Laꞌatettaa Xoossaayyo Ootta

“Nuuni Xoossaa siiqiyoogee a azazuwaa naagiyoogaa; a azazoikka deexo gidenna.”—1 YOH. 5:3.

WOYGADA ZAARUUTII?

Seexaanay Xoossaa higgeta deexxiyaaba milatissanau maliyoy ayba ogiyaanee?

Nu laggeta dooriyo wode akeekay keehippe koshshiyoy aybissee?

Nuuni laꞌatettaa Xoossau ammanettidaageeta gididi deꞌanau aybi maaddii?

1. Yihooway ba laꞌatettaa waatidi goꞌettii, qassi i Addaameyyoonne Hewaaniyyo ay mala laꞌatettaa immidee?

POLO laꞌatettan deꞌiyay Yihoowa xalaala. Gidikkokka, i he laꞌatettaa bessenna ogiyan goꞌettenna; qassi ba ashkkarati oottiyo guuttabaara ubbaa kaallenna. Hegaappe dumma ogiyan, eti banttau kuuyanaadaaninne bantta suure amuwaa polanaadan laꞌatettaa immiis. Leemisuwau, Xoossay Addaameenne Hewaana oottennaadan azazido azazoy issuwaa xalla; hegeekka, “lo77uwaanne iitaa erissiya mittaa teeraappe” meennaadan azazidoogaa. (Doo. 2:17) Eti banttana Medhidaagaa sheniyaa poliiddi maalaaliya laꞌatettan deꞌana danddayoosona.

2. Xoossay immido laꞌatettay Addaameppenne Hewaanippe halidoy aybissee?

² Xoossay Addaamessinne Hewaanissi hegaa keena laꞌatettaa immidoy aybissee? I etau zoriya wozanaa immidonne eta ba leemisuwan medhido gishshataassa. I eta Medhido gishshau a siiqiyoogaappe denddidaagan, eti suure gididabaa oottana giidi qoppiis. (Doo. 1:27; Roo. 2:15) Addaameenne Hewaana banttau deꞌuwaa Immidaagaanne i etau immido laꞌatettaa nashshibeennaagee azzanttiyaaba. Eti Seexaanay yootiyoobaa siyidi, kandduwaaban laꞌa gidanau dooridosona. Eti kaseegaappe aaruwan laꞌa gidiyoogaappe, banttananne bantta zerettaa nagaraa aylletettau bayzzidosona; hegee tuggaanne hayquwaa kaalettiis.—Roo. 5:12.

3, 4. Yihooway kessido maaraa xeelliyaaban Seexaanay nuna balettanau maliyoy ayba ogiyaanee?

³ Seexaanay naaꞌꞌu polo asatinne daro kiitanchati Xoossaa haaruwaa bolli makkalanaadan denttettana danddayikko, nunakka balettana danddayees. A hiillay haꞌꞌikka he wodeegaa mala. I Xoossay kessido maaray deexxiyaabadaaninne nuna ufayssa diggiyaabadan qoppanaadan oottidi nuna balettanau malees. (1 Yoh. 5:3) Nuuni hegaadan qoppiya asaara daro wodiyaa aattiyaaba gidikko, etaagaadan qoppiyoogaa doommana danddayoos. Haꞌꞌi iyyo layttay 24 gidido issi michiyaa, “Ta laggetuugaappe dumma ogiyan qoppanau yayyido gishshau, iita laggetettay tana keehi qohiis” yaagaasu. Hegaappe denddidaagan a shori baynna asho gaytotettaa polaasu. Laggetu woyganddee nenakka hegaadan qohennan aggenna.

⁴ Issi issitoo Kiristtaane gubaaꞌiyan deꞌiyaageetikka iitabau denttettana danddayiyoogee azzanttiyaaba. Issi yelaga ishay, gubaaꞌiyan deꞌiya a laggetuppe issoti issoti Yihoowa Markka gidenna macca naatuura wodiyaa aattiyoogaa yootiis. I ba laggetuura daro wodiyaa aattido peeshshan kaseegaappe aaruwan eta mala gidiis. I hagaadan giis: ‘Taayyo Yihoowaara deꞌiya dabbotay shuggi shuggi biis. SHiiqoy tana kaseegaadan ufayssenna; qassi haggaaziyoogaa mule aggaas gaana danddayays. Taani etaara wodiyaa aattiyoogaa aggana koshshiyoogaa he wode akeekada, agga bayaas!’ Ne laggeti nena ay keena qohana danddayiyaakko akeekay? Ha wodiyan nuna maaddana danddayiya Geeshsha Maxaafaa leemisuwaa ane beꞌa.—Roo. 15:4.

ETA WOZANAA WUUQQIIS

5, 6. Abeseloomi harata balettidoy ayba ogiyaanee, a maqqoy shin polettidee?

⁵ Harata iitabau denttettida daro asatu leemisoy Geeshsha Maxaafan deꞌees. Hegeetuppe issoy, Kawuwaa Daawita naꞌaa Abeselooma. Abeseloomi malancha asa. I Seexaanaagaadan iita amoy ba wozanan diccanaadan oottiis. Ayyo maati baynnaba gidikkokka, ba aawaa sohuwan kawotanau koyiis.a Abeseloomi ba koyidobaa demmanau, asay i banttana maaddanau koyiyaabadan, qassi kawoy maaddanau koyennabadan qoppanaadan oottiis. Ee, Dabloosi Edene gannatiyan oottidoogaadan, Abeseloomi asaa maaddiyaaba milatiis, qassi ba aawaa sunttaa mooriis.—2 Sam. 15:1-5.

⁶ Abeselooma iita maqqoy polettidee? Ee, amarida keenaa polettiis; ayssi giikko, Geeshsha Maxaafay, “Israa7eela asaa wozanaa Abeseloomi wuuqqiis” yaagees. (2 Sam. 15:6) Abeseloomi daro asaa cimmidaba gidikkonne, wurssettan xoonettiis. A otoroy inne aara exatida shaꞌan qoodettiya asay hayqqanaadan oottiis.—2 Sam. 18:7, 14-17.

7. Abeselooma leemisuwaappe ay tamaarana danddayiyoo? (Sinttaa 19n deꞌiya misiliyaa xeella.)

⁷ Israaꞌeelati hegaadan cimettidoy aybissee? Abeseloomi etau qaalaa gelidobaa polanaadan koyennan aggokkona. Woykko a meraa loꞌꞌotettan cimettennan aggokkona. Gaasoy aybanne gido, eti Yihoowayyoonne i sunttido kawuwau ammanettibeennaagaa eroos. Ha wodiyan, Seexaanay Yihoowa ashkkaratu wozanaa wuuqqanau Abeselooma mala asaa goꞌettiyoogaa aggibeenna. Eti hagaadan gaana danddayoosona, ‘Yihooway kessido maaray laꞌa gidennaadan oottees. Yihoowayyo haggaazenna asaa ubbaa beꞌa. Eti daroban ufayttoosona!’ Neeni hegaa malabaa siyiyo wode, hegee worddo gidiyoogaa akeekada, Xoossaayyo ammanettada deꞌuutii? Nena tumuppe laꞌa kessana danddayiyay Yihooway immido “bali bainna higgiyaa,” giishin Kiristtoosa higgiyaa xalla gidiyoogaa akeekuutii? (Yaaq. 1:25) Hegaa akeekikko, he higgiyaa xoqqu oottada xeella, qassi ne laꞌatettaa Yihoowa ufayssiya ogiyan goꞌetta.—1 PHeexiroosa 2:16 nabbaba.

8. Yihooway kessido maaraa sheneho giyoogee ufayssa demissennaagaa bessiya leemisoti awugeetee?

⁸ Seexaanay zambbido waannati yelagata. Ha wodiyan ayyo layttay 30ppe bolla gidido issi ishay, “Taani Yihooway kessido kandduwaa maaraa iitabaappe naagiyaabadan gidennan, laꞌatetta diggiyaabadan qoppaas” yaagidi, ba panttatetta wodiyaabaa yootiis. I hegaappe denddidaagan shori baynna asho gaytotettaa poliis. SHin hegee i ufayttanaadan oottibeenna. I ubba, daro layttau ba mooruwan zilꞌꞌettiiddi deꞌiis. Panttatetta wodiyan shori baynna asho gaytotettaa polida issi michiyaa hegaappe simmin a azzanidoogaanne aynne pattenna asadan bana xeellidoogaa xaafaasu. A gujjadakka, “Haꞌꞌi 19 layttay aadhi simminkka he mooruwaa hassayays” yaagaasu. Hara michiyaa hagaadan gaasu: “Taani keehi siiqiyoogeeti ta oottidoban azzanidoogaa qoppiyoogee tana sheekissiis, qassi ayyaanaabankka keehippe qohiis. Yihoowan nashettennan deꞌiyoogee keehippe azzanttiyaaba.” Seexaanay neeni nagaray kaalettiyo hegaa malabaa qoppanaadan koyenna.

9. (a) Yihoowabaa, a higgiyaabaanne baaso siraataabaa xeelliyaaban nuna oychana koshshiya oyshati awugeetee? (b) Xoossaa loyttidi eriyoogee keehippe koshshiyoy aybissee?

⁹ Yihoowa Markka gidida daro yelagati, ubba gasttatuppekka daroti Yihoowayyo azazettennaagee iitabaa kaalettiyoogaa banttana gakkidabaappe tamaaridoogee azzanttiyaaba! (Gal. 6:7, 8) Yaatiyo gishshau, kaallidi deꞌiyaagaadan nena oycha: ‘Seexaanay tana balettanau goꞌettiyo hiillaa akeekiyaanaa? Taani Yihoowa ubbatoo tumaa yootiyaanne taayyo loꞌꞌobaa amottiya mata dabbodan xeelliyaanaa? Tumuppe loꞌꞌobaanne ufayssaa demissiyaabaa i tana mule diggennaagaa wozanappe ammaniyaanaa?’ (Isiyaasa 48:17, 18 nabbaba.) Neeni ha oyshata wozanappe ee gaada zaaranau, Yihoowa loyttada erana koshshees. Geeshsha Maxaafan deꞌiya higgetinne baaso siraatati Yihooway nena laꞌatettaa digganau koyiyoogaa gidennan, i ubba nena siiqiyoogaa qonccissiyoogaa neeni akeekana koshshees.—Maz. 25:14.

AADHIDA ERATETTAANNE AZAZETTIYA WOZANAA DEMMANAU WOOSSA

10. Nuuni yelaga Kawuwaa Solomona leemisuwaa kaallanau baaxetana koshshiyoy aybissee?

¹⁰ Solomoni yelagatettan deꞌiyo wode bana kawushshidi, “Taani guutta na7a gidiyo gishshau, asaa waata kaalettanaakko taani erikke” yaagidi woossiis. Yaagi simmidi, aadhida eratettaanne azazettiya wozanaa demmanau woossiis. (1 Kaw. 3:7-9, 12) Yihooway i wozanappe woossido woosaa siyiis, qassi neeni yelaga gidin cima gidin, i ne woosaakka siyana. Yihooway nena sohuwaara akeekanchanne aadhida erancha oottennaagee qoncce. SHin neeni Geeshsha Maxaafaa minnada xannaꞌiyaaba, geeshsha ayyaanaa demmanau woossiyaabanne Kiristtaane gubaaꞌiyaa baggaara demmiyo kaaletuwaanne timirttiyaa oosuwan peeshshiyaaba gidikko, i nena aadhida erancha oottana. (Yaaq. 1:5) Yihooway baayyo azazettennaageetu ubbaappe, ubba ha alamiyan ‘aadhida eranchanne akeekancha’ geetettiyaageetuppekka aaruwan, ba ashkkarata ubba yelagatakka aadhida erancha oottees.—Luq. 10:21; Mazamure 119:98-100 nabbaba.

11-13. (a) Mazamure 26:4ppe, Leemiso 13:20ppenne 1 Qoronttoosa 15:33ppe nuuni tamaarana danddayiyo goꞌꞌiyaabay aybee? (b) Ha xiqisetun deꞌiya baaso siraataa waatada oosuwan peeshshuutii?

¹¹ Nuuni Yihoowa loytti eranau Geeshsha Maxaafaa xannaꞌiyoogeenne nabbabidobaa wotti dentti qoppiyoogee maaddiyoogaa bessiya, kaallidi deꞌiya xiqiseta qoppa. He xiqisetu ubban nuuni laggeta dooriyo wode keehippe maaddiya baaso siraatay deꞌees: “Taani cimmiya asatuura issippe uttikke; lo77o milatiya iitatu maabaran gelikke.” (Maz. 26:4) “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees.” (Lee. 13:20) “Iita laggetettai lo77o hanotettaa moorees.”—1 Qor. 15:33.

¹² He xiqisetuppe tamaarana danddayiyo goꞌꞌiya timirttee aybee? (1) Yihooway nuuni nu laggeta akeekan dooranaadan koyees. I nuna kandduwaabaaninne ayyaanaaban iitabaappe naaganau koyees. (2) Nu laggeti nuna loꞌꞌobau woy iitabau denttettoosona; hegee wottin deꞌiyaaba. He xiqisetun deꞌiya qaalati Yihooway nu wozanaa denttettanau koyiyoogaa bessoosona. He xiqisetuppe awugeenne “yaata” woy “yaatoppa” giya higge gidennaagaa akeeka. Hegaappe dumma ogiyan, eti tumay aybakko qonccissoosona. Hegee, Yihooway nuna, ‘Tumay hagaa. Neeni waatuutii? Ne wozanan deꞌiyaabay aybee?’ yaagees giyoogaa mala.

¹³ Wurssettan, ha heezzu xiqiseti tumaa yootiyo gishshau, eti awudenne laamettokkona, qassi darobau goꞌꞌoosona. Leemisuwau, kaallidi deꞌiyaagaa mala oyshaa nena oycha: Taani ‘loꞌꞌo milatiya iita’ asatuura wodiyaa aattennaadan naagettana danddayiyoy ayba ogiyaanee? Taani he asatuura gayttana danddayiyoy ayba hanotatuunee? (Lee. 3:32; 6:12) Yihooway taani etaara wodiyaa aattanaadan koyiyo “aadhdhida eranchcha” asati oonee? I taani etappe haakkanaadan koyiyo “eeyya” asati oonee? (Maz. 111:10; 112:1; Lee. 1:7) Taani iita laggeta dooriyo wode moorettiya ‘loꞌꞌo hanotettay’ aybee? Taayyo iita lagge gidanay alamiyaa asaa xalaalee? (2 PHe. 2:1-3) Ha oyshata woygada zaaruutii?

14. Intte So Asaa Goynuwaa omarssay kaseegaappe loꞌꞌo gidanaadan ay oottana danddayeetii?

¹⁴ Nenanne ne soo asaa qofissiyaaban Xoossaa qofay aybakko akeekanau hara xiqiseta nabbabiyo wode, ha xiqisetu qofaa yereridoogaadan yererana danddayaasa.b Yelidaageetoo, hegaa mala qofaa intte So Asaa Goynuwaa omarssan tobbana danddayekketii? Hegaadan oottiyo wode, intte halchoy so asay ubbay Xoossaa higgeenne a baaso siraatay i nuna ay keena siiqiyaakko qonccissiyoogaa loytti akeekanaadaaninne nashshanaadan maaddanaassa gidiyoogaa akeekite. (Maz. 119:72) Hegaa mala xinaatee soo asay ubbay kaseegaappe aaruwan Yihoowakko shiiqanaadaaninne issoy issuwaara siiqettanaadan maaddees.

15. Neeni aadhida eranchanne azazettiyaagaa gidaydda deꞌiyaakkonne waatada akeekana danddayay?

¹⁵ Neeni aadhida eranchanne azazettiyaagaa gidaydda deꞌiyaakkonne waatada erana danddayay? Issi ogee, “Abeet ta Xoossau, taani neeni koyiyoogaa oottanau dosais; ne higgee ta wozanaa giddon de7ees” yaagida, Kawuwaa Daawita mala Yihoowau ammanettida, beni wode deꞌida asatu qofaara ne qofaa geeddarssiyoogaa. (Maz. 40:8) Hegaadankka, Mazamure 119 xaafidaagee, “Taani ne higgiyaa aiba siiqiyaanaa! Gallassaa kumettaa taani qoppiyoogee a” yaagiis. (Maz. 119:97) Neessi hegaa mala siiqoy deꞌanaadan minnada baaxetana koshshees. Neeni Geeshsha Maxaafaa minnada xannaꞌiyo, woossiyoonne wotta dentta qoppiyo wode, hegaa mala siiqoy minnees. Yihooway koyiyoobaa azazettiyoogee daro anjjuwaa demissiyoogaa ne deꞌuwan beꞌiyo wodekka he siiqoy minnees.—Maz. 34:8.

AYYAANAABAA LAꞌATETTAA NAAGANAU BAAXETA!

16. Tumuppe laꞌa gidanau baaxetiyo baaxiyan xoonanau nuuni ay akeekana bessii?

¹⁶ Asaa naati deꞌido wode ubban kawotettati laꞌatettau olettidosona. Yaatin, neeni ayyaanaabaa laꞌatettaa naagada deꞌanau hegaappe aaruwan baaxetana koshshennee? Ne morkketi Seexaanaanne woriyaaba gidida alamiyaa qofaa xalla gidennaagaa akeeka. Cimmiya wozanaa gujjin, ne nagarancha asatettaarakka baaxetana koshshees. (Erm. 17:9; Efi. 2:3) Gidoppe attin, Yihooway maaddin neeni he baaxiyan xoonana danddayaasa. Neeni Yihooway koyiyoobaa oottiyo wode ubban, guuxxiis giishin naaꞌꞌu anjjuwaa demmaasa. Koyruwan, Yihoowa wozanaa ufayssaasa. (Lee. 27:11) Naaꞌꞌanttuwan, Xoossay immido, “ailletettaappe kessiya bali bainna [higgee]” laꞌa kessana danddayiyoogaa ne deꞌuwan beꞌiyo wode, merinaa deꞌuwau efiya ‘xuntta ogiyaappe’ kiyennaadan yaa murttaasa. Sinttappe, Yihooway baassi ammanettidaageetussi immanau qaalaa gelido polo laꞌatettaa demmaasa.—Yaaq. 1:25; Maa. 7:13, 14.

17. Nuuni moorobaa oottiyo wode, hidootaa qanxxana koshshennay aybissee, qassi Yihooway nuna maaddiyoy ayba ogiyaanee?

¹⁷ Nuuni ubbay issi issitoo baliyoogee tuma. (Era. 7:20) Hegaadan haniyo wode, hidootaa qanxxoppa, woykko neeni aynne pattennabadan qoppoppa. Neeni balabaa oottikko, hegaa giigissanau cimatu maaduwaa oychanau koshshikkokka, bessiyaabaa ootta. Yaaqoobi, “[Eti] ammanuwan Xoossaa woossido woosai hargganchchaa pattana; Godaikka a harggiyaappe denttana; qassi nagara i oottidobaa gidikkokka Godai ayyo atto gaana” yaagiis. (Yaaq. 5:15) Ee, Xoossay tumuppe maariyoogaanne nenan loꞌꞌobaa beꞌidi gubaaꞌiyau nena ehiidoogaa mule dogoppa. (Mazamure 103:8, 9 nabbaba.) Neeni kumetta wozanaappe Yihoowayyo oottanau baaxetido peeshshan, i ubbatoo nena maaddana.—1 Odi. 28:9.

18. Nuuni Yohaannisa 17:15n deꞌiya, Yesuusa woosaara moggiyaabaa oottana danddayiyoy ayba ogiyaanee?

¹⁸ Yesuusi ammanettida ba kiittido 11tuura saꞌan deꞌido wurssetta qammi eta gishshaa woossiiddi, “Neeni xalahiyaappe eta naagana mala [woossays]” yaagiis. Hegee awudenne hassayiyooba. (Yoh. 17:15) Yesuusi ba kiittidoogeetu xallaassi gidennan, bana kaalliya ubbaassi qoppees. Hegaa gishshau, ha wayssiya wodiyan nuna naagiyoogan Yihooway Yesuusa woosaa siyanaagaa ammanettana danddayoos. “Boree bainnan hemettiyaageetassikka [Yihooway] gonddalle. . . . Ba ammanettiyaageetu ogiyaakka naagees.” (Lee. 2:7, 8) Boree baynnan hemettiyoogee metiyaaba gidiyoogee tuma, shin merinaa deꞌuwau efiyaanne tumuppe laꞌa kessiya ogee hegaa xalaala. (Roo. 8:21) He ogiyaappe kiyanaadan ooninne nena balettana mala paqqadoppa!

[Tohossa qofata]

[Sinttaa 19n deꞌiya misiliyaa qonccissuwaa]

Nuuni ha wodiyan Abeselooma mala asaa shaakki erananne etappe naagettana danddayiyoy ayba ogiyaanee?