9. Beni wode, ‘eeyyatu palamay’ gubaaꞌiyaa waati qohidee?

⁹ Xoossaa Qaalay Kiristtaaneti aggana woy haakkana bessiyo iita oosota xeelliyaagan qoncce zoriyaa yootees. Leemisuwawu, 2 Ximootiyoosa 2:19 yuushuwan deꞌiya qofay, Ximootiyoosi “qaalan palamettenna mala,” qassi “pattenna haasayaappe” bana naagana mala PHawuloosi zoridoogaa yootees. (2 Ximootiyoosa 2:14, 16, 23 nabbaba.) He wode gubaaꞌiyan deꞌiya issi issi asati kaddidaageetu qofaa tamaarissoosona. Qassi harati issi issiban palamettennan waayi aggana. Eti palamettiyoobay Geeshsha Maxaafaa qofaa phalqqiyaaba gidana xayikkokka, shaahotettaa medhiyaaba. Eti qaalan palamettosonanne ooyettoosona; hegee ayyaanaaban qohees. PHawuloosi, ‘eeyyatu palamaappenne aynne erennaageetu palamaappe baqatanaadan’ Ximootiyoosa zoridoy hegaassa.

10. Kaddidaageetuura gayttidaagan nuuni ay oottana koshshii?

¹⁰ Ha wodiyan, gubaaꞌe giddon kaddidaageeti darotoo deꞌokkonna. SHin, nuuni Geeshsha Maxaafaa timirttiyaa phalqqiyaabaa siyiyo wode, he qofay awuppe yiyaaba gidikkokka appe haakkana koshshees. Kaddidaageetuura palamettiyoogee, eti Intternneetiyan xaafidobawu nu zaaruwaa kiittiyoogee woy hara ogiyan etaara gayttiyoogee eeyyatetta. Nuuni izaawa maaddanaassi qoppidi hegaadan oottiyaaba gidikkokka, yaatiyoogee nuuni ha huuphe yohuwan tamaarido Geeshsha Maxaafaa qofaa phalqqiyaaba. Nuuni Yihoowa asa gidiyo gishshawu, kaddidaageetuppe muleera haakkoos.

11. ‘Eeyyatu palamaa’ denttana danddayiyaabay aybee, qassi gubaaꞌe cimati hegaara gayttidaagan waanidi loꞌꞌo leemiso gidana danddayiyoonaa?

¹¹ Gubaaꞌiyaa sarotettaa moorana danddayiyay kaddidaageetu xalla gidokkona. Leemisuwawu, wodiyaa aattiyoobaara gayttidaagan issuwaa qofay haraagaappe dummatiyoogee ‘eeyyatu palamaa’ denttana danddayees. Wodiyaa aattiyoobaara gayttidaagan, issi uri Yihooway kessido kandduwaa maaraa kaallennaba gidikko, cimati palamettennan agganawu qoppidi hegaa malabaa coꞌꞌu gookkona. (Maz. 11:5; Efi. 5:3-5) SHin cimati harati eta qofaa kaallanaadan minttettokkona. Eti gubaaꞌe cimatuyyo imettida kaallidi deꞌiya zoriyaa oosuwan peeshshanawu baaxetoosona: “Intte giddon de7iya Xoossaa dorssaa wudiyaa Xoossai koyiyoogaadan heemmite. . . . Dorssaa wudiyau intte leemiso gidanaappe attin, heemmiyoogeeta wolqqan haaroppite.”—1 PHe. 5:2, 3; 2 Qoronttoosa 1:24 nabbaba.

¹³ Qommoora beꞌido Geeshsha Maxaafaa maaray wodiyaa aattiyoobaa dooranaassa xalla gidennan harabawukka maaddees. Maayiyoobaaranne alleeqettiyoobaara, payyatettaaranne miyoobaara, qassi hara buzo allaalliyaara gayttidaagan asay palamettana danddayees. Issi uri Geeshsha Maxaafaa higgiyaa kanttana xayikko, Yihoowa asay hegaa malaban palamettiyoogaappe haakkiyoogan aadhida erancha gidiyoogaa bessees; aybissi giikko, “Godaa ashkkarai ubbaayyo kehiyaagaa . . . gidanau besseesippe attin, ooyettanau bessenna.”—2 Xim. 2:24.