Annaacettanaadan Oottiyaabaappe Naagettiyoogan Sarotettan Deꞌa

1. Amarida asay haratuppe aadhdhiyaaba milatanawu baaxetiyoogee eti waatanaadan oottana danddayii?

ALAMIYAN ha wodiyan, daro asay haratuppe aadhdhiyaaba milatanawu ubbatoo baaxetees, qassi eti oottiyoobay harata ay keena qohiyaakko qoppokkona. Leemisuwawu, issi zalaꞌꞌanchchay hara zalꞌꞌanchchatuppe keehi gooba gidanawu koyiyo gishshawu, harata qohiyaabaa oottennan waayi aggana. Issi atileetee ispporttiyan xoonanawu hara citaa kaassanchchaa eriiddi qohees. Issi tamaaree keehi erettida yuniversttiyaa gelanawu paaciyaa wuuqqees. Nuuni Kiristtaane gidiyo gishshawu, hegaa malabati bala gidiyoogaa eroos; qassi hegee ‘asatettaa ooso.’ (Gal. 5:19-21) SHin amarida ishanttinne michchontti eti haratuppe aadhdhiyaaba milatanawu maliyoogaanne haratikka hegaadan oottanaadan eti denttettiyoogaa akeekiyoonaa? Hegee keehi koshshiya oysha; ayssi giikko, annaacettiyoogee ishanttu giddon deꞌiya issippetettaa moorana danddayees.

2. Nuuni ha huuphe yohuwan ay beꞌanee?

² Nuuni nu ishanttuppe aadhdhiyaaba milatanawu koyanaadan oottiyaabata ha huuphe yohuwan beꞌana. Haratuppe aadhdhiyaaba milatanawu baaxetibeenna, Geeshsha Maxaafan etabay odettido Yihoowa ashkkaratubaakka nuuni pilggana. Koyro, nuuni issibaa oottiyo gaasuwaa ane beꞌoos.

ISSIBAA NE OOTTIYO GAASUWAA QORA

3. Nuuni nuna ayba oyshata oychchana koshshii?

³ Nuuni issibaa oottiyo gaasuwaa issi issitoo qoriyoogee loꞌꞌo. Hagaadan nuna oychchana danddayoos: ‘Taani ufayttiyoy hara urappe aadhdhiyaabadan qoppiyo wode xallaanee? Taani gubaaꞌiyan minna oottiyoy haratuppe aadhdhanawu woy gooba gidanawu koyiyo gishshataassee? Woy qassi taani minna oottiyoy Yihoowa ufayssanawu koyiyo gishshataassee?’ Nuuni ha oyshata oychchana koshshiyoy aybissee? Xoossaa Qaalay yootiyoobaa akeeka.

4. Galaatiyaa 6:3, 4y yootiyoogaadan, nuuni nuna haratuura geeddarssana koshshennay aybissee?

⁴ Nuuni nuna haratuura geeddarssana koshshennaagaa Geeshsha Maxaafay yootees. (Galaatiyaa 6:3, 4 nabbaba.) Aybissi? Nuuni nu ishaappe aarobaa oottiyaabadan qoppikko, otorettana danddayiyo gishshataassa. SHin, nu ishantti nuuppe aarobaa oottiyaabadan nu qoppikko, hidootaa qanxxana danddayoos. He naaꞌꞌu ogetunkka qoppiyoogee likke gidenna. (Roo. 12:3) Giriiken deꞌiya Katirinob giyo michchiyaa hagaadan gaasu: “Taappe loꞌꞌiyaageetuura, sabbakiyoogaaninne laggetiyoogan gooba gididaageetuura tana ubbatoo kase geeddarssays. Hegaappe denddidaagan, pattennabadan tawu siyettees.” Yihooway nuna baakko ehiidoy, nuuni puulanchcha gidiyo gishshataassa, haasayaa haasayiyoogan gooba gidiyo gishshataassa woy daro asay nuna dosiyo gishshataassa gidennan, A siiqanawunne A Naꞌay yootiyoobaa siyanawu eeno giido gishshataassa gidiyoogaa hassayana bessees.—Yoh. 6:44; 1 Qor. 1:26-31.

5. Hayuna giyo ishaa hanotaappe ay tamaaray?

⁵ Nuuni nuna oychchana danddayiyo hara oyshay, ‘Ishantti tana sigettiya asadan xeelliyoonaayye woy haratuura darotoo maayettenna asadan xeelliyoonaa?’ yaagiyaagaa. Tohossa Kooriyan deꞌiya Hayun giyo ishaa hanotaa qoppa. Gubaaꞌiyan aawatettay deꞌiyo amaridaageeti appe aadhdhiyaaba milatanawu baaxetiyaabadan I ubbatoo kase qoppees. I, “Taani hegaa mala ishantta borays, qassi eti yootiyoobaa darotoo maayettikke” yaagiis. Hegee ay kaalettidee? I, “Ta eeshshay gubaaꞌiyan issippetettay deꞌennaadan oottiis” yaagiis. Hayuna laggetuppe amaridaageeti I ba metuwaa akeekanaadan maaddidosona. Hayuni koshshiyaaban laamettido gishshawu, haꞌꞌi keehi loꞌꞌo cima gididi oottees. Nuuni sarotettan deꞌiyaageeta gidennan, annaacettiyo eeshshay nunan deꞌiyoogaa akeekikko, sohuwaara nu laamettana bessees.

HADA CEEQETTOPPANNE MIQQAYNNOPPA

6. Galaatiyaa 5:26y yootiyoogaadan, nuuni haratuppe aadhdhiyaaba milatanawu koyanaadan oottana danddayiya iita eeshshati awugeetee?

⁶ Galaatiyaa 5:26 nabbaba. Annaacettanaadan oottana danddayiya iita eeshshay aybee? Issoy hada ceeqettiyoogaa. Hada ceeqettiya asi otoretteesinne babaa xallaa qoppees. Hara iita eeshshay miqqaynniyoogaa. Miqqaynniya asi hara urawu deꞌiyaabaa koyiyoogaa xalla gidennan, hara urawu deꞌiyaabay xayanaadankka koyees. Yaatiyo gishshawu, hara ura miqqaynniya asi he izaawa ixxees. Nuuni he iita eeshshata nuuppe muleera xayssanawu koyiyoogee qoncce!

7. Otorettiyoogeenne miqqaynniyoogee iita gidiyoogaa qonccissiya leemisoy aybee?

⁷ Hada ceeqettiyoogaanne miqqaynniyoogaa keettaa mittaa miya ollattaara geeddarssana danddayoos. Keettay keehi loꞌꞌiyaagaa gidikkonne, ollattay miikko wurssettan I kunddees. Hegaadankka, issi uri Yihoowawu amarida wodiyawu haggaazana danddayees. Gidoppe attin, I otorettiyaagaanne miqqaynniyaagaa gidikko, kunddees. (Lee. 16:18) I Yihoowayyo haggaaziyoogaa aggees, qassi bananne harata qohees. SHin, nuuni otorettennaadaaninne miqqaynnennaadan naagettanawu ay oottana danddayiyoo?

8. Hada ceeqettennaadan nuuni waani naagettana danddayiyoo?

⁸ Kiitettida PHawuloosi Piliphisiyuusa Kiristtaanetuyyo xaafido zoriyaa nuuni oosuwan peeshshiyoogan hada ceeqettennaadan naagettana danddayoos: “Inttena siiqiyoogan woikko ceeqettanau koyiyo hada amuwan issibaanne oottoppite; shin issoi issuwaappe gitatais yaagidi qoppennan, issoi issuwaayyo intte huuphiyaa kaushshite.” (Pili. 2:3) Nuuni harati nuuppe aadhdhiyaabadan xeellikko, eran nuuppe aadhdhiyaageetuura annaacettokko. Qassi nuuni etan ufayttoos. Eti Yihoowayyo haggaaziyoogan bantta eraa A sabbanawu goꞌettikko, keehi ufayttoos. Eray deꞌiyo nu ishanttinne michchontti PHawuloosa zoriyaa kaallikko, eti nu loꞌꞌo eeshshata akeekana. Hegaappe denddidaagan, nuuni ubbay gubaaꞌiyan sarotettaynne issippetettay deꞌanaadan maaddana.

9. Nuuni issi ishaa woy michchiyo miqqaynnennaadan waani naagettana danddayiyoo?

⁹ Nuuni loytti oottana danddayennabay deꞌiyoogaa akeekikko, issi ishaa woy michchiyo miqqaynnennaadan naagettana danddayoos. Nuuni nuna ziqqi oottikko, hara urappe aadhdhiyoogaa bessanawu baaxetokko. Eran nuuppe aadhdhiyaageetuppe tamaaranawu baaxetoos. Leemisuwawu, gubaaꞌiyan dere haasayaa loytti haasayiya ishaa qoppa. Nuuni I ba haasayaa waati giigettiyaakko A oychchana danddayoos. Issi michchiya qumaa kattiyoogan qara gidikko, qumaa kattiyoogan nuuni qara gidanawu maaddiya zoriyaa O oychchana danddayoos. Qassi issi yelaga Kiristtaanee haratuura laggetanawu metootikko, laggetiyoogan gooba gidida uraa zoriyaa oychchana danddayees. Nuuni hegaadan oottiyo wode, miqqaynnokko, qassi kaseegaappe aaruwan gooba gidoos.

GEESHSHA MAXAAFAN ETABAY ODETTIDOOGEETUPPE TAMAARA

10. Geedoona ayba metoy gakkidee?

¹⁰ Minaase yara gidida Geedoona giddooninne Efireema yara gidida asatu giddon merettidabaa qoppa. Geedooninne aara deꞌiya 300 asati olan xoonanaadan Yihooway maaddido gishshawu, eti otorettana danddayoosona shin. Efireema asay Geedoonaara gayttidoy A galatanaassa gidennan, aara ooyettanaassa. Xoossaa morkketa olanawu Geedooni eta koyroppe doommidi xeesibeenna gishshawu eti hanqqettidosona. Eta keehi qofissidabay asay eta yaraa bonchchana koshshiyoogaa. SHin Geedooni Yihoowa sunttaa bonchchissanawunne A asaa naaganawu oottido keehi koshshiyaabaa eti dogidosona.—Daan. 8:1.

11. Geedooni Efireema asawu woygidee?

¹¹ Geedooni bana ziqqi oottidi Efireema asawu hagaadan giis: “Taani oottidoogaappe intte oottidoogee aadhdhenneeyye?” Yaatidi, eti gitabaa oottanaadan Yihooway eta keehi maaddidoogaa hassayissiis. Asati hegaa siyido wode, “zarbbidosona.” (Daan. 8:2, 3) Xoossaa asaa giddon sarotettay deꞌana mala giidi Geedooni bana ziqqi oottanawu eeno giis.

12. Efireema asaappenne Geedoonappe ay tamaarana danddayiyoo?

¹² Ha taarikiyaappe ay tamaarana danddayiyoo? Nuna bonchchissiyaabaa qoppiyoogaa aggidi Yihooway bonchchettanaadan oottiyaaba qoppana koshshiyoogaa Efireema asaa hanotaappe tamaaroos. Nuuni so asawu huuphenne gubaaꞌe cima gidikko, Geedoonappekka tamaarana danddayoos. Nuuni oottidoban issi uri hanqqettikko, I aybissi hanqqettidaakko akeekanawu nu malana koshshees. Qassi I oottido loꞌꞌobawu A galatana danddayoos. Hegaadan oottanawu nuuni nuna ziqqi oottiyaageeta gidana koshshees, ubba qassi hara uri balaba oottiyo wode. SHin nuuni oottidobay likke gidiyoogaa qonccissiyoogaappe aaruwan nu ishanttuura sarotettan deꞌiyoogee keehi koshshiyaaba.

13. Haanno gakkida metoy aybee, qassi A waatadee?

¹³ Haanni hanotaakka qoppa. A Leewa zare gidida Elqqaana gelaasu, I O keehi siiqees. SHin Elqqaanassi Piniino giyo hara machchiyaa deꞌawusu. Elqqaani Piniinippe aaruwan Haanno siiqiyaaba gidikkonne, “Piniinissi naati de7oosona; shin Haannissi issi na7ikka baawa.” Hegaa gaasuwan, Piniina Haanno ‘hanqqetissanawu’ ubbatoo cayawusu. Haanniyyo aybi siyettidee? A keehi hanqqettaasu! ‘A yeekkaasunne qumaa meennan ixxaasu.’ (1 Sam. 1:2, 6, 7) SHin Haanna aybinkka Piniini bolli haluwaa kiyanawu malidoogaa Geeshsha Maxaafay yootenna. A bawu siyettiyaabaa Yihoowawu yootido gishshawu I bana maaddanaagaa ammanettaasu. Haanno xeelliyaagan Piniini eeshshay laamettidee? Geeshsha Maxaafay hegaabaa yootennaba gidikkonne, Haanna woppu gaada saruwan deꞌidoogaa nuuni eroos. “Hegaappe simmin mulekka azzanabeikku.”—1 Sam. 1:10, 18.

14. Haannippe ay tamaarana danddayiyoo?

¹⁴ Haanni hanotaappe ay tamaarana danddayiyoo? Issi uri issi issiban nenaara annaacettanawu malikko, he hanotay laamettanaadan neeni oottana danddayiyoogaa hassaya. Neeni annaacettana koshshenna. Iitabaa iitaban zaariyoogaappe, he uraara sigettanawu mala. (Roo. 12:17-21) I laamettana xayikkonne, neeni woppu gaananne ufayttana.

15. Aphiloosinne PHawuloosi issi mala gididoy aybinee?

¹⁵ Wurssettan, erissiyo ashkkaraa Aphiloosappenne kiitettida PHawuloosappe nuuni ay tamaarana danddayiyaakko qoppa. Eti naaꞌꞌaykka Geeshsha Maxaafaa loyttidi eroosona. Eti loytti erettiya asanne gooba asttamaare. Eti naaꞌꞌaykka daroti erissiyo ashkkara gidanaadan maaddidosona. SHin eti issoy issuwaa qanaatibookkona.

16. Aphiloosi ay mala asee?

¹⁶ Aphiloosi he wodiyan asay tamaaranawu biyo keehi erettida sohuwan ‘Iskkinddiriyan yelettiis.’ I haasayaa haasayiyoogan keehi goobanne ‘Geeshsha Maxaafaa daro eriya asa.’ (Oos. 18:24) Aphiloosi Qoronttoosan haggaaziyo wode, PHawuloosa gujjin hara ishanttuppe aaruwan, gubaaꞌiyan deꞌiya amarida ishantti Aphiloosa dosiyoogaa bessidosona. (1 Qor. 1:12, 13) He shaahotettay deꞌanaadan oottiday Aphiloosee? I oottiis giidi nuuni mule qoppokko. Aphiloosi Qoronttoosappe bi simmin, guyye simmanaadan PHawuloosi A mintti woossiis. (1 Qor. 16:12) Aphiloosi gubaaꞌiyaa shaakkiyaabadan PHawuloosi qoppiyaakko hegaadan mule woossenna. Aphiloosi mishiraachchuwaa yootiyoogaaninne ba ishantta minttiyoogan ba eraa loꞌꞌobawu goꞌettidoogee qoncce. Qassi Aphiloosi bana ziqqi oottiya asa gidiyoogaa nuuni ammanettana danddayoos. Leemisuwawu, Aqiilinne PHirisqqila “Xoossaa ogiyaa kaseppe sittayidi, ayyo geeshshidi” yootido wode, I yiillotidoogaa Geeshsha Maxaafay yootenna.—Oos. 18:24-28.

17. PHawuloosi sarotettay deꞌanaadan waati oottidee?

¹⁷ Aphiloosi oottido loꞌꞌo oosuwaa kiitettida PHawuloosi erees. Gidikkonne, PHawuloosi Aphiloosi baappe aadhdhiyaabadan asay qoppana giidi hirggibeenna. PHawuloosi Qoronttoosan deꞌiya Kiristtaanetuyyo xaafidobaa nuuni nabbabiyo wode, I bana ziqqi oottiya ashkke asa gidiyoogaa akeekana danddayoos. Asay “taani PHauloosaagaa” giyoogan I ufayttibeenna. Asay Xoossaa Yihoowanne Yesuus Kiristtoosa bonchchanaadan I yootiis.—1 Qor. 3:3-6.

18. Koyro Qoronttoosa 4:6, 7 maaran, Aphiloosappenne PHawuloosappe nuuni ay tamaariyoo?

¹⁸ Aphiloosappenne PHawuloosappe ay tamaarana danddayiyoo? Nuuni Yihoowayyo minnidi oottiyo gishshawu daroti xammaqettanaadan maaddana danddayoos. SHin nuuni hegaadan oottana danddayiyoy Yihooway nuna maaddiyo gishshataassa gidiyoogaa akeekoos. Gubaaꞌiyan nuuyyo daro aawatettay deꞌikko, gubaaꞌiyan sarotettay deꞌanaadan loytti maaddana danddayiyoogaakka Aphiloosanne PHawuloosa hanotaappe tamaaroos. Nuuni issippetettaaninne issoy issuwaara saruwan deꞌanaadan cimatinne gubaaꞌiyawu oottiyaageeti nuna maaddiyo wode keehi ufayttoos. Eti Geeshsha Maxaafaappe zoriyo wode hegaadan oottoosona. Eti haratuppe aadhdhanawu baaxetokkona, shin gubaaꞌiyan deꞌiya ubbay Yesuusawu azazettanaadaaninne A leemisuwaa kaallanaadan maaddoosona.—1 Qoronttoosa 4:6, 7 nabbaba.

19. Nuuni ubbay ay oottana danddayiyoo? (“Annaacettanaadan Oottiyaabaappe Naagetta” giya saaxiniyaakka xeella.)

¹⁹ Xoossay immido eray nu ubbaassi deꞌees. Nuuni ‘issoy issuwawu oottanawu’ nu eraa goꞌettana danddayoos. (1 PHe. 4:10) Nu oottiyoobay keehi gitaba gidenna giidi qoppennan waayi aggana. SHin guutta gidida daro qunccuutee loꞌꞌiya maayuwaa sikkana danddayiyoogaa hassaya. Nuuni haratuppe aadhdhiyaaba milatanawu mule baaxetennaadan ubbatoo minni oottana koshshees. Qassi gubaaꞌiyan sarotettaynne issippetettay deꞌanaadan nuuyyo danddayettida ubbabaa oottana koshshees.—Efi. 4:3.