“Paaciyan Intte Gelenna Mala”

“Paaciyan intte gelenna mala, naagitenne Xoossaa woossite.”—MAATIYOOSA 26:41.

¹XOOSSAA Naꞌaa, Yesuus Kiristtoosa kase gakki erenna keehi daro metoy gakkiis. I saꞌan deꞌiyo deꞌuwau wurssetta wodee matattiis. Yesuusi mata wode oyqettanaagaa, hayquwau pirddettanaagaanne mittan kaqettidi barchetanaagaa akeekiis. I kuuyiyo kuushsha ubbaynne i oottiyo ooso ubbay ba Aawaa sunttaara gayttidaagaa gidiyoogaa erees. Asaa naatu sinttanaa hidootay ba bolli baasettidoogaakka erees. Ha ubbabay a qofissiyaaba gidikkokka, i ay oottidee?

² Yesuusi ba erissiyo ashkkaratuura Geetesemaane giyo ataakiltte sohuwaa biis. He sohoy Yesuusi wodiyaa attanau dosiyoosa. I yaa bi simmidi ba erissiyo ashkkaratuppe guuttaa zarddaꞌiis. Yesuusi minttettuwaa demmanau ba Aawaakko saluwaa xeelliiddi, barkka issitoo kanche gidennan heezzutoo wozanappe woossiyoogan bau siyettiyaabaa qonccissiis. Yesuusi polo gidikkonne, metuwaa barkka xooni kiyana danddayiyoobadan qoppibeenna.—Maatiyoosa 26:36-44.

³ Ha wodiyan, nunakka metiyaabay gakkees. Nuuni deꞌiyoy iita wodiyau wurssetta gallassaana gidiyoogaa bessiya naqaashaa ha brooshuriyaa doomettan akeekida. Seexaanaa alamee gattiyo paaceenne unꞌꞌoy dariiddi deꞌees. Tumu Xoossau goynnays giya ooninne kuuyiyo kuushshatinne oottiyo oosoti a sunttaara gayttidaageeta. Qassi Xoossay ehaana ooratta alamiyan nuuni merinaa deꞌuwaa demmanaagee woy demmennaagee baasettidoy hegaana. Nuuni Yihoowa siiqoos. Nu deꞌuwaa wurssettaappenne ha siraataa wurssettaappe kasetiyaagee awugaakka gidin, nuuni “wurssettaa gakkanaashin” genccana koyoos. (Maatiyoosa 24:13) SHin nuuni waanidi ubbatoo eesotanaunne naagi uttanau danddayiyoo?

⁴ Yesuusi ba erissiyo beni wode ashkkaratanne ha wodiyaageetakka metoy gakkiyoogaa eridi: “Paaciyan intte gelenna mala, naagitenne Xoossaa woossite” giidi minttettiis. (Maatiyoosa 26:41) He qaalati ha wodiyan nuuyyo ayba birshshetta oyqqidoonaa? Nena ayba paacee gakkii? Qassi neeni waanada ‘naaga uttana’ danddayay?

Ayba Paacee Gakkii?

⁵ Nuna ubbaa galla galla ‘xalahe halaqaa gitiyan’ geliyo paacee gakkees. (2 Ximootiyoosa 2:26) Seexaanay Yihoowaassi goynniyaageeta dummayidi zambbiyooba oottidoogaa Geeshsha Maxaafay nuussi yootees. (1 PHeexiroosa 5:8; Ajjuutaa 12:12, 17) Aybaa halchidi? Hegee nuna worana xallaassa gidenna. Nuuni Xoossau ammanettidaageeta gididi hayqqiyoogee, Seexaanau xoono gidenna. Yihooway ba keerido wodiyan hayquwaappe denttanaagaa Seexaanay erees.—Luqaasa 20:37, 38.

⁶ Seexaanay xayssana koyiyoy nu haꞌꞌi deꞌuwaappe keehi aadhiyaaba gidida, Xoossaayyo nuuni suuretettaa naagidi deꞌiyoogaa. Seexaanay nuuni Yihoowau goynniyoogaa diggana danddayiyoogaa bessanau baaxetees. Yaatiyo gishshau, nuuni mishiraachuwaa yootiyoogaanne Kiristtaane kandduwaa maaraa kaalliyoogaa aggidi, ammanettennaageeta gidiyaaba gidikko, hegee Seexaanau xoono gidees! (Efisoona 6:11-13) Hegaa gishshau, “Xalahe halaqai” nuna paacciyoobaa giigissees.—Maatiyoosa 4:3.

⁷ Seexaanay ‘cimmiyo’ ogee dumma dumma. (Efisoona 6:11) I nuuni aquwaa yedettanaadan, yayyanaadan, siranaadan, woy ufayttiyoobaa yedettanaadan cimmana danddayees. SHin i goꞌettiyyo keehi muruta gidida ogiyaappe issoy hidootaa qanxxissiyoogaa. I injjiyaa demmidi paacciya genanchaa gidiyoogaadan, hidootaa qanxxiyoogee nuuni ayyaanaaban shugganaadan oottiyo gishshau, eesuwaara paaciyan yeggiyoogaa erees. (Leemiso 24:10) Yaatiyo gishshau, nuuni ayyaanan ‘nippi giyo’ wode hidootaa qanxxissiyoogan nuna paaccees.—Mazamure 38:8.

⁸ Nuuni wurssetta gallassaakko mati mati biyo wode, hidootaa qanxxissiyaabay dari dari biyaaba milatees; qassi nuuni hegaappe naxa gidana danddayokko. (“Hidootaa Qanxxanaadan Oottiya Issi Issi Gaasota” giya saaxiniyaa xeella.) Gaasoy ayba gidikkonne, hidootaa qanxxiyoogee nu minotettaa shugissana danddayees. Neeni asatettan, guuggiyaaninne qofan daafuridaba gidikko, Geeshsha Maxaafaa xannaꞌiyoogaa, Kiristtaane shiiquwaa shiiqiyoogaanne haggaazuwan shaahettiyoogaa gujjiya ayyaanaaban oottiyoobatuyyo haniya “wodiyaa” demmanau metootana danddayaasa. (Efisoona 5:15, 16) Seexaanay neeni ha allaalleta tixxi oottanaadan koyiyoogaa hassaya. SHin nuuni deꞌiyo wodee eesotiyoogaa aggiyo wode woy loddu giyo wode gidenna! (Luqaasa 21:34-36) Neeni waatada paaciyaa xoona kiyanaunne naaga uttanau danddayay? Maaddana danddayiya oyddu qofata beꞌa.

‘Xoossaa Woossa’

⁹ Yihoowan ammanettiyoogan akko woossa. Geetesemaane giyo ataakiltte sohuwan Yesuusi oottidobaa hassaya. Wolqqaama unꞌꞌoy gakkido wode ay i oottidee? I maaduwaa demmanau “cawattiyo cawai sa7an xokkiya suutta” milatana gakkanaashin, ba Aawaakko minttidi woossiis. (Luqaasa 22:44) Hegaabaa qoppa. Yesuusi Seexaanaa geeshshidi erees. Yesuusi saluwan uttidi, Seexaanay Xoossaa ashkkarata gitiyan yeggidi paaccanau oottiyo baaxe ubbaa beꞌiis. Gidikkonne, Yesuusi Seexaanay paaccanau shiishshiyoobata barkka metootennan xooni kiyana danddayiyoobadan qoppibeenna. Xoossaa Naꞌay, poloy maaduwaanne minotettaa demmanau Xoossaakko woossana koshshiyoogee au siyettidabaa gidikko, nuuni hegaappe aaruwaa woossana koshshennee?—1 PHeexiroosa 2:21.

¹⁰ Yesuusi ba erissiyo ashkkarata, “Xoossaa woossite” yaagi minttetti simmidi: “Ayyaanai giigi uttiis; shin ashoi daafuranchcha” yaagidoogaakka hassaya. (Maatiyoosa 26:41) Yesuusi yootidoy o ashuwaabee? Ba ashuwaabaa gidennaagee qoncce; a polo ashoy daafurancha gidenna. (1 PHeexiroosa 2:22) SHin i erissiyo ashkkaratu hanotay dumma. Laattido poluwaa pacatettaappenne nagara oottiyo koshshaappe denddidaagan, eti paaciyaa xooni kiyanau maaduwaa keehippe koshshees. (Rome7:21-24) Etinne tumu Kiristtaane ubbay paaciyaa xooni kiyanau woossanaadan i minttettana koshshidoy hegaassa. (Maatiyoosa 6:13) Yihooway hegaa mala woosaa zaarees. (Mazamure 65:2) Waatidi? I zaariyo ogetuppe ane naaꞌꞌaa beꞌoos.

¹¹ Koyroy, Xoossay nuuni paaceta shaakkidi eranaadan maaddees. Seexaanaa paaceti ogiyan gentti wottido pire mala. Neeni piriyaa beꞌabeennaba gidikko, oyqettana danddayaasa. Nuuni paaciyan gelennaadan, Geeshsha Maxaafaa baggaaranne Geeshsha Maxaafan baasettida xuufetu baggaara, Yihooway Seexaanaa pireta qonccissees. Daro layttau, asaa yayyiyoogaa, shori baynna kandduwaa, aquwaa yedettiyoogaanne Seexaanaa hara paaceta xeelliyaagan attamettida xuufetun, awurajjaa, woradaanne dumma shiiqotu prograamiyan nuuyyo zaaretti zaarettidi akeekissoy imettiis. (Leemiso 29:25; 1 Qoronttoosa 10:8-11; 1 Ximootiyoosa 6:9, 10) Neeni Seexaanaa piriyaa shaakkada eranaadan oottiyo gishshau Yihoowa galatikkii? (2 Qoronttoosa 2:11) Hegaa mala akeekisso ubbay neeni paaciyaa xoona kiyiyo maaduwaa demmanau woossiyo woosaa zaaro.

¹² Naaꞌꞌanttoy, Yihooway nuuni paaciyaa genccanaadan minttettuwaa immiyoogan nu woosaa zaarees. A Qaalay: “Intte wolqqai danddayiyoogaappe aadhdhiya paaciyan intte paacettanau koyenna Xoossai ammanettidaagaa. SHin inttena paacee gakkiyo wode, . . . he paaciyaappe intte kessi ekkiyo ogiyaakka immana” yaagees. (1 Qoronttoosa 10:13) Nuuni ubbatoo Xoossan ammanettiyaaba gidikko, ayyaanaaban danddayiyo abbiyaappe keehi dariya paaciyan nuuni paacettanaadan i mule paqqadenna. I ‘paaciyaappe nuuni kessi ekkiyo ogiyaa’ waatidi giigissii? I ‘bana woossiyaageetussi geeshsha ayyaanaa immees.’ (Luqaasa 11:13) Nuuni suure gididabaa oottanau qachido qofaa minttanaunne loꞌꞌo kuushshaa kuuyanau Geeshsha Maxaafaa baaso siraataa akeekanaadan he ayyaanay maaddana danddayees. (Yohaannisa 14:26; Yaaqoobaa 1:5, 6) Hegee, bala koshshaa xoonanau keehippe koshshiya eeshshata dichanaadan nuna maaddana danddayees. (Galaatiyaa 5:22, 23) Xoossaa ayyaanay nu mala Kiristtaaneti nuna ‘maaddanaadan’ denttettana danddayees. (Qolasiyaasa 4:11) Yihooway hegaa mala siiqo ogiyan nena maaddanau ne woosau zaaruwaa immiyo gishshau galatikkii?

Haniyaabaa Naaga

¹³ Naagi uttanau, nuuni haniyaabaa naagana koshshees. Nu deꞌuwan gakkiya metuwaappe denddidaagan, nuuni ubbay issi issitoo keehippe daafuroos. SHin ha iita siraatan Xoossay nuna metuwaappe naxa gidida deꞌuwaa deꞌeta giidi mule qaalaa gelibeennaagaa hassayana bessees. Beni wodekka gidin, Xoossaa ashkkarata yedetaa, hiyyeesatettaa, unꞌꞌuwaanne sahuwaa malatiya metoti gakkidosona.—Oosuwaa 8:1; 2 Qoronttoosa 8:1, 2; 1 Tasalonqqe 5:14; 1 Ximootiyoosa 5:23.

¹⁴ Ha wodiyan, nunakka metoy gakkees. Nuna yedetay, miishshaa metoy, unꞌꞌissiyaabay, sahoynne hara ogiyankka waayee gakkana danddayees. Yihooway nuna maalaalissiya ogiyan qohiyaaba ubbaappe teqqiyaaba gididaakko, hegee Seexaanay Yihoowa cayanaadan oottiyaaba gidennee? (Leemiso 27:11) Yihooway ba ashkkarati issi issi gaasuwan, bana ixxiyaageetu kushiyan paacettanaadaaninne hayqqanaadankka paqqadees.—Yohaannisa 16:2.

¹⁵ Yaatin, Yihooway ayba qaalaa gelidee? Hagaappe kase nuuni qonccissidoogaadan, nuuni an wozanappe ammanettiyaaba gidikko, nuna gakkiya ayba metuwaane xooni kiyanaadan danddayissanau qaalaa geliis. (Leemiso 3:5, 6) I ba Qaalaa, ba ayyaanaanne ba dirijjitiyaa baggaara nuna ayyaanaaban naagiyoogan, nuuni aara deꞌiya dabbotaa naaganaadan maaddiiddi deꞌees. Nuuyyo aara deꞌiya dabbotettay moorettibeennaba gidikko, hayqqikkonne, xoonoos. Aybanne gidin, ubba qassi hayqoykka, Xoossay baassi ammanettida ashkkarata woytiyoogaa diggana danddayenna. (Ibraawe 11:6) Haꞌꞌi matattida ooratta alamiyan, Yihooway bana siiqiyaageetuyyo qaalaa gelido maalaalissiya anjjo ubbaa polanaagee erettidaba.—Mazamure 145:16.

Denddida Oyshaa Hassaya

¹⁶ Wurssettaa gakkanau genccanau, Xoossay iitatettaa paqqadidoogaara gayttida keehi koshshiya oyshaa nuuni hassayana bessees. Issi issitoo nu metoti nu wolqqaappe dariyaaba milatiyo wodenne Xoossaayyo haggaaziyoogaa agganaadan nuuni paacettiyo wode, Yihooway ubbabaa haariyo maataa bolli Seexaanay denttido oyshaa hassayana bessees. Xoossaayyo goynniyaageeti ayyo aqiyoogaanne suuretettaa equwaa naagiyoogaa xeelliyaagankka Seexaanay oyshaa denttiis. (Iyyooba 1:8-11; 2:3, 4) Ha oyshatinne Yihooway oyshata zaaranau doorido ogee nu deꞌuwaappe keehi aadhidi koshshiyaaba. Hegaadan waanidi hanii?

¹⁷ Xoossay guutta wodiyau waayee deꞌanaadan paqqadidoogee harati tumaa eranaadan oottees. Hagaa qoppa: Yesuusi waayettidoogan nuuni deꞌuwaa demmana danddayoos. (Yohaannisa 3:16) Nuuni hegau galatana bessennee? SHin harati deꞌuwaa demmanaadan nuuni guutta wodiyau waayettanau eeno giyoo? Wurssettaa gakkanau genccanau, Yihoowa aadhida eratettay nuugaappe keehi dariyoogaa akeekana bessees. (Isiyaasa 55:9) I denddida oyshaa bessiya wodiyan zaariyoogan iitatettaa merinau xayssana; qassi hegee nuuyyo merinaa goꞌꞌaa demissana. Hegaadan oottana xayikko, waani giigana danddayii? Xoossay pirddaa moorenna!—Rome 9:14-24.

‘Xoossaakko SHiiqa’

¹⁸ Eesotiyoogee koshshiyoogaa dogennan deꞌanau, nuuni Yihoowakko shiiqana koshshees. Nuuyyo Yihoowaara deꞌiya dabbotaa duuttanau Seexaanay bayyo deꞌiya wolqqa ubban oottiyoogaa dogoppa. Mishiraachuwaa odiyoogee woy Geeshsha Maxaafaa baaso siraataadan deꞌiyoogee goꞌennabadan xeellanaadan, qassi wurssettay mule yeennabadan nuuni ammanana mala Seexaanay koyees. SHin “i worddanchchanne qassi wordduwaukka aawa.” (Yohaannisa 8:44) Nuuni ‘xalahe halaqaa teqqanau’ murttidaageeta gidana bessees. Yihoowaara deꞌiya nu dabbotaa laafabadan mule xeellana koshshenna. Geeshsha Maxaafay: “Xoossaakko shiiqite; ikka inttekko shiiqana” yaagidi nuna siiquwan zorees. (Yaaqooba 4:7, 8) Neeni kaseegaappe attada Yihoowakko waanada shiiqana dandday?

¹⁹ Woosan wotti dentti qoppiyoogee keehippe koshshiyaaba. Deꞌuwan gakkiya metoy ne wolqqaappe dariyaaba malatiyo wode, ne metuwaa Yihoowau yoota. Neeni issibaa qonccissada woosan Yihoowa oychiyo wode, hegau i zaaruwaa immiyoogaa akeekana danddayaasa. Zaaroy ubbatoo neeni qoppidoogaa gidennan aggana danddayees; shin neeni a bonchanaunne ayyo suuretettaa equwaa naagada deꞌanau koyiyaaba gidikko, i neeyyo koshshiya maaduwaa immiyo gishshau loyttada genccana danddayaasa. (1 Yohaannisa 5:14) Neeni ne deꞌuwan a kaaletuwaa akeekiyo wode, kaseegaappe aattada akko shiiqaasa. Geeshsha Maxaafan qonccida Yihoowa eeshshatubaanne ogetubaa nabbabiyoogeenne etan akeekan qoppiyoogeekka keehippe koshshiyaaba. Hegaadan wotti denttidi qoppiyoogee neeni Yihoowa loyttada eranaadan maaddees; hegee ne wozanaa denttetteesinne Yihoowa neeni wozanappe siiqanaadan oottees. (Mazamure 19:14) He siiqoy hara ubbabaappekka aaruwan, neeni paaciyaa xoona kiyanaadaaninne naaga uttanaadan maaddana danddayees.—1 Yohaannisa 5:3.

²⁰ Tumu Kiristtaane gididaageetuura nuuni matattidi deꞌiyoogeekka, Yihoowakko shiiqanau koshshiyaaba. Hegaa ha brooshuriyaa wurssetta kifiliyan beꞌana.

XINAATIYAU GIIGIDA OYSHAA

• Yesuusi saꞌan deꞌido deꞌuwau wurssettan wolqqaama metoy gakkido wode ay oottidee? Ba erissiyo ashkkarati ay oottanaadan he wode zoridee? (Mentto 1-4)

• Seexaanay Yihoowayyo goynniyaageeta zambbiyooba oottidoy aybissee? I nuna ayba ogetun paaccii? (Mentto 5-8)

• Nuuni ubbatoo woossiyoogee (Mentto 9-12), haniyaabaa naagiyoogee (Mentto 13-15), denddida oyshaa hassayiyoogeenne (Mentto 16-17), ‘Xoossaakko shiiqiyoogee’ (Mentto 18-20) paaciyaa xooni kiyanau koshshidoy aybissee?

[Sinttaa 25n deꞌiya misiliyaa]

Hidootaa Qanxxanaadan Oottiya Issi Issi Gaasota

Payyatettaa/ceegatettaa. Caddi oyqqidi yeddenna harggiyan waayettiyaaba woy cimatettaappe denddidaagan kaseegaadan oottennaba gidikko, nuuni Xoossaayyo darobaa oottenna gishshau unꞌꞌettana danddayoos.—Ibraawe 6:10.

Hidootaa qanxxiyoogaa. Xoossaa Qaalaa sabbakiyo wode siyanau koyiya asay keehi guutta gidiyoogee, nuuni shugganaadan oottana danddayees.—Leemiso 13:12.

Maaddennabadan qoppiyoogaa. Daro layttau harati bessenna ogiyan oyqqidoogaappe denddidaagan, issi uri a woy o asi dosennabadan, ubba Yihoowaykka dosennabadan qoppana danddayees.—1 Yohaannisa 3:19, 20.

Lancciyoogaa. Issi asa a mala issi Kiristtaanee keehippe yiilloyidaba gidikko, i lanccana danddayiyo gishshau, Kiristtaane shiiquwan beettiyoogaa woy haggaazuwan shaahettiyoogaa agganau paacettana danddayees.—Luqaasa 17:1.

Yedetaa. Ammanuwan nenaara shaahettennaageeti nena eqettanau, yedettanau woy baceessanau danddayoosona.—2 Ximootiyoosa 3:12; 2 PHeexiroosa 3:3, 4.

[Sinttaa 26n deꞌiya misiliyaa]

Nuuni paaciyaa xoonanau maaduwaayyo ubbatoo ‘woossanaadan’ Yesuusi zoriis