Higgee oottana danddayibeennabay aybee? (b) Xoossay ba ayyaanaanne wozuwaa baggaara ay polidee?
7 Polo gidenna asatettaa, nagaray haariyoogaa akeekidoogaa PHauloosi Roome shemppo 7n yootiis. Qassi 8tta shemppuwan, geeshsha ayyaanaa wolqqaabaa odiis. Kiristtaaneti Yihoowa sheniyaara moggiya ogiyan deꞌanaadaaninne an nashettanaadan, eti nagaraara baaxetiyoode Xoossaa ayyaanay waati maaddana danddayiyaakko PHauloosi yootiis. Muuse Higgee polana danddayennabaa, Xoossay ba ayyaanaanne ba Naꞌaa wozuwaa yarshshuwaa baggaara polidoogaa PHauloosi qonccissiis.
8 Muuse Higgee, a giddon deꞌiya daro azazota asay naagana danddayibeenna gishshau, nagaranchatu bolli pirddiis. Hegaa bollikka, Muuse higgiyan Israaꞌeelen qeese ubbatu halaqa gididi oottidaageeti polo gidokkona; qassi nagaraa xayssiya yarshshuwaa shiishshana danddayibookkona. Hegaa gishshau, he Higgee asaa asatettaa gaasuwan kumettabaa oottana danddayibeenna. SHin, Xoossay “nagaranchchatu asatettaa mala asatettaara de7iya ba Na7aa” kiittidi, wozo gidanaadan immiyoogan “asatettaa giddon de7iya nagaraa pirddiis.” Yaatiyoogan, “higgee oottanau danddayibeennaagaa” poliis. Hegaappe denddidaagan, ayyaanan tiyettida Kiristtaaneti Yesuusa wozuwaa yarshshuwan ammaniyoogan xillo geetettidosona. ‘Ayyaanay koyiyoogaadan deꞌanaappe attin, bantta asatettay koyiyoogaadan deꞌenna’ mala, etau zoree imettiis. (Roome 8:3, 4 nabbaba.) Eti “de7o akiliiliyaa” demmanau bantta deꞌuwaa wurssettay gakkanaassi ammanettidi hegaadan deꞌana bessees.—Ajj. 2:10.
9. Roome 8:2n “higgiyaa” geetettida qaalaa birshshettay aybee?
9 PHauloosi Muuse ‘Higgiyaabaa’ xalla gidennan, ‘ayyaanaa higgiyaabaa, nagaraa higgiyaabaanne hayquwaa higgiyaabaa’ yootiis. (Roo. 8:2) Ha higgeti aybee? Ha sohuwan “higgiyaa” geetettida qaalaa birshshettay, Muuse higgiyan deꞌiyaageetu mala azazota bessenna. Issi xuufee hagaadan giis: “Ha sohuwan higgiyaa geetettida Giriike qaalay loꞌꞌobaa woy iitabaa ootissiya, higgedan laamettenna hanotan issibaa oottanaadan wozanaa denttettiyaabaa malaatees. He qaalay issi uray deꞌuwan kaalliyo maaraakka malaatees.”
10. Nuuni nagaraa higgiyaunne hayquwaa higgiyau haarettiyoy ayba ogiyaanee?
10 Kiitettida PHauloosi, “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” yaagidi xaafiis. (Roo. 5:12) Nuuni ubbay Addaame zare gidiyo gishshau, nagaraa higgiyaunne hayquwaa higgiyau haarettoos. Nagarancha gidida nu asatettay, nuuni ubbatoo Xoossaa ufayssennabaa oottanaadan denttettees; hegee hayquwaa kaalettees. PHauloosi Galaatiyaa Kiristtaanetuyyo xaafido dabddaabbiyan, hegaa mala oosoynne eeshshay ‘asatettaa ooso’ gidiyoogaa yootiis. Qassi, “hageeta milatiyaageeta oottiyaageeti Xoossaa kawotettaa” laattennaagaakka qonccissiis. (Gal. 5:19-21) Hegaa mala asati bantta asatettay koyiyoogaadan deꞌiyaageeta. (Roo. 8:4) Eta ‘wozanaa denttettiyaabaynne eti deꞌuwan kaalliyo maaray’ asatettaabaa xalla. SHin asatettay koyiyoogaadan deꞌiyaageeti, shaaramuxiyaageetu, eeqau goynniyaageetunne iita ayyaanaa oosuwaa oottiyaageetu woy hegaa mala hara deexo nagaraa oottiyaageetu xallee? Akkay; ayssi giikko, asatettaa oosoy qanaatiyoogaa, hanqquwan suulliyoogaa, ooyettiyoogaanne miqqaynniyoogaa mala, asa eeshshaa pacadan issoti issoti xeelliyoobaakka gujjees. Asatettay koyiyoogaadan deꞌiyoogaa taani muleera aggaas gaana danddayiyay oonee?
11, 12. Nagaraa higgiyaappenne hayquwaa higgiyaappe nuuni naxa kiyaanaadan maaddanau Yihooway ay giigissidee, qassi Xoossan nashettanau nuuni ay oottana bessii?
11 Nuuni nagaraa higgiyaappenne hayquwaa higgiyaappe naxa kiyiyo ogiyaa Yihooway giigissidoogee ayba ufayssiyaabee! Yesuusi, “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagiis. Xoossaa siiqiyoogaa bessiya ogiyan deꞌiyoogaaninne Yesuus Kiristtoosa wozuwaa yarshshuwan ammaniyoogan, laattido nagaray kaalettiyo pirddaappe naxa kiyana danddayoos. (Yoh. 3:16-18) Hegaa gishshau, nuunikka PHauloosaagaadan, “Nu Godaa Yesuus Kiristtoosa baggaara Xoossau galatai gido” gaana danddayoos.
12 Nu hanotay wolqqaama harggee oyqqin paxiyoogaa mala. Nuuni paxanau koyiyaabaa gidikko, dottoree yootidobaa oottana bessees. Wozuwan ammaniyoogee nuna nagaraa higgiyaappenne hayquwaa higgiyaappe naxa kessana danddayiyaaba gidikkonne, nuuni polo gidenna nagarancha. Ayyaanaaban payya gidanaunne Xoossaa ufayssiyaageetanne i anjjiyoogeeta gidanau, harabaykka koshshees. ‘Higgiyaa xillo azazuwaa polanau,’ ayyaanay koyiyoogaadan deꞌana koshshiyoogaakka PHauloosi qonccissiis.
Nuuni Ayyaanaara Waani Moggidi Deꞌana Danddayiyoo?
13. Ayyaanay koyiyoogaadan deꞌiyoogaa giyoogee woygiyoogee?
13 Ayyaanay koyiyoogaadan deꞌanau, ayyaanaaban ubbatoo diccana koshshees; hegaa giyoogee aybanne moorana koshshenna giyoogaa gidenna. (1 Xim. 4:15) Nuuni danddayettida ubbaban, galla galla ayyaanaa kaaletuwaara moggidi deꞌanau baaxetana koshshees. ‘Ayyaanaa kaaletuwaa’ kaalliyoogee, Xoossay nunan ufayttanaadan oottees.—Gal. 5:16.
14. “Asatettai koyiyoogaadan” deꞌiyaageetu koshshay aybee?
14 PHauloosi Roome Kiristtaanetussi xaafido dabddaabbiyan, phalqqettiya qofay deꞌiyo naaꞌꞌu qommo asatubaa odiis. (Roome 8:5 nabbaba.) Ha sohuwan asatettaa geetettiday bollaa gidennan aggana danddayees. Geeshsha Maxaafay, “asatettaa” yaagiya qaalaa issi issitoo polo gidenna nagarancha asaa hanotaa qonccissanau goꞌettees. PHauloosi yootido asatettaanne qofaa giddon denddiya olau gaasoy he hanotaa. SHin, PHauloosaagaappe dumma ogiyan, “asatettai koyiyoogaadan de7iyaageeti” aynne baaxetokkona. Eti Xoossay banttappe koyiyoobaa qoppennaaninne i giigissido maaduwaa ekkennan ixxidi, “bantta asatettaabaa qoppoosona.” Eti darotoo bantta ashuwaanne asatettaa amuwaa poliyoogan xeelaa wottoosona. Hegaappe dumma hanotan, “Geeshsha Ayyaanai koyiyoogaadan de7iyaageeti Geeshsha Ayyaanaabaa,” giishin ayyaanaaban etassi giigidabaanne eti oottiyoobaa qoppoosona.
15, 16. (a) Issi uri issibaa qoppiyoogee a xeelaa laammana danddayiyoy ayba ogiyaanee? (b) Ha wodiyan daro asay ba xeelaa wottidoy aybiinee?
15 Roome 8:6 nabbaba. Issibay loꞌꞌo gidin woy iita gidin, hegaa oottanau issi uri mintti qoppees. Ubbatoo asatettaabaa qoppiyaageeti asatettaabaa poliyoogan bantta xeelaa wottoosona. Eti ubbatoo qoppiyoynne koyiyoy hegaa polanaassa.
16 Ha wodiyan daro asay ba xeelaa wottidoy aybiinee? Kiitettida Yohaannisi hagaadan giis: “Ha sa7an de7iya ubbabai, hegeekka: asatettaa amoi, aifen xeellidi qaaqqatiyoogeenne miishshan ceeqettiyoogee ha sa7aappe yiidoogaappe attin, Xoossaappe yibeenna.” (1 Yoh. 2:16) He amoy shaaramuxanau, hayttatanaunne duretanau koyiyoogaa gujjees. Maxaafatun, maxeetetun, gaazeexatun, pilmetun, televizhiine prograamiyaaninne Intternneetiyan hegaa malabay kumiis; aybissi giikko, daro asay keehippe qoppiyoynne koyiyoy hegaa malabaa gidiyo gishshataassa. SHin, “Asatettaabaa qoppiyoogee haiquwaa ehees”; hegaa giyoogee ha wodiyan ayyaanaaban, qassi sinttappe asatettan hayquwaa kaalettees giyoogaa. Aybissi? “Asatettaabaa qoppiyoogee Xoossau ixo; aissi giikko, asatettai Xoossaa higgiyau azazettenna; qassi azazettanaukka au danddayettenna. Bantta asatettau azazettiyaageeti Xoossaa ufaissanau danddayokkona.”—Roo. 8:7, 8.
17, 18. Nuuni ayyaanaabaa qoppiyaageeta gidana danddayiyoy ayba ogiyaanee, hegaadan oottiyoogan ay demmiyoo?
17 Hara baggaara, “ayyaanaabaa qoppiyoogee de7uwaanne sarotettaa ehees”; giishin sinttappe merinaa deꞌuwaa demissees; qassi ha wodiyan nuuyyo wozanaanne qofaa sarotettay deꞌanaadan, Xoossaarakka saro deꞌanaadan maaddees. Nuuni ‘ayyaanaabaa qoppiyaageeta’ gidana danddayiyoy ayba ogiyaanee? Nuuni ubbatoo Xoossay nuussi ba geeshsha ayyaanaa baggaara immiyo kaaletuwaa kaalliyaaba gidikko, nu qofay ubbatoo aagaara moggiyaagaa gidees. Nuuni hegaadan oottiyo wode, “Xoossaa higgiyau” azazettanau nu qofaa an wottoos. Nuna paacee gakkiyo wode, ay tangguwaa ekkana koshshiyaakko akeekanau metootokko. Hegee ayyaanaara moggiya suure kuushshaa kuuyanau qoppanaadan denttettees.
18 Yaatiyo gishshau, nuuni Xoossaa ayyaanaabaa qoppiyoogee keehi koshshiyaaba. Ayyaanaabaa oosuwaa aggennan ‘oottanau nu wozanan qoppiyoogan’ hegaadan oottoos. He oosoy, ubbatoo woossiyoogaa, Geeshsha Maxaafaa nabbabiyoogaa, qassi xannaꞌiyoogaa, shiiquwan beettiyoogaanne haggaaziyoogaa gujjees. (1 PHe. 1:13) Asatettaabaa qoppiyoogan nu qofaa wora zaariyoogaappe, ayyaanaaban nu qofaa wottiyaageeta gidoos. Yaatiyoogan, ayyaanay koyiyoogaadan deꞌiyaageeta gidoos. Hegaadan oottiyoogee anjjuwaa demissees; ayssi giikko, ayyaanaabaa qoppiyoogee deꞌuwaanne sarotettaa demissiyo gishshataassa.—Gal. 6:7, 8.
Qonccissana Danddayay?
• ‘Higgee oottanau danddayibeennabay’ aybee, Xoossay hegaa waatidi giigissidee?
• ‘Nagaraa higgeenne hayquwaa higgee’ aybee, nuuni hegaappe naxa kiyana danddayiyoy ayba ogiyaanee?
• Nuuni ‘ayyaanaabaa qoppiyaageeta’ gidanau ay oottana bessii?
[Sinttaa 16n deꞌiya misiliyaa qonccissuwaa]
Asatettay koyiyoogaadan deꞌayiyye, ayyaanay koyiyoogaadan deꞌay?