Oyshaa Saaxiniyaa
◼ Yihoowa Markkati haasayaa duuqqidi woykko masttooshan xaafidi haratussi gishana koshshii?
Geeshsha Maxaafan baasettida haasayay nuna minttettees. (Oos. 15:32) Yaatiyo gishshau, hegaa mala minttettiya qofaa shiiquwan beettibeenna haratussi yootanau koyiyoogee wottin deꞌiyaaba. Ha wodiyan, duuqqanau maaddiya daro miishshati deꞌiyo gishshau, issi haasayaa duuqqidi haratussi gishiyoogee metiyaaba gidenna. Issoti issoti daro layttappe kase shiiqida haasayata gujjin, daro haasayaa duuqqi wottidosona; qassi suure qofan hegeeta haratussi garxxoosona woykko laggetussi duuqqidi immoosona. Harati Weyb saytiyaa giigissidi ooninne hegaappe dawunloode oottana mala haasayata yan wottidosona.
Nuuni nu huuphessi goꞌettanau woykko nu soo asaassi haasayaa duuqqiyoogan ayba balinne baynnaagee erettidaba. Hegaa bollikka, shiiquwan beettana danddayenna, gubaaꞌiyaa yame gidida abbee baynnaageetussi haasayati duuqettanaadan cimati giigissana danddayoosona. Gidikkonne, nuuni haasayaa duuqqidi woy masttooshan xaafidi haratussi gishennaadan oottiya loꞌꞌo gaasoy deꞌees.
Haasayay darotoo gubaaꞌiyau koshshiyaabaa qoppiyoogan shiiqiyo gishshau, haasayay shiiqido hanotaa akeekennaagaappe denddidaagan, nuuni duuqqidi gishido haasayan deꞌiya issi qofaa bala ogiyan akeekana danddayoos. Hegaa bollikka, haasayan shiiqida qofay ha wodiyan nuuni akeekiyoobaara moggottiyaagaanne likke qofa gidiyoogaa ammananau, hegaa ooni shiishshidaakko, qassi awude shiishshidaakko eranau metees. (Luq. 1:1-4) Hegaappekka haray, haasayaa masttooshan xaafidi woy duuqqidi gishiyoogee, issoti issoti bessenna bonchettanau harati qassi bonchanau paacettanaadan oottana danddayees.—1 Qor. 3:5-7.
Ammanettida wozannaama ashkkaray bessiyaagaa keena ayyaanaabaa qumaa ‘koshshiya wodiyan’ immanau minnidi oottees. (Luq. 12:42) Hegee Yihoowa Markkatu gubaaꞌetun haasayay shiiqanaadaaninne cenggurssan duuqetti giigidabata jw.org geetettiya, dirijjitiyaa Weyb saytiyaappe dawunloode oottanaadan giigissidobata gujjees. Nuuni ammanuwan minnanaadan koshshiyaabaa, ammanettida wozannaama ashkkaraynne a kalꞌatiya Bollaara Heemmiyaagee giigissiyoogaa ammanettoos.—Oos. 16:4, 5.