Hariyaa Haasayaasu

HAREE haasayishin siya eray? ‘CHii, mehee haasayana danddayenna’ geennan aggakka. SHin Geeshsha Maxaafay issi hariyaa haasayidoogaa yootees. Hegee waanidi hanidaakko ane beꞌoos.

Israaꞌeeleti Kanaane biitti gelanau giigi uttidosona. Mooꞌaaba kawoy Baalaaqi Israaꞌeeleta yayyiis. Yaatiyo gishshau, i issi Balaama giyo eranchcha bitanee Israaꞌeeleta qangganau yaanaadan asa kiittiis. Baalaaqi ayyo daro miishshaa immanau qaalaa gelido gishshau, Balaami ba hariyo toggidi Baalaaqan gayttanau biyoogaa doommiis.

Yihooway Ba asaa Balaami qangganaadan koyibeenna. Yaatiyo gishshau, adussa bisuwaa oyqqida issi kiitanchchay ogiyan eqqidi Balaama teqqana mala kiittiis. Balaami kiitanchchaa beꞌana danddayibeennashin, a hariyaa beꞌaasu. Yaatiyo gishshau, hariyaa kiitanchchaappe baqataydda takkada, wurssettan ogiyan zinꞌꞌa aggaasu. Balaami keehin yiillotidi, ba hariyo gatiman bukkiis.

Yaatin hariyaa haasayishin Balaami siyanaadan Yihooway oottiis. Hariyaa: ‘Taani neeyyo ay oottiinne neeni tana bukkiyoy?’ yaagada oychchaasu.

Balaami: ‘Neeni tana eyya kessadassa. Tau bisoy deꞌiyaakko, ta nena woranashin!’ yaagiis.

Hariyaa: ‘Taani neeyyo hagaadan hana eriyanaayye?’ yaagada oychchaasu.

Balaami: ‘Hana erakka’ yaagidi zaariis.

Hegaappe guyyiyan, Yihooway Balaama ayfiyaa dooyin, kiitanchchay bisuwaa oyqqidi ogiyan eqqidaagaa beꞌiis. Kiitanchchay: ‘Ne hariyo ayssi bukkadii? Israaꞌeeleta qangganau neeni beennaadan, taani nena teqqanau yaas. Hariyaa wora simmabeennabaa gidiyaakko, taani nena worada, hariyo ashshana shin’ yaagiis.

Balaami: ‘Taani nagaraa oottaas. Neeni ogiyan eqqidoogaa taani erabeykke’ yaagiis. Kiitanchchay Balaama baanaadan yeddin, Balaami Baalaaqaara gayttanau biis. I haꞌꞌikka Israaꞌeeleta qangganau maliis; shin Yihooway heezzuttoo, i qanggiyoogaappe anjjanaadan oottiis.