TIMIRTTE 45
Alamiyaaban Oossinne Exatennaagaa Waati Bessiyoo?
Yesuusi bana kaalliyaageeti ‘saꞌaabaa gidana’ koshshennaagaa woy saꞌaaban eta gattiyaabi baynnaagaa tamaarissiis. (Yohaannisa 15:19) Ha alamiyaa polotikaaninne olan oossinne exatennaageekka hegaara gayttidaba. Exatennan aggiyoogee issi issitoo metiyoogee tuma. Nuuni alamiyaaban ooyyoonne exatenna gishshawu, asay nuna qilliiccana danddayees. Nuuni ooyyoonne exatennan, awudenne Xoossaa Yihoowawu ammanettidi deꞌanawu waatana danddayiyoo?
1. Tumu Kiristtaaneti asaa kawotettata waati xeelliyoonaa?
Kiristtaaneti kawotettaa bonchchoosona. Nuuni giiraa qanxxana koshshiyoogaa mala kawotettaa higgiyawu azazettidi, “Qeesaaraagaa Qeesaarassi” immiyoogan, Yesuusi azazidobaa oottoos. (Marqqoosa 12:17) Geeshsha maxaafay asaa kawotettati haariyoy Xoossay eeno giido gishshataassa gidiyoogaa yootees. (Roome 13:1) Yaatiyo gishshawu, asaa kawotettatussi Xoossaagaa keena maatay baynnaagaa nuuni eroos. Asaa metuwaa nu Xoossay ba Kawotettaa baggaara qaaranaadan amottoos.
2. Nuuni alamiyaaban ooyyoonne exatennaagaa waati bessana danddayiyoo?
Yesuusaagaadan, nuunikka polotikaaban aybinkka gelokko. Asay Yesuusi oottido maalaaliya issibaa beꞌidi A kawoyanawu malido wode, I eeno gibeenna. (Yohaannisa 6:15) Ayssi giikko, I guyyeppe yootidoogaadan, ‘A kawotettay ha saꞌaana gidenna’ woy qassi saꞌaaban A gattiyaabi baawa. (Yohaannisa 18:36) Nuuni Yesuusa kaalliyaageeta gidiyo gishshawu, alamiyaaban oossinne exatennaagaa daro ogetun bessoos. Leemisuwawu, nuuni ola olettokko. (Mikiyaasa 4:3 nabbaba.) Nuuni banddiraa mala, issi biittawu malaata gididabata bonchchikkonne, Xoossawu bessiya bonchchuwaa etawu immokko. (1 Yohaannisa 5:21) Nuuni ay polotikaa dirijjitessinne woy doorettiya oossinne exatokko woy eta eqettokko. Hegeetinne harabati nuuni Xoossaa kawotettawu wozanappe ammanettiyoogaa bessoosona.
LOYTTA AKEEKA
Alamiyaaban oossinne exatennan agganawu nuuni metootanaadan oottana danddayiyaabata pilgga, qassi neeni Yihoowa ufayssiyaabaa waata kuuyanaakko akeeka.
3. Tumu Kiristtaaneti alamiyaaban oossinne exatokkona
Yesuusinne A kaalliyaageeti nuussi leemiso gidiyaabaa oottidosona. Roome 13:1, 5-7nne 1 PHeexiroosa 2:13, 14 nabbabite. Yaatidi, BIIDUWAA beꞌidi, kaallidi deꞌiya oyshata tobbite.
Nuuni asaa kawotettata bonchchana koshshiyoy aybissee?
Nuuni etawu haarettiyoogaa bessiyo amarida ogeti awugeetee?
Olaa wode amarida kawotettati olettiyaageetuppe oossinne exatokko gaana danddayoosona, shin he olan naaꞌꞌu baggaakka maaddoosona. Alamiyaaban tumuppe oossinne exatennaagaa waati bessiyo? Yohaannisa 17:16 nabbabite. Yaatidi, BIIDUWAA beꞌidi, kaallidi deꞌiya oyshaa tobbite.
Alamiyaaban oossinne exatennaagaa waati bessiyo?
Neeni Xoossaa higgiyaa phalqqiyaabaa oottanaadan kawotettay koyikko waatuutee? Oosuwaa 5:28, 29 nabbabite. Yaatidi, BIIDUWAA beꞌidi, kaallidi deꞌiya oyshata tobbite.
Asaa higgee Xoossaa higgiyaa phalqqiyaaba gidiyo wode, O higgiyawu azazettana koshshii?
Kiristtaaneti kawotettawu azazettenna hanotata hassayay?
4. Neeni alamiyaaban ooyyoonne exatennaagaa bessiyaabaa qoppanne ootta
Koyro Yohaannisa 5:21 nabbabite. Yaatidi, BIIDUWAA beꞌidi, kaallidi deꞌiya oyshata tobbite.
Neeni biiduwan beꞌidoogaadan, Ayenggee polotikaa dirijjitiyan gelennan, woy banddiraa mazamuriyaa yexxiyoogaa mala, ba biittaa siiqiyoogaa bessiyaaba oottennan ayssi ixxidee?
Ne qofay aybee, I loꞌꞌobaa kuuyidee?
Nuuni alamiyaaban oossinne exatennan agganawu metootanaadan oottana danddayiya harabati aybee? BIIDUWAA beꞌite; yaatidi kaallidi deꞌiya oyshata tobbite.
Dumma dumma biittaa asay annaacettiyo ispporttiyaa beꞌiyo wode ooyyoonne exatennaadan waatana danddayiyoo?
Polotikaa asati kuuyiyoobay nuna goꞌꞌin woy qohinkka, ooyyoonne exatennaadan waatana danddayiyoo?
Oduwaa woy nunaara gayttiya asay yootiyoobaa siyidi alamiyaaban nuuni oossinne exatana koshshennay aybissee?
Issi Kiristtaanee alamiyaaban ooyyoonne exatennaagaa bessiyaabaa qoppananne oottana koshshiyaabati aybee?
ISSI URI HAGAADAN OYCHCHANA DANDDAYEES: “Neeni polotikaa dirijjite maaddennay aybissee?”
Woygada zaaruutee?
AY AKEEKADII?
Kiristtaaneti qoppiyooban, haasayiyoobaaninne oottiyooban polotikaaban ooyyoonne exatennaadan baaxetoosona.
Zaaretuwaa
Asaa kawotettawu nuuni oottana koshshiyaabay aybee?
Nuuni polotikaaban oossinne exatennay aybissee?
Alamiyaaban oossinne exatennan agganawu nuuni metootanaadan oottana danddayiyaabati aybee?
PILGGA
Nuuni alamiyaaban oossinne exatennaadan ay aggi bayana danddayiyoo?
Alamiyaaban oossinne exatennan agganawu metiyaabawu, so asay kaseti giigettanawu ay oottana danddayii?
Issi uri ba biittaa naagiyoogee ayyo bonchcho ubbaappe aadhdhiyaaba gidennay aybissee?
Neeni oosuwaara gayttidaagan kuuyiyo wode alamiyaaban gelennaadan waatanaakko qoppa.
‘Asay Ubbay Ba Toohuwaa Tookkanawu Bessees’ (Wochchiyo Keelaa huuphe yohuwaa)