Yelidaageetoo​—Intte Naati ‘Atotettaa Demmiya Aadhida Erancha’ Gidanaadan Maaddite

1, 2. Naati bantta huuphiyaa geppidi xammaqettanawu koyiyo wode issi issi aawatinne aayoti hirggiyoy aybissa gidana danddayii?

GEESHSHA MAXAAFAA xannaꞌissiyo shaꞌan qoodettiyaageeti bantta huuphiyaa Yihoowawu geppidi xammaqettoosona. Etappe daroti tumaa tamaaridi diccida yelagata; eti ubbaappe aadhiya deꞌuwaa dooridosona. (Maz. 1:1-3) Neeni Kiristtaane aawa woy aayo gidikko, ne naꞌi xammaqettana gallassaa neeni yeemuwan naaganaagee erettidaagaa.—3 Yohaannisa 4⁠ra gatta xeella.

² SHin nena qofissiyaabay deꞌana danddayees. Issi issi yelagati xammaqetti simmidi, Xoossaa maaraadan deꞌiyoogee aadhida eratetta gidiyoogaa siriyoogaa akeekennan aggakka. Ubba issoti issoti tumaa aggidosona. Yaatiyo gishshawu, ne naꞌi tumaa ogiyan biyoogaa doommi simmidi, guyyeppe tumaa kaseegaadan siiqiyoogaa aggana gaada hirggana danddayaasa. Ne naꞌi Yesuusi, “Neeni kase ne siiquwaa aggadasa” yaagido, koyro xeetu layttaa Efisoona gubaaꞌiyaa mala gidana danddayees. (Ajj. 2:4) Ne naꞌa siiqoy ubbatoo mino gidanaadaaninne i ‘diccidi attanaadan’ waata maaddana danddayay? (1 PHe. 2:3) Hegaa zaaranawu, Ximootiyoosa hanotaa ane beꞌoos.

“GEESHSHA MAXAAFATA ERADASA”

3. (a) Ximootiyoosi waani Kiristtaane gididee, qassi i tamaaridobaa waati oosuwan peeshshidee? (b) Tamaariyoogaara gayttidaagan PHawuloosi Ximootiyoosa zorido heezzubay aybee?

³ Ximootiyoosi Kiristtaane haymaanootiyaabaa koyro siyidoy, kiitettida PHawuloosi 47 M.Ln Lisxxira biitti koyro biido wode gidennan aggenna. Ximootiyoosi he wode pantta yelaga gidennan aggenna, shin i tamaaridobaa oosuwan peeshshiis. Naaꞌꞌu layttappe simmin, i PHawuloosaara yuuyidi xomoosiyoogaa doommiis. Hegaappe simmin, 16 gidiya layttay aadhin, PHawuloosi Ximootiyoosawu hagaadan giis: “Neeni he tumatettaa ooppe tamaaridaakkonne erada, neeni tamaaridoogaaninne eridoogan [mintta ammanidoogan] minnada de7a. Neeni guutta naatettaasappe doommada Kiristtoos Yesuusa ammanada, atotettai beettiyo aadhdhida eratettaa immanau danddayiya [Ibraawetto] geeshsha maxaafata eradasa.” (2 Xim. 3:14, 15) PHawuloosi (1) geeshsha maxaafata eriyoogaa, (2) tamaaridobaa mintti ammaniyoogaanne (3) Kiristtoos Yesuusa ammanidi, atotettaa demmiya aadhida erancha gidiyoogaa xeelliyaagan yootidoogaa akeeka.

4. Intte guutta naata tamaarissanawu inttena maaddidabati aybee? (Doomettan deꞌiya misiliyaa xeella.)

⁴ Kiristtaane aawatinne aayeti intte naꞌay geeshsha maxaafata eranaadan koyeeta; hegeeti ha wodiyan Ibraawettonne Giriiketto Geeshsha Maxaafata. Eti akeekana danddayiyo hanotaadan, keehi guutta naatikka Geeshsha Maxaafan odettida asatubaanne hanotatubaa tamaarana danddayoosona. Aawatinne aayeti bantta naata maaddanawu goꞌettana danddayiyo darobata Yihoowa dirijjitee giigissiis. Hegeetuppe intte qaalan giigida issota issota qoppana danddayeetii? Geeshsha Maxaafaa eray Yihoowaara dabbotaa minttanawu maaddiya waannaba gidiyoogaa hassayite.

MINTTA AMMANA

5. (a) Mintti ammaniyoogaa giyoogee woygiyoogee? (b) Ximootiyoosi Yesuusabaa yootiya mishiraachuwaa mintti ammanidoogaa waati eriyoo?

⁵ Geeshsha maxaafatuppe demmiyo eray keehi maaddees. Gidoppe attin, naata ayyaanaabaa tamaarissanawu Geeshsha Maxaafan odettida asatubaanne hanotatubaa tamaarissiyoogaa xallay gidenna. Ximootiyoosi ‘eranaadan’ woykko mintti ammananaadan tamaaridoogaakka hassaya. Ximootiyoosi “guutta naatettaasappe” doommidi Ibraawetto Geeshsha Maxaafaa erees. SHin guyyeppe i Yesuusi Masiyaa gidiyoogaa ammaniis. Hegaa giyoogee i demmido eray a ammanuwan yaa minniis giyoogaa. Ximootiyoosi mishiraachuwaa mintti ammanidi xammaqettida erissiyo ashkkara gidiis; qassi PHawuloosaara misoonaawe gididi oottiis.

6. Intte naati Xoossaa Qaalaappe tamaariyoobaa mintti ammananaadan waati maaddana danddayeetii?

⁶ Intte naati Ximootiyoosaagaadan mintti ammananaadan waati maaddana danddayeetii? Koyruwan, danddayite. Ammanoy issi galla beettiyaaba gidenna; woy qassi intte mintti ammaniyo gishsha xallawu intte naati laattiyooba gidenna. Geeshsha Maxaafaa tumabaa ammananawu naati ubbay ‘ubbabaa paaccana’ bessees. (1 Tasalonqqe 5:21 nabbaba.) Aawatinne aayeti intte intte naatu ammanoy minnanaadan, ubba qassi eti oyshaa oychiyo wode eta maaddanawu darobaa oottana danddayeeta. Ane issi leemisuwaa beꞌoos.

7, 8. (a) Issi Kiristtaane aaway ba naꞌiyo tamaarissiyo wode danddayiyoogaa waati bessidee? (b) Ne naꞌaabaa neeni danddayana koshshidoy awudee?

⁷ Toomaasa naꞌee layttay 11. I hagaadan giis: “Ta naꞌiyaa hagaadan gaada oychawusu, ‘Yihooway saꞌan deꞌoy deꞌanaadan lodda laamiyaa goꞌettideeshsha?’ woy qassi, ‘Nuuni deretettan hanotaa giigissanawu, leemisuwawu dooruwaa dooriyoogaa malabaa ayssi oottokkonii?’ Issi issitoo yuushsha qoppennan zaarenna mala naagettays.” Issi uri ammananaadan oottiyay tuma gidida issi gitabaa gidennan, qoodan daro gidida guuttabata gidiyoogaa Toomaasi erees.

⁸ Toomaasi eriyoogaadan, tamaarissanawu danddayay koshshees. Danddayay Kiristtaanetu ubbaassi keehi koshshiyaaba. (Qol. 3:12) Toomaasi ba naꞌee ammanoy minnanaadan maaddanawu daro wodeenne darotoo haasayiyoogee koshshiyoogaa akeekiis. I ba naꞌiyaa tamaariyoobaa ammananaadan maaddanawu Geeshsha Maxaafaa qofaa qonccissana koshshees. I hagaadan giis: “Taaninne ta machiyaa nu naꞌiyaa tamaariyoobaa, ubba qassi keehi koshshiya yohota a wozanappe ammaniyaakkonne akeekiyaakko eranawu koyoos. A oyshaa oychiyoogee loꞌꞌoba. A oychennan issibaa ammaniyo wode taani hirggays.”

9. Intte naata Xoossaa Qaalaa waati tamaarissana danddayeetii?

⁹ Aawatinne aayeti danddayan tamaarissiyo wode, ammanoy “ai keena aahokko, adussakko, xoqqakkonne ciimmakko” naati loddan loddan akeekana. (Efi. 3:18) Nuuni eta layttaadaaninne eta hanotaadan tamaarissiyoobaa koyana danddayoos. Eti tamaariyoobaa ammanikko, etaara tamaariyaageeta gujjin, haratu sinttan bantta ammanuwawu exatana danddayoosona. (1 PHe. 3:15) Leemisuwawu, asay hayqqiyo wode waaniyaakko intte naati Geeshsha Maxaafaappe qonccissana danddayiyoonaa? Geeshsha Maxaafay yootiyoobaa eti loytti akeekiyoonaa?a Xoossaa Qaalaa intte naata tamaarissanawu danddayaa koshshees; gidikkonne yaatiyoogee maaddiyaaba.—Zaa. 6:6, 7.

10. Intte tamaarissiyo wode keehi koshshiyaabaappe issoy aybee?

¹⁰ Intte naatu ammanoy minnanaadan maaddanawu intte loꞌꞌo leemiso gidiyoogeekka keehi koshshiyaaba. Heezzu macca naatu aayo gidida Istefaana hagaadan gaasu: “Ta naati guutta naatettan deꞌiyo wodeppe doommada tana hagaadan gaada oychays: ‘Yihooway deꞌiyoogaa, i siiqo gidiyoogaanne a ogee suure gidiyoogaa taani ayssi ammanidaakko ta naatussi odiyaanaa? Ta naati taani wozanappe Yihoowa siiqiyoogaa akeekiyoonaa?’ Tana ammanttennabay ta naata ammanttana gaada qoppana danddayikke.”

‘ATTANAWU AADHIDA ERANCHA GIDA’

11, 12. Aadhida eratettay aybee, qassi nuuni hegaa bessiyaabay issi ura laytta gidenna gaana danddayiyoy aybissee?

¹¹ Nuuni beꞌidoogaadan, Ximootiyoosi (1) Geeshsha Maxaafaa erees, qassi (2) eridobaa mintti ammanees. SHin, PHawuloosi geeshsha maxaafati Ximootiyoosi ‘attanawu aadhida erancha gidanaadan’ oottana danddayoosona giidoy aybissee?

¹² Geeshsha Maxaafaa Loytti Akeekiyoogaa, Paydo 2y, Geeshsha Maxaafan aadhida eratettay qonccissiyo amaridabata hagaadan gees: “[Aadhida eratettay] metuwaa qaaranawu, qohiyaabaappe naagettanawu, halchuwaa polanawu woy harati hegaadan oottanaadan zoranawu eraanne akeekaa goꞌettiyoogaa. He eratettay eeyyatettaappe keehi dummatiyaaba.” Geeshsha Maxaafay, “Na7a wozanaa azallatettai baqqi oiqqees” yaagees. (Lee. 22:15) Eeyyatettaappe keehi dummatiya aadhida eratettay wozannamatettaa bessiya issiba. Ayyaanaaban wozannaama gidiyoogaa bessiyaabay layttaa gidennan, issi uri Yihoowa yayyiyoogaanne awu azazettanawu eeno giyoogaa.—Mazamure 111:10 nabbaba.

13. Yelagati attana danddayiya aadhida erancha gidiyoogaa waati bessana danddayiyoonaa?

¹³ Ayyaanaaban wozannaama gidida yelagati bantta amuwan woy laggeti denttettin ‘beetan yaanne haanne shocettokkona.’ (Efi. 4:14) SHin, eti ‘iitaa kehaa shaakkidi’ ayyaanaaban diccoosona. (Ibr. 5:14) Eti bantta aawatinne aayeti woy gasttati deꞌenna wodekka gidin, eratettan kuuyiyoogan ayyaanaaban wozannaama gidiyoogaa bessoosona. (Pili. 2:12) Attanawu hegaa mala eratettay koshshiyaaba. (Leemiso 24:14 nabbaba.) Intte naati he eratettaa demmanaadan waati maaddana danddayeetii? Intte kaalliyo maaraa eti eriyoogaa intte akeekana bessees. Intte haasayiyoobaaninne oottiyooban, Xoossaa Qaalan deꞌiya maaray intte kaalliyo maara gidiyoogaakka eti eranaadan oottite.—Roo. 2:21-23.

14, 15. (a) Xammaqettanawu koyiya yelagay qoppana koshshiya gita yohoti aybee? (b) Intte naati Xoossaa higgiyaa azazettiyoogee demissiyo anjjuwaa qoppanaadan waati maaddana danddayeetii?

¹⁴ SHin, aybi iitakko woy aybi loꞌꞌokko intte naatussi yootiyoogaa xallay gidenna. Eti hageetu mala oyshata qoppanaadankka intte maaddana koshshees: ‘Asatettawu ufayssana danddayiyaabaa Geeshsha Maxaafay diggiyoy aybissee? Geeshsha Maxaafaa maaray awudekka tana goꞌꞌees gaada taani ammananaadan oottiyay aybee?’—Isi. 48:17, 18.

¹⁵ Intte naꞌay xammaqettanawu koyikko, xammaqettiyoogaara gayttida aawatettaa i loytti qoppanaadankka maaddite. Hegawu ayyo aybi siyettii? Hegaa goꞌꞌay aybee? Metanabay aybee? Metiyaabaappe goꞌꞌiyaabay darees giyoy aybissee? (Mar. 10:29, 30) Xammaqettanaappe kase hageeta loytti qoppiyoogee keehi koshshiyaaba. Azazettiyoogee demissiyo anjjuwaanne azazettennan ixxiyoogee gattiyo qohuwaa naati loytti qoppanaadan eta maaddiyo wode, eti ammanana danddayoosona. Aybaa? Geeshsha Maxaafaa maaray awudenne eta goꞌꞌiyaaba gidiyoogaa.—Zaa. 30:19, 20.

XAMMAQETTIDA YELAGAY AMMANUWAWU BAAXETIYO WODE

16. Xammaqettida issi yelagay ammanuwan shuggiyoogaa doommikko, a yelidaageeti ay qoppana bessii?

¹⁶ Gidoppe attin, intte naꞌi xammaqettidi amarida wodiyaappe simmin siriyoogaa doommikko shin? Leemisuwawu, xammaqettida issi pantta yelagay alamiyaabaa amottiyaaba milatana woy Geeshsha Maxaafaa maaraadan deꞌiyoogee goꞌꞌiyoogaa sirana danddayees. (Maz. 73:1-3, 12, 13) A qofaa suurissana giidi intte oottiyoobay i Yihoowawu haggaazanaadan woy haggaazennaadan oottana danddayees. I guutta naꞌa gidin woy yelagakka gidin, he yohuwan aara palamettoppite. SHin, intte a siiqiyoogaanne maaddanawu koyiyoogaa i eranaadan oottite.

17, 18. Issi yelagay siriyoobay deꞌikko, yelidaageeti waati maaddana danddayiyoonaa?

¹⁷ Xammaqettida yelagay wozanappe bana Yihoowawu geppidoogee qoncce. Hegee Xoossaa siiqanawunne aybippenne aaruwan a sheniyaa oottanawu gelido qaala. (Marqqoosa 12:30 nabbaba.) Yihooway he qaalaa xoqqu ootti xeellees; qassi qaalaa gelida urikka hegaa xoqqu ootti xeellana koshshees. (Era. 5:4, 5) Bessiya wodiyan, qassi kehatettan hegaa intte naꞌaa hassayissite. SHin, yaatanaappe kase, Yihoowa dirijjitee yelidaageetussi giigissidobata loytti goꞌettite. Yaatiyoogee, naꞌay ba huuphiyaa Yihoowawu geppiyoogeenne xammaqettida Kiristtaane gidiyoogee keehi gitaba, qassi anjjuwaa demissiyaaba gidiyoogaa ayyo qonccissanawu maaddees.

¹⁸ Leemisuwawu, Yelagati Oychiyo Oyshaa—Oosuwan Peꞌana Danddayiya Zaaruwaa, Paydo 1n, “Yelidaageeti Oychiyo Oyshata” giyo gujo qofan maaddiya zoriyaa demmana danddayettees. He zoree hagaadan gees: “Intte naꞌay intte ammanuwaa kaallanawu koyenna giidi sohuwaara kuuyoppite. Darotoo hegawu gaaso gidiyaabay deꞌees.” Laggeti hegawu denttettana danddayoosona. Laggee baynnaagee woy hara yelaga Kiristtaaneti ayyaanaaban baappe gooba giidi qoppiyoogeekka gaaso gidana danddayees. He hanotati intte naꞌi intte ammaniyoobaa maayennaagaa bessennan aggana danddayiyoogaakka he gujo qofay qonccissees. He hanotatu gaasoy darotoo a wayssida harabaara gayttidaba. Qassi he gujo qofay yelidaageeti tumaa siriya bantta naꞌaa waati maaddana danddayiyaakko yootees.

19. Aawatinne aayeti bantta naati ‘aadhida erancha gididi attanaadan’ waati maaddana danddayiyoonaa?

¹⁹ Aawatoonne aayetoo, intte naata “Godaa seeraaninne zoriyan” dichiyo gita aawatettaynne matay intteyyo deꞌees. (Efi. 6:4) Nuuni beꞌidoogaadan, hegaadan oottanawu Geeshsha Maxaafay yootiyoobaa tamaarissiyoogaa xalla gidennan, eti tamaaridobaa mintti ammananaadan maaddanakka koshshees. Eta ammanoy eti bantta huuphiyaa Yihoowawu geppanaadaaninne ayyo kumettaa wozanappe haggaazanaadan denttettiyaagaa keena mino gidana koshshees. Yihoowa Qaalay, a ayyaanay, qassi intte oottiyoobay intte naati ‘aadhida erancha gididi attanaadan’ maaddana mala amottoos.