SHaahuwaa 6
Xoossay Tuggay Deꞌishin Ayssi Coꞌꞌu Giidi Xeellii?
1, 2. Nu koyro aawaayinne aayyiya Xoossay etau immido loꞌꞌo doomettaa waati mooridonaa?
AYBA bali merettidee? Xoossay nu koyro aawaassinne aayeessi immido loꞌꞌo sohuwaa Edene Gannatiyaa mooridabi aybi kiyidee? Gannatiyan sarotettaaninne moggottidi deꞌana bessishin iitatettaynne tuggay shaꞌan qoodettiya layttatussi dalggidi deꞌidoy aybissee?
2 Addaameenne Hewaana koyidoba oottiyo bantta maataa bessenna ogiyan goꞌetto gishshataassa. Xoossaappenne a higgiyaappe gaxa kiyidi ishalidi deꞌanau danddayennaageeta gididi merettidoogaa dogidosona. Xoossaappe gaxa kiyidi deꞌiyoogee, bantta deꞌuwaa loyttees gi qoppidi hegaadan oottidosona. Yaatiyo gishshau, Xoossay wottido koyobaa oottiyo maataa zawaappe gaxi kiyidosona.—Doomettaabaa, shemppo 3.
Ubbaappe Bollaara Haariyo Maataa Bolli Denddida Oyshaa
3-5. Xoossay Addaamanne Hewaano xayssidi wotti yeggidi hara asaa medhdhibeennay aybissee?
3 Xoossay aybissi Addaamanne Hewaano xayssidi, wotti yeggidi hara attumaagaanne maccaaro medhdhibeennee? I ubbaappe bollaara haariyo maatan, hegeekka a suure haaruwan oyshay denddido gishshataassa.
4 Denddida oyshay: Haaranau maatay deꞌiyoy oonee, qassi o haaroy suuree? yaagiyaagaa. Xoossay ubbaa danddayiyaagaanne meretaa ubbaa Medhdhidaagaa gidiyo gishshau, ubbaappe bollaara haaranau maatay ayyo deꞌees. I ubbabaa eriyaagaa gidiyo gishshau, a haaroy ubba meretaayyo aybippenne aadhdhida loꞌꞌo. SHin Xoossaa haaruwan oyshay denddiis. A mereta gidiya asi merettido ogiyan bali deꞌiishsha? Oyshay asaa naatu suuretettaa naaguwa gujjiyoogaa nuuni simmidi pilggana.
5 Asay Xoossaappe gaxa kiyidoogan denddida hara oyshay: Asay Xoossan haarettennaakko loꞌꞌoshshaa? yaagiyaagaa. Medhdhidaagee ha oyshaa zaaruwaa eriyoogau siree baawa; shin asaa naati koyidi demmana danddayiyo suure ogee, eti koyido zawi baynna laꞌatettaa etau immiyoogaana. Bantta koyidoogaa oottiyo maatan eti doorido ginan baanaadan, Xoossay eta coꞌꞌu giidi xeelliis.
6, 7. Xoossay asaa naati adussa wodiyau mule laꞌa gidanaadan aybissi coꞌꞌu giidee?
6 Xoossay asaa naatussi mali beꞌanaadan gidiya wodiya mule laꞌatettaara immidi, asaa naati Xoossaayyo haarettiyoogee loꞌꞌokko woy banttana banttarkka haariyoogee loꞌꞌokko ubbatooyyo boxooxissiyaabaa oottiis. Qassi asaa naati polotikkan, inddusttiriyan, saynnisiyaaninne akkamuwan pilggidi xoqqa sohuwaa gakkanaadan, imettiya wodee gidiyaagaa gidanau koshshees.
7 Yaatiyo gishshau, asaa naati Xoossaappe gaxa kiyidi banttarkka banttana ayssiyo ayssoy kehakko woy iitakko ayba sireenne baynnan qonccidi beettanaadan nu wodiya gakkanaashin laꞌatettan haaranaadan coꞌꞌu giidi xeelliis. Hegan asay kehatettaanne makkalaa giddon, siiquwaanne ixuwaa giddon, xillotettaanne iitatettaa giddon dooranau danddayiis. SHin i, ba dooroy ehiyo ayfiyaa: loꞌotettaanne sarotettaa demmana woy iitatettaanne tuggaa beꞌana.
Ayyaana Meretatu Makkalaa
8, 9. (a) Ayyaana alamiyan makkalay waani denddidee? (b) Seexaanay Addaameppenne Hewaanippe hara ooni makkalanaadan oottidee?
8 Qoppanau koshshiyaa hara yohoy deꞌees. Xoossaa haaruwaa bolla makkalidaageeti nu koyro aawaanne aayee xalaala gidokkona. Yaatin, he wode hara ooni deꞌii? Ayyaana meretati deꞌoosona. Xoossay asaa medhdhanaappe kase, saluwan deꞌiya asaagaappe xoqqa deꞌoy deꞌiyo cora qooday deꞌiyo kiitanchchata medhdhiis. Etikka koyidoogaa oottiyo maataaranne Xoossaa haaruwaayyo haarettiyo koshshaara merettidosona.—Iyyooba 38:7; Mazamure 104:4; Ajjuutaa 5:11.
9 Geeshsha Maxaafay makkalay koyro doommidoy ayyaana alamiyaana gidiyoogaa bessees. Issi ayyaana meretay zawi baynna laꞌatettaa koyiis. Ubba qassi asaa naati assi goynnanaadan koyiis. (Maatiyoosa 4:8, 9) Ha ayyaana mereta gidiya makkalanchchay, wordduwan Xoossay etau bessiya loꞌꞌobaa diggiis giidi Addaameenne Hewaana Xoossaa bolli makkalanaadan oottiis. (Doomettaabaa 3:1-5) Hegaa gishshau, i Dablloossaa (Sunttaa Mooriyaagaa) qassi Seexaanaa (Morkkiyaa) geetettiis. Guyyeppe, hara ayyaana meretatikka makkalanaadan labiis. Etikka dayidanttata geetettidosona.—Zaarettido Wogaa 32:17; Ajjuutaa 12:9; 16:14.
10. Asaa naatunne ayyaana meretatu makkalaappe denddidaagan aybi yiidee?
10 Asaa naati Xoossaa bolli eqettidi makkaliyoogan, Seexaanaanne dayidanttatu qohuwaassi banttana aatti immidosona. Geeshsha Maxaafay Seexaanaa ‘Ha sa7aa Xoossaa,’ ‘ammanenna asatu qofaa jallissidaagaa’ yaagidoy hegaassa. Hegaappe denddidaagan, Xoossaa Qaalaay ‘mule sa7aikka xalahe halaqan haarettees’ yaagees. Yesuusi ba huuphiyau Seexaanaa ‘ha sa7aa haariyaagaa’ yaagiis.—2 Qoronttoosa 4:4; 1 Yohaannisa 5:19; Yohaannisa 12:31.
Denddida Naaꞌꞌu Oyshata
11. Seexaanay hara ay oyshaa denttidi Xoossaara gaadetidee?
11 Seexaanay Xoossaara gaadettiyo hara oyshaa denttiis. Hegankka, Xoossay asaa naata bala gidida ogiyan medhdhiis yaagiyanne ooninne unꞌꞌuwaa wode suurebaa oottanau koyenna yaagiya oyshaa denttiis. Paacee gakkiyo wode eti Xoossaa ubba qanggana yaagiis. (Iyyooba 2:1-5) Seexaanay ha ogiyan asaa naatu suuretettaa naaguwaaban oyshay denddanaadan oottiis.
12-14. Seexaanay denttido naaꞌꞌu oyshatubaa tumaa, wodee waati qonccissanee?
12 Yaatiyo gishshau, ha oyshaunne ubbaappe bollaara haariyo Xoossaa maataa bolli denddida oyshau, qoppi danddayiya mereta ubbay zaaruwaa demmiyo ogiyaa beꞌanaadan gidiya wodiya immidi Xoossay coꞌꞌu giidi xeelliis. (Kessaabaa 9:16ara dabboyite.) Wurssettan asaa naatu taarikee, ha naaꞌꞌu oyshatubaa tumay qoncci beettanaadan oottana.
13 Ubbaappe kase, mereta ubbaappe bollaara haariyo Xoossaa maataa xeelliyaagan denddida oyshaayyo imettida wodee aybi qonccidi beettanaadan oottanee? Xoossaa haaruwaappe asaa naati banttana banttarkka haariyoogee kehanddee? Asaa naati Xoossaappe gaxa kiyidi kaalettido ay ayssoyinne olay, makkalay, pirddaa pacay baynna ufayssiya alamiyaa ehanddee? Ubba asaassi hiyeesatettaa xayssidinne ishaluwaa ehaana danddayiyay eta giddon deꞌanee? Harggiyaa, ceegatettaanne hayquwaa xoonanay eta giddon deꞌanee? Xoossaa haaroy hagaa ubbaa oottanau giigiidaagaa.—Doomettaabaa 1:26-31.
14 Naaꞌꞌantto oyshaa xeelliyaagan, wodee asaa naatu meretaa suuretettaaba xeelliyaagan aybi qonccanaadan oottanee? Xoossay asaa naata medhdhdo ogiyan bali deꞌii? Etappe paacee gakkiyo wode suurebaa oottanay deꞌanddee? Xoossaappe gaxi kiyida asa haaruwaappe Xoossaayyo haarettiyoogee loꞌꞌo gidiyoogaa dooriya asay deꞌanee?
[Sinttaa 13n deꞌiya misiliyaa]
Shuttle: Based on NASA photo
[Sinttaa 13n deꞌiya misiliyaa]
Asaa naati bantta oosuwan wurssetta xoqqa sohuwaa gakkanaadan Xoossay wodiya immiis