Ne Kahaa Ammanettada Kaallana Danddayay?

1, 2. Nuussi kahaa Immidaagee oonee, qassi hegee nuuyyo deꞌiyo gishshawu galatana danddayiyoy aybissee?

XOOSSAA YIHOOWAY asay ba koyidobaa dooranaadan oottidi medhiis. Xoossay koyro bitanee, a machiyaanne eti yelana naati iitaa kehaa shaakki eranaadan eta kaalettiya loꞌꞌobaa, hegeekka kahaa etawu immiis. Nuuni kahaa maara goꞌettikko, loꞌꞌobaa oottanaadaaninne iitabaappe haakkanaadan nuna maaddana danddayees. Hegaa gishshawu, nu kahay Xoossay nuna siiqiyoogaanne asay issippetettan loꞌꞌobaa oottanaadan i koyiyoogaa bessees.

² Ha wodiyankka asawu kahay deꞌees. (Roome 2:14, 15 nabbaba.) Daro asay Geeshsha Maxaafaa kandduwaa maaraappe wora simmikkokka, issi issi asay darotoo loꞌꞌobaa oottiyoogaanne iitabaa ixxiyoogaa akeekoos. Daroti keehi iitabaa oottennaadan eta kahay teqqees. Oossinne kahay baynnaakko alamiyaa hanotay ay keena iita gidanaakko qoppa! Ha wodiyaagaappe keehi iitabaa siyennan aggokko. Xoossay asawu kahaa immido gishshawu a keehi galatoos!

3. Kahay Kiristtaane gubaaꞌiyan keehi maaddiyaaba gidiyoy aybissee?

³ Daro asaagaappe dumma hanotan, Yihoowa ashkkarati bantta kahaa loohissanawu koyoosona. Eti likkebaanne likke gidennabaa, loꞌꞌobaanne iitabaa xeelliyaagan bantta kahay yootiyoobay Xoossa Qaalay yootiyoobaara maayettanaadan koyoosona. Maara loohida kahay Kiristtaane gubaaꞌiyan keehi maaddees. SHin, Kiristtaaneti bantta kahaa loohissanawunne goꞌettanawu Geeshsha Maxaafay yootiyoobaa eriyoogaa xallay gidenna. Geeshsha Maxaafay loꞌꞌo kahay ammanuwaaranne siiquwaara gayttidaba gidiyoogaa yootees. PHawuloosi, “Ha azazuwau waanna qofai geeshsha wozanaappe, lo77o zoriya wozanaappe, asi be7o giyoobi bainna ammanuwaappe beettiya siiquwaa denttettanaassa” yaagiis. (1 Xim. 1:5) Nu kahaa loohissidi i yootiyoobaa siyiyo wode, Yihoowa wozanappe siiqoos; qassi mino ammanoy deꞌiyoogeeta gidoos. Nuuni nu kahaa goꞌettiyo ogee Yihoowaara dabbotaa ay keena minttidaakkonne a ufayssanawu ay keena koyiyaakko qonccissees. Nu kahay nuuni ay mala asakko bessees.

4. Nu kahaa waati loohissana danddayiyoo?

⁴ Gidoppe attin, nu kahaa waati loohissana danddayiyoo? Nuuni Geeshsha Maxaafaa ubbatoo xannaꞌana, nabbabidoogaa wotti dentti qoppananne tamaaridobaa oosuwan peeshshanaadan Yihooway maaddana mala woossana koshshees. Yaatiyoogee tuma gididabaanne higgiyaa eriyoogaa xalla gidennaagee qoncce. Nuuni Geeshsha Maxaafaa xannaꞌiyo wode Yihoowa, a eeshshaa, i dosiyoobaanne ixxiyoobaa loddan loddan loytti akeekoos. Hegee nu kahay Xoossaa Yihoowa ogiyaara maayettanaadan oottees. Yaatiyo wode, nu wozanay nuuni a keehi milatanawu koyanaadan denttettees.

5. Ha huuphe yohuwan nuuni ay beꞌanee?

⁵ SHin, hagaadan giidi qoppana danddayoos: Nuuni kuuyana koshshiyo wode loytti loohida kahay waati maaddana danddayii? Nu mala Kiristtaaneti akeekan kuuyidobaa waatidi bonchana danddayiyoo? Mishetti oottanaadan nu kahay nuna waati denttettana danddayii? Ha oyshata qoppiiddi nu kahay nuna maaddana danddayiyo heezzu ginaa ane beꞌoos: (1) akkamettiyoogaa, (2) wodiyaa aattiyoobaanne (3) haggaazuwaa.

BESSIYAAGAADAN QOPPA

6. Nu payyatettaa naagiyoogaara gayttidaagan nuuni kuuyiyoobay aybee?

⁶ Nuuni qohiyaabaappe naagettanaadaaninne miyoobaanne uyiyoobaa malaban yorattennaadan Geeshsha Maxaafay zorees. (Lee. 23:20; 2 Qor. 7:1) Nuuni cimidaageetanne wolqqi baynnaageeta gidikkonne, Geeshsha Maxaafaa maaraadan deꞌiyoogee nu payyatettaa amarida ogiyan naaganaadan maaddana danddayees. Issi issi biittan aakime xaleekka xalettiyo hara dumma dumma ogeekka deꞌees. Dumma dumma akkamuwaa akkamettanawu qoppiya ishanttinne michontti macara biirotussi darotoo dabddaabbiyaa xaafoosona. Daroti, “Yihoowa ashkkara gidida uri ha akkamuwaa akkamettana danddayii?” giidi oychoosona.

7. Nuuni akkamettiyoogaara gayttidaagan waatidi kuuyana danddayiyoo?

⁷ Issi Yihoowa Markkay waatana koshshiyaakko oychikkokka, macara biiroykka gubaaꞌe cimatikka akkamuwaara gayttidabaa ayyo kuuyana danddayokkona. (Gal. 6:5) Kuuyanawu maaddana danddayiyaabaa Yihooway yootidobaappe eti hassayissana danddayiyoogee qoncce. Leemisuwawu, ‘suuttaa uyennaadan’ Geeshsha Maxaafay yootiyoobaa issi Kiristtaanee hassayana bessees. (Oos. 15:29) Akkamuwawu suuttaa woykko a giddon deꞌiya waanna kifiletuppe awugaanne ekkennaadan hegee diggiyoogee erettidaagaa. He waannatiya kifiletuppe issuwaa shaahota xeelliyaagan issi Kiristtaanee kuuyiyo wodekka hegaa eriyoogee a kahawu maaddana danddayees.a SHin nuuni akkamettanawu qoppiyo wode maaddana danddayiya hara Geeshsha Maxaafaa zoree awugee?

8. Piliphphisiyuusa 4:5y payyatettaa naagiyoogaara gayttidaagan nuna waati maaddana danddayii?

⁸ Leemiso 14:15y, “Eeyya asi ubbabaa ammanees; shin cinccai akeekidi tanggees” yaagees. Issi issi harggiyawu xalee erettennan aggana danddayees. Yaatiyo gishshawu, xallees geetettiyaaba gidikkonne, hegawu naqaashi baynna akkamuwaappe naagettiyoogee loꞌꞌo. PHawuloosi, “Asai ubbai intte ashkketettaa [bessiyaabaa qoppiyoogaa] ero” yaagiis. (Pili. 4:5) Bessiyaabaa qoppiyoogee nuuni akkamuwaaban daro wodiyaa wurssiyoogaappe ayyaanaabaa kaseyanaadan maaddees. Nuna qofissiya waannabay payyatettaa naagiyoogaa gidikko, nubaa xallaa qoppiyaageeta gidoos. (Pili. 2:4) Keehi koshshiyaabay ayyaanaabaa; qassi payyatettaara gayttidaagan nuuni qoppiyoobay bessiyaaba gidana koshshees.—Piliphphisiyuusa 1:10 nabbaba.

9. Roome 14:13, 19y payyatettaara gayttidabaa kuuyanawu waati maaddii, qassi nu issippetettay waani moorettana danddayii?

⁹ Bessiyaagaadan qoppiya Kiristtaanee ba qofaa hara asay kaallanaadan oottanawu baaxetenna. Awurooppan issi biittan, azinaynne machiyaa issi issi qumaa qommotubaanne qumaa miyo ogiyaabaa minttidi yootoosona. Hegaa goꞌettanaadan eti amarida ishantta ammanttidosona; shin harati goꞌettibookkona. Guyyeppe, qoppidoogaadan hanibeenna gishshawu, daroti lanccidosona. Azinaynne machiyaa issi issi qumaa qommotanne miyo ogiyaa banttawu doorana danddayoosona; shin payyatettaara gayttidaban gubaaꞌiyaa issippetettay moorettanaadan oottiyoogee bessiyaabee? Issi issi qumaa miyoogaaranne issi issi gallassaa bonchiyoogaara gayttidaagan beni Roomen deꞌiya Kiristtaanetu ubbaa qofay amarida wodiyawu issi mala gidenna. PHawuloosi eta woygi zoridee? Gallassaa xeelliyaagan i hagaadan giis: “Issi urai, ‘Hiqqa gallassai hara gallassatuppe aadhdhees’ yaagidi qoppiyo wode, harai, ‘Ubba gallassatikka issi mala’ giidi qoppees. Asai ubbai huuphiyan huuphiyan hegaadan aissi qoppiyaakko akeeko.” Haratussi xube gidiyaabaa oottennaagee keehi koshshiyaaba.—Roome 14:5, 13, 15, 19, 20 nabbaba.

10. Harati kuuyiyoobaa nuuni bonchana koshshiyoy aybissee? (Ha huuphe yohuwaa doomettan deꞌiya misiliyaa xeella.)

¹⁰ Nu mala Kiristtaanee akeekan kuuyido issibaa nuuni akeekana xayikko, a bolli pirddanawu eesotana koshshenna; woy a qofaa laamissanawu baaxetana koshshenna. A kahay loytti loohana bessiya “shugo” gidana danddayees; woy issi issiban keehi pirddiyaagaa gidana danddayees. (1 Qor. 8:11, 12) Hara baggaara, Xoossay kessido maaraara maayettanaadan loohissana bessiyaakkonne, nu kahaa qorana koshshennan waayi aggana. Payyatettaa naagiyoogaa malaban, nuuni ubbay nu huuphen kuuyananne hegaa gaasuwan gakkiyaabaa danddayana koshshees.

WODIYAA AATTIYO UFAYSSIYAABAA

11, 12. Allaxxiyoobaa dooriyo wode, nuuni hassayana koshshiyo Geeshsha Maxaafaa zoree awugee?

¹¹ Asay wodiyaa aattiyooban ufayttanaadaaninne goꞌettanaadan oottidi Yihooway medhiis. Solomoni “miiccanaukka wodee” deꞌiyoogaanne “yexxanaukka wodee” deꞌiyoogaa yootiis. (Era. 3:4) SHin wodiyaa aattiyo amaridabay maaddiyaaba, ufayssiyaaba woy gazddissiyaaba gidenna; woy qassi keehi allaxxiyoogee woykko muletoo allaxxiyoogee loꞌꞌo gidenna. Ufayssiyaaban allaxxidi goꞌettanaadan nu kahay waatidi maaddana danddayii?

¹² Geeshsha Maxaafay ‘asatettaa oosuwaa’ oottennaadan yootees. He oosoti “shaaramuxiyoogaa, tunatettaa, yeellaa xayiyoogaa, Eeqau goinniyoogaa, bitiyoogaa, morkketettaa, palamaa, qanaatiyoogaa, hanqquwaa, bana xoqqissiyoogaa, ooyettiyoogaa, issoi issuwaappe shaahettiyoogaa, miqqainniyoogaa, woriyoogaa, mattottiyoogaa, yettanchcha kiyiyoogaanne hageeta milatiyaageeta.” PHawuloosi, “Hageeta milatiyaageeta oottiyaageeti Xoossaa kawotettaa laattokkona” yaagiis. (Gal. 5:19-21) Hegaa gishshawu, nuna hagaadan oychana danddayoos: ‘Qohiya woy keesettiyo woy ba biittan ceeqettiyoogaa bessiya ispporttiyaa ixxanaadan ta kahay tana denttettii? SHori baynnabaa, mattottiyoogaa, woy iita ayyaanaa oosuwaa xaasayi xeellanaadan oottiya woy pokkobaa bessiya pilimiyaa beꞌanawu taani paacettiyo wode, ta kahay tana diggii?’

13. Allaxxiyoobaa xeelliyaagan 1 Ximootiyoosa 4:8⁠ninne Leemiso 13:20n deꞌiya zoree nuna waatidi maaddana danddayii?

¹³ Allaxxiyoogaara gayttidaagan nu kahaa loohissanawu Geeshsha Maxaafaa maaray maaddana danddayees. Leemisuwawu, Geeshsha Maxaafay ‘bollaa minttiyoogee guuttaa goꞌꞌiyoogaa’ yootees. (1 Xim. 4:8) Bollaa ubbatoo minttiyoogee gazddissiyoogaanne payyatettawukka maaddiyoogaa daroti akeekoosona. Nuuni haratuura issippe bollaa minttanawu koyikko, hegaa oonaarakka oottana koshshii? Leemiso 13:20y, “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees” yaagees. Nuuni Geeshsha Maxaafan loohida nu kahay yootiyoobaa siyiyoogan, dooridi allaxxana koshshiyoogaa hegee bessennee?

14. Issi yelagiyaa Roome 14:2-4ra maayettiyaabaa waata oottadee?

¹⁴ Kiristtiyanawunne Danyelissi yelaga naaꞌꞌu macca naati deꞌoosona. Kiristtiyaani hagaadan giis: “Nu So Asaa Goynuwaa omarssi allaxxiyoogaabaa tobbida. Allaxxiyo issi issibay loꞌꞌo gidiyoogaa, haray qassi loꞌꞌo gidennaagaa maayida. Loꞌꞌo lagge geetettana danddayiyay oonee? Amarida yelaga Yihoowa Markkati timirtte keettan shemppo saatiyan a likke gidenna gaada qoppiyoobaa haniyoogaa nu naatuppe issinna yootaasu. Akka etaagaadan hananaadan bana unꞌꞌettidabadan qoppaasu. Nuussi ubbaassi kahay deꞌiyoogaanne ay oottanaakko, qassi oonaara oottanaakko dooranawu kahay yootiyoobaa siyana koshshiyoogaa iyyo yootida.”—Roome 14:2-4 nabbaba.

15. Allaxxanawu qoppiyo wode Maatiyoosa 6:33 hassayiyoogee waati maaddana danddayii?

¹⁵ Ay keena wodiyaa allaxxay? SHiiquwaa, haggaazuwaa, buzo xinaatiyaanne hegaa malabaa kaseyayiyye, allaxxiyoobaa kaseyay? Neeni keehippe koyiyoobay aybee? Yesuusi, “Kasetidi, Xoossaa kawotettaanne a xillotettaa koyite; i intteyyo he ubbabaa immana” yaagiis. (Maa. 6:33) Ne kahay neeni Yesuusa zoriyaara maayettiyaabaa kaseyanaadan denttettii?

MISHETTIDI OOTTANAADAN DENTTETTIYAABAA

16. Haggaazuwan nu kahay aybin maaddana danddayii?

¹⁶ Loꞌꞌo kahay nuna maaddiyoy iitabaa oottennaadan yootiyoogaa xallaana gidenna. I nuuni loꞌꞌo oosuwaa oottanaadan denttettees. He loꞌꞌo oosotuppe waannatiyaagee sooppe soo biidi markkattiyoogaanne haggaazuwaa kiyennan markkattiyoogaa. PHawuloosi hegaadan oottanaadan a kahay a denttettiis. I, “Wonggeliyaa mishiraachchuwaa yootennan aggikko, taassi aayye7ana” yaagiis. (1 Qor. 9:16) Nuuni aagaadan oottiyo wode, nuuni suurebaa oottiyoogaa nu kahay nuussi yootees. Qassi mishiraachuwaa yootiyoogan nuuni etawu yootiyo asatu kahaa denttettoos. PHawuloosi, “Tumaa qoncciyan haasayidi, Xoossaa sinttan asa ubbaa zoriya wozanaayyo nuna shiishsheettees” yaagiis.—2 Qor. 4:2.

17. Issi yelaga michiyaa ba kahaara maayettiyaabaa waatada oottadee?

¹⁷ Jaklina bayoloojiyaa tamaariyo wode, iyyo layttay 16. He wode lodda laamiyaa timirttiyaa tamaarissoosona. A hagaadan gaasu: “Hegaa tamaariyo wode taani haroodeegaadan loytta tobbanawu ta kahay paqqadibeenna. Lodda laamiyaa timirttiyawu exatikke. Taani ta qofaa asttamaariyawu yootaas. I daro keha; qassi taani kifiliyan deꞌiya naatu ubbawu meretaabaa yootanaadan paqqadiis.” Jaklina Geeshsha Maxaafan loohida ba kahay yootiyoobaa siyada hegaara maayettiyaabaa oottido gishshawu, keehi ufayttaasu. Ne kahay neeni hegaadan likkebaa oottanaadan denttettii?

18. Nuuni ammanttiya loꞌꞌo kahay nuussi deꞌanaadan koyana bessiyoy aybissee?

¹⁸ Yihooway kessido maaraaranne a ogiyaara kaseegaappe aaruwan maayettidi deꞌanawu halchiyoogee keehi loꞌꞌoba! Yaatanawu, kahay keehi maaddana danddayees. Nuuni Xoossaa Qaalaa ubbatoo loytti xannaꞌiyoogan, akeekidobaa wotti dentti qoppiyoogaaninne hegaadan deꞌanawu baaxetiyoogan nu kahaa loohissoos. Yaatiyo wode, kahay deꞌuwan nuna keehi maaddees!