Laꞌatettaa Xoossaa Yihoowawu Haggaaza

1, 2. (a) Kiitettida PHawuloosa wodiyan asaa aylletettaabaynne laꞌatettaabay qofissiyoy aybissee? (b) Asay tumu laꞌatettaa demmanaadan PHawuloosi eta ookko kaalettidee?

ROOME biittaa asay bana higgiyaa, suure pirddaanne laꞌatettaa afkaato giidi ceeqettees; beni wode Kiristtaaneti eta giddon deꞌidosona. SHin Rooma Kawotettaa wolqqaynne bonchchoy daro baggi minnidoy aylletu wolqqaana. Issi wode, he biittaa asa ubbaa giddon xeetaappe 30 kushe gidiyaageeti aylleta. Aylletettaynne laꞌatettay Kiristtaaneta gujjin, he wode daro asaa qofissiyaaba gidiyoogee qoncce.

² PHawuloosi ba dabddaabbetun laꞌatettaabaa darobaa yootiis. Gidoppe attin, I ba haggaazuwan halchchidobay, he wode asay koyiyoobaa, hegeekka deretettaa meeziyaa woy polotikaabaa laammanaassa gidenna. PHawuloosinne A mala Kiristtaaneti laꞌatettaa demmanawu dere haariya woy sunttettida ay asakkonne xeelliyoogaappe, asay Xoossaa Kawotettaa mishiraachchuwaanne laggetiyaabi baynna Kiristtoos Yesuusa wozuwaa yarshshuwaa goꞌꞌaa eranaadan maaddanawu minnidi oottidosona. PHawuloosi ba mala Kiristtaaneta tumu laꞌatettaa Pulttuwaakko kaalettiis. Leemisuwawu, I Qoronttoosa Kiristtaanetussi xaafido naaꞌꞌantto dabddaabbiyan, “Godai Geeshsha Ayyaana. Godaa Ayyaanai de7iyoosan ailletetti baawa” yaagiis.—2 Qor. 3:17.

3, 4. (a) PHawuloosi 2 Qoronttoosa 3:17n deꞌiyaagaa xaafido gaasoy aybee? (b) Yihooway immiyo laꞌatettaa demmanawu nuuni ay oottana bessii?

³ PHawuloosi he qofaappe kase he dabddaabbiyan, Muusee Yihoowa kiitanchchaara gaytti simmidi Siinaa Deriyaappe wodhdhiyo wode awu deꞌiya bonchchuwaabaa yootiis. Asay Muusa beꞌidi yayyiis; qassi Muusee ba somꞌꞌuwaa naxalan kammiis. (Kes. 34:29, 30, 33; 2 Qor. 3:7, 13) PHawuloosi, “SHin . . . ooninne Godaakko simmiyo wode audenne he naxalai kichchees” yaagiis. (2 Qor. 3:16) PHawuloosi yootidobay woygiyoogee?

⁴ Nuuni hagaappe kasetiya huuphe yohuwan xannaꞌidoogaadan, ubbabaa Medhdhida Yihoowa xallawu zawi baynna laꞌatettay deꞌees. ‘Yihoowa ayyaanay deꞌiyoosan’ laꞌatettay deꞌiyoogaa qoppiyoogee bessiyaaba. SHin he laꞌatettan ufayttanawunne goꞌettanawu, nuuni ‘Yihoowakko simmana,’ hegeekka A dabbo gidana bessees. Israaꞌeelati bazzuwan deꞌiyo wode banttawu Yihooway oottidobaa ayyaanaa ayfiyan xeellibookkona. Eti Gibxxe aylletettaappe mati kiyidoogaa asatettaaban goꞌettana xallawu qoppidoogan, eta wozanaynne qofay kamettidabanne muumidaba mala gidiis.—Ibr. 3:8-10.

5. (a) Yihoowa ayyaanay ay mala laꞌatettaa demissii? (b) Asatetta aylletettay Yihooway immiyo laꞌatettaa pacinchchana koshshennaagaa waati eriyoo? (c) Nuuni zaarana koshshiya oyshati awugeetee?

⁵ Gidoppe attin, Yihoowa ayyaanay demissiyo laꞌatettay asatetta aylletettaappe kiyiyoogaappe keehi aadhdhiyaaba. Asi daafuridi demmana giidi qoppiyo aybippenne aaruwan, Yihoowa ayyaanay nagaraanne hayquwaa aylletettaappe, qassikka worddo haymaanootiyaanne A meeziyaa aylletettaappe kessees. (Roo. 6:23; 8:2) Hegee keehi bonchcho laꞌatetta! Asi qashetti woy aylle gidi uttidikka he laꞌatettan goꞌettana danddayees. (Doo. 39:20-23) Naaꞌꞌaykka daro layttawu qashuwan genccida Ishaa Erik Frostanne Ishaa Horst Henshila hanotay hegaa mala. Eti banttana gakkidabaa odishin JW Libraryan beꞌananne siyana danddayaasa. (INTERVIWUS END EKISPIRIYENSIS > ENJURING TRAYALS giyaagaa garssan xeella.) SHin kaallidi deꞌiya oyshata nuuni beꞌana koshshees: Nu laꞌatettaa nashshiyoogaa waatidi bessana danddayiyoo? Qassi nu laꞌatettaa loꞌꞌoban goꞌettanawu ay oottana danddayiyoo?

XOOSSAY NUUSSI IMMIDO LAꞌATETTAA NASHSHIYOOGAA

6. Israaꞌeelati banttassi Yihooway immido laꞌatettaa nashshennaagaa waati bessidonaa?

⁶ Nuuni alꞌꞌo imotaa tumu goꞌꞌaa akeekiyoogee, immidaagaa galatanaadan denttettees. Israaꞌeelati Yihooway eta Gibxxe aylletettaappe kessidi immido laꞌatettaa nashshibookkona. Eti laꞌa kiyido amarida aginan Gibxxen kase miyoobaanne uyiyoobaa amottidi, Yihooway immiyooban zuuzummiyoogaa, ubba qassi guyye Gibxxe simmanawu koyiyoogaa doommidosona. Eti ‘molee, paranjja leehee, meeloonee, sunkkuruutoynne tuummoy’ tumu Xoossaa Yihoowawu goynnana mala Xoossay etawu immido laꞌatettaappe aadhdhiyaabadan xeellidosona. Yihooway he asaa bolli keehi hanqqettidoogee maalaaliyaabee? (Qoo. 11:5, 6, 10; 14:3, 4) Nuuni hegaappe gitabaa tamaaroos!

7. PHawuloosi 2 Qoronttoosa 6:1n deꞌiya ba zoriyaara maayiyaabaa ay oottidee, qassi nuuni waatidi hegaadan oottana danddayiyoo?

⁷ Kiitettida PHawuloosi Kiristtaaneti ubbay banttawu Yihooway ba Naꞌaa Yesuus Kiristtoosa baggaara kehatettan immido laꞌatettaa xaasayennaadan zoriis. (2 Qoronttoosa 6:1 nabbaba.) PHawuloosi nagaraanne hayquwaa aylle gididoogan azzanidoogaanne ba kahan metootidoogaa hassaya. SHin I galatan kumidi, “Nu Godaa Yesuus Kiristtoosa baggaara Xoossau galatai gido” yaagiis. Aybissi? I ba mala Kiristtaanetussi, “Aissi giikko, Kiristtoos Yesuusa baggaara nuuyyo de7uwaa ehiya Geeshsha Ayyaanaa higgee tana nagaraa higgiyaa ailletettaappenne haiquwaa higgiyaa ailletettaappe kessiis” yaagiis. (Roo. 7:24, 25; 8:2) Nuunikka PHawuloosa leemisuwaa kaallidi, Yihooway nuna nagaraanne hayquwaa aylletettaappe kessidoogaa mule xaasayana bessenna. Nuuni wozuwaa baggaara geeshsha kahan nu Xoossawu haggaazana danddayoos; yaatiyoogan qassi tumu ufayssaa demmoos.—Maz. 40:8.

8, 9. (a) Nu laꞌatettaa goꞌettiyo ogiyan naagettana koshshiyaabaa kiitettida PHeexiroosi ay yootidee? (b) Issi uri ba laꞌatettaa bessenna ogiyan waatidi goꞌettana danddayii?

⁸ SHin nuuni galatiyoogaa bolli, nu alꞌꞌo laꞌatettaa bessennabawu mule goꞌettennaadan ubbatoo naagettana koshshees. Kiitettida PHeexiroosi nu laꞌatettaa ashuwaa amuwaa polanawu gaaso oottennaadan mintti zoriis. (1 PHeexiroosa 2:16 nabbaba.) Hegee Israaꞌeelata bazzuwan gakkidabaa nena hassayissennee? Qassi he daafabay nuna ubba etaagaappe aaruwan gakkana danddayees. Seexaanaynne A alamee maayuwaaninne alleeqettiyooban, miyoobaaninne uyiyooban, allaxxiyoobaaninne wodiyaa aattiyooban, qassi hara daroban keehi cimmiyaabaa giigissiis. Zalꞌꞌiyaaban erissiya cincca asati nuussi koshshenna darobaa loꞌꞌiya asatuura gattidi darotoo keehi koshshiyaabadan qonccissoosona. Hegan cimettidi nu laꞌatettaa maari baynna ogiyan goꞌettana danddayoos.

⁹ PHeexiroosi zoridobay issi uri timirttiyan woy oosuwan dooriyoobaa mala keehi koshshiyaabankka maaddees. Leemisuwawu, yelagata ha wodiyan timirtte keettan keehi erettidasan xoqqa timirttiyaa tamaaranaadan denttettoosona. Eti xoqqa timirttee dure kessiya bonchchettida ooso demissiyaabadan qoppana mala asay denttettees; qassi darotoo hegaa mala timirttiyaa tamaaridaageeti koshshiyaagaa xallaa tamaaridaageetuugaappe ay keena daro miishshaa demmiyaakko yootoosona. Yelagati bantta deꞌuwaa muleera laammiyaabaa dooriyo wode, he ubbabaa keehi amoyiyaabadan xeellana danddayoosona. Etinne eta yelidaageeti ay hassayana koshshii?

10. Nuuni kuuyiyooban nu laꞌatettaa goꞌettiyo wode ay hassayana koshshii?

¹⁰ Hegaa malabaa dooriyoogee asi bawu kuuyiyooba gidiyo gishshawu, issoti issoti bantta kahaa qumꞌꞌennaba gidido peeshshan aybanne doorana danddayiyaabadan qoppoosona. Eti geella miyoobaara gayttidaban PHawuloosi Qoronttoosa Kiristtaanetussi, “Taani ta koyidoogaa hananau danddayiyo ta hanotettaa hara asa zoriya wozanai aissi pirddii?” yaagidoogaa qoppana danddayoosona. (1 Qor. 10:29) Timirttiyaabaanne oosuwaabaa nuuni nu huuphen kuuyana koshshiyoogee tuma, shin nu laꞌatettawu zaway deꞌiyoogaanne nuuni kuuyiyo ubbabay kaalettiyoobi deꞌiyoogaa hassayana koshshees. Hegaa gishshawu, PHawuloosi he qofaappe kase hagaadan giis: “Ubbabaa oottanau tana diggiyaabi baawa; shin ubbabai go77enna. Ubbabaa oottanau diggiyaabi baawa; shin ubbabai maaddenna.” (1 Qor. 10:23) Nu deꞌuwan ubbaban nu laꞌatettaa goꞌettiyoogaa xeelliyaagan, nuuni dosiyoobaappe aaruwan qoppana koshshiyaabati deꞌiyoogaa akeekanaadan hegee nuna maaddees.

XOOSSAWU HAGGAAZANAWU NU LAꞌATETTAA ERATETTAN GOꞌETTIYOOGAA

11. Nuuni laꞌa kiyido gaasoy aybee?

¹¹ Laꞌatettaa bessenna ogiyan goꞌettenna mala naagettanaadan yootiiddi, PHeexiroosi hegaa halchchuwaakka yootiis. I nuuni nu laꞌatettaa “Xoossaa ailledan” goꞌettanaadan zoriis. Hegaa gishshawu, Yihooway nuna Yesuusa baggaara nagaraanne hayquwaa aylletettaappe kessido tumu gaasoy nuuni “Xoossaa ailledan” ayyo aqidi deꞌanaadaana.

12. Noheenne A soo asay nuussi leemiso gidiyaabaa ay oottidonaa?

¹² Nu laꞌatettaa bessenna ogiyan goꞌettidi zaarettidi alamiyaabaa qaaqqawunne amuwawu aylle gidenna mala naagettanaadan keehi maaddiyaabay ayyaanaabaa oosuwan sheekkiyoogaa. (Gal. 5:16) Leemisuwawu, Nohanne A soo asaa qoppa. Eti kobaynne pokkobaa haniyoogee kumido alamiyan deꞌidosona. SHin eti bantta yuushuwan deꞌiya asay qaaqqatiyoobaanne oottiyoobaa qullibookkona. Eti hegaadan hananawu waani danddayidonaa? Eti Yihooway banttassi immido, markkabiyaa keexxiyo, banttassinne mehiyawu doꞌawu miyoobaa dagayiyoonne harati naagettanaadan yootiyo oosuwaa daafuridi oottidosona. “Nohee ubbabaakka Xoossai azazidoogaadan oottiis.” (Doo. 6:22) Hegee ay demissidee? Noheenne A soo asay he alamee xayiyo wode attidosona.—Ibr. 11:7.

13. Yesuusawu imettidanne I bana kaalliyaageeta azazido oosoy aybee?

¹³ Ha wodiyan nuuni oottanaadan Yihooway azazidobay aybee? Nuuni Yesuusa kaalliyo gishshawu, Xoossay nuussi immido oosuwaa loytti eroos. (Luqaasa 4:18, 19 nabbaba.) Ha wodiyan daro asaa qofaa ha alamiyaa xoossay goozi wottiis; qassi eti haymaanootiyaa, miishshaanne deretettaa meeziyaa aylletettan deꞌoosona. (2 Qor. 4:4) Laꞌatettaa Xoossaa Yihoowa eranaadaaninne ayyo goynnanaadan asaa maaddiyoogan Yesuusa leemisuwaa kaalliyoogee nuussi gita maata. (Maa. 28:19, 20) Hegee wayssenna ooso gidenna; qassi paace gidiya darobay deꞌees. Issi issi biittan kaseegaappe daro asay siyanawu koyenna; issoti issoti ubba hanqqettoosona. Nuuni ubbay, ‘Taani ta laꞌatettaa Kawotettaabaa yaa gujja oottanawu goꞌettana danddayiyaanaa?’ yaagidi nuna oychchana koshshees.

14, 15. Yihoowa Markkatuppe daroti ay oottanawu kuuyidonaa? (Doomettan deꞌiya misiliyaa xeella.)

¹⁴ Daroti nu wodee eesoyiyoogaa akeekiyoogaanne kumetta wodiyaa haggaazanawu sima deꞌuwaa deꞌiyoogaa beꞌiyoogee minttettiyaaba. (1 Qor. 9:19, 23) Etappe amaridaageeti bantta heeran haggaazoosona; harati qassi aassiyaageeti keehi koshshiyoosaa biidi haggaazoosona. Aadhdhida ichchashu layttan 250,000⁠ppe dariyaageeti kumetta wodiyaa aqinye gididosona, qassi haꞌꞌi kumetta wodiyaa aqinyetu qooday 1,100,000⁠ppe daro. Daroti Yihoowawu hegaadan haggaazanawu bantta laꞌatettaa goꞌettiyoogee ayba ufayssiyaabee!—Maz. 110:3.

¹⁵ Ha ishanttinne michchontti bantta laꞌatettaa loꞌꞌoban goꞌettanaadan maaddidabay aybee? Aadhdhida 30 layttawu daro biittan haggaazida Joonanne Judito qoppa. Aqinyetettaa Haggaazuwaa Timirtte Keettay 1977n doommiyo wode, aassiyaageeti koshshiyoosan haggaazanawu eeno gaanaadan tamaareta minttettidoogaa eti hassayoosona. Eti he halchchuwaa ubbatoo qoppanaadan sima deꞌo deꞌana mala, I darotoo oosuwaa laammidoogaa Jooni yootiis. Guyyeppe, eti hara biitti biido wode, ooratta qaalaa tamaariyoogaa, ooratta wogaa meezetiyoogaanne wayssiya carkkuwaa danddayiyoogaa mala xubiyaa xoonanaadan Yihoowa woossiyoogeenne an ammanettiyoogee maaddidoogaa akeekidosona. He layttatu haggaazoy eta waati maaddidee? Jooni, “Taani eriyo woy beꞌido aybippenne aadhdhiya ooso oottidabadan qoppays” yaagiis. Gujjidikka hagaadan giis: “Yihooway siiqiya aawa gidiyoogee tawu kaseegaappe aaruwan qoncciis. Yaaqooba 4:8y, ‘Xoossaakko shiiqite; ikka inttekko shiiqana’ yaagiyo qofaa haꞌꞌi taani loytta akeekays. Taani koyiyo, deꞌuwawu halchchidobaa akeekada ufayttiyo deꞌuwaa demmidoogaa eraas.”

16. Hanotay darin injjetenna daroti bantta laꞌatettaa waatidi loꞌꞌoban goꞌettidonaa?

¹⁶ Haratu hanotay Joonaagaanne Juditiigaa mala gidennan, qantta wodiyawu kumetta wodiyaa haggaazissiyaagaa. Gidoppe attin, daroti alamiyan dumma dumma biittan Xoossaa oosuwawu bantta dosan keettaa keexxoosona. Leemisuwawu, Niwu Yorken, Worwiken waanna biiroy keexettiyo wode, 27,000 gidiya ishanttinne michchontti naaꞌꞌu saaminttappe biidi issi laytta gidiya woy hegaappe dariya wodiyawu bantta dosan oottidosona. Daroti yan haggaazanawu bantta oosuwaa wottishiisona. Hegee eti bantta laꞌatettaa Xoossaa Yihoowa sabbanawunne bonchchanawu giidi oottido keehi ufayssiyaaba!

17. Ha wodiyan Xoossay immido laꞌatettaa loꞌꞌoban goꞌettiyaageeti sinttappe demmana bonchchoy aybee?

¹⁷ Yihoowa eridoogawunne tumu goynoy demissiyo laꞌatettaa demmidoogawu, nuuni Yihoowa keehi galatoos. Simi nuuni dooriyooban he laꞌatettaa nashshiyoogaa bessoos. Nu laꞌatettaa mela ashshiyoogaappe woy maara goꞌettennan aggiyoogaappe, danddayettiya ubbaban Yihoowawu haggaaziyoogan loꞌꞌoban goꞌettoos. Nuuni yaatiyaaba gidikko, ha hiraagaa qaalati polettiyo wode Yihooway immana giido anjjuwaa demmanaagaa ammanettana danddayoos: “Mereta ubbai ba huuphen bashshaa ailletettaappe issi gallassi kiyana; qassi he meretati Xoossaa naati ailletettaappe kiyido bonchcho kessaa shaakkana.”—Roo. 8:21.