Harati Inttena Beꞌidi Ay Tamaariyoonaa
1. Yesuusi erissiyo ashkkarati appe beꞌiyoogan ay tamaaridonaa?
1 Yesuusi: “Ta qambbaran waaxettite; taappe tamaarite” yaagiis. (Maa. 11:29) I yootiyooba xallan gidennan, loꞌꞌo leemiso gidiyoogankka harata tamaarissiis. Erissiyo ashkkarati Yesuusappe beꞌidi tamaaridobaa qoppite. I loꞌꞌo, kehanne siiqiyaagaa. (Maa. 8:1-3; Mar. 6:30-34) I wozanappe bana kawushshiyaagaa. (Yoh. 13:2-5) Erissiyo ashkkarati Yesuusaara haggaaziyo wode, i daafuri baynnan tumaa harata muruta ogiyan tamaarissiya oosancha gidiyoogaa beꞌidosona. (Luq. 8:1; 21:37, 38) Harati haggaazuwan nuuppe beꞌiyoobay eta waatidi maaddii?
2. Haggaazuwan nu loꞌꞌo hanotettay haasayissiyoogeeta waatidi goꞌꞌana danddayii?
2 Haasayissiyoogeeta: Nuuni bessiyaagaadan maayiyoogee, nu loꞌꞌo eeshshaynne asau wozanappe qoppiyoogee nuuni haasayissiyoogeeta keehippe maaddana danddayees. (2 Qor. 6:3; Pil. 1:27) Nuuni Geeshsha Maxaafaa darotoo goꞌettiyoogaa eti akeekoosona. Harati nuuni bonchuwan eta qofaa ezggiyoogan ufayttana danddayoosona. Ha allaalletun loꞌꞌo leemiso gidiyoogee asay Kawotettaa kiitaa siyanaadan oottana danddayiyoogaa xaasayidi xeelloppite.
3. Nuuni nu ishantta waatidi loꞌꞌbau denttettana danddayiyoo?
3 Nu Ishantta: Nu hanotay nu ishantta goꞌꞌana danddayiyoogaakka qoppite. Nuuni mishettidi haggaaziyoogee haratikka hegaadan oottanaadan denttettana danddayees. Biratay birataa poshiyoogaadan, nuuni loytti giigettidi haggaaziyoogee, harati muruta ogiyan haggaazanaadan denttettana danddayees. (Lee. 27:17) Nuuni tumaa koyiyaageeta masttooshan loytti xaafidi, takkennan zaarettidi oychiyoogee, haratikka hegaadan oottanaadan denttettees. Nuuni nu haggaazuwaa kumetta hanotan poliyoogan nu ishanttanne michontta loꞌꞌobau denttettoos.—2 Xim. 4:5.
4. Nuuni ay mala leemisokko wodiyaappe wodiyan akeekan xomoosana koshshiyoy aybissee?
4 Intte oottiyoobaanne haasayiyoobaa, qassi harata intte leemisoy bochiyo hanotaa wodiyaappe wodiyan ayssi akeekan xomoosekketii? Nu loꞌꞌo leemisoy Yihoowa ufayssanaunne “taani Kiristtoosadan haniyoogaadan, inttekka tanadan hanite” yaagida PHauloosaagaadan nuussikka siyettanaadan oottanau danddayees.—1 Qor. 11:1.