Ubbatoo Goꞌettite
1. Tumaa Eranau giya tirakttee waatanau maaddii?
1 Tumaa Eranau Koyay? giya tirakttee nuuni Geeshsha Maxaafaa xinaatiyaa doomissanaadan maaddanau giigiis. SHin nuuni tumaa zerettaa zeranaukka keehi maaddiya miishsha. (Era. 11:6) He tirakttiyaa loytti goꞌettanau maaddiya amarida qofay hagaappe kaallidi deꞌees.
2. Haasayaa doommanau tirakttiyaa waatidi goꞌettana danddayiyoo?
2 Haasayaa Doommanau: Haasayissiyo urau tirakttiyaa immidi, koyro sinttan deꞌiya usuppun oyshaa bessiiddi, “Hageetuppe inttena qofissiya oyshay awugee?” yaagidi oychana danddayeeta. A zaaruwaa siyi simmidi, hegeetuppe issi oyshau Geeshsha Maxaafay yootiyo zaaruwaa he tirakttiyan bessite; yaatidi xiqisetuppe issuwaa nabbabite. Wurssetta sinttaa nabbabite woykko qofaa qanttan yootite; yaatidi Geeshsha Maxaafay Tamaarissiyoy giya maxaafaa immite. I he maxaafaa ekkennaba gidikkokka, tumay a wozanan xaphuwaa yeddanaadan oottana danddayiya tirakttiyaa ekkiis.—Maa. 13:23.
3. Keettaaway ooso oyqqidaba gidikko waatana danddayiyoo?
3 Keettaaway Ooso Oyqqikko: Hagaadan gaana danddayeeta: “Haꞌꞌi intteyyo injjetenna gishshau, ha tirakttiyaa immana koyays. Ha tirakttee nuuppe daroti oychiyo usuppun waanna oyshata denttidi, he ubba oyshatuyyo Geeshsha Maxaafaappe qoncce zaaruwaa immees. Inttenaara naaꞌꞌanttuwaa gayttiyo wode, intte qofay aybakko siyana.”
4. Ogiyan sabbakiyo wode tirakttiyaa immiyo wode woygana danddayiyoo?
4 Ogiyan Sabbakiyo Wode: Hagaadan gaana danddayeeta: “Saro. Ha oyshatuppe issuwaa oychi ereetii? [Zaaruwaa immanaashin takki ga.] Geeshsha Maxaafay yootiyo qonccenne aliya zaaroy ha tirakttiyan deꞌees.” He uri eesotennaba gidikko, issi oyshaa zaaruwaa tirakttiyaappe tobbana danddayeeta; ubba Geeshsha Maxaafay Tamaarissiyoy giya maxaafaa immanaukka danddayeeta.
5. Asi son baynna keettan issi issitoo tirakttiyaa ayba ogiyan goꞌettana danddyiyoo?
5 Asi Son Baynna Wode: Issi issi moottan asi baynna keettan, aassiyaageeti darotoo xuufiyaa geema sohuwan wottidi boosona. Intte gubaaꞌiyankka hegaadan oottiyo meezee deꞌikko, Tumaa Eranau giya tirakttiyaa issi issitoo aybissi wottidi beekketii? Zaaretti biyo wode hagaadan gaana danddayeeta: “Nuuni kase hagaa yiido wode inttena son demmibookko; yaatiyo gishshau, ha tirakttiyaa intte penggen wottidi biida. Ha oyshatuppe awugaa zaaruwaa eranau koyeetii?”
6. Tumaa Eranau giya tirakttiyaa sabbakanau keehi maaddiya miishsha oottiyaabay aybee?
6 Tumaa Eranau giya tirakttee qonccenne eranau metenna ogiyan tumaa yootees. Hegee ubba haymaanootiyaanne wogaa kaalliya asaa ufayssiyaaba. Hegaa asau immanau metenna; ubba yelagatinne aassiyoogaa mati doommidaageetikka hegaadan oottana danddayoosona. Koshshiyo wodiyan ubban a goꞌetteetii?