Nu Mayzza Aawati Awan Deꞌiyoonaa?

1, 2. Daro asay hayqqidaageeta xeelliyaagan woygidi ammanii?

AFIRKKAN miilooniyan qoodettiya asati hayqoy deꞌuwau wurssetta gidennan, hara alamiyan deꞌanau pinttiyaabadan ammanoosona. Daroti, hayqqida bantta mayzza aawati beettiya alamiyaappe beettenna alamiyau, asaa alamiyaappe ayyaanatu alamiyau pinnidobadan qoppoosona.

² Ha mayzzati woykko mayzzatu ayyaanati, saꞌan deꞌiya bantta so asay qohettennaadaaninne ishalanaadan oottoosona giidi ammanoosona. Ha ammanuwaadan, mayzzatu ayyaanati kattay mokkanaadaaninne payyatettay deꞌanaadan oottiya, qassi qohuwaappe naagiya wolqqaama dabbo. Eta aggibayiyaabaanne yiilloyiyaaba gidikko, bashshaa, giishin harggiyaa, hiyyeesatettaanne waayiyaa gattiyaabadan qofettees.

3. Issi issi asay mayzzatuyyo goynniyoy ayba ogiyaanee?

³ Deꞌuwan deꞌiyaageeti mayzza aawata bonchiyoonne etaara deꞌiya loꞌꞌo dabbotaa naagidi deꞌiyo oosotanne wogata poloosona. Issi issi heeran deꞌiya, ahaa naagiiddi aqiyoogaanne naaꞌꞌntto mooguwaa milatiya, baliyaaranne mooguwaara gayttida meezetun hagaa mala oosoti qonccoosona. Mayzzatuyyo goynniyoogee hara ogiyankka qonccees. Leemisuwau, issi issi asay ushshaa uyanaappe kase mayzzatussi guuttaa saꞌan gussees; qassi qumaa katti simmidi, mayzzati yiikko miyoobaa demmanaadan qumaappe otuwan ashshees.

4. Daro asay shemppuwaa xeelliyaagan woygidi ammanii?

⁴ Hara asay, paxa deꞌiyaageetussi ashoy hayqqiyo wode hayqqenna shemppoy deꞌees giidi ammanees. Issi uri suure deꞌuwaa deꞌikko, shemppoy saluwaa woykko gannatiyaa gelees; shin mooro deꞌuwaa deꞌikko, siꞌooliyan pirddettees geetettees. Darotoo asay ha qofaa woga ammanuwaara walakkees. Leemisuwau, issi uri hayqqidoogaa eraadooniyan odiyo wode, issi issitoo he uri “hara alamiyaa biis” woykko “mayzzatukko biis” geetettees. Ha ammanoti ubbay, ashoy hayqqiyo wode hayqqenna shemppoy woykko ayyaanay deꞌees giyo qofan baasettidosona. Hegaa xeelliyaagan Geeshsha Maxaafay woygii?

SHemppuwaanne Ayyaanaa

5, 6. Geeshsha Maxaafay yootiyoogaadan shemppoy aybee?

⁵ Geeshsha Maxaafay shemppoy asa giddon deꞌiyaaba gidennan, he uraa ba huuphe gidiyoogaa yootees. Leemisuwau, Xoossay Addaama medhido wode, “bitanee paxa de7iya asa [“shemppo,” NW] gidiis.” (Doomettaabaa 2:7) Addaameyyo shemppoy imettibeenna; i ba huuphe shemppo, kumetta asa.

⁶ Hegaappe denddidaagan, shemppoy yelettiyoogaa nabbaboos. (Doomettaabaa 46:18) SHemppoy maanaunne xoomanau danddayees. (Wogaabaa 7:20; Mazamure 35:13) SHemppoy yeekkeesinne hitees. (Ermmaasa 13:17; Yoonaasa 2:7) SHemppuwaa wuuqqanau, yedettanaunne biratan qachanau danddayettees. (Zaarettido Wogaa 24:7; Mazamure 7:5; 105:18) Ha xiqisetun deꞌiya koyro qaalaa, issi issi Geeshsha Maxaafati “shemppo” giyo wode harati qassi “paxa deꞌiyaaba,” “mereta” woykko “asa” giya qaalata goꞌettoosona. Ubbaa birshshettaykka issi mala.

7. SHemppoy hayqqana danddayiyoogaa bessiya Geeshsha Maxaafaa xiqiseti awugeetee?

⁷ SHemppoy he ura gidiyo gishshau, issi uri hayqqiyo wode shemppoy hayqqees. Hizqqeela 18:4y: “Nagaraa oottiya shemppoi i bau haiqqana” yaagees. Qassi Oosuwaa 3:23y: “He hananabaa yootiyaagee odiyoogaa siyenna asi [shemppoy] ooninne asaa giddoppe shaahettidi xayo” yaagees. Yaatiyo gishshau, shemppoy, ashoy hayqqiyo wode hayqqennan attiyaaba gidenna.

8. Asaa ayyaanay aybee?

⁸ Ayyaanay shemppuwaara issi mala gidenna. Asaa ayyaanay asay deꞌuwan oottiyoobaa oottanaadan danddayissiya deꞌo wolqqaa. Ayyaanay korintte mala. Korinttee amppuulee pooꞌuwaa immanaadan oottana danddayees shin, barkka pooꞌuwaa immana danddayenna. Hegaara issi mala ogiyan, nu ayyaanaykka nuuni xeellanaadan, siyanaadaaninne qoppanaadan danddayissees. SHin ayfee, hayttaynne guuggee baynnan ayyaanay barkka hegaadan oottana danddayenna. Geeshsha Maxaafay: “Eta shemppoi [“ayyaanay,” NW] kiyiyo wode, eti biittau simmoosona; eta halchchoi ubbai he gallassikka atti aggees” yaagiyoy hegaassa.—Mazamure 146:4.

9. SHemppoynne ayyaanay waanokkonaa?

⁹ Yaatiyo gishshau, Geeshsha Maxaafay yootiyoogaadan shemppoy gidin ayyaanay gidin, asi hayqqiyo wode ashuwaappe shaahettidi ayyaana alamiyan deꞌiyaaba gidenna.

Hayqqidaageeti Deꞌiyo Hanotaa

10. Geeshsha Maxaafay hayqqidaageeti deꞌiyo hanotaabaa woygii?

¹⁰ Yaatin, hayqqidaageeti ayba hanotan deꞌiyoonaa? Asaa medhidaagee Yihoowa gidiyo gishshau, nuuni hayqqiyo wode waaniyaakkokka i erees. A Qaalay, hayqqidaageeti deꞌon deꞌennaagaa, siyanau, xeellanau, haasayanau woykko qoppanau danddayennaagaa tamaarissees. Geeshsha Maxaafay kaallidi deꞌiyaagaadan gees:

• “Haiqqidaageeti aibanne erokkona.”—Eranchchaa 9:5.

• “Eta siiqoi, ixoinne qanaatee ubbai etaara issippe xayiichchiis.”—Eranchchaa 9:6.

• “Neeni baanasan duufuwan oosoi, woikko halchchoi, woikko eri, woikko aadhdhida eratetti baawa.”—Eranchchaa 9:10.

11. Addaamee nagaraa ootti simmin Yihooway ayyo woygidee?

¹¹ Geeshsha Maxaafay nu mayzza aawaa Addaamebaa woygiyaakko qoppa. Yihooway Addaama “biittaa baanaappe” giigissiis. (Doomettaabaa 2:7) Addaamee Yihoowa higgiyaa naagidaba gidiyaakko, i merinau ufayssan saꞌaa bolli deꞌana shin. Gidikkokka, Addaamee Yihoowa higgiyaa azazettibeenna; yaatiyo gishshau, a bolli hayqoy pirddettiis. Addaamee hayqqidi awu biidee? Xoossay ayyo: “Neeni biittaappe ekettadasa; neeni baana; neeni baanau simmana” yaagiis.—Doomettaabaa 3:19.

12. Addaamee hayqqidi waanidee?

¹² Yihooway Addaama baanaappe medhanaappe kase i awan deꞌii? I awaaninne deꞌenna. I deꞌon deꞌenna. Yaatiyo gishshau, Yihooway Addaamee “baanau simmana” giyo wode, Addaamee simmidi baanaadan, deꞌoy baynnaagaa gidees gaanau koyiis. Addaamee hegaappe simmin ayyaana alamiyan deꞌibeenna. I mayzzatu ayyaanaa alamiyau ‘pinnibeenna.’ I saluwaa woykko siꞌooliyaa bibeenna. I simmidi deꞌoy baynnaagaa gidiis; deꞌiyoogaa essiis.

13. Asaa gidin doꞌatakka gidin hayqqiyo wode waaniyoonaa?

¹³ Asaa naatu ubbaa hanotay hegaara issi malee? Ee, issi mala. Geeshsha Maxaafay: “[Asaa gidin, doꞌata gidinkka] naa77aikka issi sohuwaa boosona; naa77aikka biittaappe merettido gishshau, biittau simmoosona” yaagidi qonccissees.—Eranchchaa 3:19, 20.

14. Hayqqidaageetuyyo ayba hidooti deꞌii?

¹⁴ Hayqqidaageeta gannate saꞌan denttanau Xoossay qaalaa gelidoogaa Geeshsha Maxaafay yootees. (Yohaannisa 5:28, 29; Oosuwaa 24:15) SHin hegee hananay sinttappe. Ha wodiyan eti hayquwan xiskkidosona. (Yohaannisa 11:11-14) Eti nuna maaddanau woykko qohanau danddayenna gishshau, nuuni etau yayyanau woykko goynnanau koshshenna.

15, 16. Hayqqidaageeti tumuppe hayqqibookkona giidi asay ammananaadan oottanau Seexaanay maliyoy ayba ogiyaanee?

¹⁵ Nuuni tumuppe hayqqokko yaagiya qofay Seexaanaa Dabloosi aassiyo worddo. He wordduwaa asaa ammanttanau, inne daydanttati harggiyaunne hara metuwau gaasoy hayqqidaageetu ayyaanaa yaagidi asay qoppanaadan oottanau baaxetoosona. Issi issi metuwau gaasoti daydanttata gidiyoogee tuma. Issi issi metuwau ayyaana wolqqati gaaso gidennaageekka tuma. SHin, hayquwan xiskkidaageeti nuna qohana danddayoosona giyoogee tuma gidenna.

¹⁶ Geeshsha Maxaafay hayqqidaageetubaa yootiyoobay bala giidi asay qoppanaadan daydanttati oottiyo hara ogeekka deꞌees. Eti, asay hayqqidaageeta beꞌidobadan woy eta haasayissidobadan qoppanaadan oottiyoogan cimmoosona. Daydanttati hegaa ajjuutan, aymuwan, moytilliyaa xeesiyaageetu baggaara woykko hara ogiyan oottoosona. Gidikkokka, asay haasayissiyoy hayqqidaageeta gidennan, hayqqida asaa milatidi qoncciya daydanttata. Moytilliyaa xeesiyaageetanne hayqqidaageeta oychiyaageeta Yihooway minttidi ixxiyoy hegaassa.—Zaarettido Wogaa 18:10-12; Zakkaariyaasa 10:2.