Issi Wudiyaa, Issi Henttanchaa

“Tana kaallida inttekka tammanne naa77⁠u Israa7⁠eela zaretu bolli pirddanau, tammanne naa77⁠u kawotaa araatan uttana.” —MAATIYOOSA 19:28.

1. Yihooway Abrahaama zareta ayba ogiyan oyqqidee, hegee hara asa ubbaa sheneho giis giyoogaa gidennay aybissee?

YIHOOWAY Abrahaama siiqido gishshau, a zerettau aggenna siiquwaa bessiis. I Abrahaama zare gidida, Israaꞌeela deriyaa 1,500 layttaappe dariya wodiyau doorettida, “baayyo dumma asa oottidi” xeelliis. (Zaarettido Wogaa 7:6 nabbaba.) Hegee Yihooway hara asa ubbaa sheneho giis giyoogee? CHii. He wode, Yihoowayyo goynnanau koyiya, Israaꞌeele gidenna asay a dumma asaara dabbotaa medhanau danddayiis. Ayhuda ammanuwau laamettida he asati he dere asadan qoodettidosona. Israaꞌeeleti eta bantta ishadan xeellana koshshiis. (Wogaabaa 19:33, 34) Etikka Yihoowa higgeta ubbaa azazettana koshshiis.—Wogaabaa 24:22.

2. Yesuusi daganttiyaabaa ay yootidee, hegee ayba oyshaa denttii?

² Gidikkokka, Yesuusi ba wode deꞌiya Ayhudatussi: “Xoossaa kawotettai intteppe ekettidi, lo77⁠o aifiyaa immiya asau imettana” giidi daganttiyaabaa yootiis. (Maatiyoosa 21:43) Ha ooratta dere gidanay oonee, ha wodiyan ha laamee nuna ayba ogiyan bochii?

Ooratta Deriyaa

3, 4. (a) Kiitettida PHeexiroosi ooratta deriyaa woygidi qonccissidee? (b) Ooratta dere gidiyay oonee?

³ Kiitettida PHeexiroosi ha ooratta deriyaa loytti qonccissiis. I ba mala Kiristtaanetuyyo: “Xoossai xumaappe garamissiya ba poo7⁠uwau inttena xeesiis; intte a ooratta oosuwaa yootanau doorettida zare; intte kawo qeeseta; geeshsha asanne Xoossaassi buzo asa” giidi xaafiis. (1 PHeexiroosa 2:9) Kaseti odettidaagaadan, Yesuusi Mase gidiyoogaa ammanida Ayhudati he ooratta deriyau koyro asata gididosona. (Daaneela 9:27a; Maatiyoosa 10:6) PHeexiroosi: “Intte kase Xoossaa asa gidekketa; shin ha77⁠i intte a asa” giido gishshau, takkidi, Israaꞌeele dere gidenna daro asatikka he deriyaa yame gididosona.

⁴ PHeexiroosi ooyyo yootiiddi deꞌii? Dabddaabbiyaa doomettan i: “Nuna naa77anttuwaa yelidaagaa, Yesuus Kiristtoosa haiquwaappe denttidoogan nuuyyo de7⁠uwaa immana giidaagaa [Xoossaa] galatoos. Qassi Xoossai intteyyo immana daro laataa wooqqennasan, moorettennasan, woi xayennasan saluwan naagees” yaagiis. (1 PHeexiroosa 1:3, 4) Yaatiyo gishshau, ha ooratta deriyaa yameti saluwaa hidootay deꞌiyo, ayyaanan tiyettida Kiristtaaneta. Eti “Xoossaa Israaꞌeele.” (Galaatiyaa 6:16, NW) Kiitettida Yohaannisi Xoossaa Israaꞌeeletu qooday 144,000 gidiyoogaa ajjuutan beꞌiis. Eti “qeeseta” gididi oottanaunne “Xoossaassinne Dorssaassi baira gidanau, sa7aa asa giddoppe wozettidaageeta” gidishin, “[Yesuusaara] issippe sha7⁠u laittau haarana.”—Ajjuutaa 5:10; 7:4; 14:1, 4; 20:6; Yaaqooba 1:18.

Haratakka Gujjii?

5. (a) “Xoossaa Israaꞌeele” giya qaalay oona malaatii? (b) “Israaꞌeele” giya qaalay ubbatoo issiba xallaa malaatennay aybissee?

⁵ Galaatiyaa 6:16n “Xoossaa Israaꞌeele, NW” giya qaalay malaatiyoy ayyaanan tiyettida Kiristtaaneta gidiyoogee qoncce. SHin, Yihooway Israaꞌeele deriyaa tiyettida Kiristtaanetu xalla gidennan hara Kiristtaanetakka malaatanau goꞌettido wodee deꞌii? Ha oyshaa zaaruwaa Yesuusi baassi ammanettida kiitettidaageetuyyo: “Ta kawotettan taani qumaa miyo sohuwan intte maana malanne, uyana mala, qassi tammanne naa77⁠u Israa7⁠eela zaretu bolli pirddiiddi, araatatun uttana mala, ta Aawai tana sunttidoogaadan, taani inttena sunttais” giido qaalaappe akeekoos. (Luqaasa 22:28-30) Kiristtoosa SHaꞌu Layttaa Haaruwaa wode, “zaaretti merettiyo” wode hegee polettana.—Maatiyoosa 19:28, NW.

6, 7. Maatiyoosa 19:28⁠ninne Luqaasa 22:30n “tammanne naa77⁠u Israa7⁠eela” zareta geetettidaageeti oona malaatiyoonaa?

⁶ SHaꞌu Layttaa Haaruwaa wode, 144,000⁠ti saluwan kawo, qeesenne daanna gididi oottana. (Ajjuutaa 20:4) Eti pirddanaynne haaranay o bollaanee? Maatiyoosa 19:28⁠ninne Luqaasa 22:30n eti “tammanne naa77⁠u Israa7⁠eela zaretu bolli” pirddanaagee odettiis. He sohuwan “tammanne naa77⁠u Israa7⁠eela” zareti malaatiyoy oonee? Hegeeti Yesuusa yarshshuwan ammaniyaageeta gidikkonne, kawonne qeese gidenna, saꞌan deꞌanau hidootiya ubbata malaatoosona. (Leewa zaree 12 Israaꞌeele zerettatun gujettibookkona.) He sohuwan 12 Israaꞌeele zaretun leemisettidaageeti, 144,000⁠ti qeese gididi oottiyo wode ayyaanaaban goꞌettiyaageeta. Ha goꞌettiya, qeese gidenna asatikka Xoossaa asa; qassi i eta siiqeesinne nashshees. Eti beni Xoossaa asa gididaageetun leemisettidoogee bessiyaaba.

⁷ Gita waayiyaappe kase 144,000 Xoossaa Israaꞌeeletu bolli merinau maatafay wodhiyoogaa kiitettida Yohaannisi ajjuutan beꞌi simmidi, “zare ubbaappe” yiida “zawai bainna daro asaa” beꞌidoogee bessiyaaba. (Ajjuutaa 7:9) Hageeti gita waayiyaappe attidi, Kiristtoosa SHaꞌu Layttaa Haaruwan deꞌana. Eti biilooniyan qoodettiya, hayquwaappe denddiyaageetuura yan deꞌana. (Yohaannisa 5:28, 29; Ajjuutaa 20:13) Yesuusinne aara issippe haariya 144,000⁠ti pirddanay, “tammanne naa77⁠u Israa7⁠eela” zaretun leemisettida ha ubbatu bollaana.—Oosuwaa 17:31; 24:15; Ajjuutaa 20:12.

8. Nagaraa Atto Giissiyo Gallassi hanettiyaabay 144,000⁠tunne asaa naatu haratu giddon deꞌiya gaytotettau eesho gidiyoy ayba ogiyaanee?

⁸ Asaa naatu haratunne 144,000⁠tu giddon deꞌiya gaytotettau, beni wode layttan issitoo bonchiyo Nagaraa Atto Giissiyo Gallassi hanettiyaabay eesho gidees. (Wogaabaa 16:6-10) Qeese ubbatu halaqay koyro “ba nagaraanne ba so asaa nagaraa” gishshau mirgguwaa yarshshana koshshees. Hegaa gishshau, Yesuusa yarshshoy shiiqidoy, koyruwan appe garssaara qeese gididi aara saluwan oottana, a soo asaa gishshataassa. Beni wode, Nagaraa Atto Giissiyo Gallassi hara Israaꞌeeletu nagaraa gishshau, naaꞌꞌu deeshshati shiiqoosona. Ha hanotan, qeese zareti 144,000⁠ta malaatiyo wode, hara Israaꞌeeleti saꞌan deꞌanau hidootiya ubbaa malaatoosona. Maatiyoosa 19:28n deꞌiya “tammanne naa77⁠u Israa77⁠eela” zareti, Yesuusappe garssaara qeese gididi oottiya ayyaanan tiyettidaageeta gidennan, Yesuusa yarshshuwan ammaniya harata ubbaa malaatiyoogaa hagee bessees.a

9. Hizqqeeli beeta maqidasiyaabaa beꞌido ajjuutan qeeseti oona malaatiyoonaa, qeese gidenna Israaꞌeeleti shin?

⁹ Hara leemisuwaa qoppa. Hananabaa yootiya Hizqqeeli Yihoowa beeta maqidasiyaa xeelliyaagan darobaa ajjuutan beꞌiis. (Hizqqeela shem. 40-48) He ajjuutan beeta maqidasiyan oottiya qeeseti Yihoowappe zoriyaanne seeraa siyidi asaa tamaarissoosona. (Hizqqeela 44:23-31) He ajjuutan dumma dumma zareti goynnanaunne yarshshuwaa shiishshanau yiidosona. (Hizqqeela 45:16, 17) Hegaa gishshau he ajjuutan, qeeseti malaatiyoy ayyaanan tiyettidaageeta gidishin, qeese gidenna Israaꞌeele zareti saꞌan deꞌanau hidootiyaageeta malaatoosona. Qeeseti tumu goynuwan sintta xeera gididi kaalettiyo wode, naaꞌꞌu citatikka issippe moggottidi oottiyoogaa he ajjuutay qonccissees.

10, 11. (a) Yesuusi woygidi yootidobay ammano minttiya hanotan polettidee? (b) Hara dorssata xeelliyaagan ayba oyshay denddii?

¹⁰ Yesuusi ayyaanan tiyettida bana kaalliya, ‘amarida dorssa wudiyaara’ issi birddiyan deꞌenna “hara dorssatikka” deꞌiyoogaa yootiis. (Yohaannisa 10:16; Luqaasa 12:32) I: “Taani etakka ehaanau bessees. Qassi eti ta qaalaa siyana; issi wudee de7ana; heemmiyaageekka issuwaa gidana” yaagiis. Hegee polettidoogaa beꞌiyoogee ay keena ammano minttiyaabee! Naaꞌꞌu cita asay, giishin qooday guutta gidido, ayyaanan tiyettidaageetu citaynne zawi baynna hara dorssatu citay issi wude gidiis. (Zakkaariyaasa 8:23 nabbaba.) Hara dorssati leemiso hanotan ayyaana beeta maqidasiyau giddo dabaaban oottennaba gidikkonne, kare dabaaban oottoosona.

¹¹ SHin Yihooway issi issitoo hara dorssata malaatanau qeese gidenna beni Israaꞌeeleta goꞌettiyo gishshau, saꞌan deꞌanau hidootiyaageetikka Godaa Kahuwaa wode oyttaappenne woyniyaappe ekkana koshshii? Ha oyshaa zaaruwaa kaallidi beꞌana.

Ooratta Maachaa

12. Yihooway ayba ooratta giigissuwaabaa kasetidi yootidee?

¹² Yihooway: “Taani . . . he gallassatuppe guyyiyan Israa7⁠eela asaara maacettana maachchai hagaa: taani ta higgiyaa eta giddon wottana; qassi eta wozanankka xaafana. Taani eta Xoossaa gidana; qassi etikka ta asa gidana” giido wode, ba asaassi ooratta giigissuwaa giigissanaagaa kasetidi yootiis. (Ermmaasa 31:31-33) Yihooway Abrahaamayyo gelido qaalay ha ooratta maachaa baggaara maalaalissiya hanotan merinau polettana.—Doomettaabaa 22:18 nabbaba.

13, 14. (a) Ooratta maachan shaahettiyaageeti oonee? (b) Ha ooratta maachan goꞌettiyaageeti oonee, eti hegaa ‘mintti naagiyoy’ ayba ogiyaanee?

¹³ Yesuusi hayqqanaappe kase qammi burccukkuwaa kiitettidaageetussi immidi: “Hagee inttessi gukkiya ta suuttan maacettida ooratta maachchaa” giido wode, ha ooratta maachaabaa yootiis. (Luqaasa 22:20; 1 Qoronttoosa 11:25) Ha ooratta maachay ubba Kiristtaanetakka gujjii? Gujjenna. He galla qammi he burccukkuwaappe uyida kiitettidaageetu mala issoti issoti ooratta maachan shaahettiyaageeta.b Yesuusi ba Kawotettan banaara haaranaadan etaara hara maachaa maacettiis. (Luqaasa 22:28-30) Eti Yesuusaara a Kawotettan issippe haarana.—Luqaasa 22:15, 16.

¹⁴ A Kawotettaa haaruwan, saꞌan deꞌanaageeta xeelliyaagan shin? Eti ooratta maachan goꞌettiyaageeta. (Galaatiyaa 3:8, 9) Eti he maachan shaahettennaba gidikkonne, Isiyaasi: “GODAASSI oottanau, GODAA sunttaa dosanaunne a ashkkara gidanau, banttana akko shiishshiya beteta, qassi Sambbataa tunissennan bonchchiyaageetanne ta maachchaa minttidi naagiyaageeta ubbata taani ta geeshsha deriyaa ehaana; ehaada ta woosa keettan eta ufaissana” yaagidi kaseti yootidoogaadan, he maachan koyettiyaabaa ‘minttidi naagoosona.’ Hegaappe simmin, Yihooway: “Ta keettai asai ubbai Xoossaa woossiyo keetta geetettana” yaagiis.—Isiyaasa 56:6, 7.

Oyttaappenne Woyniyaappe Ekkana Bessiyay Oonee?

15, 16. (a) Kiitettida PHauloosi ooratta maachaa aybiira gattidi yootidee? (b) Saꞌaa laattiyo hidootay deꞌiyoogeeti oyttaappenne woyniyaappe ekkana bessennay aybissee?

¹⁵ Ooratta maachan shaahettiyaageetussi ‘Ubbaappe Aadhiya Geeshsha Sohuwaa gelanau xalatettay deꞌees.’ (Ibraawe 10:15-20 nabbaba.) “Qaaxxanau danddayenna kawotettaa” ekkiyaageeti eta. (Ibraawe 12:28) Hegaa gishshau, saluwan Yesuus Kiristtoosaara kawonne qeese gidiyaageetu xallay ooratta maachaa malaatiya ‘burcckkuwaappe’ uyana koshshees. Ha ooratta maachan shaahettiyaageeti Dorssau bullashettanau giigidaageeta. (2 Qoronttoosa 11:2; Ajjuutaa 21:2, 9) Godaa Kahuwaa bonchiyo baalan beettiya hara ubbati oyttaappenne woyniyaappe ekkana xayikkonne bonchuwan shaahettoosona.

¹⁶ Saꞌaa laattiyo hidootay deꞌiyoogeeti Godaa Kahuwaa bonchiyo wode oyttaappenne woyniyaappe ekkennaagaa nuuni akeekanau maaddiyaabaakka PHauloosi yootiis. I tiyettida Kiristtaanetuyyo: “Intte ha oittaa miido wode ubbaaninne ha burccukkuwaappe uyido wode ubban Godai yaana gakkanaassikka, a haiquwaa yooteeta” yaagiis. (1 Qoronttoosa 11:26) Goday ‘yiyoy’ awudee? I yiyoy, bullashettiyaari yame gidida tiyettidaageetuppe wurssettan attidaagaa saluwaa efaanau yiyo wode. (Yohaannisa 14:2, 3) Godaa Kahuwaa bonchiyo baalay merinau bonchettennaagee qoncce. Maccaasee zerettaappe saꞌan attida ubbati saluwan bantta woytuwaa ekkana gakkanaassi he kahuwaa moosona. (Ajjuutaa 12:17) Gidikkokka, saꞌan merinau deꞌanaageeti oyttaappenne woyniyaappe ekkiyaaba gidiyaakko, Godaa Kahoy merinau bonchettana koshshees.

Eti Tumuppe Ta “Asa Gidana”

17, 18. Hizqqeela 37:26, 27n deꞌiya hiraagay ayba ogiyan polettidee?

¹⁷ Yihooway ba asaa giddon deꞌana issippetettaa hagaadan giis: “Taani etaara Sarotettaa maachchaa maacettana; he maachchaikka etaara merinaa maachcha gidana. Taani eta minttada essana; eta qoodaakka corissana; ta Beeta Maqidasiyaakka merinau eta giddon wottana. Yaatada taani hegan etaara de7ana. Taani eta Xoossaa gidana; etikka ta asa gidana.”—Hizqqeela 37:26, 27.

¹⁸ Sarotettaa maacha gidida, Yihooway gelido ha maalaalissiya qaalay polettiyoogan Xoossaa asa ubbay goꞌettana danddayees. Ee, Yihooway baassi azazettiya ashkkaratu ubbaassi sarotettaa immanau qaalaa geliis. A ayyaanaa ayfee eta giddon qonccidi beettees. Kiristtaanetu geeshsha goynuwaa malaatiya a beeta maqidasee eta giddon dees. Eti eeqaa goynuwaa ubbaa aggido gishshaunne Xoossaa Yihoowa xallau goynniyo gishshau, tumuppe a asa gididosona.

19, 20. Yihooway ‘ta asa’ giyoogeetu bagga gididaageeti oonee, ooratta maachay ay demissii?

¹⁹ Ha naaꞌꞌu citatu issippetettaa nu wodiyan beꞌiyoogee ayba ufayssiyaabee! Qooday gujji gujji biyo zawi baynna daro asati saluwan deꞌanau hidootennaba gidikkonne, he hidootay deꞌiyoogeetuura issippetettaa medhidoogaa xoqqu oottidi xeelloosona. Eti Xoossaa Israaꞌeeletuura dabbotaa medhidosona. Yaatiyoogan, eti Yihooway ‘ta asa’ giyoogeetu bagga gididosona. “He wode daro Aihuda gidenna kawotettati GODAARA gaittidi, a asa gidana; ikka eta giddon de7ana. Qassi inttekka Ubbaappe Wolqqaama GODAI tana inttekko kiittidoogaa he wode erana” yaagiya hiraagay etan polettidoogaa akeekoos.—Zakkaariyaasa 2:11; 8:21; Isiyaasa 65:22; Ajjuutaa 21:3, 4 nabbaba.

²⁰ Yihooway hagee ubbay ooratta maachaa baggaara hananaadan oottiis. Ayyaanaaban bete gidida miilooniyan qoodettiyaageeti Yihoowan nashettida deriyaa bagga gididosona. (Mikkiyaasa 4:1-5) He maachan giigidabaa ammanidi ekkiyoogaaninne an koyettiyaabaa azazettiyoogan eti he maachaa minttidi naaganau murttidosona. (Isiyaasa 56:6, 7) Hegaadan oottiyoogan, eti Xoossaa Israaꞌeelaara ubbatoo sarotettan deꞌiyo daro anjjuwaa demmidosona. Hegee neeni haꞌꞌinne merinau demmiyo anjjo gido!

[Tohossa qofata]

Hassayay?

• Eta bolli 144,000⁠ti pirddiyo “tammanne naa77⁠u Israa7⁠eela” zareti oonee?

• Tiyettidaageetuyyoonne hara dorssatuyyo ooratta maachaara gayttidaagan deꞌiya sohoy aybee?

• Ubba Kiristtaaneti Godaa Kahuwaa wode oyttaappenne woyniyaappe ekkana bessii?

• Ha wodiyan ayba issippetettay deꞌanaagee kasetidi odettidee?

[Sinttaa 25n Deꞌiya Misiliyaa]

(For fully formatted text, see publication)

Ha wodiyan daroti Xoossaa Israaꞌeeletuura oottiiddi doosona

7,313,173

4,017,213

1,483,430

373,430

1950 1970 1990 2009