Nuna Kaalettiya Yesuusaara Hashetite

1. Ha wodiyan Yihooway koyiyoobay aybee?

HA WODIYAN Kawotettaa mishiraachchoy saꞌa ubban odettanaadan Xoossay koyees. (Mar. 13:10; 1 Xim. 2:3, 4) He oosoy Yihoowaba, qassi keehi koshshiyaaba gidiyo gishshawu, hegaa kaalettanaadan I ba siiqiyo Naꞌaa sunttiis. Nuna Yesuusi kaalettiyo gishshawu wurssettay yaanaappe kase Yihooway koyiyoogaadan sabbakuwaa oosoy polettanaagaa nuuni ammanettana danddayoos.—Maa. 24:14.

2. Ha huuphe yohuwan nuuni ay beꞌanee?

² Ayyaanaabaa qumaa giigissanaadaaninne bana kaalliyaageeti issippe awudeegaappenne aaruwan sabbakanaadan Yesuusi ammanettida wozannaama ashkkaraa baggaara waati kaalettiyaakko ha huuphe yohuwan beꞌana. (Maa. 24:45) Nuuni ubbay Yesuusaaranne ammanettida wozannaama ashkkaraara hashetanawu waatana danddayiyaakkokka beꞌana.

YESUUSI SABBAKUWAA OOSUWAA KAALETTEES

3. Yesuusawu ayba aawatettay imettidee?

³ Yesuusi sabbakuwaa oosuwaa ha wodiyan kaalettiiddi deꞌees. Hegaa nuuni ammanettana danddayiyoy aybissee? I saluwaa baanaappe kase, bana kaalliya ammanettida amaridaageetuura Galiilan deꞌiya issi deriyan shiiqiis. I etayyo hagaadan giis: “Maata ubbai saluwaaninne sa7an taayyo imettiis.” Yaagi simmidi I woygidaakko akeeka: “Hegaa gishshau, intte biidi, asa ubbaa tana kaalliyaageeta oottite.” (Maa. 28:18, 19) Yaatiyo gishshawu, Yesuusawu imettida aawatettaappe issoy sabbakiyo oosuwaa kaalettiyoogaa.

4. Ha wodiyan Yesuusi sabbakuwaa oosuwaa kaalettiiddi deꞌiyoogaa ammanettana danddayiyoy aybissee?

⁴ Yesuusi bana kaalliyaageeti “dere ubban” sabbakanaagaanne asaa erissiyo ashkkara oottanaagaa qassi ‘wodiyaa wurssettay gakkanaassikka ubba wode etaara deꞌanaagaa’ yootiis. (Maa. 28:20) Hegee, Yesuusi kaalettin nu wodiyaa gakkanaashin sabbakuwaa oosoy oosettanaagaa loytti qonccissees.

5. Mazamure 110:3n deꞌiya hiraagay polettanaadan nuuni waati maaddana danddayiyoo?

⁵ Yesuusi wurssettaa wodiyan he oosuwawu gidiya oosanchchati deꞌokkona giidi hirggibeenna. Ayssi giikko, mazamuraawee, “Neeni ne morkketuura olettiyo gallassi ne asai eeno gaana” giidi yootido hiraagay polettanaagaa I erees. (Maz. 110:3) Neeni sabbakuwaa oosuwaa oottiyaaba gidikko, Yesuusaaranne ammanettida ashkkaraara hashetaasa, qassi ha hiraagay polettanaadan maaddaasa. Ha oosoy oosettiiddi deꞌiyaaba gidikkokka, metiyaabati deꞌoosona.

6. Kawotettaa mishiraachchuwaa yootiyaageeta ha wodiyan gakkiya issi metoy aybee?

⁶ Kawotettaa mishiraachchuwaa yootiyaageeta gakkiya issi metoy harati eqettiyoogaa. Kaddidaageeti, haymaanootiyaa kaalettiyaageetinne polotikaa asati nu oosuwaabaa darotuyyo wordduwaa yootoosona. He worddo odoy balettin nu dabboti, nu eriyoogeetinne nunaara oottiyaageeti nuuni Yihoowawu haggaazennaadaaninne sabbakennaadan wolqqanttana danddayoosona. Issi issi biittatun, nu morkketi nu ishanttanne michchontta yashissoosona, keehi shocoosona, ubba qassi qachchoosona. Eti yaatiyoogee nuna garamissenna. Ayssi giikko, Yesuusi kasetidi, “Ta sunttaa gishshau, dere ubbai inttena ixxana” yaagiis. (Maa. 24:9) Asay nuna hegaadan ixxiyoogee Yihooway nunan ufayttiyoogaa bessees. (Maa. 5:11, 12) He ubbabawu denttettiyay Dabloosa. SHin, Yesuusi Dabloosappe keehi wolqqaama! Yesuusi maaddin mishiraachchoy saꞌa ubban odettiiddi deꞌees. Hegaa bessiya naqaashaa ane beꞌoos.

7. Ajjuutaa 14:6, 7n deꞌiya hiraagay polettiiddi deꞌiyoogaa bessiyaabaa ay akeekadii?

⁷ Nuuni mishiraachchuwaa yootiyo wode nuna gakkiya hara metoy, daro asay haasayiyo qaalay nuugaara issi mala gidennaagaa. Yesuusi kiitettida Yohaannisa bessido ajjuutan ha wodiyan mishiraachchoy he metuwaa xooni kanttanaagaa kasetidi yootiis. (Ajjuutaa 14:6, 7 nabbaba.) Waati xoonidee? Kawotettaa mishiraachchuwaa nuuyyo danddayettida keenan daro asay siyanaadan maaddiiddi deꞌoos. Ha wodiyan kumetta saꞌan deꞌiya asay jw.org saytiyan Geeshsha Maxaafaa qofay deꞌiyo xuufeta nabbabana danddayees; ayssi giikko, he xuufeti 1,000ppe dariya doonatun deꞌoosona! Asaa erissiyo ashkkara oottanawu xannaꞌissiyo Merinawu Ufayttada Deꞌa! giya maxaafay 700ppe dariya qaalan birshshettanaadan Oosuwaa Kaalettiya Citay paqqadiis! Hegaa bollikka, Geeshsha Maxaafaa qofay deꞌiyo xuufeti hayttay siyennaageetuyyo biiduwan, qassi ayfee xeellennaageetuyyo bireeliyan giigidosona. Geeshsha Maxaafaa hiraagay polettiyoogaa beꞌiiddi deꞌoos. Geeshsha Maxaafay kasetidi yootidoogaadan, “dumma dumma qaalan haasayiya kawotettatu” ubban deꞌiya asay Geeshsha Maxaafaa tumaa woykko ‘geeshsha haasayaa’ tamaariiddi deꞌees. (Zak. 8:23; Sof. 3:9) Hegee ubbay polettiyoy Yesuus Kiristtoosi kaalettiiddi deꞌiyo gishshataassa.

8. Nuuni sabbakiyoogee ayba ayfiyaa demissidee?

⁸ Ha wodiyan Yihoowa dirijjitiyan 240 biittatun 8,000,000ppe dariya asay deꞌees; qassi layttan layttan keehi daro asay xammaqettees! SHin eti “ooratta meretaa” maayidoogee woy eta eeshshay laamettidi loꞌꞌidoogee he qoodaappekka keehi aadhdhiyaaba. (Qol. 3:8-10) Daroti pokkobaa oottiyoogaa, kobattiyoogaa, asaa coo ixxiyoogaanne bantta biittaa keehi siiqiyoogaa aggidosona. Isiyaasa 2:4n, “Hegaappe guyyiyan eti mulekka olaa timirttiyaa tamaarokkona” giya hiraagay polettiiddi deꞌees. Nuuni ooratta meretaa maayanawu baaxetiyo wode, asay Xoossaa dirijjitiyaakko yaanaadan oottoosinne nuna kaalettiya Kiristtoos Yesuusa kaalliyoogaa bessoos. (Yoh. 13:35; 1 PHe. 2:12) Ha ubbabay haniyoy aybissee? Yesuusi nuna koshshiyaagaadan maaddiyo gishshaassa.

AMMANETTIDA WOZANNAAMA ASHKKARAA YESUUSI SUNTTIIS

9. Maatiyoosa 24:45-47y yootiyoogaadan, wurssettaa wodiyaa xeelliyaagan Yesuusi kasetidi ay yootidee?

⁹ Maatiyoosa 24:45-47 nabbaba. Yesuusi wurssettaa wodiyan ayyaanaabaa qumaa giigissanaadan ‘ammanettida wozannaama ashkkaraa’ sunttanaagaa kasetidi yootiis. Yaatiyo gishshawu, ammanettida wozannaama ashkkaray ha wodiyan minnidi oottana giidi nuuni qoppanaagee qoncce. Qassi nuuni qoppiyoogaadan haniis. Xoossaa asawunne tumaa siyanawu koyiya asawu “koshshiyo wodiyan” ayyaanaabaa qumaa giigissanaadan, ayyaanan tiyettida amarida asata Yesuusi sunttiis. He asati banttana haratu ammanuwawu goda giidi qoppokkona. (2 Qor. 1:24) SHin Yesuus Kiristtoosi Xoossaa asaa “kaalettiyaagaanne halaqa” gidiyoogaa eti akeekoosona.—Isi. 55:4.

10. Neeni Yihoowawu haggaaziyoogaa doommanaadan misiliyan deꞌiya xuufetuppe awugee maaddidee?

¹⁰ Ammanettida wozannaama ashkkaray tumaa siyanawu koyiyaageeti Xoossaa Qaalaa tumaa tamaaranaadan, 1919ppe doommidi dumma dumma xuufeta giigissiis. Tumaa siyanawu koyiyaageeti Geeshsha Maxaafaa koyro timirtteta eranaadan maaddanawu Zi Harp of God giyo maxaafay 1921n giigiis. Guyyeppe hara xuufetikka giigidosona. Neeni saluwan deꞌiya nu Aawaa eranaadaaninne siiqanaadan kaallidi deꞌiya xuufetuppe awugee maaddidee? ‘Xoossay Tumanchcha Gido,’ Merinaa Deꞌuwawu Kaalettiya Tumaa, Saꞌan Gannatiyan Merinawu Daana Danddayaasa, Merinaa Deꞌuwawu Kaalettiya Eraa, Tumuppe Geeshsha Maxaafay Tamaarissiyoy Aybee?, Geeshsha Maxaafay Nuna Ay Tamaarissii? giyo maxaafayiyye woy Merinawu Ufayttada Deꞌa!​ giyo mati kiyida maxaafay? He ubba xuufetikka asay erissiyo ashkkara gidanaadan maaddanawu giigidosona. He xuufeti kiyido wode keehi maaddidosona.

11. Nuuni ubbay Yihoowabaanne Geeshsha Maxaafaa loytti tamaarana koshshiyoy aybissee?

¹¹ Oorattatu xalla gidennan, nuuni ubbaykka Yihoowabaanne Geeshsha Maxaafaa loytti tamaarana koshshees. Kiitettida PHawuloosi, “Mino qumai wozannaama asaassa” yaagiis. Nuuni Geeshsha Maxaafaappe tamaaridobaa oosuwan peeshshiyoogee ‘iitaa kehaa shaakkanaadan’ maaddiyoogaa PHawuloosi gujjidi yootiis. (Ibr. 5:14) Ha wodiyan daro asay keehi pokkobaa oottiyo gishshawu, Yihooway kessido maaraayyo azazettiyoogee keehi deexxana danddayees. SHin Yesuusi nuuni nu ammanuwaa minttanawu koshshiyaabaa tamaaranaadan oottees. He timirttiyaa Xoossaa ayyaanan xaafettida Geeshsha Maxaafaappe tamaaroos. Ammanettida wozannaama ashkkaray Yesuusi kaalettin, he timirttiyaa giigisseesinne ubbawu gattees.

12. Yesuusaagaadan, nuuni Xoossaa sunttaa bonchchiyoogaa waati bessidoo?

¹² Yesuusaagaadan, nuunikka bonchchoy bessiyo Xoossaa sunttaa bonchchoos. (Yoh. 17:26) Leemisuwawu, Geeshsha Maxaafaara maayettiya Yihoowa Markkata giyo sunttan 1931ppe doommidi xeesettanawu kuuyida. Yaatiyoogan, Xoossaa sunttaa keehi xoqqu ootti xeelliyoogaanne saluwan deꞌiya nu Aawaa sunttan erettanawu koyiyoogaa bessida. (Isi. 43:10-12) Xoossaa sunttay Wochchiyo Keelawu koyro sinttan kiyiyoogaa he laytti Xiqimita aginan doommiis. Hegaa bollikka, Ooratta Alamiyaa Geeshsha Maxaafaa Birshshettan Xoossaa sunttay kase deꞌiyo soho ubban zaarettidi geliis. Hegee, Yihoowa sunttaa daro Geeshsha Maxaafaa birshshettatuppe kessida, banttana Kiristtaane giya haymaanootetuppe nuuni keehi dummatiyoogaa qonccissees!

YESUUSI BANA KAALLIYAAGEETA KAALETTEES

13. Yesuusi ha wodiyan ‘ammanettida wozannaama ashkkaraa’ goꞌettiiddi deꞌiyoogaa neeni ammanettanaadan oottiyaabay aybee? (Yoh. 6:68)

¹³ Yesuusi ‘ammanettida wozannaama ashkkaraa’ baggaara ha saꞌan geeshsha goynuwaa aassiya issi maalaaliya dirijjitiyaa essiis. He dirijjitiyaa xeelliyaagan neeyyo aybi siyettii? Geella neeyyookka kiitettida PHeexiroosaagaadan siyettennan waayi aggana. PHeexiroosi Yesuusa hagaadan giis: “Nuuni ookko baanee? Neeyyo merinaa de7uwaa qaalai de7ees.” (Yoh. 6:68) Ha wodiyan nuuni Yihoowa dirijjitiyaa erennaakko, waananawu deꞌiyoo? Kiristtoosi he dirijjitiyaa baggaara nuuni Xoossawu ammanettidi deꞌanaadan nuussi koshshiyaabaa ubbaa immees. Nuuni haggaazuwan qara gidanaadankka I nuna loohissees, qassi Yihoowa ufayssanawu ‘ooratta asatettaa maayanaadan’ nuna maaddees.—Efi. 4:24.

14. Koronaa harggee darido ha wodiyan, neeni Yihoowa dirijjitiyaa bagga gididoogan waana goꞌettadii?

¹⁴ Yesuusi wayssiya wodiyan maaddiya kaaletuwaa nuuyyo yootees. Koronaa harggee doommido wode, hegaa mala kaaletoy ay keena maaddiyaakko akeekida. Alamiyan daro asawu kirqqi giido wode, Yesuusi nuuni nu payyatettaa naaganaadan maaddiya qoncce kaaletuwaa immiis. Nuuni nu sooppe kiyiyo wode maskkiya wottanaadaaninne asaa mati shiiqennaadan nuuyyo zoree imettees. Cimati gubaaꞌiyan deꞌiya ubbaara silkkiyan woy hara ogiyan ubbatoo gayttanaadaaninne etawu asatettaaninne ayyaanaaban koshshiyaabaa hassayanaadan odettees. (Isi. 32:1, 2) Oosuwaa Kaalettiya Citaa irpporttiyaappekka hara kaaletuwaanne minttettuwaa demmida.

15. Ha koronaa harggiyaa wodiyan, shiiqotuuranne haggaazuwaara gayttidaagan ayba kaaletoy nuussi imettidee, qassi hegee ayba ayfe demissidee?

¹⁵ Ha koronaa harggiyaa wodiyan, gubaaꞌe shiiqota shiiqiyoogaaranne haggaazuwaara gayttidaagankka nuuyyo qoncce kaaletoy imettiis. Qassi Intternneetiyaa goꞌettidi gubaaꞌe shiiqota, woradaanne killiliyaa shiiqota shiiqiyoogaa sohuwaara doommida. Qassi dabddaabbiyaa xaafiyoogaanne silkkiyaa dawaliyoogaa xallan haggaaziyoogaa doommida. Yaatin, Yihooway nuuni oottidobaa anjjiis. Daro macara biiroti aassiyaageetu qooday kaseegaappe keehi gujjidoogaa yootidosona. Hegaa bollikka, daro ishanttinne michchontti ha wodiyan haggaazuwan keehi loꞌꞌo ayfiyaa demmidosona.—“Yihooway Nu Haggaazuwaa Anjjees” giya saaxiniyaa xeella.

16. Nuuni ay ammanettana danddayiyoo?

¹⁶ Koronaa harggiyaara gayttidaagan, Yihoowa dirijjitee naagettiyoogaa keehi darissiyaabadan issoti issoti qoppana danddayoosona. SHin nuuyyo imettiya kaaletoti keehi maaddiyoogaa darotoo akeekida. (Maa. 11:19) Yesuusi Yihoowa asaa siiquwan waati kaalettiiddi deꞌiyaakko nuuni wotti dentti qoppiyo wode, sinttappe aybi haniyaakkonne Yihoowanne I siiqiyo Naꞌay nuna ubbatoo maaddanaagaa ammanettana danddayoos.—Ibraawe 13:5, 6 nabbaba.

17. Yesuusi kaalettin oottiyoogan neeyyo aybi siyettii?

¹⁷ Nuna Yesuusi kaalettiyo gishshawu keehi ufayttoos! Nu wogay, biittaynne nu haasayiyo qaalay dumma dumma gidikkonne, Yihoowa dirijjitiyan issuwaa gididi deꞌoos. Xoossaa Qaalaappe keehi darobaa tamaaroos, qassi haggaazuwan qara gidanaadan loohoos. Nuuni ubbaykka ooratta asatettaa maayanaadaaninne issoy issuwaara siiqettanaadan tamaaroos. Nuna kaalettiyaagee Yesuusa gidiyo gishshawu nuuni keehippe ufayttoos!