Miishshay Iitatetta Ubbawu Pulttoo?

Geeshsha Maxaafay yootiyoobaa

Akkay. Geeshsha Maxaafay miishshaa iita woy iitatetta ubbawu pultto geenna. “Miishshay iitatetta ubbawu pultto” giyo meeze gidida haasayay asay Geeshsha Maxaafaa qofaappe ashshidi yootiyo balettiyaaba. Geeshsha Maxaafay “miishsha siiqiyoogee iitatetta ubbau pultto” giyoogee tuma.a—1 Ximootiyoosa 6:10.

Miishshaa xeelliyaagan Geeshsha Maxaafay woygii?

Akeekan goꞌettikko, miishshay goꞌꞌana, ubbakka iitabaappe naagana danddayiyoogaa Geeshsha Maxaafay yootees. (Eranchchaa 7:12) Hegaa bollikka, haratussi kehiyaageeta Geeshsha Maxaafay nashshees; miishshaa immiyoogee hegaa bessiyaaba gidana danddayees.—Leemiso 11:25.

Geeshsha Maxaafay deꞌuwan miishshaa shiishshanawu bichchaarennaadankka zorees. Hagaadan gees: “Miishsha siiqoppe inttena naagite; intteyyo de7iyaagee intteyyo gido.” (Ibraawe 13:5) Duretettaa yedettennan aggidi, miishshaa maara goꞌettana bessiyoogaa hegaappe tamaaroos. SHin, miyoobay, maayiyoobaynne, keettaa mala nuussi koshshiyaabay deꞌikko gidees.—1 Ximootiyoosa 6:8.

**Miishshaa siiqenna mala naagettanaadan Geeshsha Maxaafay yootiyoy aybissee?**

Yaaretiya asay merinaa deꞌuwaa demmenna. (Efisoona 5:5) Hegawu issi gaasoy, yaaretiyoogee eeqawu goynniyoogaa woy worddo goyno gidiyoogaa. (Qolasiyaasa 3:5) Hara gaasoy, miishshaa siiqiya asay eti amottiyoobaa demmanawu koyiyo gishshawu, darotoo loꞌꞌo maaraa kaallokkona. Leemiso 28:20y, NW, “Duretanawu jaamiyagee ba geeshshatettaa mooriyoogee attenna” gees. Ubba eti wuuqqiyoogaa, balibakkiyoogaa, asa gubaayiyoogaa woy shemppuwaa woriyoogaa mala danobaa oottana danddayoosona.

Miishshaa siiqoy eeshshaa moorana xayikkokka, hara iitabaa kaalettana danddayees. Geeshsha Maxaafay hagaadan gees: “Duretanau koyiyaageeti paaciyaaninne piriyan geloosona; qassi daro asaa bashshaunne xayuwau goochchi efiya daro eeyyanne qohiya amuwan kunddoosona.”—1 Ximootiyoosa 6:9.

Miishshaa xeelliyaagan Geeshsha Maxaafay zoriyooban waani goꞌettana danddayiyo?

Miishshaa demmanawu giidi likkebaanne Xoossaa ufayssiyaabaa eriiddi oottennan aggennaba gidikko, bonchchissiyaabaa hanoos, qassi Xoossan nashshettoosinne appe maaduwaa demmoos. Xoossay bana ufayssanawu wozanappe koyiyaageetussi hagaadan giidi qaalaa geliis: “Taani nena mulekka yeggikke woikko aggikke.” (Ibraawe 13:5, 6) I “ammanettida urai daro” anjjettanaagaa yootiyoogan nuna minttettees.—Leemiso 28:20.

Miishshaara Gayttidabaa Yootiya Geeshsha Maxaafaa Xiqiseta

Eranchchaa 7:12: ‘Miishshay asaa iitaappe ashshees.’

Hegaa birshshettaa: Miishshaa maara goꞌettiyoogee amaridaban nuna naagiyo gishshawu, maaddana danddayees.

Luqaasa 12:15: “Asassi daro miishshai de7ikkokka, a shemppoi he duretettan de7enna.”

Hegaa birshshettaa: Miishshay deꞌuwan ubbabaappe aadhdhiyaaba gidenna; qassi nuuni atotettaa demmanaadan maaddenna.

1 Ximootiyoosa 6:10: “Miishsha siiqiyoogee iitatettaa ubbau pultto. Issoti issoti hegaa amottiiddi, ammanuwaappe balettidi, daro metuwan banttana qohidosona.”

Hegaa birshshettaa: Issi urawu miishshay deꞌiyoogee bala gidenna. SHin bantta deꞌuwan hara aybippenne aattidi miishshaa siiqiya asati bantta so asaa deꞌoy laalettanaadan oottiyoogaaninne bessiyaagaappe aatti oottiyo gishshawu sahettiyoogan bantta bolli metuwaa ehoosona.

Ibraawe 13:5: “Miishsha siiqoppe inttena naagite; intteyyo de7iyaagee intteyyo gido.”

Hegaa birshshettaa: Nuuni duretanawu jaamiyoogaappe nuussi tumuppe koshshiyaabay gidana giidi deꞌiyoogee eratetta.

Maatiyoosa 19:24: “Dure asi Xoossaa kawotettaa gelanaappe, gaameelai marppiyaa xoo7iyaara aadhdhanaagee matattees.”

Hegaa birshshettaa: Issi yelaga dure bitanee A kaallanaadan Yesuusi shoobbiis. SHin he bitanee duretettaa keehi siiqiyo gishshawu A kaallennan ixxiis. Yaatiyo gishshawu miishshaa siiqenna mala naagettanaadan Yesuusi yootiis. Duretettaa Xoossaappe sinttayiya urappe merinaa deꞌoy halana.

a Xiqisee hagaadankka geetettiis: “Miishshaa siiqiyoogee qohiya ubbabawu pultto.”