Dabloosanne A Cimo Oosuwaa Eqetta

1, 2. Xinqqatiyaa wode ufayttiyaageeti oonee?

NEENI daro layttatussi Yihoowayyo oottaydda takkidaba gidikko, Yihoowa Markkatu gita shiiqotun xmmaqettiyaageetussi shiiqiya haasayaa darotoo siyidoogau siree baawa. Hegaa mala sohuwan neeni beettido wodee ay keena gidikkonne, he shiiquwan xammaqettanau sintta maaran uttidaageeti, qaalaa gelanau denddi eqqiyaageeta beꞌiyo wode ubban, neessi haꞌꞌikka koyroogaadan siyettana danddayees. He wodiyan, shiiquwaa sohuwan beettida ubbay keehippe ufayttees. Hegaa kaallidi asay wozanappe ufayttidi kushiyaa baqqiyoogee siyettees. Yihoowa miyyiyan eqqanu doorida hara alꞌꞌo asatu citaa neeni beꞌiyo wode, ne ayfiyan afuttay yooli yoolana danddayees. Hegaa mala wodee ayba ufayssiyaabee!

² Layttaa giddon nu heeran shiiqiyo amarida shiiqotun xinqqatiyaa beꞌana danddayoos. SHin, kiitanchati hegaa malabaa daruwaa beꞌana danddayoosona. Alamiyaa yuushuwan saaminttan saaminttan shaꞌan qoodettiya asay Yihoowa dirijjitiyau beettiya baggaa yame gididi gujettiyoogaa beꞌiyo wode, “saluwan de7iyaageeti” ay keena ufayttiyaakko qoppana danddayay? (Luqaasa 15:7, 10) Hegaa keena asay gujettidoogan, kiitanchati keehippe ufayttiyoogau siree baawa!—Hagga 2:7.

DABLOOSI “GUDIYA GAAMMODAN GUDIIDDI” YUUYEES

3. Seexaanay “gudiya gaammuwaadan gudiiddi” yuuyiyoy aybissee? I ay oottanau koyii?

³ Gidoppe attin, hara baggaara he xinqqate wodetun yiillotiya ayyaana meretati deꞌoosona. SHaꞌan qoodettiya asati ha moorettida alamiyau zokkuwaa zaariyoogaa beꞌiyoogee, Seexaanaanne daydanttata yilloyees. Seexaanay otoruwan, Yihoowayyo siiquwan wozanappe oottiya asinne wolqqaama paacee gakkiyo wode ammanettidi eqqiya asi deꞌenna yaagido gishshau, Dabloosinne daydanttati hegaadan yiillotiyoogee erettidaba. (Iyyooba 2:4, 5) Asi ba huuphiyaa Yihoowayyo geppanau qofaa qachido paydo ubban, Seexaanay worddancha gidiyoogaa qonccissees. Hegee, saaminttan saaminttan shaꞌan qoodettiyaagaa keenaa Seexaanaa qinxxallee baqettees yaagiyoogaa mala. I “mittiyo uraa koyidi, gudiya gaammuwaadan gudiiddi” yuuyiyoogee garamissiyaaba gidenna. (1 PHeexiroosa 5:8) Ha ‘gaammoy,’ nuuni Xoossaara medhido dabbotaa mooridi woykko ubba duuttidi nuna ayyaana hanotan mittanau yeemottees.—Mazamure 7:1, 2; 2 Ximootiyoosa 3:12.

4, 5. (a) Yihooway Seexaanaa qohuwaappe nuna naagiyo naaꞌꞌu waanna ogeti awugeetee? (b) Issi tumu Kiristtaanee aybin ammanettana danddayii?

⁴ Nuussi iita morkkee deꞌiyaaba gidikkonne, yashshan baqibaqiyo gaasoy baawa. Ayssi giikko, Yihooway he ‘gudiya gaammoy’ nuna qohennaadan teqqiyo naaꞌꞌu waanna ogeti deꞌiyo gishshataassa. He naaꞌꞌu ogeti awugeetee? Koyroy, tumu Kiristtaane gidida ‘zawi baynna daro asay’ ‘daro waayiyaappe’ attanaagaa Yihooway kasetidi yootiis. (Ajjuutaa 7:9, 14) Xoossaa hiraagay polettennan mule attenna. Yaatiyo gishshau, Xoossaa asaa ubbaa qohana danddayennaagaa Seexaanay ba huuphe erana bessees.

⁵ Dabloosi nuna qohennaadan Yihooway teqqiyo naaꞌꞌantto ogee qassi, beni wode deꞌida ammanettida, Xoossaa asatuppe issoy yootido tuman qoncciis. Hananabaa yootiya Azaariyaasi Kawuwaa Asayyo: “Intte GODAARA issippe de7iyo keena ubban ikka inttenaara de7ees” yaagiis. (2 Hanidabaa Odiya 15:2; 1 Qoronttoosa 10:12, 13) Geeshsha Maxaafan xaafettida daro leemisoti, Xoossaakko matattidi deꞌida beni wode ashkkaratuppe oonanne Seexaanay xayssanau danddayibeennaagaa qonccissoosona. (Ibraawe 11:4-40) Ha wodiyankka, Xoossaakko matattidi deꞌiya issi Kiristtaanee Dabloosa eqettanaunne ubba xoonanaukka danddayees. Xoossaa Qaalay: “[Dabloosa] teqqite; i intteppe baqatana” yaagidi nuna minttettees.—Yaaqooba 4:7.

‘NUUNI IITA AYYAANAA WOLQQATUURA OLETTOOS’

6. Seexaanay Kiristtaanetuura huuphiyan huuphiyan olettiyoy ayba ogiyaanee?

⁶ Seexaanay he olan xoonenna; shin issi uri gittaa lepissikko, he uraa xoonana danddayees. Seexaanay nuussi Yihoowaara deꞌiya dabbotaa irxxissana danddayikko, nuna xoonana danddayiyoogaa erees. I hegaa oottanau maliyoy ayba ogiyaanee? Wolqqaama qohuwaa gattiyoogaana, huuphiyan huuphiyan nunaara baaxetiyoogaananne geema gidida ogiyan qohiyoogaana. Seexaanay goꞌettiyo ha waanna ogeta ane beꞌoos.

7. Seexaanay Yihoowa asaa bolli wolqqaama qohuwaa gattiyoy aybissee?

⁷ Wolqqaama qohuwaa. Kiitettida Yohaannisi: ‘Ha mule saꞌaykka xalahe halaqan haarettees’ yaagiis. (1 Yohaannisa 5:19) Hegee tumu Kiristtaaneti ubbay naagettanaadan imettida seera. Seexaanay iita gidida, asaa naatu alamiyaa kumettaa haariyo gishshau, haꞌꞌi hanno gakkanaashin ba kushiyan gelibeenna Yihoowa asatu bolli xeelaa wottidi, olaa minttana danddayees. (Mikkiyaasa 4:1; Yohaannisa 15:19; Ajjuutaa 12:12, 17) Baayyo attida wodee guutta gidiyoogaa eriyo gishshau keehippe hanqqettiis. Yaatiyo gishshau, i gattiyo qohoy keehippe gujjiis. Ha wodiyan i Yihoowaara deꞌiya nu dabbotaa duuttanau wurssetta camo baaxiyaa baaxetiiddi deꞌees. Yaatiyo gishshau, nuuni awudeegaappenne aaruwan “ai oottanau bessiyaakko, wodiyaabaa shaakki eriya akeekanchcha” asa gidanau koshshees.—1 Hanidabaa Odiya 12:32.

8. Kiitettida PHauloosi nuuni iita ayyaanatuura ‘olettiyoogaa’ yootido wode woyganau koyidee?

⁸ Huuphiyan huuphiyan baaxetiyoogaa. Kiitettida PHauloosi ba mala Kiristtaaneta, “nuuni saluwaa sohuwan de7iya iita ayyaana wolqqatuura” olettoos yaagidi akeekissiis. (Efisoona 6:12) “Olettiyoogaa” geetettidi birshshettida Giriiketto qaalay “baaxetiyoogaa” yaagiyoogaa. Hegee issoy issuwaara kushiyan oyqettidi baaxetiyoogaa malaatees. Yaatiyo gishshau, PHauloosi he qaalaa goꞌettidi nuuni huuphiyan huuphiyan iita ayyaanatuura baaxetiyoogaa qonccissiis. Nuuni deꞌiyo biittan iita ayyaanan ammaniyoogee erettidaba gidin woy aggin, nu huuphiyaa Yihoowayyo geppido wodiyaappe doommidi baaxiyaa dembban deꞌiyoogaa mule dogana koshshenna. Issi Kiristtaanee, guuxxiis giishin ba huuphiyaa geppoosappe doommidi he baaxiyan geliyoogee attennaba. PHauloosi Efisoona Kiristtaaneta ‘minni eqqanaadan’ zaari zaari zoridoogee garamissiyaaba gidenna.—Efisoona 6:11, 13, 14.

9. (a) Seexaanaynne daydanttati cora qommo “iita cimuwaa” goꞌettiyoy aybissee? (b) Seexaanay nu qofaa mooranau baaxetiyoy aybissee? Nuuni a baaxiyaa waatidi eqettana danddayiyoo? (Sinttaa 192-3n deꞌiya saaxiniyaa xeella.) (c) Nuuni kallidi beꞌana iita cimoy awugee?

⁹ Geema hiillaa. PHauloosi Kiristtaaneti Seexaanaa “iita cimuwaa” teqqanau minnidi eqqana mala zoriis. (Efisoona 6:11) Iita cimuwaa geetettidaagee issibaa xalla gidennan corabaa malaatees. Iita ayyaanati issuwaa xalla gidenna cora hiillaa goꞌettiyoogau mino gaasoy deꞌees. Issi qommo paaciyaa xoonida issi issi Kiristtaaneti, hara wodiyan hara qommo paaciyan xoonettidosona. Hegaa gishshau, Dabloosinne daydanttati, nu pacaa shaakki eranau nu ubbaa eeshshaa minttidi xeelloosona. Yaati simmidi, nu pacaa goꞌettidi, Xoossaara deꞌiya nu dabbotaa mooroosona. Gidikkonne, Dabloosi goꞌettiyo hiillati Geeshsha Maxaafan qonccido gishshau, eta erana danddayoos; hegee Yihoowa galatana bessiyaaba. (2 Qoronttoos 2:11) Aquwaa siiqiyoogaa, qohiya laggetettaanne tuna asho gaytotettaa milatiya hiillata kasetidi ha maxaafan beꞌida. Seexaanay goꞌettiyo iita cimotuppe issuwaa ane beꞌoos; hegeekka, iita ayyaanaa oosuwaa.

IITA AYYAANAA OOSUWAA OOTTIYOOGAA—KADDIYOOGAA

10. (a) Iita ayyaanaa oosoy aybee? (b) Iita ayyaanaa oosuwaa Yihooway waati xeellii? Neeni shin waata xeellay?

¹⁰ Iita ayyaanaa oosuwaa oottiyoogan, issi uri iita ayyaanatuura gayttees. Iita ayyaanaa oosotuppe issoti issoti bitiyoogaa, shareechiyoogaa, daggamiyoogaanne hayqqida asaa ayyaanaa xeegiyoogaa. Nuuni ubbay eriyoogaadan, Yihooway iita ayyaanaa oosuwaa ‘ixxees.’ (Zaarettido Wogaa 18:10-12; Ajjuutaa 21:8) Nuunikka ‘iitabaa ixxana’ koshshiyo gishshau, iita ayyaanatuura dabbotiyoogee mule qoppanaukka bessennaba. (Roome 12:9) Hegaadan oottiyoogee, saluwan deꞌiya nu Aawaa, Yihoowa kaddiyoogaa bessiya iita ooso.

11. Seexaanay nuuni iita ayyaanaa oosuwaa oottanaadan cimmikko, hegee ayyo gita xoono gidiyoy aybissee? Leemisuwan yoota.

¹¹ Gidikkonne, iita ayyaanaa oosuwaa oottiyoogee Yihoowa kaddiyo iita ooso gidiyoogaa Seexaanay eriyo gishshau, nu giddoppe issota issota hegaa ootissanau baaxetees. Issi Kiristtaaniyaa iita ayyaanaa oosuwaa ootissiyo wode ubban, Seexaanay gita xoonuwaa demmees. Aybissi? Ane hegaara gatti xeellanau maaddiya issibaa qoppa: Issi wotaaddaray ba baggan deꞌiya olanchata kaddidi morkke olanchatuura walahettanau cimettikko, morkke olanchatu halaqay ufayttees. He kaddida wotaaddaraa kase halaqaa cayanau, woyto demmidabadan, ubba a asaa bessana danddayees. Hegaadankka, issi Kiristtaanee iita ayyaanaa oosuwaa oottikko, eriiddi ba koshshan Yihoowa aggidi, Seexaanan haarettanau bana aattidi immees. Seexaanay he kaddida uraa olan demmido woyto oottidi harata bessiyoogan ay keena ufayttanaakko qoppa! Dabloosi hegaa mala xoonuwaa demmanaadan koyiyay nuuppe deꞌii? Ooninne baawa! Nuuni kaddiyaageeta gidokko.

SIRIYAA MEDHANAU OYSHAA DENTTIYOOGAA

12. Iita ayyaanaa oosuwaa nuuni xeelliyo xeelaa mooranau Seexaanay ay hiillaa goꞌettii?

¹² Nuuni iita ayyaanaa oosuwaa ixxiyaageeta gidikko, Seexaanay hegaa goꞌettidi nuna xoonenna. Yaatiyo gishshau, i nu qofaa laamissana koshshiyoogaa akeekees. Waatidi? I Kiristtaanetuppe issoti issoti “iitaa lo77o lo77uwaa iita” giidi qoppanaadan oottiyo ogiyaa koyees. (Isiyaasa 5:20) Hegaadan oottanau, kase goꞌettidi murutido hiillatuppe issuwaa zaaretti goꞌettees. Hegeekka, siriyaa medhanau oyshaa denttiyoogaa.

13. Seexaanay oyshaa denttiyo hiillaa siriyaa medhanau waatidi goꞌettidee?

¹³ Seexaanay kase wode he hiillaa waatidi goꞌettidaakko akeeka. Edenen Hewaano: “Xoossai tumu inttena, Gannatiyan de7iya mitta teeraa ubbaappekka mooppite giidee?” yaagidi oychiis. Iyyooba wode, Seexaanay saluwan kiitanchatuura shiiqidi: “Tumu Iyyoobi [Xoossaayyo] coo yayyii?” yaagiya oyshaa denttiis. Qassi Yesuusi saꞌan haggaazuwaa doommido wode, Seexaanay Kiristtoosa: “Neeni Xoossaa Na7a gidikko, ane ha shuchchati oitta gidana mala azaza” yaagidi paacciis. Yesuusaara gayttidaagan, usuppun saaminttaappe kase Yihooway ba huuphe: “Taani siiqiyo ta Na7ai, tana ufaissiyaagee hagaa” yaagido qaalaa Seexaanay qilliiccanau xalidoogaa qoppa!—Doomettaabaa 3:1; Iyyooba 1:9; Maatiyoosa 3:17; 4:3.

14. (a) Iita ayyaanaa oosuwaa xeelliyaagan, Seexaanay siriyaa medhiyo hiillaa waati goꞌettii? (b) Haꞌꞌi ay beꞌanau deꞌiyoo?

¹⁴ Ha wodiyankka, Dabloosi iita ayyaanaa oosoy iita gidiyoogaa siranaadan oottanau hegaa mala hiillaa goꞌettees. I issi issi Kiristtaaneta siranaadan oottidi xoonidoogee azzanttiyaaba. Eti issi issi iita ayyaanaa oosoti tumu iita gidiyoogaa siriyoogaa doommidosona. Hegee, eti ‘tumu hegaadaanee?’ giidi qoppoosona giyoogaa mala. (2 Qoronttoosa 11:3) Hegaa mala asati bantta qofaa laammanaadan waati maaddana danddayiyoo? Nuuni Seexaanaa cimuwan balettennaagaa waanidi ammanettana danddayiyoo? He oyshata zaaranau, Seexaanay iita ayyaanaa oosuwan hambbalaashidoogee qoncciyan erettenna, naaꞌꞌu deꞌo macarata ane beꞌoos. Hegeeti wodiyaa aattiyoobatanne payyatettaa naagiyo ogeta.

NUUNI KOYIYOOBATANNE NUUSSI KOSHSHIYAABATA GOꞌETTEES

15. (a) Amarkkaaninne Awurooppan deꞌiya daroti iita ayyaanaa oosuwaa waati xeelliyoonaa? (b) Alamee iita ayyaanaa oosuwaa xeelliyo ogee issi issi Kiristtaaneta waatidi bochidee?

¹⁵ Huuphessa Amarkkaaninne Awurooppan murunniyoogee, shareechiyoogeenne hara qommo iita ayyaanaa oosoti qohennabadan xeelettiyo hanotay gujji gujji biis. Pilmeti, maxaafati, televizhiiniyaa prograametinne kompputeriyan kaaꞌiyoobati iita ayyaanaa oosota miicciyoobadan, eratettadaaninne qohennabadan bessiyoogee gujji gujji biis. Iita ayyaanaa oosotuura gayttida taariketi deꞌiyo issi issi pilmetinne maxaafati keehippe erettidoogaappe denddidaagan, hegaa malabata dosiyaageeti issippe shiiqidi hegeetun miicciyo mabaraa essidosona. Daydanttati iita ayyaanaa oosuwaa qohennaba milatissiyoogan murutidoogee qoncce. Iita ayyaanaa oosuwaa qohennabadan xeelliyo he hanotay Kiristtaanetakka bochidee? Issotu issotu qofay moorettiis. Ayba ogiyan? Hegaara gayttida issi leemisuwaa beꞌana danddayoos. Issi Kiristtaanee iita ayyaanaa oosuwaara gayttida issi pilmiyaa beꞌidi, “Pilmiyaa beꞌaas shin, iita ayyaanaa oosuwaa oottabeykke” yaagiis. Hegaadan qoppiyoogee iitaba gididoy aybissee?

16. Iita ayyaanaa oosuwaara gayttida, wodiyaa aattiyoobaa dooriyoogee iita gididoy aybissee?

¹⁶ Iita ayyaanaa oosuwaa oottiyoogaaninne hegaa oottishin beꞌiyoogan dummatettay deꞌiyaaba gidikkonne, iita ayyaanaa oosuwaa beꞌiyoogee qohenna giyoogaa gidenna. Aybissi? Xoossaa Qaalay, Seexaanay gidin daydanttatikka gidin, nuuni qoppiyoobaa erana danddayennaagaa yootiyoogaa akeeka.a Yaatiyo gishshau, kasetidi nuuni beꞌidoogaadan, iita ayyaanati nuuni qoppiyoobaanne ayyaanaaban nuuyyo deꞌiya pacaa eranau, nu hanotaa akeekan xeelloosona. Hegee nuuni wodiyaa aattanau dooriyoobaa gujjees. Issi Kiristtaanee, iita ayyaanatuura gayttiyoogaa, daggamiyoogaa, daydanttatu wolqqan oottiyoobaa woykko hegaa mala iita ayyaanaa oosota, pilmiyan beꞌiyoogan woykko maxaafan nabbabiyoogan ufayttiyoogaa a hanotay bessiyaaba gidikko, daydanttatuyyo issibaa malaatiiddi deꞌees. Hegee baayyo deꞌiya pacaa eta akeekissiyoogaa mala. Daydanttati hegaa akeekidi, ayyo deꞌiya pacaa goꞌettidi, he Kiristtaaniyaa ooggana gakkanaashin wolqqappe baaxetoosona. Issoti issoti iita ayyaanaa oosotuura gayttidoogan erettida, wodiyaa aattiyoobatun koyro bantta koshshaa denttettidi, wurssettan iita ayyaanaa oosuwaa oottiyaageeta gidoosona.—Galaatiyaa 6:7.

17. Seexaanay sahettiyaageeta ba kushiyan gelissanau ayba iita cimuwaa goꞌettii?

¹⁷ Seexaanay nu qofaa mooranau, wodiyaa aattanau koyiyo koshshaa xalaala gidennan payyatettaa naaganau nuna koshshiyaabaakka goꞌettees. Waatidi? Issi sahettiya Kiristtaanee xale demmanau keehippe baaxetinkka harggee goobi goobi biikko, azzanana danddayees. (Marqqoosa 5:25, 26) Hegee Seexaanaynne daydanttati he uraa qohiyo injjiyaa demmanaadan oottees. ‘Iitabaa oottiyaageetu’ maaduwaa koyennaadan Xoossaa Qaalay seeriyoogaa daydanttati eroosona. (Isiyaasa 31:2) Daydanttati issi Kiristtaanee he seeraa naagennaadan oottanau, ba harggiyaabaa xallaa qoppiyoogan “asaagaappe bolla gidida wolqqaa” woykko iita ayyaanaa oosuwaa goꞌettidi xalettiyo ogiyaa koyanaadan paaccana danddayoosona. Hegee keehippe qohiyaaba. Daydanttati goꞌettiyo he iita cimoy eti koyidoogaadan polettiyaaba gidikko, he sahettiya urau Xoossaara deꞌiya dabbotay leppana danddayees. Ayba ogetun?

18. Issi Kiristtaanee aybiira gayttidabaa ixxana bessii? Aybissii?

¹⁸ “Asaagaappe bolla gidida wolqqaa” [NW] koyida Israaꞌeeleta, Yihooway: “Intte kushiyaa miccidi, intte woossiyo wode, taani ta aifiyaa intteppe genttana; intte daro woosaa woossikkokka, taani siyikke” yaagidi seeriis. (Isiyaasa 1:13, 15) Yihooway nu woosaa siyennaadaaninne appe maaduwaa demmennaadan oottiyaabaappe nuuni ubbatoo haakkana koyiyoogee qoncce. Sahettiyo wode hegaadan oottiyoogee ubba bessiyaaba. (Mazamure 41:3) Hegaa gishshau, maraamarettiyo woy akkamettiyo hanotaara gayttidaagan, iita ayyaanaa oosuwaara gayttidabi deꞌiyoogaa akeekikko, issi tumu Kiristtaanee hegaa ixxana bessees.b (Maatiyoosa 6:13) Hegaadan oottiyoogan, Yihooway a maaddiyoogaa ammanettana danddayees. Sinttaa 194n deꞌiya “Hagee Tumuppe Iita Ayyaanaa Oosoo?” yaagiya saaxiniyaa xeella.

DAYDANTTATUBAA YOOTIYO HAYSEE DARIYO WODE

19. (a) Dabloosi ba wolqaa xeelliyaagan daro asay woygidi ammananaadan eeyyettidee? (b) Tumu Kiristtaaneti haakkana bessiyo hayseti awugeetee?

¹⁹ Amarkkaaninne Awurooppaa bittatun deꞌiya daro asay Seexaanaa wolqqaa qoho gattennabadan xeelliyaaba gidikkonne, hara biittatun qassi hanotay hegaappe dumma. He biittatun, Dabloosi baayyo deꞌiya wolqqaappe aaroy deꞌiyaabadan ammananaadan oottidi darota eeyyettiis. Issoti issoti bantta galla galla duussaa ubban iita ayyaanata yayyidi deꞌoosona. Daydanttati wolqqaamabaa oottiyaabadan odiyo haysee keehi dariis. Darotoo hegaa mala haysiyaa yootiya asay ufayttiiddi yootees; siyiyaageetikka hegaa wudidi ezggoosona. Nuunikka hegaa mala hayseta haratussi yootana bessii? Akkay, tumu Xoossaassi haggaaziyaageeti hegaadan oottenna naaꞌꞌu waanna gaasoti deꞌoosona.

20. Issi uri akeekennan Seexaanaa qofaa aassiyaagaa waanidi gidana danddayii?

²⁰ Koyroy, daydanttati gitabaa oottidabadan odettiya haysiyaa aassiyoogan, issi uri Seexaanaa koshshaa polees. Waatidi? Seexaanay wolqqaamabaa oottana danddayiyoogaa Xoossaa Qaalay qonccissees; shin qassi i “worddo malaataanne” ‘iita cimuwaa’ goꞌettiyoogaakka akeekissees. (2 Tasalonqqe 2:9, 10) Seexaanay waanna balettiyaagaa gidiyo gishshau, iita ayyaanaa oosuwaa oottanau zuubbaridaageetu qofaa waatidi moorana danddayiyaakkonne tuma gidennabaa waatidi eta ammanttana danddayiyaakko erees. Hegaa mala asati bantta beꞌidonne siyido issi issibata tumubadan ammanidi haratuyyo yootoosona. Eti yootido haysee issoy harau yootishin takkiiddi, darobay gujettidoba gidees. Issi Kiristtaanee hegaa mala haysiyaa yootiyaaba gidikko, ‘wordduwau aawa’ gidida Dabloosa sheniyaa poliyaagaa gidees. He uri Seexaanaa qofaa aassiyaagaa gidees.—Yohaannisa 8:44; 2 Ximootiyoosa 2:16.

21. Nu haasayay ay xeelliyaagaa gidanaadan koyiyoo?

²¹ Naaꞌꞌanttoy, issi Kiristtaanee tumaa siyanaappe kase iita ayyaanatuura gayttiyaagaa gidikkokka, hara Kiristtaaneta miichanau hegaa malabaaraa gayttidabaa zaari zaari yootana bessenna. Aybissi? “Nuuni nu ammanuwau huuphenne polo gidiya Yesuusa” loytti xeellanaadan zoree imettiis. (Ibraawe 12:2) Ee, nuuni nu xeelaa wottana bessiyoy Kiristtoosaanappe attin Seexaanaana gidenna. Yesuusi Seexaanaa wolqqaabaa darobaa yootana danddayees; shin i saꞌan deꞌiyo wode ba erissiyo ashkkarata miichanaassi giidi, iita ayyaanatubaa yootibeennaagee akeekana bessiyaaba. Hegaappe, Yesuusi ba xeelaa wottidoy Kawotettaa kiitaana. Yaatiyo gishshau, Yesuusanne i kiittidoogeetu leemisuwaa kaalliyoogan, nuuni haratuura haasayiyoobay “Xoossai oottido gita oosuwaa” xeelliyaagaa gidanaadan koyoos.—Oosuwaa 2:11; Luqaasa 8:1; Roome 1:11, 12.

22. “Saluwan de7iyaageeti” ufayttanaadan ubbatoo ay oottana danddayiyoo?

²² Seexaanay nuuni Yihoowaara medhido dabbotaa duuttanau, iita ayyaanaa oosota gujjin, dumma dumma iita cimuwaa goꞌettees. Gidikkonne, iitabaa ixxiyoogaaninne loꞌꞌobaa minttidi oyqqiyoogan, nuuni iita ayyaanaa ooso qommo ubbaa ixxanau murttido murttiyan Dabloosi nuna shugissanaadan injjiyaa immokko. (Efisoona 4:27) Dabloosi xayana gakkanaashin a “iita cimuwaa” minni eqqidi teqqiyoogan sinttau sugiyaaba gidikko, “saluwan de7iyaageeti” ay keena ufayttanaakko qoppa!—Efisoona 6:11.