Cakkiyo Darobaa!

YESUUSI A kaalliyaageeti wurssetta wodiyan keehi daro kattaa cakkanaagaa yootiis. (Maa. 9:37; 24:14) I giidobay Yukreenen Transkarpatiyaa giyo heeran dumma gidida ogiyan waani polettidaakko beꞌa. He heeran deꞌiya heezzu katamatun, 50 gubaaꞌetinne 5,400ppe dariya aassiyaageeti deꞌoosona.a Ha heezzu katamatun deꞌiya kumetta asaappe, 4ppe 1y Yihoowa Markka!

He moottan deꞌiya asaa hanotay ay malee? He heeran deꞌiya Vasila giyo ishay, “Ha heeraa asay Geeshsha Maxaafaa bonchchees, suure pirddaa dosees, ba soo asaara keehi matattidi deꞌees, qassi issoy haraa maaddanawu wozanappe koyees” yaagiis. I gujjidikka, “Eti nu ammaniyo ubbabaa maayokkona. SHin issibaa Geeshsha Maxaafaappe bessiyo wode, eti hegaa loytti ezggoosona.”

Aassiyaageetu qooday keehi daro gididaashin bantta moottan deꞌiya asay guutta gidido heeran haggaaziya nu ishanttanne michchontta metiya hara darotuugaappe dummatiyaabay deꞌees. Leemisuwawu, issi gubaaꞌiyan 134 aassiyaageeti deꞌikkonne he moottan deꞌiya keettatu qooday 50 xalla! Yaatin, aassiyaageeti he hanotan waani haggaazidonaa?

Daro ishatinne michchoti aassiyaageeti keehi koshshiyoosaa biidi minnidi haggaazoosona. Layttay 90 gidido Yonasha giyo ishay hagaadan giis: “Nu gubaaꞌiyaa haggaazo moottan aassiya issi urawu gakkiyay 2 keetta xalla. Haꞌꞌi taani matan deꞌiya manddaratun sabbakays; shin mata wode tana keehi sakkana gakkanaassi ay gubaaꞌe moottanne gidenna heeran Hanggaare qaalan sabbakanawu 160 kilo meetiriyaa haakkada bays.” Aassiyaageeti eta moottan deꞌiyaageeta maaddanawu bantta goꞌꞌaa aggibayana koshshees. Yonashi, “Baaburiyaa demmanawu qammi 10 saatiyan xiskkuwaappe suurays; yaatada, baaburee ta katamaa simmidi yaanaashin, omarssi 12 saate gakkanaashin haggaazays. Saamintta giddon naaꞌꞌutoo woy heezzutoo hegaadan oottaas” yaagiis. I hegaadan oottidoogan zilꞌꞌettidee? I, “Hegaadan haggaazidoogan keehi ufayttaas. Haahosan deꞌiya issi keetta asay tumaa eranaadan maaddaas; hegee keehi ufayssiyaaba” yaagiis.

He heera gubaaꞌetun deꞌiya ubbay haahosaa biidi sabbakana danddayennaagee tuma. SHin cimidaageeta gujjin, aassiya ubbati bantta haggaazo moottan loytti haggaazanawu baaxetoosona. Hegaappe denddidaagan, 2017n, ha heezzu katamatun Godaa Kahuwawu shiiqida asaa qooday he katamatun deꞌiya Yihoowa Markkatu naaꞌꞌu kushe gidiyaagaa woykko yan deꞌiya kumetta asaappe baggaa. Nuuni haggaaziyoy awaananne gidin, ‘Godaa oosuwan’ minnidi oottana danddayiyo darobay deꞌiyoogee qoncce.—1 Qor. 15:58.