SHaahuwaa 6

Iyyoobi Ba Suuretettaa Naagiis

Iyyoobi Xoossaa sinttan suure gidiyoogaa xeelliyaagan Seexaanay oyshaa denttiis; shin Iyyoobi Yihoowayyo ammanettidi deꞌiis

WOLQQAAMA paacee gakkiyo wodenne azazettiyoogee aquwaaban aybanne goꞌꞌennaba milatiyo wode, Xoossaayyo ammanettidi deꞌiya asi deꞌanee? Iyyooba giyo bitaniyaara gayttidaagaana ha oyshay denddiis; hegaa zaaroykka beettiis.

Israaꞌeeleti Gibxxen deꞌiyo wode, Abrahaama dabbo gidida Iyyoobi ha wodiyan Araba geetettiya biittan deꞌees. He wode, kiitanchati saluwan Xoossaa sinttan shiiqidosona; Seexaanaykka etaara shiiqiis. Yihooway he shiiquwan, ammanettida ba ashkkaraa Iyyooban ammanettiyoogaa yootiis. Yihooway Iyyoobadan suure gidida hara asi baynnaagaa yootiis. SHin Seexaanay, Iyyoobi Xoossaayyo oottiyoy Xoossay a anjjidonne naagido gishsha xallaassa yaagiis. Seexaanay, Iyyoobau deꞌiyaabay ubbay xayikko, i Xoossaa qanggana yaagiis.

Seexaanay koyro Iyyooba aquwaanne naata xayssanaadan, hegaappe simmin a payyatettaa qohanaadan Xoossay paqqadiis. Iyyoobi he ubbabaa Seexaanay oottiyoogaa akeekibeenna gishshau, he paacee ba bolli gakkanaadan Xoossay ayssi paqqadidaakko eribeenna. Gidikkokka, Iyyoobi Xoossaa mule qanggibeenna.

Heezzu worddo laggeti Iyyoobakko yiidosona. Iyyooba maxaafan xaafettida daro haasayatun, he asati Iyyoobi qosan oottido nagarau Xoossay qaxxayiiddi deꞌiyoobadan balan a ammanttanau malidosona. Xoossay ba ashkkaratu oosuwan ufayttenna; qassi eta ammanenna yaagidikka haasayidosona. Iyyoobi eta bala qofaa maayibeenna. Iyyoobi hayqqana gakkanaashin ba suuretettaa naaganaagaa ammanettidi qonccissiis!

SHin Iyyoobi suure gididi deꞌiyoogaa qonccissanau keehippe qoppidoogan baliis. Eta palamaa ubbaa ezggiiddi takkida Elihu giyo issi yelagay, Iyyoobinne a worddo laggeti balidobaa yootiis. Ubbaappe bollaara haarana bessiyay Xoossaa Yihoowa gidiyoogaa qonccissiyoogee issi ura suuretettaa qonccissiyoogaappe aadhiyoogaa Iyyoobi akeekibeenna gishshau, Elihu a seeriis. Elihu Iyyooba worddo laggetakka minttidi seeriis.

Hegaappe simmin, Xoossaa Yihooway Iyyooba qofaa suurissanau a haasayissiis. Yihooway maalaalissiya daro meretatubaa yootidi, Xoossaa gitatettaara gatti xeelliyo wode asay ay keena guuttakko Iyyoobi qoppanaadan oottiis. Xoossay a qofaa suurissanau yootidobaa Iyyoobi ashkketettan siyiis. Yihooway “maarotainne qaretai kumidoogaa” gidiyo gishshau, Iyyooba pattiisinne kaseegaappe naaꞌꞌu kushe dariya aquwaanne tammu naata immidi a anjjiis. (Yaaqooba 5:11) Iyyoobi wolqqaama paacee gakkishinkka Yihoowa sinttan ba suuretettaa naagidi deꞌiyoogan, asaa naati paacee gakkiyo wode Xoossau ammanettokkona giya Seexaanaa mootuwau bessiya zaaruwaa immiis.

—Iyyooba maxaafan baasettidaagaa.

◼ Seexaanay Iyyooba xeelliyaagan ayba mooto denttidee?

◼ Iyyoobi Yihoowa sinttan ba suuretettaa naagidoogan aybi qonccidee?

SHaahuwaa 7

Xoossay Israaꞌeelata Aylletettaappe Kessiis

Yihooway Gibxxe biittan boshaa yeddiis; Muusee Israaꞌeelata he biittaappe kaalettidi kessiis. Xoossay Muuse baggaara Israaꞌeeletuyyo Higgiyaa immiis.

ISRAAꞌEELATI ishalidinne corattidi daro layttau Gibxxen deꞌidosona. Gidoppe attin, ooratta kawoy haariyoogaa doommiis. He kawoy Yooseefa erenna. Israaꞌeelati corattiyoogan yayyida, meqetti baynna he kawoy, eta aylle oottiisinne yelettiya attuma naꞌa ubbaa Nayle SHaafan olanaadan azaziis. SHin issi xala aayyiyaa ba gacino naꞌaa keeshiyan yeggada ceeccaa giddon wottada ashshaasu. Paaroona naꞌiyaa he naꞌaa demmada Muusa gaada sunttaasunne Gibxxe kawuwaa son dichaasu.

Muuseyyo layttay 40 gidido wode, Israaꞌeele asa gidida issi aylliyaa Gibxxe asa gidida issi kaabbuwaappe ashshana giidi i metuwan geliis. Muusee betedan deꞌido haaho biitti baqatiis. Muuseyyo layttay 80 gidido wode, Gibxxe biidi, Paarooni Xoossaa asaa yeddana mala oychanaadan Yihooway a kiittiis.

Paarooni yeddanau mule koyibeenna. Yaatiyo gishshau, Xoossay Gibxxe biittan tammu boshaa yeddiis. Kaalliya boshay gakkennaadan oottana bessiyaabaa yootanau Muusee Paaroona sintti biido paydo ubban, Paarooni Muuseenne a Xoossaa Yihooway yootiyoobaa siyennan ixxiis. Wurssettan, Yihoowassi azazettidi yarshshido dorssaa suuttaa bantta keettaa qosilettaa tiyida asaa soonippe attin, tammantta boshay Gibxxe biittaa ubban bayra yelettida ubbaa woriis. Bayra ubbaa woranaadan kiitettida Xoossaa kiitanchay suuttay tiyettido keettaa aggi aadhiis. Israaꞌeelati maalaalissiya ogiyan attido he hanotaa hassayiyo Paasikaa giyo baalaa he wodeppe doommidi layttan layttan bonchoosona.

Paarooni ba bayra naꞌay hayqqi simmin, Muuseenne Israaꞌeeleti ubbay Gibxxeppe baanaadan azaziis. Sohuwaara daro asay Gibxxeppe kiyanaadan giigissiyoogaa doommidosona. SHin Paarooni ba qofaa laammiis. I daro olanchatanne paraa gaareta ekkidi eta yedettiis. Zoꞌo Abbaa doonan Israaꞌeeletussi kessi ekkiyoosi baynnaba milatiis. Yihooway Zoꞌo Abbaa shaakkidi, haattay godadan yaaranne haara eqqin mela biittaara Israaꞌeeleti pinnanaadan oottiis! Gibxxeti eta kaallidi eesuwan gelido wode, haattay ba kase sohuwaa simmidi Paaroonanne a olanchata mittanaadan Xoossay oottiis.

Guyyeppe, Israaꞌeeleti Siinaa Deriyaa matan kambbidaashin, Yihooway etaara maachaa maacettiis. Xoossay Muusa gaannatiyaagaa ootti goꞌettidi, deꞌo macara ubban eti naaguwaanne kaaletuwaa demmanaadan Israaꞌeeletussi higgiyaa immiis. Israaꞌeelati Xoossa haaruwau ammanettidi haarettiyaaba gidikko, Yihooway etaara gidana; qassi eta haratuyyo anjjo oottana.

Gidikkokka, Israaꞌeelatuppe daroti ammanennaageeta gidiyoogan Xoossaa yiilloyidosona. Yaatiyo gishshau, Yihooway he yeletay 40u layttau bazzuwan toylattanaadan oottiis. Hegaappe simmin, Muusee suure asa gidida Yaasa ba sohuwan sunttiis. Wurssettan, Israaꞌeeleti Xoossay Abrahaamayyo qaalaa gelido biittaa gelanau giigidosona.

—Kessaaban; Wogaaban; Qoodaaban; Zaarettido Wogan; Mazamure 136:10-15n; Oosuwaa 7:17-36n baasettidaagaa.

◼ Xoossay Israaꞌeeleta aylletettaappe kessanau Muusa waatidi goꞌettidee?

◼ Israaꞌeeleti Paasikaa bonchiyoy aybissee?

◼ Yihooway Israaꞌeeleta Gibxxe aylletettaappe waatidi kessidee?