• “Beettenna Xoossaa” Beꞌay?
    Wochiyo Keelaa—2014 | Hosppune 15

    • 10. (a) Yihooway Nisaana aginan 1513n K.K. Israaꞌeelati ay oottanaadan azazidee? (b) Muusee Xoossay azazidoogaadan oottidoy aybissee?

      10 Nisaana aginan 1513n K.K., Muuseenne Aarooni Israaꞌeelatuyyo yootana mala Yihooway oorattabaa etau yootiis; hegeekka, Iraaꞌeelati bollan ayba pacinne baynna issi dorssa orggiyaa woy deeshsha orggiyaa shukkidi bantta keettaa qosilettaa tiyanaadaana. (Kes. 12:3-7) Muusee waatidee? Kiitettida PHauloosi guyyeppe abaa hagaadan giidi xaafiis: “Haiquwaa kiitanchchai Israa7eela asaayyo baira naata bochchennaadan, Muusee Paasikaa bonchchidoogeenne qosilettan suuttaa caccafissidoogee ammanuwaana.” (Ibr. 11:28) Muusee Yihooway ammanettiya Xoossa gidiyoogaa eriis; qassi Yihooway Gibxxen yelettida bayra naata woranau gelido qaalay polettanaagaa ammaniis.

      11. Muusee harati naagettanaadan yootidoy aybissee?

      11 He wode Muuse naati “hayquwaa kiitanchchai”a gakkenna haahosan, Midiyaama biittan deꞌennan aggokkona. (Kes. 18:1-6) Gidoppe attin, i Israaꞌeelatu bayra naati hayqqenna mala etau yootiyoogan Yihoowau azazettiis. Muusee eta shemppuwaa ashshanau, sohuwaara “Israa7eela cimata ubbaa xeesissidi, . . . ‘Paasikau orgge dorssaa woikko orgge deeshshaa shukkite’” yaagiis.—Kes. 12:21.

      12. Yihooway nuuni keehi koshshiyaabaa yootanaadan azazidee?

      12 Yihoowa asay kiitanchay kaalettin, “Xoossaayyo yayyite; a bonchchite. Aissi giikko, sa7aa asa i pirddiyo saatee gakkiis. Saluwaa, sa7aa, abbaanne haattaa pulttuwaa medhdhida Xoossaayyo goinnite” yaagidi asaassi keehi koshshiyaabaa yootoosona. (Ajj. 14:7) Hegaa yootana koshshiyo saatee haꞌꞌa. Nuuni asay Gita Baabilooni ‘qixaatiyaa shaakkenna’ mala ippe kiyanaadan etau yootana bessees. (Ajj. 18:4) Xoossaappe haakkida asay ‘aara sigettana’ mala, “hara dorssatikka” tiyettida Kiristtaanetuura issippe eta woossoosona.—Yoh. 10:16; 2 Qor. 5:20.

      Issi Yihoowa Markkiyaa kiitanchati bashshaa carkkoy carkkennaadan teqqi uttidoogaa qoppausu

      Yihooway qaalaa gelidobaa ammaniyoogee neeni mishiraachuwaa yootanau kaseegaappe aaruwan amottanaadan oottana (Mentto 13 xeella)

      13. Nuuni mishiraachuwaa yootanau kaseegaappe aaruwan amottanaadan oottiyay aybee?

      13 “Pirddiyo saatee” gakkidoogaa nuuni ammanoos. Yihooway giidoogaadan nuuni eesuwan sabbakananne asaa erissiyo ashkkara oottana koshshiyoogaa ammanoos. Kiitettida Yohaannisi, ‘oyddu kiitanchati oyddu saꞌaa zooziyan eqqidi, carkkoy carkkennaadan teqqi’ uttidoogaa ajjuutan beꞌiis. (Ajj. 7:1) He oyddu kiitanchati ha alamiyan gakkana gita waayiyaa bashshaa carkkuwaa yeddana haniyoogaa ammanuwan beꞌay? Neeni he kiitanchata ammano ayfiyan beꞌiyaaba gidikko, yayyennan mishiraachuwaa yootana danddayaasa.