“Taani Soofiyoa machchin 39⁠ppe dariya layttay aadhdhi simmin, A daro wodiyawu sahetta takkada hayqqaasu. Ta laggeti tana keehi maaddidosona; qassi taani oosoy darido asa gidaas. SHin issi layttawu keehi kayyottaas. Tawu siyettiyaabay sohuwaara sohuwaara laamettees. Haꞌꞌi A hayqqoosappe heezzu layttay matikkokka, issi issitoo qoppennan keehi kayyottays.”—Kostasa.

Ne siiqiyo uri hayqqidee? Gidikko, neeyyookka Kostasaagaadan siyettana danddayees. Aqo laggee, dabboy woy siiqiyo laggee hayqqiyoogaa keena keehi kayyoyiyaanne wozanay meqqanaadan oottiyaabi darenna. Kayyuwaabaa xannaꞌiya eranchchati he qofaa maayoosona. Zi Amerikan Jornal of Saykatery giya xuufiyan kiyida qofay, “Issi uri hayqqiyo wode merinawu nuuppe shaahettees; hegee qassi keehi kayyoyiyaabaa” yaagees. Siiqiyo asi hayqqin keehi kayyottiya uri hagaadan qoppana danddayees: ‘Awude gakkanaashin hagaadan kayyottanee? Taani zaarettada ufayttanee? Taani waanada woppu gaana danddayiyaanaa?’

He oyshatu zaaruwaa ha Beegottite! maxeetiyan beꞌana. Ne siiqiyo uri matan hayqqidaba gidikko, neeni ay naagana danddayiyaakko kaalliya huuphe yohuwan beꞌana. Hegaappe kaalliya huuphe yohoti qassi neeni keehi kayyottiyoogaa agganaadan maaddiyaabaa qonccissoosona.

Hagaappe kaalliya huuphe yohoti siiqiyo uri hayqqin kayyottiya ubbaa minttettanaagaanne maaddanaagaa hidootoos.

Issi issi eranchchati asay issi mala ogiyan kayyottees giyaaba gidikkokka, ubba asaykka kayyottiyoy dumma dumma ogiyaana. Hegee issoy haraappe guuttaa azzanidoogaa woy eti bantta azzanuwaa qonccissibeennaagaa bessiyaabee? Hegaadan gidennan aggana danddayees. Azzanttiyaabay merettiyo wode hegaa akeekiyoogeenne azzanuwaa qonccissiyoogee nuuyyo loꞌꞌobay siyettanaadan maaddana danddayikkokka, kayyottiyoy “likke” gidida issi oge xallaana gidenna. Biittaa wogay, izaawu eeshshaynne I ba deꞌuwan beꞌidobay, qassi siiqiyo uri hayqqido hanotay issi uri haraappe dummatiya ogiyan azzananaadan oottana danddayees.

AY KEENA QOHANEE?

Siiqiyo uri hayqqidoogeeti hegaappe simmin aybi hananaakko erennan aggana danddayoosona. SHin, etawu siyettiya issi issibay haratuyyookka siyettiyaaba, qassi hanana giidi naagiyoobaa gidana danddayees. Ane kaallidi deꞌiyaabaa beꞌa:

Keehi unꞌꞌettiyoogaa. Kayyottiya uri yeekkana, hayqqida uraa laamotana, qassi A eeshshay sohuwaara sohuwaara laamettana danddayees. Hayqqida ura hassayanaadan oottiyaabati woy aymoy keehi unꞌꞌettanaadan oottana danddayees. SHin koyro, dagammananne ammananawu metootana danddayoos. Tiina I azinay Timoy qoppennan hayqqin iyyo siyettidabaa hassayawusu. A hagaadan gaasu: “Koyro taani jollu gaas. Ubba yeekkanawukka danddayabeykke. Taani keehi unꞌꞌettido gishshawu, issi issitoo shemppanawukka metootaas. Hanidabaa mule ammanana danddayabeykke.”

Hirggiyoogaa, yiillotiyoogaa, qassi bana mooranchchadan xeelliyoogaa. Ivani hagaadan giis: “Layttay 24 gidido nu naꞌay Eriki hayqqin, taaninne ta machchiyaa Yolandda amarida wodiyawu keehi yiillotida! Nuuni kase yiillotiya asadan nuna mule xeellenna gishshawu, hegan nuuni garamettida. Nu naꞌaa maaddanawu nuuni oottana danddayiyoobi deꞌishin aggidaakkonne qoppida; hegee nuuni nuna mooranchchadan xeellanaadan oottiis.” A machchiyaa daro wodiyawu harggada hayqqido Alehandroykka bana mooranchchadan xeelliis; I hagaadan giis: “Koyro heeran, Xoossay taani hagaadan waayettanaadan paqqadidoogee taani iita asa gidiyo gishshataassa gidana gaada qoppaas. Qassi hanidabawu oyshettiyay Xoossaa gaada qoppido gishshawu, tana mooranchchadan xeellaas.” Kasetiya huuphe yohuwan abaa qonccissido Kostasi hagaadan giis: “Issi issitoo, Soofiya hayqqido gishshawu iini yiillotays. Yaatada qassi, hegaadan qoppido gishshawu, tana mooranchchadan xeellays. Qassikka mooroy ibaa gidenna.”

Suure qoppanawu metootiyoogaa. Siiqiyo uri hayqqidoogeeti issi issitoo bessennabaa woy hanana danddayennabaa qoppana danddayoosona. Leemisuwawu, eti hayqqida uri haasayin siyana, akeekana woy A beꞌana danddayoos giidi qoppana danddayoosona. Woy eti issibaa wudanawu woy hassayanawu metootana danddayoosona. Tiina hagaadan gaasu: “Issi issitoo, taani asaara haasayaydda harabaa qoppays! Hegeekka Timo hayquwaara gayttidaba qoppays. Issibaa akeekida maara oottana danddayabeykke; hegee tana unꞌꞌissiis.”

Hara asaappe shaahettanawu koyiyoogaa. Kayyottiya uri harati shiiqidosan deꞌanawu metootana danddayees. Kostasi, “Taani aqo oyqqidaageetikka aqo oyqqibeennaageetikka shiiqidosan issippe deꞌanawu metootiyoogaa akeekaas” yaagiis. Ivana machchiya Yolandda hagaadan gaasu: “Nuugaara geeddarssiyo wode eta metoy he keena gidinkka hegan amassaliya asaara deꞌiyoogee keehi metiyaaba! Hegaa bolli, bantta naati loꞌꞌidi deꞌiyoogaa yootiya yelidaageetikka deꞌoosona. Hegee ufayssiyaaba gidikkokka, eti yootiyoobaa siyanawu metootays. Kayyottiiddikka deꞌana danddayiyoogaa ta azinaynne taani akeekida; shin asay hegaa malabaa haasayiyo wode siyanawu koyokko.”

Harggiyoogaa. Siiqiyo uri hayqqidoogeeti qumaa maanawu koyennan aggana, leeꞌana woy orddana, qassi maara xiskkennan aggana danddayoosona. Aarooni ba aaway hayqqi simmin deꞌiya layttan hanidabaa hassayidi hagaadan giis: “Taani xiskkanawu keehi metootaas. Ta aawaa hayquwaabaa hassayada qammi qammi ubbatoo issi mala saatiyan denddays.”

Alehandroy bana aybi sakkiyaakko eribeennaagaa hassayidi hagaadan giis: “Dottoree tana darotoo maramaridi taani payya gidiyoogaa yootiis. Ta sahettanaadan oottiday kayyuwaa ga qoppaas.” A sakkiyaabay guyyeppe aggiis. SHin Alehandroy maramarettanawu dottoriyaakko biidoogee loꞌꞌo. Kayyoy bollay bana qohiyaabaappe teqqanawu oottiyoobay leppanaadan, kase deꞌiya harggee goobanaadan woy ubba hara qommo hargge oyqqanaadan oottana danddayees.

Koshshiyaabaa oottanawu metootiyoogaa. Ivani hagaadan giis: “Eriki hayqqidoogaa dabbotuyyoonne laggetuyyo xalla gidennan, A halaqaanne I deꞌido keettaa godaa gujjin, hara darotuyyo yootana koshshiis. Higgiyaara gayttidaagan kunttana koshshiyo daro qitsetikka deꞌoosona. Qassi Erikabaa gididabaa xeellidi giigissana koshshiis. Nuuni asatettaaninne qofan keehi daafurido he wodiyan he ubbabaa akeekidi loytti oottana koshshiis.”

SHin, issota issota deexxiya waannabay, siiqiyo hayqqida uri kase oottiyoobaa haꞌꞌi eti oottana koshshiyoogaa. Tiino gakkidabaykka hegaa. A hagaadan gaasu: “Bankkiyaaranne zalꞌiyaara gayttida harabaa ubbatoo kase oottiyay Tima. Haꞌꞌi hegaa oottiyay tana; hegee taani kaseegaappe aaruwan unꞌꞌettanaadan oottiis. Tumu hegaa taani maaraa oottanee?”

Qommoora beꞌido metooti kayyuwaa gencciyoogee keehi metiyoogaa bessoosona. Siiqiyo uri hayqqiyo wode keehi kayyottiyoogee attennaba; shin hegaa kasetidi eriyoogee bantta siiqiyo uri mati hayqqidoogeeti minettanaadan maaddana danddayees. Qassi siiqiyo uri hayqqido ubbay kayyoy gattiyo qoho ubban qohettennaagaa hassaya. Hegaa bollikka, siiqiyo uri hayqqin keehi kayyottiyoogee wottin deꞌiyaaba gidiyoogaa eriyoogee kayyottidaageeti amarida hanotan minettanaadan oottana danddayees.

TAANI ZAARETTADA UFAYTTANEE?

Hanana giidi naagiyoobaa: Hegaadan keehi kayyottiiddi daro wodiyawu deꞌokko; loddan loddan minetti minetti boos. Hegaa giyoogee azzaniyoogaa muleera aggoos woy nu siiqiyo uraa dogoos giyoogaa gidenna. SHin, loddan loddan keehi kayyottiyoogaa aggoos. He hayqqida ura hassayanaadan oottiyaabay, bullachchaa gallassay, hayqqido gallassay, woy hegaa mala hara gallassay nuuni qoppennan keehi azzananaadan oottana danddayees. SHin guyyeppe, daroti kayyuwaappe minettoosonanne galla galla oottiyoobaa maara oottana danddayoosona. Siiqiyo uri hayqqidoogeeta so asay woy laggeti maaddikko qassi etikka minettanawu koshshiyaabaa oottikko sohuwaara minettana danddayoosona.

Awude gakkanaashin keehi kayyottanee? Issooti issooti amarida aginaappe simmin minettoosona. Daroti issi layttaappe woy naaꞌꞌu layttaappe simmin minettana danddayoosona. Ubba qassi harati minettanawu hegaappe daro layttaa koshshees.a Alehandroy babaa hassayidi, “Taani heezzu layttawu keehi kayyottaas” yaagiis.

Ne hanotaa danddaya. Wonttobawu hirggoppa; ne hanotay haratuugaappe dummatiyoogaa era; qassi kayyottiiddi merinawu deꞌennaagaa akeeka. Qassi, ne kayyuwaappe minettanawunne koshshennan daro wodiyawu kayyottennaadan neeni ay oottana danddayay?

Kayyuwaappe minettiyoogaabaa eranawu koyikko, issoy haraappe aaruwan maaddiya, keehi daro qofaa demmana danddayaasa. Kasetiya huuphe yohuwan beꞌidoogaadan, hegawu gaasoy ubba asaykka kayyottiyoy dumma dumma ogiyaana gidiyoogaa gidana. Issuwaa maaddiyaabay haraa maaddennan aggana danddayees.

Gidoppe attin, daro asaa maaddiya amarida qofay deꞌees. Kayyottidaageeta zoriyaageeti darotoo he qofata yootoosona; qassi he qofay ammanttiyaaba gidiyoogee erettida, aadhdhida eratettay deꞌiyo Geeshsha Maxaafay yootiyoobaara maayees.

1: SO ASAYNNE LAGGETI MAADDIYO WODE MAADETTA

• 

  Hegee kayyuwaappe minettanawu maaddiya waannaba gidiyoogaa issi issi eranchchati yootoosona. SHin issi issitoo neeni nerkka deꞌanawu koyana danddayaasa. Ubba, nena maaddanawu baaxetiyaageeti oottiyoobay nena yiilloyana danddayees. Hegee wottin deꞌiyaaba.

• Ubbatoo harati nenaara deꞌana gaada qoppoppa; qassi harati neekko shiiqennaadan diggoppa. Wodeppe eti nena maaddanaadan koyana danddayaasa. Neeni koyiyoobaanne koyennabaa haratuyyo ashkketettan yoota.

• Ne hanotaadan, awude asaara wodiyaa aattanaakko qassi awude nerkka takkanaakkko akeekan kuuya.

GEESHSHA MAXAAFAY YOOTIYO MAARAA: “Issuwaa gidiyoogaappe naa77a gidiyoogee lo77o; . . . naa77aappe issoi kunddikko issoi denttees.”​—Eranchchaa 4:9, 10.

2: Maaddiya Qumaa Ma; Qassi Bollaa Minttiyaabaa Oottanawu Wodiyaa Bazza

• Bollawu maaddiya qumaa miyoogee kayyuwan unꞌꞌettiyoogaappe woppu gaanawu maaddees. Dumma dumma qommo mittaa ayfiyaa, ataakilttiyaa qassi prootine deꞌiyo qummaa ma.

• Daro haattaa, qassi payyatettawu maaddiya harabaa uya.

• Neeyyo qumay meetettana xayikko, elle elle guuttaa guuttaa ma. Qassi qumadan bollaa minttiya xaliyaabaa aakimiyaa oychchana danddayaasa.a

• Horddofiyoogeenne bollaa minttiya harabay kayyuwaappe minettanaadan amarida ogiyan maaddana danddayees. Bollaa minttiyaabaa oottiyoogee ne siiqiyo hayqqida uraabaa wotta dentta qoppanawu woy hegaabaa qoppiyoogaa amarida wodiyawu agganawu maaddana danddayees.

GEESHSHA MAXAAFAY YOOTIYO MAARAA: “Ba bollaa ixxiya asi mulekka baawa; shin . . . ooninne ba bollaa mizeesinne naagees.”​—Efisoona 5:29.

3: LOYTTA XISKKA

• 

  Xiskkoy ubba asawu keehi koshshiyaaba gidikkonne, kayyottiyaageeti hara asaagaappe aaruwan daafuriyo gishshawu ubba etawu keehi koshshees.

• Tukke malabaynne cammiya ushshay xiskkuwaa diggana danddayiyo gishshawu, ay keenaa uyanaakko akeekana koshshees.

GEESHSHA MAXAAFAY YOOTIYO MAARAA: “Daafuraaninne carkkuwaa oiqqanau yedettiyoogaa mala jaaman daafuridi demmiyo naa77u kushebaappe, woppan demmiyo issi kushebai darees.”—Eranchchaa 4:6.

4: NE QOFAA HANOTAADAN LAAMMA

• 

  Ubba asaykka kayyottiyoy dumma dumma ogiyaana gidiyoogee qoncce. Yaatiyo gishshawu, neeyyo haniya ogiyaa akeekana koshshees.

• Issoti issoti haratuyyo bantta kayyuwaa qonccissiyoogee eti minettanaadan maaddiyoogaa akeekidosona; shin harati bantta kayyuwaa qonccissanawu koyokkona. Issi uri bawu siyettiyaabaa haratuyyo yootiyoogee kayyuwaappe minettanawu maaddiyoogaa xeelliyaagan eranchchati dumma dumma qofaa yootoosona. Neeyyo siyettiyaabaa issi urawu yootana koshshishin ne yayyikko, hegaa mata laggiyawu qonccissiyoogee metennaba gidana danddayiyo gishshawu, leddan leddan ayyo yootiyoogan doomma.

• Yeekkiyoogee bantta kayyuwaappe minettanawu maaddiyoogaa issi issi asati akeekidosona; harati qassi darin yeekkana xayikkokka minettoosona.

GEESHSHA MAXAAFAY YOOTIYO MAARAA: “Ba wozanaa azzanuwaa aawu erees.”—Leemiso 14:10.

5: NENA QOHIYAABAA OOTTOPPA

• 

  Siiqiyo uri hayqqido issoti issoti bantta kayyuwaappe amarida ogiyan minettanawu giidi ushshaa uyoosona woy jallissiyaabaa bessenna ogiyan goꞌettoosona. Yaatidi kayyuwaappe guuttaa minettanawu maliyoogee qohiyaaba. Hegaadan woppu giyoogee guutta wodiyaassa; qassi hegee guyyeppe daroban keehi qohana danddayees. Unꞌꞌettiyoogaappe woppu gaanawu nena qohiyaabaa oottoppa.

GEESHSHA MAXAAFAY YOOTIYO MAARAA: “Tunissiya ubbabaappe nu huuphiyaa ane geeshshoos.”—2 Qoronttoosa 7:1.

6: UBBATOO AZZANOPPA

• Daroti ubbatoo azzaniyoogaappe (kayyuwaabaa qoppiiddi unꞌꞌettiyoogaappe) azzanennan aggiyo amarida wodiyaa bazziyoogee (bantta azzanuwaabaa qoppennaadan oottiyaabaa amarida wodiyawu oottiyoogee) loꞌꞌo gidiyoogaa akeekidosona.

• Dabbotaa medhdhiyoogee woy minttiyoogee, ooratta hiillaa tamaariyoogee woy qassi allaxxiyoogee amarida wodiyawu woppu gaanawu maaddana danddayees.

• Amarida wodiyaappe simmin, ne hanotay laamettana danddayees. Neeni daro wodiyaa darotoo kayyottennaagaa akeekana danddayaasa.

GEESHSHA MAXAAFAY YOOTIYO MAARAA: “Ubbabau wodee de7ees; . . . yeekkanau wodee de7ees; miiccanaukka wodee de7ees. Kayyottanau wodee de7ees; qassi ufaittidi yexxanaukka wodee de7ees.”—Eranchchaa 3:1, 4.

7: NE KASE MEEZIYAA AGGOPPA

• 

  Kase oottiyoobaa sohuwaara doomma.

• Neeni kaseegaadan xiskkikko, qassi oosuwaanne harabaa kaseegaadan oottikko, sohuwaara minettana danddayaasa.

• Aggennan ubbatoo loꞌꞌobaa oottiyoogee azzanuwaappe minettanaadan maaddana danddayees.

GEESHSHA MAXAAFAY YOOTIYO MAARAA: “Xoossai a wozanan ubba wode ufaissaa kuntti wottiyo gishshau, i ba de7uwaa laittaabaa daro qoppenna.”—Eranchchaa 5:20.

8: KEEHI EESOTADA GITABAA KUUYOPPA

• Siiqiyo uri hayqqi simmin sohuwaara gitabaa kuuyida daroti, guyyeppe hegan zilꞌꞌettoosona.

• Deꞌanawu harasaa baanawu, oosuwaa laammanawu woy siiqiyo hayqqida uraabaa kessa olanawu kuuyanaappe kase, danddayettiyaabaa gidikko amarida wodiyawu takka.

GEESHSHA MAXAAFAY YOOTIYO MAARAA: “Mino oosanchchaa halchchoi dureyees; shin eesotiya ubbai hiyyeesana.”—Leemiso 21:5.

9: NE SIIQIYO URAA HASSAYA

• 

  Siiqiyo uray hayqqido daroti hayqqida uraa dogennaadan maaddiyaabaa oottiyoogee loꞌꞌo giidi qoppoosona.

• Hayqqida uraa hassayanaadan oottiya pootuwaa woy A hassayissiya harabaa shiishshiyoogee woy qassi neeni hassayana koyiyo hanidaba xaafa oyqqiyoogee minettanaadan oottiyaaba gidana danddayees.

• Loꞌꞌobaa hassayanaadan oottiyaabaa shiishsha; qassi guyyeppe neeni minettidabadan qoppiyo wode hegaa beꞌa.

GEESHSHA MAXAAFAY YOOTIYO MAARAA: “Kase wodiyaa qoppite.”—Zaarettido Wogaa 32:7.

10: ALLAXXA

• Neeni harasaa baada wodiyaa aattanawu qoppana danddayaasa.

• Wodiyaa aattanawu harasaa baada daro wodiyawu takkanawu danddayennaba gidikko, issi woy naaꞌꞌu gallassawu hemettana, muuziyemiyaa xomoosana woy kaamiyan issisaa baana danddayaasa.

• Neeni meezetidobaappe guuttaa dummatiyaabaa oottiyoogeekka kayyuwaappe minettanawu maaddana danddayees.

GEESHSHA MAXAAFAY YOOTIYO MAARAA: “Nurkka guuttaa shemppi ekkanau asi bainnasaa hinddite.”—Marqqoosa 6:31.

11: HARATA MAADDA

• 

  Harata maaddiyo wode ubban neenikka maadettiyoogaa hassaya.

• Neeni siiqiyo uri hayqqin kayyottiya, banttanaara harati azzananaadan koyiya ne soo asaanne laggeta minttettiyoogan harata maaddiyoogaa doommana danddayaasa.

• Harata maaddiyoogeenne minttettiyoogee neeni zaarettada ufayttanaadaaninne woppu gaanaadan oottana danddayees.

GEESHSHA MAXAAFAY YOOTIYO MAARAA: “Ekkiyaagaappe immiyaagee anjjettidaagaa.”—Oosuwaa 20:35.

12: NEENI XOQQU OOTTADA XEELLIYOOBAA ZAARETTADA YIGGA

• Siiqiyo uri hayqqin kayyottiyoogee, deꞌuwan keehi koshshiyaabay aybakko loytti akeekanawu maaddana danddayees.

• Neeni ne deꞌuwan ay oottaydda deꞌiyaakko loytta qora.

• Koshshikko, neeni xoqqu oottada xeelliyoobaa zaarettada yigga.

GEESHSHA MAXAAFAY YOOTIYO MAARAA: “Gibiraa keettaa biyoogaappe, yeeho keettaa biyoogee lo77o; aissi giikko, asa ubbaa wurssettai haiqo; paxa de7iya asaikka hegaa ba wozanan wottanau koshshees.”—Eranchchaa 7:2.

Ha wodiyan, neeni azzaniyoogaa muleera agganaadan oottiyaabi baawa. SHin ha huuphe yohuwan odettidaagaa mala loꞌꞌobaa oottiyoogee bantta siiqiyo uri hayqqin minettanawu maaddidoogaa daroti odoosona. Kayyottiyoogaa agganawu maaddiya ubbabay ha huuphe yohuwan odettibeennaagee tuma. SHin hagan odettidaagaappe amaridaagaa oosuwan peeshshikko neeni keehi minettana.

MATA WODEPPE HAA SIMMIN, SIIQIYO URI HAYQQIN KAYYOTTIYOOGAABAA ERANCHCHATI DAROBAA XANNAꞌIDOSONA. SHin ha maxeetiyan kasetidi qonccidaagaadan, eranchchati yootiyo zoree, daro wodiyaappe kase Geeshsha Maxaafan odettida aadhdhida eratettaara maayees. Hegee Geeshsha Maxaafay wodee aadhdhichidoba gidennaagaa bessiyaaba. SHin Geeshsha Maxaafay yootiyoy ammanttiya zore xalla gidenna. Kayyottiyaageeta keehi minttettiya, hara awuppenne demmana danddayennaabaakka yootees.

• Nu siiqiyo hayqqidaageeti waayettiiddi deꞌennaagaa bessiya ammanttiya naqaashaa

  Geeshsha Maxaafay Eranchchaa 9:5n, “Haiqqidaageeti aibanne erokkona” yaagees. Eta “halchchoi ubbai . . . atti aggees.” (Mazamure 146:4) Hegaara maayiya ogiyan, Geeshsha Maxaafay hayquwaa xiskkuwan leemisees.—Yohaannisa 11:11.

• Siiqiya Xoossaa mintti ammaniyoogee minettanaadan oottees

  Geeshsha Maxaafay Mazamure 34:15n, “GODAA aifee xillotukko xeellees; qassi i ubba wode eta waasuwaa ezggees” yaagees. Nuuyyo siyettiyaabaa woosan Xoossawu yootiyoogee issi urawu yootiyoogaappe woy maara qoppiyoogaappe aadhdhiyaaba. Woosay nuuni nuna Medhdhidaagaara mino dabbotaa medhdhanawu maaddees; I ba wolqqan nuna minttettana danddayees.

• Sinttappe demmanawu yeemottiyo loꞌꞌo deꞌuwaa

  Duufuwan deꞌiya hayqqida asay denddidi ha saꞌan deꞌana wodiyaabaa qoppa! Geeshsha Maxaafay he wodiyaabaa darotoo yootees. He wode saꞌan hanotay ay mala gidanaakko Geeshsha Maxaafay hagaadan gees: “Xoossai [nu] aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—Ajjuutaa 21:3, 4.

Geeshsha Maxaafaa xaafissida Xoossaa Yihoowaa ammaniya daroti bantta siiqiyo hayqqidaageetuura zaarettidi gayttanaagaa ammanido gishshawu, bantta kayyuwaappe minettidosona. Leemisuwawu, aqo deꞌuwan 65 laytta iira deꞌida I azinay hayqqido Ana hagaadan gaasu: “Nu siiqiyo hayqqidaageeti waayettennaagaa, qassi Xoossay hassayiyo ubbata denttanaagaa Geeshsha Maxaafaappe akeekaas. Hayqqida ta azinaabaa qoppiyo wode ubban he qofaa hassayays; hegee tana gakkida keehi azzanttiyaabaappe minettanaadan maaddiis!”

Ha maxeetiyan ibay kasetidi odettido Tiina hagaadan gaasu: “Timoy hayqqoosappe doommidi Xoossay tana maaddiis. Taani metootido he wodiyan Yihoowa kushiyaa darotoo beꞌaas. Geeshsha Maxaafay yootiyo dendduwaa hidootay tawu keehi qoncce. Hegee taani Tima zaarettada demmana gakkanaashin genccanaadan maaddees.”

He asati giidobay Geeshsha Maxaafay ammanttiyoogaa akeekida miilooniyan qoodettiyaageetu qofaara issi mala. Neeni geella Geeshsha Maxaafay yootiyoobay tuma gidennaba woy aymo malabaa gaada qoppiyaaba gidikko, an deꞌiya zoreenne hidootay tumakkonne eranawu A pilggana bessees. Yaatikko, kayyottiyaageeta maaddiya waannabay Geeshsha Maxaafaa gidiyoogaa neeni akeekana danddayaasa.

HAYQQIDAAGEETUYYO DEꞌIYA HIDOOTAABAA GUJJADA ERA

Hegaara gayttida biiduwaa jw.org giyo nu weyb saytiyan xeella

HAYQQIDAAGEETU HANOTAA

Nuuni hayqqiyo wode waaniyoo? Geeshsha Maxaafay yootiyo qoncce zaaroy minttetteesinne woppissees

LAYBRERIYAA > BIIDUWAA giyaagaa garssan xeella (Biiduwaa Garssan: GEESHSHA MAXAAFAA)

MISHIRAACHO SIYANA KOYAY?

Ubbasan siyiyo odoy ufayssennaba; shin mishiraachcho awuppe demmana danddayay?

GEESHSHA MAXAAFAA TIMIRTTETA > SAROTETTAANNE UFAYSSAA giyaagaa garssan xeella