Yihoowa Markkati Tumu Kiristtaanee?

Yihoowa Markkati nuuni tumu Kiristtaane gidiyoogaa ammanoos. Aybissi? Nu ammaniyoobawu pulttuwaa, nuna haratuppe dummayiya sunttaanne nuuni issoy issuwaa siiqiyoogaa ane beꞌoos.

1. Yihoowa Markkati ammaniyoobay aybin deꞌii?

Yesuusi ‘Xoossaa qaalay tuma’ yaagiis. (Yohaannisa 17:17) Yesuusaagaadan, Yihoowa Markkati awudekka Xoossaa Qaalan deꞌiyaabaa ammanoosona. Leemisuwawu, Geeshsha Maxaafaa Tamaareta kase geetettiya Yihoowa Markkatu taarikiyaa beꞌa. Geeshsha Maxaafaa tamaareti 1870 heeran Geeshsha Maxaafaa loytti pilggiyoogaa doommidosona. Eti ammaniyoobay woosa keettay tamaarissiyoogaappe dummatikkokka, Geeshsha Maxaafay yootiyoobaa ammanoosona. Yaatidi, eti akeekidobaa haratussi yootiyoogaa doommidosona.a

2. Nuuni Yihoowa Markkata geetettiyoy aybissee?

Yihoowi baayyo goynniyaageeta ba markkata yaagees; ayssi giikko, eti abaa tumaa yootoosona. (Ibraawe 11:4–12:1) Leemisuwawu, Xoossay beni wode ba asaa, “Intte ta markkata” yaagiis. (Isiyaasa 43:10 nabbaba.) Yesuusi ‘Ammanettida Markkaa’ geetettiis. (Ajjuutaa 1:5) Yaatiyo gishshawu, 1931n, Yihoowa Markkata geetettanawu kuuyida. Nuuni he sunttan xeesettiyo gishshawu keehi ufayttoos.

3. Yihoowa Markkati Yesuusaagaadan siiqiyoogaa waati bessiyoonaa?

Yesuusi bana kaalliyaageeta keehi siiqiyo gishshawu eti awu so asa mala. (Marqqoosa 3:35 nabbaba.) Hegaadankka, Yihoowa Markkati kumetta saꞌan issi keettaa asa mala. Nuuni issoy issuwaa ishanne michcho giyoy hegaassa. (Pilimoona 1, 2) Qassi nuuni, “Intte ishantta siiqite” giya azazuwaa azazettoos. (1 PHeexiroosa 2:17) Yihoowa Markkati kumetta saꞌan deꞌiya nu ishanttanne michchontta maadoy koshshiyo wode maaddiyoogaa mala daro ogetun hegaadan siiqoos.

LOYTTA AKEEKA

4. Nu ammaniyoobay Geeshsha Maxaafay yootiyooba

Geeshsha Maxaafaa tumay nuussi qoncci qoncci baanaagaa Yihoowi kasetidi yootiis. Daaneela 12:4 nabbabite; yaatidi ha oyshaa tobbite:

• Xoossaa asay Geeshsha Maxaafaa ubbatoo pilggiyo wode ‘daranabay’ aybee?

CHarles Raasila giyo ishaynne hara amarida Geeshsha Maxaafaa tamaareti Xoossaa Qaalaa waati xannaꞌidaakko akeeka. BIIDUWAA beꞌite; yaatidi kaallidi deꞌiya oyshaa tobbite.

BIIDUWAA: Geeshsha Maxaafaa Tumaa Zaarettidi Demmiyoogaa (7:45)

• CHarles Raasilinne aara issippe xannaꞌiyaageeti Geeshsha Maxaafaa waati xannaꞌiyoogaa biiduwaappe akeekadii?

Hagaa eray?

Nu ammaniyo amaridabay issi issitoo yaa geeyiis. Aybissi? Away kiyiyo wode heeran deꞌiyaabay loddan loddan qoncci beettiyoogaadan, Xoossay ba Qaalaa loddan loddan akeekanaadan oottees. (Leemiso 4:18 nabbaba.) Hegaa gishshawu, Geeshsha Maxaafay laamettana xayikkonne, nuuni A loytti akeekiyo wode nu ammaniyoobay kaseegaappe geeyi geeyi bees.

5. Nuuni nu sunttay qonccissiyoobaa oottoos

BIIDUWAA: Nuuni Oonakko Erissiya Sunttaa (2:40)

• Yihoowa Markkata giyo sunttay bessiyaaba gidiyoy aybissee?

Yihoowi baayyo asay markkattanaadan dooridoy aybissee? Abaa worddobaa odidobay daro gidiyo gishshawu, I tumu Xoossaa gidiyoogaa eti qonccissanaadaana. Ane he worddotuppe naaꞌꞌaa xallaa beꞌa.

Issi issi haymaanooteti misiliyaa goꞌettidi ayyo goynnanaadan Xoossay koyees giidi bantta asaa tamaarissoosona. Gidoppe attin, Wogaabaa 26:1 nabbabidi, ha oyshata tobbite:

• Awugee tumee? Eeqata Yihoowi waati xeellii?

Haymaanootiyaa kaalettiya amaridaageeti Yesuusi Xoossaa giidi tamaarissoosona. Gidoppe attin, Yohaannisa 20:17 nabbabidi, ha oyshata tobbite:

• Awugee tumee? Yesuusi Xoossaappe aynne dummatennee?

• Yihoowi ba Markkati babaanne ba Naꞌaabaa tumaa yootanaadan kiittidoogaa erido gishshawu neeyyo aybi siyettii?

6. Nuuni issoy issuwaa siiqoos

Bollaa qommoti issoy issuwaara ohettidoogaadan Kiristtaaneti issuwaa gidana koshshiyoogaa Geeshsha Maxaafay yootees. Koyro Qoronttoosa 12:25, 26 nabbabite; yaatidi ha oyshata tobbite:

• Tumu Kiristtaaneti issi Kiristtaanee waayettiyo wode waatana koshshii?

• Yihoowa Markkati siiqettiyo siiquwaabaa neeni ay akeekadii?

Yihoowa Markkati issi biittan waayettiyo wode, kumetta saꞌan deꞌiya Yihoowa Markkati sohuwaara eta maaddanawu baaxetoosona. Hegawu issi leemisuwaa qonccissiya BIIDUWAA beꞌite. Yaatidi kaallidi deꞌiya oyshaa tobbite.

BIIDUWAA: Hayte Biittay Matiwu Giyo Gotiyaappe Attiis (5:29)

• Yihoowa Markkati daafaban qohettidaageeta maaddanawu oottiyoobay eti siiqettiyoogawu aybin naqaasha gidii?

AY AKEEKADII?

Yihoowa Markkati tumu Kiristtaaneta. Nuuni Geeshsha Maxaafay yootiyoobaa ammaniya, Yihoowabaa tumaa yootiyaanne awu goynniya kumetta saꞌan deꞌiya issi keettaa asa mala.

Zaaretuwaa

• Nuuni Yihoowa Markkata geetettanawu kuuyidoy aybissee?

• Nuuni issoy issuwaara siiqettiyoogaa waati bessiyoo?

• Yihoowa Markkati tumu Kiristtaanee?

PILGGA

Nu taarikiyaabaa loytta akeeka.

Yihoowa Markkati Oosuwan Bessido Ammanuwaa, SHaaho 1: Xumaappe Kiyiyoogaa 1:00:53

Yihoowa Markkati worddo timirtteta waati qoncciya kessidaakko issi leemisuwaa beꞌa.

Xoossaa Asay A Sunttaa Bonchchees 7:08

Yihoowa Markkatubaa geella ne oychchiyo oyshatussi zaaruwaa demma.

“Yihoowa Markkata Xeelliyaagan Asay Darotoo Oychchiyo Oyshata” (websaytiyaa sinttaa)

Isteveni hara zare asaa keehi ixxiyo gishshawu eta qohiis. I laamettidoy aybissakko akeeka.

“Ta Deꞌoy He Wode Yaa Iiti Iiti Biis” (Wochchiyo Keelaa, Xiqimita 1, 2015)