Yelagatoo Dabloosa Eqettite
“Xalahee halaqaa iita cimuwaa teqqanau intte danddayana mala, Xoossai intteyyo immiyo olaa maayo ubbaa maayite.”—EFI. 6:11.
1, 2. (a) Yelaga Kiristtaaneti iita ayyaana wolqqatuura olettidi xooniiddi deꞌiyoy aybissee? (Doomettan deꞌiya misiliyaa xeella.) (b) Nuuni beꞌanabay aybee?
KIRISTTAANETA kiitettida PHawuloosi olanchchatuura geeddarssiis. Nuuni ayyaanaaban olettoos. Gidikkokka, nuuyyo tumu morkketi deꞌoosona. Seexaanaynne daydanttati olaa eraynne daro wodiyaa meezee deꞌiyo olanchchata. Hegaa gishshawu, nuuni ubba qassi yelaga gidikko, he olan xoonennaba milatana danddayees. Yelagati he wolqqaama morkketa olan xoonana danddayiyoonaa? Ee, danddayoosona; qassi xooniiddi deꞌoosona! Aybissi? Eti ‘Godaaninne A gita wolqqan minnido’ gishshataassa. SHin eti Xoossaa wolqqaa demmiyoogaappe harabaakka oottidosona. Eti olawu gixxidosona. Eti olawu loytti loohida wotaaddaratudan, ‘Xoossay immiyo olaa maayo ubbaa maayidosona.’—Efisoona 6:10-12 nabbaba.
2 PHawuloosi ba leemisuwaa yootiyo wode, Rooma wotaaddarati maayiyo olaa maayuwaa qoppennan aggenna. (Oos. 28:16) Hegee bessiya leemiso gidiyoy aybissakko ane beꞌoos. Hegaa beꞌiyo wode, issi issi yelagati ayyaanaabaa olaa maayuwaa ubbaa maayennaadan paace gididabaanne he ubbaa maayidoogan goꞌettidobaa yootiyoobaa akeeka.
Ne Ola Miishshay Kumettee?
‘QABATTUWAA MALA TUMATETTAA’
3, 4. Geeshsha Maxaafan deꞌiya tumay waanidi Rooma wotaaddaratu qabattuwaa mala gidii?
3 Efisoona 6:14 nabbaba. Rooma wotaaddaratu xeessay qohettennaadan naagiya biratay eta qabattuwaa bolli deꞌees. He qabattoy appe qommoora deꞌiya ola miishshaa deexuwaappe shemppissanaadan giigiis. Qassi bisuwaanne cubiyaa qaphiyo mino biratay a bolli deꞌees. Issi wotaaddaray ba qabattuwaa mintti gixxidi olaa minnidi teqqana danddayees.
4 Hegaadan, nuuni Xoossaa Qaalaappe tamaariyo tumay worddo timirttee nuna ayyaanaaban qohennaadan naagees. (Yoh. 8:31, 32; 1 Yoh. 4:1) Qassi nuuni Xoossaa tumaa keehi siiqiyo wode, ‘tiran wottiyo miishshaa’ maayanawu, hegeekka Xoossay xillotettawu kessido maaraa naaganawu metootokko. (Maz. 111:7, 8; 1 Yoh. 5:3) Hegaa bollikka, Xoossaa Qaalan deꞌiya tumaa nuuni loytti akeekiyo wode, yeeqennan ammanettidi deꞌananne eqettiyaageetu sinttan he tumawu exatana danddayoos.—1 PHe. 3:15.
5. Nuuni tumaa haasayana koshshiyoy aybissee?
5 Nuuni Geeshsha Maxaafaa tumaa leemiso hanotan nu xeessan qabattodan qachikko hegaara maayettiya ogiyan deꞌoos; qassi ubba wodekka tumaa haasayoos. Nuuni worddotennay aybissee? Seexaanawu keehi ushachchanaadan oottida issi miishshay wordduwaa gidiyo gishshataassa. Worddoy yootiyaagaakka hegaa ammaniyaagaakka qohees. (Yoh. 8:44) SHin nuuyyo danddayettida peeshshan worddotennaadan naagettoos. (Efi. 4:25) SHin hegee wayssana danddayees. Abigaalo giyo 18 laytta naꞌiyaa, “Ubbatoo, ubba qassi worddotiyoogee iita hanotaappe kessiyaaba gidiyo wode, tumaa haasayiyoogee maaddiyaaba milatennan aggana danddayees” yaagaasu. Yaatin A ubbatoo tumaa haasayanawu ayssi baaxetay? A hagaadan gaasu: “Taani tumaa yootiyo wode ta kahay Yihoowa sinttan geeshsha. Qassi tana yelidaageetinne ta laggeti tana ammanana danddayiyoogaa eroosona.” Viktoriyo giyo 23 laytta naꞌiyaa hagaadan gaasu: “Neeni tumaa yootiyoonne ne ammaniyoobawu exatiyo wode, harati nenaara gaaddetana danddayoosona. SHin ubbatoo keehi loꞌꞌo goꞌꞌaa demmaasa: Yayyakka, Yihoowakko kaseegaappe aaruwan shiiqaasa, qassi nena siiqiyaageeti nena bonchchoosona.” Tumukka, “xeessan qabattuwaa gixxiyoogaadan tumatettaa” ubbatoo gixxiyoogee bessiyaaba.
Qabatto mala tumaa (Mentto 3-5 xeella)
‘TIRAN WOTTIYO MIISHSHA MALA XILLOTETTAA’
6, 7. Xillotettay tiran wottiyo ola maayuwan leemisettidoy aybissee?
6 Koyro xeetu layttan Rooma wotaaddaray tiran wottiyo ola maayotuppe issuwan adussa biratata issuwaa haraa miyyiyaa mayssi mayssi wottidoogee deꞌees. He biratata tiran wottanawu leeqqanttidi galbbaa bolli sikettida zalabata malabaara oyttoosona. Hegaadan galbbaara oyttido biratay wotaaddarawu xeessaappe qommo baggaa kammees. Hegaa mala maayoy wotaaddaray koyoogaadan qaaxerettennaadan guuttaa diggees, qassi biratati minni ohettidaakkonne ubbatoo xomoosana koshshees. Gidikkokka, wotaaddaraa wozanaa woy hara bolla qommuwaa bisoy woy zubbee caddennaadan he maayoy teqqees.
7 Hegee Yihooway kessido xillotettaa maaray nu leemiso wozanaa naagiyoogaa bessiya loꞌꞌo leemiso! (Lee. 4:23) Tiran wottiyo birataappe oosettidaagaa appe laafiyaaban issi wotaaddaray laammennaagaadan, nuuni goꞌettanaadan xillotettawu Yihooway kessido maaraa nu qoppiyooban mule laammokko. Nu qofay keehi bala gidiyo gishshawu, nuussi koshshiya naago demissenna. (Lee. 3:5, 6) Yihooway nuussi immido ‘biratati’ nu leemiso wozanaa bolli minni ohettidaakkonne nuuni ubbatoo xomoosoos.
8. Yihoowa maaraa mintti kaalliyoogee bessiyaaba gididoy aybissee?
8 Yihooway xillotettawu kessido maaray nena laꞌatettaa diggiyaabadan issi issitoo qoppay? Daaneela giyo 21 laytta naꞌay hagaadan giis: “Taani Geeshsha Maxaafaa maaraa kaalliyo gishshawu asttamaaretinne tanaara tamaariya naati ta bolli qilliiccoosona. Yaatin amarida wodiyawu hirggaasinne unꞌꞌettaas.” I zaarettidi waani minnidee? I hagaadan giis: “Yihoowa maaraa kaalliyoogaa goꞌꞌaa guyyeppe akeekaas. Ta lagge gidiyaageetuppe amaridaageeti jallissiyaabaa goꞌettiyoogaa doommidosona; harati qassi timirttiyaa aggibayidosona. Eta deꞌoy hanidobaa beꞌiyoogee azzanttiyaaba. Yihooway tumukka nuna naagees.” Madeseno giyo 15 laytta naꞌiyaa, “Yihoowa maaraa mintta naaganawunne ta lagge gidiya naati ufayssiyaabadan xeelliyoobaa kaallennan agganawu keehi baaxetaas” yaagaasu. A waanada genccadee? Hagaadan gaasu: “Taani Yihoowa sunttan xeesettiyoogaanne paacee Seexaanay ta bolli zambbiyooba gidiyoogaa hassayays. Baaxetada xooniyo wode, taban kaseegaappe ufayttays.”
Tiran wottiyoobaa mala xillotettaa (Mentto 6-8 xeella)
‘TOHUWAN CAAMMAA WOTTIYOOGAADAN MISHIRAACHCHUWAA YOOTANAWU GIIGIYOOGAA’
9-11. (a) Kiristtaaneti wottiyo leemiso caammay aybee? (b) Nuuni mishiraachchuwaa ufayttiiddi yootanaadan maaddiyaabay aybee?
9 Efisoona 6:15 nabbaba. Ba caammaa wottibeenna Rooma wotaaddaray olawu baanawu giigettibeenna. A caammay saꞌaa mintti yedhdhanawu keehi maaddiya heezzu achcha galbbaa gatti oyttidoogaappe oosettiis. He caammay keehi gamꞌꞌanaadaaninne wottanawu injjetanaadan giigiis.
10 Rooma wotaaddarati wottiyo caammay wottidi olawu biyooba; shin Kiristtaaneti wottiyo leemiso caammay eti sarotettaabaa yootanaadan maaddiyaaba. (Isi. 52:7; Roo. 10:15) Gidikkokka, injjetiyo wode yootanawu xalana koshshees. Boo giyo 20 laytta naꞌay, “Tanaara tamaariyaageetussi markkattanawu kase yayyays” yaagiis. Gujjidikka, “Taani he wode yeellatays. Kasebaa qoppiyo wode, taani ayssi hegaadan hanidaakko erikke. Ta lagge gidiyaageetussi markkattiyoogee haꞌꞌi tana ufayssees” yaagiis.
11 Daro yelagati loytti giigettiyo wode, mishiraachchuwaa yootanawu ufayttiyoogaa akeekidosona. Giigettanawu neeni ay oottana danddayay? Layttay 16 gidido Juuliyaa hagaadan gaasu: “Ta timirtte keettaa borssan xuufiyaa yegga wottays, qassi tanaara tamaariyaageeti eti qoppiyoobaanne ammaniyoobaa yootiyo wode ezggays. Yaatada eta maaddiyaabaa qoppays. Taani giigettido wode, eta maaddanabaa etawu yootana danddayays.” Makenzii giyo 23 laytta naꞌiyaa hagaadan gaasu: “Neeni loytta ezggiya keha asa gidikko, ne lagge gidiyaageeta gakkiyaabaa erana danddayaasa. Taani yelagatussi giigidabaa ubbaa nabbabays. Yaatiyo wode, ta laggeta maaddiyaabaa Geeshsha Maxaafaappe woy jw.org saytiyaappe yootana danddayays.” Ha naati yootidobay bessiyoogaadan, neeni sabbakanawu loytta giigettiyo wode, ne leemiso ‘caammay’ ne tohuwaa baqqi oyqqees.
Caammaa wottidi giigida tohuwaa (Mentto 9-11 xeella)
‘WOGGA GONDDALLIYAA MALA AMMANUWAA’
12, 13. Seexaanay yeddiyo ‘wonddafiyaa tamaappe’ amaridaagee aybee?
12 Efisoona 6:16 nabbaba. Rooma wotaaddaray oyqqiyo oyddu zoozee deꞌiyo wogga ‘gonddallee’ hashiyaappe gulbbataa gakkanaashin kammees. SHociyaanne xonggettiya ola miishshatuppe hegee A naagees.
13 Seexaanay ne bolli yeddiyo ‘wonddafiyaa tamaappe’ amaridaagee Yihooway neeyyo qoppennanne neeni siiqoy bessiyo asa gidakka yaagidi Abaa yootiyo worddobaa. Ido giyo 19 laytta naꞌiyaa pattenna asadan bana xeelliyoogaa agganawu baaxetawusu. A, “Taayyo darotoo Yihooway taakko shiiqennabadaaninne ta Dabbo gidanawu koyennabadan siyettees” yaagawusu. He wonddafiyaa A waatada teqqay? Ida, “SHiiqoti ta ammanuwaa keehi minttoosona” yaagawusu. Gujjadakka hagaadan gaasu: “Taani kase ta yootiyoobaa ooninne siyanawu koyennabadan qoppada, yan uttada qaalakka qaattikke. SHin haꞌꞌi shiiquwawu giigettays, qassi heezzutoo woy oyddutoo zaaranawu malays. Hegee wayssikkonne yaatiyo wode tana keehi pashkkissees. Qassi ishanttinne michchontti tana keehi minttettoosona. Yihooway tana siiqiyoogaa erada shiiquwaappe ubbatoo simmays.”
14. Idi hanotay qonccissiyo tumay aybee?
14 Idi hanotay ha gita tumaa qonccissees: Wotaaddaray oyqqiyo gonddalliyaa yesoy liketti uttidaba, shin nu ammanuwaa gonddallee woy darana woy guuxxana danddayees. Hegee nuuni kuuyiyooba. (Maa. 14:31; 2 Tas. 1:3) Nu ammanuwaa minttiyoogee keehi koshshiyaaba!
Wogga gonddalliyaa mala ammanuwaa (Mentto 12-14 xeella)
‘QOPHE MALA ATOTETTAA’
15, 16. Hidootay waanidi birata qophe malee?
15 Efisoona 6:17 nabbaba. Rooma wotaaddarati wottiyo birata qophee huuphiyaa, qooriyaanne somꞌꞌuwaa shociyaabaa teqqanawu giigiis. Wotaaddaray kushiyan oyqqana mala, issi issi birata qophiyaa oyqqiyoosay deꞌees.
16 Birata qophee wotaaddaraa guuggiyaa naagiyoogaadan, nu ‘atotettaa hidootay’ nu qofaa naagees. (1 Tas. 5:8; Lee. 3:21) Hidootay nuuni Xoossay qaalaa gelidobaa ubbatoo qoppanaadaaninne metuwaa maara xeellanaadan maaddees. (Maz. 27:1, 14; Oos. 24:15) SHin nuuni nu ‘birata qophee’ goꞌꞌiyaaba gidanaadan koyikko, huuphiyan wottana koshsheesippe attin, kushiyan oyqqana bessenna.
17, 18. (a) Nu birata qophiyaa digganaadan Seexaanay nuna waatidi denttettana danddayii? (b) Nuuni Seexaanaa geniyan cimettennaagaa waatidi bessana danddayiyoo?
17 Nuuni nu birata qophiyaa digganaadan Seexaanay waatidi denttettana danddayii? I Yesuusa waatidaakko qoppa. Yesuusi guyyeppe asaa haaranawu hidootan naagiyoogaa Seexaanay eriyoogee qoncce. SHin Yihooway keerido wodee gakkanaashin Yesuusi naagana koshshees. Qassi hegaappe kase I waayettidi hayqqana koshshees. Hegaa gishshawu, he hidootay eesuwan polettiyo qaaday deꞌiyoogaa Seexaanay Yesuusawu yootiis. Yesuusi issitoo ayyo goynnikko, he ubbabaa sohuwaara demmanaagaa Seexaanay yootiis. (Luq. 4:5-7) Hegaadankka, nuuyyo asatettan maaddiyaabaa Yihooway ooratta alamiyan immanaagaa Seexaanay erees. SHin nuuni naagana koshshees, qassi hegee gakkanaashin waayettana danddayoos. Yaatiyo gishshawu, nuuni hegaa mala deꞌuwaa haꞌꞌi deꞌanawu paacettanaadan oottiyaabaa Seexaanay giigissees. I nuuni kasetidi asatettan goꞌꞌiya ubbabaa haꞌꞌi demmanawu qaaqqatanaadan koyees. Kawotettaa naaꞌꞌanttuwan koyanaadan Seexaanay nuna denttettees.—Maa. 6:31-33.
18 Yelaga Kiristtaanetu darotuugaadan, Kiꞌano giyo 20 laytta naꞌiyaa hegan cimettabeykku. A, “Nu meto ubbaa xayssana danddayiyay Xoossaa Kawotettaa xalla gidiyoogaa erays” yaagaasu. He mino hidootay qofaaninne oottiyooban O haꞌꞌi waati maaddii? “Gannatiyaa hidootay asatettaabaa taani bessiyaagaadan xeellanaadan maaddees” yaagaasu. Gujjadakka hagaadan gaasu: “Ta eran goꞌettanawu woy zalꞌꞌiyan duretanawu baaxetikke. SHin ta wodiyaanne wolqqaa ayyaanaaban halchchidobaa polanawu goꞌettays.”
Birata qophe mala atotettaa (Mentto 15-18 xeella)
XOOSSAA QAALAA, “AYYAANAA BISUWAA”
19, 20. Nuuni Xoossaa Qaalaa waatidi kaseegaappe loytti goꞌettana danddayiyoo?
19 Rooma wotaaddarati beni goꞌettiyo bisoy 50 santi meetire aduqqees. He wotaaddarati bantta bisuwaara galla galla meezetiyo gishshawu, A loytti goꞌettoosona.
20 PHawuloosi Xoossaa Qaalaa Yihooway nuussi immido bisuwaara geeddarssiis. SHin nuuni nu ammanuwawu exatiyo wode woy nu qofaa suurissiyo wode, hegaa loytti goꞌettiyoogaa tamaarana koshshees. (2 Qor. 10:4, 5; 2 Xim. 2:15) Neeni hegaa waatada kaseegaappe loytta goꞌettana danddayay? Sebastiyana giyo 21 laytta naꞌay hagaadan giis: “Taani Geeshsha Maxaafaa nabbabaydda ubba shemppuwaappe issi issi xiqisiyaa xaafays. Taani dosiyo xiqiseta issippe shiishshays. Yaatiyoogee ta qofay Yihoowa qofaa milatanaadan tana daro maaddidabadan qoppays.” Qommoora abaa denttido Daaneeli hagaadan giis: “Taani Geeshsha Maxaafaa nabbabaydda haggaazuwan demmiyo asata maaddana gaada qoppiyo xiqiseta doorays. Asay neeni Geeshsha Maxaafaa keehi dosiyoogaanne eta maaddanawu neeyyo danddayettida ubbaa oottiyoogaa eriyo wode loytti siyiyoogaa akeekaas.”
Ayyaana bisuwaa (Mentto 19-20 xeella)
21. Seexaanaanne daydanttata yayyana koshshennay aybissee?
21 Ha huuphe yohuwan denttido yelagatubay bessiyoogaadan, Seexaanaanne daydanttata yayyiyo gaasoy baawa. Eti keehi wolqqaama, shin xoonettennaba gidokkona. Qassi eti hayqqoosona. Mati, Kiristtoosa SHaꞌu Layttaa Haaruwaa wode, eti mule qaaxxennaadan qashettana, hegaappe simmin eti xayana. (Ajj. 20:1-3, 7-10) Nuuni nu morkkiya shaakkidi eroos; qassi A maqquwaanne A qofaakka eroos. Yihooway maaddin, nuuni A eqettana danddayoos!