Nuuni Xoossaa Oychana Koshshii?

ISSI issi asay Xoossaa oychiyoogee bala gees. Issi issibay hananaadan woy hanennaadan Xoossay ayssi paqqadiyaakko oychiyoogee a bonchennaagaa bessiyaaba giidi eti qoppoosona. Ne qofaykka hegaa malee?

Yaatikko, loꞌꞌo asati daroti issi issibaa gaasuwaa Xoossaa oychidoogaa eriyo wode neeni garamettennan aggakka. Eti oychido, kaallidi deꞌiya oyshata akeeka.

Ammanettida asa gidida Iyyoobi hagaadan giis: “Iita asati aissi paxa de7iyoonaa? Eta baree aissi aduqqii? Eta wolqqaikka aissi dari dari bii?”—Iyy. 21:7.

Hananabaa yootiya, ammanettida Imbbaaqoomi hagaadan giis: “Ha makkalanchchata aibissi co77u gaada xeellai? Nagaranchchati banttappe xilliya asata mittiyo wode aibissi co77u gai?”—Imb. 1:13.

Yesuus Kiristtoosi hagaadan giis: “Ta Xoossau, ta Xoossau, tana aissi aggadii?”—Maa. 27:46.

Ha xiqisetu yuushuwan deꞌiya qofaa neeni nabbabiyo wode, hegaa mala oyshaa oychido gishshau Xoossaa Yihoowaya hanqqettibeennaagaa akeekaasa. I danddayidoogee garamissenna. Leemisuwau, nu payyatettau maaddiyaabaa immanaadan Xoossaa oychiyoogee a kawushshiyaaba gidenna. I hegaa nuussi ufayssan immees. (Maa. 6:11, 33) Hegaadankka, i nuuni loꞌꞌobaa qoppanaadan maaddiyaabaa yootees. (Pili. 4:6, 7) Yesuusi ba erissiyo ashkkarata, “Woossite; intte ekkana” yaagiis. (Maa. 7:7) He xiqisiyaa yuushuwan deꞌiya qofay, aquwaaban koshshiyaabaa xalla gidennan, keehi koshshiya oyshatuyyookka zaaro demmana danddayiyoogaa Yesuusi yootidoogaa bessees.

Neeni Xoossaa oychana danddayiyaakko, kaallidi deꞌiya oyshatuppe awugaa oychanau koyay?

• Ta deꞌuwau halchidobi deꞌii?

• Taani hayqqiyo wode waaniyaanaa?

• Taani waayettanaadan aybissi paqqadadii?

“Xoossaa maxaafa ubban Xoossaa Ayyaanai” deꞌiyo gishshau, Xoossay ba Qaalaa Geeshsha Maxaafan he oyshatu zaaruwaa yootees. (2 Xim. 3:16) Issoti issoti qommoora deꞌiya oyshata aybissi oychiyaakko, qassi Geeshsha Maxaafay hegaa woygi zaariyaakko ane beꞌoos.