Yihoowi maaran oottiya Xoossaa. (1 Qoronttoosa 14:33, 40) Yaaniyo gishshawu, I ba asaa kaalettanaagaa ammanettoos. Yihoowi Yesuusa baggaara galchchaa waati kaalettii? Hegawu nuuppe koyettiyaabaa waati oottana danddayiyoo?

1. Galchchaa kaalettiyay oonee?

“Kiristtoosi . . . woosa keettaayyo huuphe.” (Efisoona 5:23) I kumetta saꞌan deꞌiya Yihoowa asay oottiyoobaa saluwan uttidi kaalettees. Yesuusi ‘ammanettida wozannaama ashkkaraa’ woy Oosuwaa Kaalettiya Citaa geetettiya, ayyaanaaban kaymida amarida cimata sunttiis. (Maatiyoosa 24:45-47 nabbaba.) Koyro xeetu layttan Yerusalaamen deꞌiya kiitettidaageetinne cimati oottidoogaadan, Oosuwaa Kaalettiya Citay kumetta saꞌan deꞌiya galchchatussi kaaletuwaa immees. (Oosuwaa 15:2) SHin nu dirijjitiyaa he asati kaalettokkona. Eti oottanaadan Yihoowi koyiyoobaa eranawu Geeshsha Maxaafaa nabbaboosona, qassi Yesuusa kaaletuwaa eeno giidi kaalloosona.

2. Cimati oonee, qassi ay oottiyoonaa?

Cimati daro wodiyawu ammanettidi deꞌida Kiristtaane attuma asata. Eti Yihoowa asaa Geeshsha Maxaafaappe tamaarisoosona, qassi eta maaddoosonanne minttettoosona. Oottiyoobawu miishshay etawu imettenna. SHin eti ‘Xoossay koyiyoogaadan dosan, bantta goꞌꞌa xalaalaa xeellennan, loꞌꞌo qofan’ haggaazoosona. (1 PHeexiroosa 5:1, 2) Galchchawu oottiyaageeti galchchan cimata maaddiya attuma asata. Guuttaa takkidi, galchchawu oottiyaageeti banttappe koyettiyaabaa oottidi cima gidana danddayoosona.

Oosuwaa Kaalettiya Citay amarida cimata woradaa xomoosiyaageeta oottidi sunttees. Eti ishanttanne michchontta zoranawunne minttettanawu dumma dumma galchchata xomoosoosona. Geeshsha Maxaafan galchchaa cimatinne galchchawu oottiyaageeti polana koshshiyaabaa oottiiddi deꞌiyaageeta eti sunttoosona.—1 Ximootiyoosa 3:1-10, 12; Tiitu 1:5-9.

3. Yihoowa Markkati ubbay oottana koshshiyaabay aybee?

Galchchan deꞌiya ubbay shiiqotun bantta inxxarssan Xoossaa sabbiyoogaaninne banttawu danddayettida keenan haggaaziyoogan ‘Godaa sunttaa galatoosona.’—Mazamure 148:12, 13 nabbaba.

LOYTTA AKEEKA

4. Yesuusi kehatettan kaalettees

Yesuusi nuna ufayssiyaabaa shoobbees. Maatiyoosa 11:28-30 nabbabite; yaatidi ha oyshaa tobbite:

• Yesuusi waati kaalettii, qassi nuuni waananaadan koyii?

BIIDUWAA: Neppalen Biittay Qaaxxin Cimati Koshshiyaaban Maaddidosona (4:56)

Cimati bantta oosuwaa waati oottana koshshiyaakko Geeshsha Maxaafay loytti qonccissees.

Isiyaasa 32:2​nne 1 PHeexiroosa 5:1-3 nabbabite; yaatidi ha oyshata tobbite:

• Cimati Yesuusaagaadan harata minttettanawu baaxetiyoogaa eriyoogee neessi aybi siyettanaadan oottii?

• Cimati Yesuusa milatana danddayiyo hara amarida ogeti aybee?

5. Cimati oottiyooban tamaarissoosona

BIIDUWAA: Cimati Leemiso Gidoosona! (7:39)

Galchchan aawatettay deꞌiyoogeetussi Yesuusi leemiso gidees. Maatiyoosa 23:8-12 nabbabite; yaatidi ha oyshaa tobbite:

• Geeshsha Maxaafay cimatussi yootiyo maaray aybee? Haymaanootiyaa kaalettiyaageeti Geeshsha Maxaafay yootiyoobaa kaalliyaaba neeyyo milatii?

1. Cimati ayyaanaaban ubbatoo minnidi deꞌoosona; qassi bantta so asaykka minnidi deꞌanaadan maaddoosona

2. Cimati galchchan deꞌiya ubbawu qoppoosona

3. Cimati ubbatoo markkattoosona

4. Cimati tamaarissoosona. Eti geeshshiyoogaaninne harabaa oottiyoogan maaddoosona

6. Nuuni cimatuura hashetidi oottana danddayoos

Cimatuura hashetidi oottiyoogee keehi koshshiyoy aybissakko Geeshsha Maxaafay yootees. Ibraawe 13:17 nabbabite; yaatidi ha oyshata tobbite:

• Nuuni galchchan aawatettay deꞌiyoogeetussi eeno giidi azazettana koshshiyoogaa Geeshsha Maxaafay yootiyoy aybissee? Hegaa ne waata xeellay?

Luqaasa 16:10 nabbabite; yaatidi ha oyshaa tobbite:

• Guuttaba milatiyaabankka nuuni cimatuura hashetidi oottana koshshiyoy aybissee?

AY AKEEKADII?

Galchchaa kaalettiyay Yesuusa. Yesuusa aysuwan haggaaziya cimati nuna minttettiyoonne eti oottiyooban nuna tamaarissiyo gishshawu ufayssan etaara hashetidi oottoos.

Zaaretuwaa

• Galchchaa kaalettiyay oonee?

• Cimati galchchaa waati maaddiyoonaa?

• Yihoowawu goynniyaageeti ubbay oottana koshshiyaabay aybee?

PILGGA

Oosuwaa Kaalettiya Citaynne hara cimati ha wodiyan Kiristtaanetussi keehi qoppiyoogaa bessiyaabaa akeeka.

Nu Oosoy Teqettido Biittan Ishantti Minettidosona (4:22)

Woradaa xomoosiyaageeti oottiyoobaa akeeka.

Gaxariyan Woradaa Xomoosiyaageetu Deꞌuwaa (4:51)

Macca asati galchchan oottiyo keehi koshshiyaabaa nabbaba.

“Macca Yihoowa Markkatussi Tamaarissiyo Aawatettay Deꞌii?” (Wochchiyo Keelaa huuphe yohuwaa)

Cimati bantta ishanttanne michchontta minttettanawu waati minni oottiyaakko akeeka.

“Gubaaꞌiyaa Cimati ‘Nuna Ufayssanau Nunaara Oottiyaageeta’” (Wochchiyo Keelaa, Ichchashe 15, 2013)

1. Geeshsha Maxaafay azinata zoriyoobay aybee?

Yihoowi azinay ba keettaa ayssanaadan aawatettaa immiis. (Efisoona 5:23 nabbaba.) Yihoowi azinay ba so asaa maaddiyaabaa kuuyanaadan koyees. Geeshsha Maxaafay azinata, “Intte maccaasata siiqite” giidi zorees. (Efisoona 5:25) Hegee azinati waatana koshshiyoogaa bessii? Siiqiya azinay, eti banttarkka deꞌiyo sohuwan gidin woy haratu sinttankka ba machcheeyyo kehees. I qohiyaabaappe O naagees, qassi O ufayssanawunne iyyo koshshiyaabaa kunttanawu baaxetees. (1 Ximootiyoosa 5:8) I ubbaappe aaruwan, A Yihoowayyo mata dabbo gidanaadan maaddees. (Maatiyoosa 4:4) Leemisuwawu, I ba machcheera woossananne Geeshsha Maxaafaa nabbabana danddayees. Issi azinay ba machchiyo siiquwan maaddiyo wode, Yihoowaara dabbotaa minttidi deꞌees.—1 PHeexiroosa 3:7 nabbaba.

Yesuusi Kiristtaane galchchawu Huuphe woy Kaalettiyaagaa. (Efisoona 5:23) Ha wodiyan, Yesuusi saluwan uttidi, bana kaalliya saꞌan deꞌiyaageeta ‘ammanettida wozannaama ashkkaraa’ baggaara kaalettees. (Maatiyoosa 24:45 nabbaba.) He ashkkaraa sunttidaynne issi issibaa kuuyanaadan aawatettaa immiday Yesuusa. Gidikkokka, he ashkkaray Kiristtoosawu azazettananne A ishatussi haggaazana bessees. He ashkkaray oonee? He ashkkaray nuna aybin maaddii?