“Ubbabaappe Aattidi Issoi Issuwaara Wozanappe Siiqettite”
“Ubbabaukka wurssettai matattiis. . . . Ubbabaappe aattidi issoi issuwaara wozanappe siiqettite.”—1 PHEEXIROOSA 4:7, 8.
1YESUUSI ba kiittidoogeetuura wurssettan aattiyo guutta saatee keehippe alꞌꞌo gidiyoogaa akeekiis. Sinttappe eta aybi naagiyaakko i erees. Eti polana bessiyo gita oosoy deꞌees; shin eti Yesuusaagaadan ixettananne yedetettana. (Yohaannisa 15:18-20) Issippe aattido he wurssetta qammi, “issoi issuwaa siiqite” yaagidi hegee keehippe koshshiyaaba gidiyoogaa eta darotoo hassayissiis.—Yohaannisa 13:34, 35; 15:12, 13, 17.
2 He qammi aara deꞌiya kiitettida PHeexiroosi, hegaa akeekiis. Daro layttaappe guyyiyan, Yerusalaame kunddanaappe guutta wodiyaa kasetidi PHeexiroosi xaafidoban, siiqoy keehippe koshshiyoogaa minttidi yootiis. I Kiristtaaneta: “Ubbabaukka wurssettai matattiis. . . . Ubbabaappe aattidi issoi issuwaara wozanappe siiqettite” yaagidi zoriis. (1 PHeexiroosa 4:7, 8) Ha siraatau ‘wurssetta gallassan’ deꞌiyaageetuyyo PHeexiroosi yootidobati keehippe maaddoosona. (2 Ximootiyoosa 3:1) “Wozanappe siiqettite” giyoogee woygiyoogee? Nuuni harata hegaadan siiqana koshshiyoy aybissee? Nuuni hegaadan siiqiyoogaa waati bessana danddayiyoo?
“Wozanappe Siiqettite” Giyoogee Woygiyoogee?
3 Daroti siiquwaa meretan coo siyettiyaabadan qoppoosona. SHin PHeexiroosi yootiiddi deꞌiyoy ubba siiqo qommuwaabaa gidenna; i yootiiddi deꞌiyoy hara siiqo qommo ubbaappe aadhiya siiquwaabaa. ‘Siiquwaa’ geetettidi 1 PHeexiroosa 4:8n birshshettida Giriike qaalay agaappe giya qaalaa. He qaalay baaso siraatan haarettiya, ba xallaa siiqiyoogaappe dumma gidida siiquwaa malaatees. Issi xuufee qonccissidoogaadan: “Agaappe giyo siiqoy coo siyettiyaaba xallan baasettidi bessiyo siiqo gidennan, issibaa oottanau murttidi bessiyo siiqo.” Nu huuphiyaa siiqiyo eeshshaa laattido gishshau, Xoossaa baaso siraatan haarettiya siiquwaa bessanaadan nuuni issoy issuwaa siiqanau hassayissoy imettiyoogee koshshiyaaba.—Doomettaabaa 8:21; Roome 5:12.
4 Nuuni hegaadan oottanau azazettido gishsha xallau issoy issuwaa siiqoos giyoogaa gidenna. Agaappe giyo siiqoy ufayttidinne siyettiyaabi deꞌin bessiyo siiqo. PHeexiroosi nuuni “issoi issuwaara wozanappe [sitta birshshettan, “aassidi”]” siiqettana bessiyoogaa yootiis.a (Kingdem Interliniyer) Gidikkokka, he siiquwaa bessanau baaxetiyoogaa koshshees. “Wozanappe” geetettida Giriike qaalaa xeelliyaagan, issi eranchay: “He qaalay, wottaa naasiyan woxxiya uri xoonanau wurssettan oottiyo baaxiyaa malaatees” yaagiis.
5 Yaatiyo gishshau, nuuni siiquwaa bessiyoy injjetiyo wode xallan woy amaridaageetu xallau gidana bessenna. Kiristtaane siiquwaa, metiyaabay deꞌishinkka aahuwan bessana koshshees. (2 Qoronttoosa 6:11-13) Wottaa naasiyan woxxiya uri ba goobatettaa gujji gujji baanau meezetana bessiyoogaadan, nuuni hegaa mala siiquwaa dichana bessiyoogee qoncce. Nuuni issoy issuwau hegaa mala siiquwaa bessiyoogee koshshiyaaba. Aybissi? Guuxxiis giishin heezzu gaasotuppe denddidaagaana.
Nuuni Issoy Issuwaara Siiqettana Koshshidoy Aybissee?
6 Koyroy, “siiqoi Xoossaappe yiyo” gishshataassa. (1 Yohaannisa 4:7) Ha keehippe loꞌꞌo eeshshau Pulttoy, Yihooway nuna kasetidi siiqiis. Kiitettida Yohaannisi: “Xoossai nuna ba siiquwaa hagan bessiis; nuuni Kiristtoosa baggaara de7uwaa demmana mala, ba issi Na7aa ha sa7aa kiittiis” yaagiis. (1 Yohaannisa 4:9) Xoossaa Naꞌay asa gididi saꞌau ‘kiitettidoy,’ haggaazuwaa polanaassanne mittan barchetidi hayqqanaassa. I hegaa ubbaa oottidoy nuuni “de7uwaa demmana mala.” Xoossay bessido, siiqo ubbaappe aadhiya ha siiquwau nuuni ay zaaro immana koshshii? Yohaannisi: “Xoossai nuna hagaadan siiqidabaa gidikko, nuunikka issoi issuwaara siiqettanau bessees” yaagiis. (1 Yohaannisa 4:11) Yohaannisi, “Xoossai nuna hagaadan siiqidabaa gidikko” yaagidi xaafido wode, nena gidennan nuna giidoogaa akeeka. Qofay qoncce: Xoossay au goynniya nu mala asata siiqiyaaba gidikko, nuunikka eta siiqana bessees.
7 Naaꞌꞌanttoy, “ubbabaukka wurssettai” matattido gishshau, nu maadoy koshshiyoogeeta maaddiyoogan ha wodiyan issoy issuwaara siiqettiyoogee keehippe koshshees. (1 PHeexiroosa 4:7) Nuuni deꞌiyoy “waissiya” wodiyaana. (2 Ximootiyoosa 3:1) Alamiyaa hanotati, meretan gakkiya daafatinne yedetay nu bolli metoy gakkanaadan oottoosona. Metiyaabati gakkiyo wode, kaseegaappe aattidi nuuni issoy issuwaa siiqana koshshees. Wozanappe siiqettiyoogee nuuni issoy issuwaara issippetettaa minttanaadaaninne “issoi issuwaassi” qoppanaadan denttettees.—1 Qoronttoosa 12:25, 26.
8 Heezzanttoy, nuuni issoy issuwaara siiqettana koshshiyoy, “xalahe halaqaayyo soho” immin i nuna qohanaadan koyenna gishshataassa. (Efisoona 4:27) Seexaanay nuna xubbanau, nu mala Kiristtaanetu polotetta pacaa, giishin daafuraa, balaanne mooruwaa eesuwan goꞌettees. Issi Kiristtaanee qoppennan haasayidobi woy azzanttiya oosoy nuuni gubaaꞌiyaappe haakkanau gaaso gidii? (Leemiso 12:18) Nuuni issoy issuwaara wozanappe siiqettiyaaba gidikko, gubaaꞌiyaappe haakkanau hegee gaaso gidenna! Hegaa mala siiqoy nuuni saro gididi deꞌanaadaaninne Xoossaayyo “issippe” oottanaadan maaddees.—Sofonaasa 3:9.
Harata Siiqiyoogaa Neeni Waatada Bessuutee?
9 Harata siiqiyoogaa sooppe doommana bessees. Yesuusi bana tumuppe kaalliyaageeti issoy issuwau bessiyo siiquwan eti erettanaagaa yootiis. (Yohaannisa 13:34, 35) Siiqoy qonccidi beettana bessiyoy gubaaꞌe giddo xallan gidennan son, giishin aqo laggetu giddon, yelidaageetu giddooninne naatu giddonkka gidana bessees. Keettaa asaa siiqiyoogaadan qoppiyoogee barkka gidenna; nuuni hegaa bessiya ogiyan qonccissana koshshees.
10 Aqo laggeti issoy issuwau siiquwaa waatidi bessana danddayiyoonaa? Ba machiyo wozanappe siiqiya azinay, haasayiyoobaaninne oottiyooban a hegaa eranaadan oottees; barkka deꞌiyo wodenne asaa sinttankka o galatees. O bonchees; i qofaa, i xeelaanne iyyo siyettiyaabaa akeekees. (1 PHeexiroosa 3:7) Baagaappe i koshshaa kaseyees; iyyo ashuwaaban, ayyaanaabaaninne qofan koshshiyaabaa kunttanau bau danddayettida ubbabaa oottees. (Efisoona 5:25, 28) Ba azinaa tumuppe siiqiya machiyaa, issi issitoo a koyiyoobaa i kunttana xayikkonne, a wozanappe ‘bonchausu.’ (Efisoona 5:22, 33) A ba aqo laggiyaa kaafausunne ayyo haarettausu; bessennabaa koyiyaaro gidennan, ayyaanaabaa sinttayiyoogan aara maadettiyaaro.—Doomettaabaa 2:18; Maatiyoosa 6:33.
11 Yelidaageetoo, intte naata siiqiyoogaa waatidi bessana danddayeetii? Etau ashuwan koshshiyaabaa kunttanau intte minnidi oottiyoogee eta siiqiyoogaa bessees. (1 Ximootiyoosa 5:8) SHin naatuyyo qumaappe, maayuwaappenne keettaappe aadhiyaabaa koshshees. Eti tumu Xoossaa siiqiyaageetanne ayyo haggaaziyaageeta gididi diccanau, ayyaanaaban loohana koshshees. (Leemiso 22:6) Hegaa giyoogee, keetta asay soo asaa xinaatiyau, haggaazuwan shaahettanaunne Kiristtaane shiiquwan beettanau prograamiyaa giigissiyoogaa giyoogaa. (Zaarettido Wogaa 6:4-7) Ubbatoo hegaadan oottiyoogee, ubba ha waayissiya wodiyan darobaa yarshshanaadan oottees. Intte intte naatuyyo ayyaanaaban koshshiyaabaa kunttanau qoppiyoogeenne baaxetiyoogee etau siiquwaa bessiyoogaa; intte yaatiyoogan eta merinaa goꞌꞌabaa qoppiyoogaa besseeta.—Yohaannisa 17:3.
12 Yelidaageeti bantta naatuyyo qofan koshshiyaabaa kunttiyoogan siiquwaa bessiyoogeekka keehippe koshshiyaaba. Naati eesuwaara qohettoosona; eta naatetta wozanay siiquwan intte minttettiyoogaa koyees. Intte eta siiqiyoogaa odite; eta loyttidi siiqite; hegaa mala qonccissoy intte siiqiyoogeenne dosiyoogee etau siyettanaadan oottees. Eta siiqo ogiyaaninne tuma gidida ogiyan minttettite; hegee intte eta baaxiyaa xoqqu oottidi xeelliyoogaanne eta hanotaa akeekiyoogaa eti eranaadan oottees. Eta siiquwan seerite; intte hegaadan seeriyoogee eti wodeppe ay mala asa gidanaadan intte koyiyaakko eti akeekanaadan oottees. (Efisoona 6:4) Hegaadan siiquwaa loꞌꞌo gidida ogiyan qonccissiyoogee ufayttiyaanne issoy issuwaara maaddettiya keetta asay deꞌanadan oottees. Hegee eti ha wurssetta gallassa metuwaa xoonidi kiyanau loytti giigettanaadan maaddees.
13 Siiqoy nuuni haratu balaa aggi aadhanaadan oottees. “Ubbabaappe aattidi issoi issuwaara wozanappe siiqettite” yaagidi PHeexiroosi zorido wode hegee keehippe koshshido gaasoy “siiqoi daro nagaraa kammiyo” gishshataassa gidiyoogaa hassaya. (1 PHeexiroosa 4:8) Nagaraa ‘kammiyoogaa’ giyoogee gita nagaraa ‘kammiyoogaa’ gidenna. Hegaa mala gita nagaray gubaaꞌiyan aawatettay deꞌiyoogeetuyyo odettees; qassi eti bessiya ogiyan oyqqoosona. (Wogaa 5:1; Leemiso 29:24) Gita nagaraa oottidaageeti xillo asata ubbatoo qohanaadan oottiyoogee siiqo bessiyo ogeppe keehi haakkidabanne Geeshsha Maxaafan baasettibeennaba.—1 Qoronttoosa 5:9-13.
14 Nu mala Kiristtaanetu mooroynne balay, darotoo nagaradan xeelliyooba gidenna. Nuuni issi issitoo haasayiyooban woy oottiyooban baliyo gishshau, issoy issuwaa azzantteettees woy qoheettees. (Yaaqooba 3:2) Nuuni haratu balaa asau yootanau eesotana koshshii? Hegaadan oottiyoogee gubaaꞌe giddon ooshshay denddanaadan oottiyoogaappe attin hara goꞌꞌi baawa. (Efisoona 4:1-3) Nuuni siiquwan simerttiyaaba gidikko, nu mala Kiristtaaniyaa ‘zigirookko.’ (Mazamure 50:20) Lissineenne qalamee keettaa zaꞌuwaa kammiyoogaadan, siiqoy haratu pacaa kammees.—Leemiso 17:9.
15 Maadoy tumuppe koshshiyoogeeta maaddanaadan siiqoy nuna denttettees. Ha wurssetta wodiyan hanotay iiti iiti biyo wode, nu mala Kiristtaanetussi ashuwan koshshiyaaban woy asatettaaban maaduwaa koshshiya wodee deꞌana danddayees. (1 Yohaannisa 3:17, 18) Leemisuwau, nu gubaaꞌiyaa yame gidida uri keehippe miishsha metootidee woy oosoppe kiyidee? Hegaadaana gidikko, nu wolqqay danddayidoogaa keenaa issi issibaa maaddana danddayoos. (Leemiso 3:27, 28; Yaaqooba 2:14-17) Cimida amꞌꞌee keettay giigisso koyii? Hegaadan gidikko, nuuni nu huuphe qoppidi he oosuwaappe amaridaagaa oottiyoogan maaddana danddayoos.—Yaaqooba 1:27.
16 Nuuni siiquwaa bessiyoy nu heeran deꞌiyaageetu xallaassa gidenna. Issi issitoo, wolqqaama gotiyan, biittaa qaattan woy olaa gaasuwan qohoy gakkido hara biittan deꞌiya, Xoossaa ashkkaratubaa siyana danddayeettees. Etassi qumay, maayoynne harabay keehippe koshshana danddayees. Eti hara zare woy hara sheeshsha gidiyoogee dummatetta medhenna. Nuuni “ishanttu maabaraa kumettaa siiqoos.” (1 PHeexiroosa 2:17, NW) Hegaa gishshau, koyro xeetu layttan deꞌida gubaaꞌetuugaadan, maadoy koshshiyoogeeta hashetidi maaddanau yeemottoos. (Oosuwaa 11:27-30; Roome 15:26) Nuuni siiquwaa hegaa mala ubba ogiyan bessiyo wode, wurssetta wodiyan nu giddon deꞌiya issippetettay minnees.—Qolasiyaasa 3:14.
17 Siiqoy nuuni Xoossaa Kawotettaa mishiraachuwaa haratuyyo odanaadan oottees. Yesuusa leemisuwaa qoppa. I sabbakidoynne tamaarissidoy aybissee? Asay ayyaanaaban hiyyeesa gidiyoogaa beꞌido gishshau ‘qarettiis.’ (Marqqoosa 6:34) Eta ayyaanaaban tuma gididabaanne hidooti deꞌiyoobaa tamaarissana bessiya, worddo henttanchatun dogettidosonaanne balabaa tamaaridosona. Yaatiyo gishshau, Yesuusi keehippe yeemottidi, wozanappe siiqidinne qarettidi, “Xoossaa kawotettaa wonggeliyaa mishiraachchuwaa” yootiyoogan asaa minttettiis.—Luqaasa 4:16-21, 43.
18 Ha wodiyankka daro asay ayyaanaaban dogettiis, balabaa tamaariisinne hidoota xayidi deꞌees. Tumu Xoossaa eribeennaageetu ayyaanaabaa hanotay Yesuusaagaadan nuna azzanttiyaaba gidikko, Xoossaa Kawotettaa wonggeliyaa mishiraachchuwaa etau yootanaadan siiqoynne qaretay nuna denttettees. (Maatiyoosa 6:9, 10; 24:14) Attida wodee guutta giyoogaappe denddidaagan, shemppo ashshiya kiitaa awudeegaappenne aaruwan eesotidi sabbakiyoogee koshshiyaaba.—1 Ximootiyoosa 4:16.
“Ubbabaukka Wurssettai Matattiis”
19 PHeexiroosi issoy issuwaara siiqettanaadan zoriiddi: “Ubbabaukka wurssettai matattiis” yaagidi doommidoogaa hassaya. (1 PHeexiroosa 4:7) Mata wodiyan ha iita alamee, Xoossay ehaana geeshsha gidida ooratta alamiyan laamettana. (2 PHeexiroosa 3:13) Yaatiyo gishshau, ha wodee qofi baynna duussa deꞌiyo wode gidenna. Yesuusi: “Muussan, ushshan, mattooninne aqossi hirggiyooban intte wozanai balenna mala, qassi intte qoppennan he gallassai intte bolli yeennaadan, inttena naagite. Aissi giikko, he gallassai sa7a ubban de7iya asa ubbaa piriyaadan oiqqana” yaagidi nuna zoriis.—Luqaasa 21:34, 35.
20 Yaatiyo gishshau, nuuni deꞌiyo wodiyaa akeekidi, nuuyyo danddayettida keena ubban ‘naagi uttidaageeta’ gidoos. (Maatiyoosa 24:42) Seexaanay ehiyo, nu qofaa laammana danddayiya ay paaciyaappekka gidin, nu huuphiyaa naagiyaageeta gidoos. Siiqoy baynna ha alamee nuuni haratussi siiquwaa bessiyoogaa digganaadan paqqadennaageeta gidoos. Hegaa ubbaappe aaruwan, mata wode Mase Kawotettay ha saꞌaa bolli a boncho halchuwaa polissiyo, tumu Xoossaa, Yihoowakko kaseegaappe aattidi matattiyaageeta gidoos.—Ajjuutaa 21:4, 5.
[Tohossa qofaa]
a Issi issi Geeshsha Maxaafaa birshshettati 1 PHeexiroosa 4:8, issoy issuwaara “tumuppe,” “kumetta ogiyan” siiqettite yaagoosona.
XINAATIYAU GIIGIDA OYSHAA
• Yesuusi ba erissiyo ashkkaratuura aattido wurssetta qammi eta woygidi zoridee? PHeexiroosi he zoriyaa akeekidoogaa aybin eriyoo? (Mentto 1-2)
• “Wozanappe siiqettite” giyoogee woygiyoogee? (Mentto 3-5)
• Nuuni issoy issuwaara siiqettana koshshiyoy aybissee? (Mentto 6-8)
• Neeni harata siiqiyoogaa waatada bessana danddayay? (Mentto 9-18)
• Ha wodee qofi baynna duussaa deꞌiyo wode gidennay aybissee? Nuuni ay oottanau murttana koshshii? (Mentto 19-20)
[Sinttaa 29n deꞌiya misiliyaa]
Issoy issuwaara maaddettiya keetta asay ha wurssetta gallassa metuwaa xoonidi kiyanau loꞌꞌo ogiyan giigettees
[Sinttaa 30n deꞌiya misiliyaa]
Maadoy tumuppe koshshiyoogeeta maaddanaadan siiqoy nuna denttettees
[Sinttaa 31n deꞌiya misiliyaa]
Xoossaa Kawotettaa mishiraachuwaa haratuyyo yootiyoogee siiqo bessiyo oge