Ha xiqisseta ammananau deexii? Deexiyaaba gidikko, ane hagaa qoppa: daro so asayyo, son koshshiyaaba kunttanaayo miishshaa ehiyaagee attumaaga. I hayqqiyo wode, a so asay daroto metuwan kunddoosona. Issito issito a keettayessinne naatussi kaattaa shammanau gidiya miishshikka ubba baawa. Geelladan bitaniyaa morkketi eta qohana danddayoosona. Ane haꞌꞌi nena oychcha: ‘he bitanee ayyaana alamiyan deꞌikko, ba soo asaayyo koshshiyaaba ayssi kunttenee?’ I ba soo asaa iita asaappe ayssi naagenee? Hagee hanoogee xiqisseti tuma gido gishshaasa. He bitaniyaayyo deꞌoy baawa, aybanne oottanau danddayenna.—Mazamure 115:17.

Hagaa giyoogee hayqqidaageeti sinttanau mule deꞌuwau simmidi yookkona yaagiyoogee? Akkay, yaagiyoogaa gidenna. SHin hayqqida asati haꞌꞌi neeni oottayida deꞌiyoobaa erokkona yaagiyoogaa. Nuuni simmidi dendduwaabaa haasayana. Eti nena beꞌanau, ne giyooba siyanau, woy nenaara haasayanau danddayokkona. Neeni eta yayyanau koshshenna. Eti nena maaddanaunne qohanau danddayokkona.— Eranchchaa 9:4; Isiyaasa 26:14.

Geeshsha Maxaafay daro ayyaana meretati deꞌiyoogaa yootees. Yihoowaykka ba huuphe ayyaana.—Yohaannisa 4:24; 2 Qoronttoosa 3:17, 18.

Yihooway, salo gufanttuwan saꞌa micettan barkka deꞌido wodee deꞌees. Hegaappe simmidi kiitanchchata geeteti xeegettiya ayyaana meretata medhdhiyoogaa doommiis. Kiitanchchati asaa naatuppe wolqqaaninne eraan keehi aadhdhoosona. Yihooway daro kiitanchchata medhdhiis; Xoossaa ayllee Daaneeli, ajjuutaan, xeetu miiloone kiitanchchata beꞌiis.—Daaneela 7:10; Ibraawe 1:7.

Ha kiitanchchati Xoossan merettidoy i saꞌaa medhdhanaappekka kase. (Iyyooba 38:4-7) Etappe oonakka gidin issi wode saꞌan deꞌidi hayqqida asa ayyaana gidokkona.

Yihooway ayyaana meretata medhdhido wode ubbaykka loꞌo. Guyyeppe issi kiitanchchay iita gidiis. I Seexaanaa Dablloosa. Seexaanay, saꞌan deꞌiya asay Yihoowaayyo goynniyoogaa aggidi baassi goynnanaadan koyiis. Hanidabay kaallidi deꞌiyagaadana:

Edene gannatiyaa giddon, maanau malꞌiya ayfe ayfiyaa daro mittay deꞌees. Yihooway Addaameenne a machchiya Hewaana he mittatu ayfiyaappe coo maanaadan yootiis. Shin gannte giddon Xoossay mooppite giido issi mittay deꞌees. Eti appe miikko, tumu hayqqiyoogaa yootiis.—Doomettaabaa 2:9, 16, 17.

Issi gallassi Hewaana barkka deꞌishin shooshshay o haasayssiis. O haasayssidaagee tumuppe shooshshaa gidenna; shooshshay haasayiyaaba malatanaadan oottaagee Seexaanaa Dablloosa. Seexaanay, Hewaana he mittaa ayfiyaappe miidaba gidiyaakko, a Xoossaadan aadhdhida eranchcha gidana danddayiyoogaadan yootiis. A hayqqana danddayenaagaakka yootiis. Ha naaꞌu odottikka worddo. Gidikkokka, Hewaana Seexaanaa ammanada mittaa ayfiyaappe maasu. Hegaappe guyyiyaan, Addaameyyo immin ikka miis.—Doomettaabaa 3:1-6.

Ha tumu taarikiyaappe, Seexaanay makkalanchchanne worddanchcha gidiyoogaa tamaaroos.