Nuuni Waayettiyoy, Cimiyoynne Hayqqiyoy Aybissee?

Nuuni Waayettiyoy Saꞌan Koyro Deꞌida Naaꞌꞌu Asati Oottidobaa Gaasuwaana

“Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, . . . haiqoi asa zare ubbaa gakkiis.”—ROOME 5:12.

Xoossay saꞌan koyro deꞌida Addaamanne Hewaano medhdhido wode, etawu wottiyoobi baynna guuggiyaanne bollaa immiis. Qassi I eta loꞌꞌiya ataakiltte soho gidida gannate saꞌan wottiis. I eti issi mittaa teeraa aggidi, gannatiyan deꞌiya mittaa teeraa ubbaappe maana danddayiyoogaa etawu yootiis. Gidoppe attin, Addaameenne Hewaana digettida he mittaa teeraappe miidosona, qassi hegee nagara. (Doomettaabaa 2:15-17; 3:1-19) Eti Xoossaayyo azazettibeenna gishshawu I gannatiyaappe eta kessiis, yaatin etawu deꞌoy deexxiis. Guyyeppe, eti naata yelidosona; qassi eta naatussikka deꞌoy keehi deexxiis. Eti ubbay ceeggidi hayqqidosona. (Doomettaabaa 3:23; 5:5) Nuunikka Addaamenne Hewaani naata gidiyo gishshawu harggoos, ceeggoosinne hayqqoos.

Makkalanchcha Kiitanchchatu Gaasuwankka Nuuni Waayettoos

“Ha mule sa7aikka xalahe halaqan haarettidoogaa eroos.”—1 YOHAANNISA 5:19.

Ha xiqisiyan ‘xalahe halaqaa’ geetettidaagee Seexaanaa. I Xoossaa bolli makkalida kiitanchchaa. (Yohaannisa 8:44; Ajjuutaa 12:9) Guyyeppe, hara kiitanchchatikka aagaadan makkalidi Seexaanaa kaallidosona. Eti daydanttata geetettoosona. He iita kiitanchchati Medhdhidaagawu azazettenna mala asaa cimmanawu bantta wolqqaa goꞌettoosona. Eti asaa iitabaa ootissanawu maloosona. (Mazamure 106:35-38; 1 Ximootiyoosa 4:1) Seexaanaynne dayddanttati asay waayettanaadan oottiyoogan ufayttoosona.

Issi Issitoo Iitabaa Kuuyiyo Gishshawu Waayettoos

“Asi ba zeriyoogaa zaarettidi cakkana.”—GALAATIYAA 6:7.

Nuuni ubbay nagaraa laattido gishshawunne Seexaanay ha alamiyaa haariyo gishshawu waayettoos. SHin asay issi issitoo ba bolli ba kushiyan metuwaa ehees. Waatidi? Eti iitabaa oottiyo woy eeyyabaa kuuyiyo wode, hegee kaalettiyo iitabaa cakkoosona. Hara baggaara qassi, eti loꞌꞌobaa kuuyiyo wode loꞌꞌobaa cakkoosona. Leemisuwawu, ba soo asaa siiqiya ammanettidanne minnidi oottiya azinaynne aaway ba soo asay ufayttanaadan oottiyoogan loꞌꞌobaa cakkana. SHin ceeriyaa kaaꞌiya, daro ushshaa uyiya woy azalla uri ba soo asay hiyyeesanaadan oottana danddayees. Yaatiyo gishshawu, nuna Medhdhidaagee yootiyoobaa siyiyoogee eratetta. I ‘kumetta sarotettaa’ gujjin, loꞌꞌo gidida darobaa nuuni cakkanaadan koyees.—Mazamure 119:165.

Nuuni ‘Wurssetta Gallassan’ Deꞌiyo Gishshawu Waayettoos

“Wurssetta gallassi . . . asati banttana siiqiyaageeta, miishshaa siiqiyaageeta, . . . banttana yelidaageetuyyo azazettennaageeta, . . . banttana naagennaageeta, kehennaageeta, lo77obaa dosennaageeta . . . gidana.”—2 XIMOOTIYOOSA 3:1-5.

Geeshsha Maxaafay ha xiqisiyan kasetidi yootidoogaadan ha wodiyan daro asawu hegaa mala eeshshay deꞌees. Hegee nuuni ha alamiyawu ‘wurssettaa gallassan’ deꞌiyoogaa loytti bessees. Olaa, koshaa, biittay wolqqappe qaaxxiyoogaanne harggiyaa beꞌiyo wode nu deꞌiyoy ‘wurssettaa gallassaana’ gidiyoogaa nuuni akeekanaagaa Geeshsha Maxaafay kasetidi yootiis. (Maatiyoosa 24:3, 7, 8; Luqaasa 21:10, 11) He ubbabay daro waayiyaanne hayquwaa kaalettiis.