SHaahuwaa 5

Koyidobaa Oottanaadan Imettida Maalaalissiyaa Imotaa

1, 2. Nu meretaa giddon maalaalissiya imota gididay awugee?

XOOSSAY tuggaa aybissi coꞌꞌu giidi xeelliyaakkonne tuggaa xayssanau ay oottanaakko akeekanau, i nuna waati medhdhidaakko nashshanau koshshees. I nuna asatettaaranne guuggiyaara medhdhidoogaappe aadhdhiyaabaa oottiis. I nuna kahaaninne koshshan dumma gidanaadankka oottidi medhdhiis.

² Nu kahaynne koshshay dummattiyo ogetuppe issoy koyidobaa oottanaadan merettidoogaa. Ee, Xoossay nu giddon koyidoogaa dooriyo laꞌatettaa giigissi wottiis. Hagee tumukka appe imettida maalaalissiya imota.

Nuuni Merettido Ogiyaa

3-5. Koyidoogaa oottiyo maataa nuuni nashshiyoy aybissee?

³ Koyidobaa oottanau dooriyo maatay Xoossay tuggaa coꞌꞌu giidi xeelliyoogaara waani oyqqettidaakko xeelloos. Ane koyro hagaattuwa qoppoos: Intte ay oottanaakkonne haasayanaakko, ay maanaakkonne maayanaakko, ay mala oosuwa oottanaakko, awaninne waanidi deꞌanaakko koyidoba dooriyo laꞌatettay deꞌiyoogaa nashsheetii? Woy intte haasayaa, intte oosuwaanne intte deꞌuwaa ubbaa issi asi wolqqanttin polanau koyeetii?

⁴ Payya qofaara deꞌiya ayba asinne ba deꞌuwan i oottiyoobi ubbi ba koshshaappe gaxi kiyaanaadan koyenna. Aybissi koyennee? Xoossay nuna medhdhido ogee hegaa bessees. Xoossay asaa ba ‘leemisuwan bana milatissidi’ medhdhidoogaa Geeshsha Maxaafay nuussi yootees; qassi Xoossaayyo deꞌiyaabaappe issoy dooriyo laꞌatetta. (Doomettaabaa 1:26; Zaarettudo Wogaa 7:6) I asaa medhdhiyo wode, he maalaalissiya—ba koyidoogaa dooriyo imotaa immiis. Aylle oottidi unꞌꞌissiya ayssoy nuna hirggan woriyo issi gaasoy hegaa.

⁵ Laꞌatettaa amottiyoogee coo yiidaba gidennan, Xoossay laꞌatettaa Xoossa gidiyo gishshataassa. Geeshsha Maxaafay: “Godaa Ayyaanai de7⁠iyoosan ailletetti baawa” yaagees. (2 Qoronttoosa 3:17) Yaatiyo gishshau, ba koyidoogaa oottanau dooriyo maataa Xoossay nuussi dola mereta oottidi immiis. Nu kahaynne koshshay waati oottanaakko i kasetidi erido gishshau, koyidoogaa oottiyo maatan nuuni ubbaappe aadhdhi ufayttanaagaa eriis.

6. Nu guuggee koyidoogaa oottiyo maataara moggottidi oottanaadan Xoossay waati medhdhidee?

⁶ Koyidoogaa oottiyo maataara issippe biya, qoppi danddayiyoogaa, yohuwaa yiggi xeelliyoogaa, kuushshaa kuuyiyoogaanne iitaa kehaappe shaakki eriyo imotaa Xoossay nuussi immiis. (Ibraawe 5:14) Yaatiyo gishshau, koyidoogaa oottanau dooriyo maatay akeekan qoppiyo dooruwan baasettana bessees. Nuuni merettidoy ba shenebaa oottiyo maati baynna, qoppenna roobootedaana gidenna. Nuuni merettidoy qofi baynna mehedaankka gidenna. Hegaappe, maalaalissiyaa nu guuggee koyidoogaa dooriyo laꞌatettaara moggottidi oottanaadan giigiis.

Keehippe Loꞌꞌo Doomettaa

7, 8. Xoossay nu koyro aawaanne aayee deꞌuwaa ay mala loꞌꞌo ogiyan doomissidee?

⁷ Xoossay asaa ay keena saaphoyi oyqqiyaakko bessanau, nu koyro aawanne aayo gidida Addaamessinne Hewaanissi, koyidogaa oottiyo maataara, ay asinne bau kumanaadan koyiyoobaa ubbabaa immiis. Eta aahonne loꞌꞌiya gannattiyan wottiis. Etau koshshiyaabay ubbay kumi palahiis. Etau polo gidida guuggeenne asatettay deꞌees; hegaa gishshau ceeggokkona, harggokkona woy hayqqokkona—merinau deꞌana danddayoosona shin. Merinau deꞌiya, ufayttiya polo gidida naata yelanaukka danddayoosona shin. Corattiiddi dari dari biya asaassi aqi peeꞌiiddi kumetta biittaa gannate oottiyo ufayssiya oosoy deꞌanashin.—Doomettaabaa 1:26-30; 2:15.

⁸ Giigidabaa xeelliyaagan Geeshsha Maxaafay yootiiddi: “Xoossai ba medhdhido ubbabaakka xeelliis; xeellidi daro lo77⁠o gididoogaa be7⁠iis” yaagees. (Doomettaabaa 1:31) Gujjidikka Geeshsha Maxaafay Xoossaabaa: “A oosuwan wotoi baa” yaagees. (Zaarettido wogaa 32:4) Ee Medhdhidaagee asaa naatussi polo gidida doomettaa immiis. Hegaappe aadhdhiya loꞌꞌobi deꞌana danddayenna. Xoossay qoppiyaagaa gidiyoogee i oottido oosuwan ay keena erettidee!

Zaway Deꞌiyo Laꞌatettaa

9, 10. Koyidoogaa oottiyo maatay bessiya ogiyaappe deshshenaadan naagana koshshiyoy aybissee?

⁹ Gidikkokka, Xoossay halchchidoy koyidoogaa oottiyo maatay zawi baynnaagaa gidanaadaaneeyye? Cora kaamee deꞌiyo, ubbay ba koyosaara ba koyoogaadan kaamiya laaggiyo tiraafikiyaa higgee baynna katamaa ane qoppite. Intte hegaa mala hanotan kaamiyaa laagganau koyuuteetii? CHii, hegaa mala woga xayida ogiyan, yaa haa simerettiyoogee, wurssettan daro daafaa gattiyoogee qoncce.

¹⁰ Xoossay immido Koyidoogaa oottiyo maataykka hegaadaana. Zawi baynna laꞌatettay deretettaa giddon maari xayanaadan oottees. Asaa naatu hanotaa kaalettiya higgee deꞌanau koshshees. Xoossaa Qaalay: “Ailletettaappe kiyidi, Xoossaa ailledan de7⁠iteppe attin, he ailletettaappe kiyidoogaa iitatetta genttiyoobaa oottoppite” yaagees. (1 PHeexiroosa 2:16) Ubbaassi loꞌꞌo gidana mala Xoossay koyidoogaa oottiyo maatau higgee deꞌanaadan koyees. I nuuyyo halchchidoy, zawi baynna laꞌatetta gidennan, zawi deꞌiyo laꞌatettan higgiyau haarettidi deꞌanaadaana.

O Higgetee?

11. O higgeta azazettanaadan hanidi merettidoo?

¹¹ Nuuni o higgeta azazettanaadan hanidi merettidoo? Koyro PHeexiroosa 2:16⁠u kaalliya kifilee: “Xoossaappe attin hara o ayllenne gidekketa” yaagees. Hegaa giyoogee unꞌꞌissiya aylletetta giyoogaa gidenna; shin hegaappe, Xoossaa higgiyau haarettiyoogan aybippenne aaruwan ufayttanaadan hanidi merettida yaagiyoogaa. (Maatiyoosa 22:35-40) A higgeti, asi kessido ay higgetuppekka aaruwan keehi loꞌꞌo kaaletuwa immoosona. “Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana.”—Isiyaasa 48:17.

12. Xoossaa higgiyaa garssan nuuni koyidoogaa dooranau ayba laꞌatettay deꞌii?

¹² Hegaadankka, Xoossaa higgeti bantta wottiyo zawaa giddon dooranau daro laꞌatettaa immiyaageeta. Wurssettan hagee dumma dumma hanotay deꞌanaadan oottidi asaa naati yallisanaadan oottiyaagaa. Alamiyaa yuushuwan deꞌiyaa dumma dumma qommo qumaa, maayuwaa, muuzunqqaa, oosuwa hiillaanne keettaa ane qoppite. Hegeeta malatiyaabatun hara asi nuussi kuuyiyoogaappe nu dosidoogaa dooranau koyiyoogee qoncce.

13. Nuussi loꞌꞌo gidanaadan giidi, azazettana bessiya mereta higgeti awugeetee?

¹³ Yaatiyo gishshau, nuuni asaa naatu eeshshaa xeelliyaagan Xoossaa higgetussi haarettiyoode aybippenne aaruwan ufayttanaadan hanidi merettida. Hagee Xoossay meretaayyo kessido higgiyau haarettiyoogaara issi mala. Leemisuwaassi, biittaa dafo higgiya sheneho giidi xoqqa sohuwaappe guppiyaaba gidikko, qohetoos woykko hayqqoos. Nu asatettaa garssa higgiyaa sheneho giidinne qumaa miyoogaa, haattaa uyiyoogaa woy siiriyaara shemppiyoogaa aggikko, hayqqeetees.

14. Asaa naati Xoossaappe gaxa gidanaadan hanidi merettibeennaaga waati erana danddayiyoo?

¹⁴ Nuuni Xoossay kessido mereta higgetussi haarettana koshshiyoogeeta gididi meretidoogee qoncce gidiyoogaadan, Xoossay kessido kandduwaanne issippetettaa higgiyaassikka haarettanau koshshiyoogeeta gididi merettida. (Maatiyoosa 4:4) Asaa naati banttana Medhdhidaagaappe gaxi kiyidi oottiyooban murutanaadan merettibookkona. Hananabaa yootiya Ermmaasi: “ba hemetaa suurissanaagee aawu shene gidennaagaa taani erais. Abeet GODAU, tana seera” yaagees. (Ermmaasa 10:23, 24) Yaatiyo gishshau, asaa naati ay oggiyaarakka gidin banttana banttarkka haaranaadan gidennan, Xoossaa haaruwaa garssan deꞌanaadan hanidi merettidosona.

15. Xoossaa higgeti Addaamessinne Hewaanissi dexxiyaabee?

¹⁵ Xoossaa higgetuussi haarettiyoogee nu koyro aawaassinne aayeessi deexxiyaaba gidenna shin. Hegaappe, he higgee etassinne asaa zeretta ubbau kehabaassa shin. Koyro azinaynne machchiyaa Xoossaa higgeti wottiyo zawaa naagidi deꞌidaba gidiyaakko, ubbabay loꞌꞌo gidana shin. Tumuppe, nuuni haꞌꞌi keehippe loꞌꞌiya gannattiyan ufayttiya, issipetettay deꞌiyo so asa gididi deꞌanaagaa shin! Iitatettay, tuggayinne hayqoy deꞌenna shin.

[Sinttaa 11n deꞌiya misiliyaa]

Medhdhidaagee asaa naatu deꞌuwaa polo gidida ogiyan doomisiis

[Sinttaa 12n deꞌiya misiliyaa]

Yaa haa biyaabi bessido, tiraafikkiyaa higgee baynna sohuwan kaamiyaa laagganau koyay?