TIMIRTTE 41
Geeshsha Maxaafay Inddaa Gaytettaabaa Woygii?
Daro asay inddaa woy asho gaytettaabaa haasayanawu yayyees. Gidikkonne, Geeshsha Maxaafay inddaa gaytettaabaa aynne genttennan bonchchuwan yootees. I yootiyoobay nuna goꞌꞌiyaaba. Geeshsha Maxaafay nuna Medhdhida Yihoowa imota gidiyo gishshawu, hegaadan giyoogee bessiyaaba. Yaatiyo gishshawu, nuussi aybi keehi loꞌꞌokko Yihoowi erees. A ufayssanawu oottana koshshiyaabaanne merinawu ufayttidi deꞌanawu maaddiyaabaa I nuussi yootees.
1. Inddaa gaytettaa Yihoowi waati xeellii?
Inddaa gaytettay Yihoowa imota. Inddaa gaytettan azinaynne machchiyaa ufayttanaadan I koyees. He imotay azinaynne machchiyaa naata yelanaadan oottees; hegaa xalla gidennan, eti siiqettiyoogaa ufayssiya ogiyan bessanaadankka oottees. Xoossaa Qaalay, “Yelagatettan neeni ekkido ne maccaaseera ufaitta” giyoy hegaassa. (Leemiso 5:18, 19) Yihoowi aqo oyqqida Kiristtaaneti bantta aqo laggiyawu ammanettanaadan koyiyo gishshawu, eti mule wodiraa laammokkona.—Ibraawe 13:4 nabbaba.
2. Bessenna inddaa gaytettay aybee?
Geeshsha Maxaafay, “SHaaramuxana qaaqqatiyaageeti . . . Xoossaa kawotettaa laattokkona” yaagees. (1 Qoronttoosa 6:9, 10) Bessenna inddaa gaytettaabaa qonccissanawu Giriikettuwan Geeshsha Maxaafaa xaafidaageeti porniyaa giya qaalaa goꞌettidosona. Ha qaalay (1) aqo oyqqibeennaageeti, (2) attumay attumaara maccay maccaara inddan gayttiyoogaa, qassi (3) asay mehiyaara gayttiyoogaakkaa bessiyaaba. Nuuni “SHaaramuxiyoogaa muleera [aggiyo]” wode Yihoowi ufayttees, nuunikka goꞌettoos.—1 Tasalonqqe 4:3.
LOYTTA AKEEKA
Neeni bessenna inddaa gaytettaa gayttennaadan waatanaakko, qassi ne kanddoy awudenne geeshsha gidiyoogee nena waati goꞌꞌiyaakko akeeka.
3. Bessenna inddaa gaytettaappe baqata
Yooseefi banaara zinꞌꞌanawu koyida maccaaseeyyo eeno gibeenna. Doomettaabaa 39:1-12 nabbabite; yaatidi ha oyshata tobbite:
Yooseefi baqatanaadan oottidabay aybee?—Paydo 9 xeella.
Yooseefi loꞌꞌobaa kuuyiis gaada qoppay? Aybissi?
Ha wodiyan deꞌiya yelagati bessenna inddaa gaytettaappe Yooseefaagaadan waani baqatana danddayiyoonaa? BIIDUWAA beꞌite.
Yihoowi bessenna inddaa gaytettaappe nuuni ubbay baqatanaadan koyees. Koyro Qoronttoosa 6:18 nabbabite; yaatidi ha oyshata tobbite:
Issi uri bessenna inddaa gaytettaa gayttanaadan oottana danddayiya hanotati aybee?
Bessenna Inddaa gaytettaappe neeni waana baqatana danddayay?
4. Neeni paacciyaabaa eqettana danddayaasa
Bessenna Inddaa gaytettawu paacciyaabaa eqettiyoogee metanaadan oottana danddayiyaabay aybee? BIIDUWAA beꞌite; yaatidi kaallidi deꞌiya oyshaa tobbite.
Biiduwan beꞌido ishay I qoppiyoonne oottiyo issi issibay ba keettaayeessi ammanettennaadan oottanaagaa akeekidi waatidee?
Issi issitoo ammanettida Kiristtaanetikka geeshshabaa qoppanawu metootoosona. Neeni ubbatoo bessennabaa qoppennaadan waatana danddayay? Piliphphisiyuusa 4:8 nabbabite; yaatidi ha oyshata tobbite:
Nuuni qoppana koshshiyaabati awugeetee?
Geeshsha Maxaafaa nabbabiyoogeenne minnidi Yihoowawu oottiyoogee nagaraa oottanaadan paacciyaabaa eqettanawu waati maaddii?
5. Yihoowi yootiyo maaray nuna goꞌꞌees
Nuussi keehi loꞌꞌobay aybakko Yihoowi erees. I nu kanddoy awudenne geeshsha gidanaadan nuuni oottanabaanne hegaa goꞌꞌaa yootiis. Leemiso 7:7-27 nabbabite; woy BIIDUWAA beꞌite; yaatidi kaallidi deꞌiya oyshata tobbite.
Issi yelagay waani paaciyan gelidee?—Leemiso 7:8, 9 xeella.
Leemiso 7:23, 26y yootiyoogaadan, bessenna inddaa gaytettay keehi qohana danddayees. Nuuni kandduwan awudenne geeshsha gidiyoogee ayba metuwaappe ashshii?
Nuuni kandduwan geeshsha gidiyoogee merinawu ufayttidi deꞌanawu waati maaddii?
Issi issi asay Geeshsha Maxaafay attumay attumaara maccay maccaara inddan gayttiyoogaa xeelliyaagan yootiyoobay Xoossay siiqennaagaa bessiyaaba giidi qoppees. SHin siiqiya Xoossay Yihoowi asa ubbay merinawu ufayttidi deꞌanaadan koyees. Hegawu nuuni Yihoowi yootiyo maaraadan deꞌana bessees. Koyro Qoronttoosa 6:9-11 nabbabite; yaatidi ha oyshaa tobbite:
Xoossay bessennaba ootti xeelliyoy attumay attumaara maccay maccaara zinꞌꞌanawu qaaqqatiyo qaaqqaa xallee?
Nuuni ubbay Xoossaa ufayssanawu laamettana koshshees. Hegawu baaxetiyoogee bessiyaabee? Mazamure 19:8, 11 nabbabite; yaatidi ha oyshata tobbite:
Kandduwaaban Yihoowi yootiyo maaray bessiyaaba gaada qoppay? Aybissi?
Yihoowi kandduwaaban I yootido higgiyaa azazettanaadan darota maaddiis. I nenakka maaddana
ISSI ISSI ASAY HAGAADAN GEES: “Siiqettiya asati ooninne inddan gayttiyoogan bali baa.”
Woygada zaaruutee?
AY AKEEKADII?
Azinay ba machcheera zinꞌꞌiyoogee eti ufayttanaadan Yihoowi immido imota.
Zaaretuwaa
Inddan gayttiyo bessenna gaytettati aybee aybee?
Inddan bessenna gaytettaa gayttennaadan nuna aybi maaddanee?
Kandduwaaban Yihoowi yootido maaraa azazettiyoogee nuna waati goꞌꞌii?
PILGGA
Xoossay issippe deꞌanawu koyiya attumaageenne maccaara aqo oyqqanaadan koyiyoy aybissakko akeeka.
“Aqo Oyqqennan Issippe Deꞌiyoogaa Xeelliyaagan Geeshsha Maxaafay Woygii?” (Nu websaytiyan deꞌiyaaba)
Geeshsha Maxaafay attumay attumaara maccay maccaara zinꞌꞌiyoogaa bala giyoogee, hegaadan oottiya asata nuuni ixxana koshshees giyoogaa gidennay aybissakko akeeka.
“Attumay Attumaara Maccay Maccaara Zinꞌꞌiyoogee Balee?” (Nu websaytiyan deꞌiyaaba)
Xoossay inddaa gaytettaa ubbawu kessido higgee nuna waati naagiyaakko akeeka.
“Doonaara Gayttiyoogee Tumu Inddaa Gaytettee?” (Nu websaytiyan deꞌiyaaba)
Xoossa ufayssanawu laamettanaadan, attuma asaara inddan gayttiya issi bitaniyaa aybi denttettidaakko akeekanawu, “Tana Bonchchidosona” giyaagaa xeella.
“Geeshsha Maxaafay Asay Laamettanaadan Oottees” (Wochchiyo Keelaa huuphe yohuwaa)
a Maccay attumaara gayttiyoogee, doonaara woy dulliyaara gayttiyoogee, qassi issi uraa attumatettaa woy maccatettaa sohiyoogeenne hegaa malabay bessenna he gaytettaa qonccissiyaabata.