SHaahuwaa 18

Yesuusi Maalaalissiyaabaa Oottiis

Yesuusi Kawo gidiyo wode ba wolqqaa waati goꞌettanaakko ba oottido maalaalissiyaaban qonccissiis

YESUUSI hara asi oottana danddayennabaa oottanaadan Xoossay au wolqqaa immiis. Yesuusi darotoo, cora asaa sinttan keehippe maalaalissiya darobaa oottiis. He maalaalissiya oosoti polo gidenna asaa naati mule xayssana danddayenna morkketanne xubeta xayssiyo wolqqay Yesuusau deꞌiyoogaa qonccissidosona. Issi issi leemisota beꞌa.

Namisaanne saamuwaa. Yesuusi koyro oottido maalaalissiya oosoy haattaa ayfe woyne eessau laammiyoogaa gujjees. Hara naaꞌꞌu wodetun, shaꞌan qoodettiya namisettida asaa guutta oyttaanne moliyaa goꞌettidi miziis. He naaꞌꞌu wodetunkka, qumay ubba asau gididi palahiis.

Harggiyaa. Yesuusi “hargge ubbaappenne saho ubbaappe” asaa pattiis. (Maatiyoosa 4:23) Yesuusi qooqeta, tulleta, inchirichay oyqqidoogeetanne yiicotidi bana doganaadan oottiya harggiyaa harggiyaageeta pattiis. I wobbeta, bollay silidoogeetanne bollan pacay deꞌiyoogeeta pattiis. I pattanau danddayibeenna sahoy baawa.

Iita carkkuwaa. Yesuusinne i erissiyo ashkkarati Galiila Abbaa bolli wolwoluwan biishin, wolqqaama gotee denddiis. Erissiyo ashkkarati yayyidosona. Yesuusi gotiyaakko simmidi: “Co77u ga,” “Woppu ga” giis. He wode ubbabaykka woppu giis. (Marqqoosa 4:37-39) Hara wode, i wolqqaama beetay deꞌishin haattaa bolli hemettiis.—Maatiyoosa 14:24-33.

Iita ayyaanata. Iita ayyaanati asaa naatuppe keehi wolqqaama. Daro asati Xoossaa morkke gidida ha iitati banttana oyqqiyo wode naxa kiyana danddayokkona. Gidikkonne, Yesuusi iita ayyaanati oyqqido asatuppe kiyanaadan darotoo azazin, eti kiyidosona. I he ayyaanata yayyibeenna. Hegaappe dumma gidida ogiyan, eti ayyo deꞌiya maataa eridi ayyo yayyidosona.

Hayquwaa. Asaa naati xayssana danddayenna morkkee, hayqoy ‘ubbaappe wurssetta morkke’ geetettidoogee bessiyaaba. (1 Qoronttoosa 15:26) SHin Yesuusi hayqqidaageeta denttiis; issi amꞌꞌee yelaga naꞌaanne bantta naꞌiyaa hayqqin kayyottiyaageetu yelaga naꞌiyookka denttiis. Hayqqoosappe oyddu gallassay aadhidaba gidikkonne, yeekkiya daro asaa sinttan ba siiqo laggiyaa Alꞌꞌaazara Yesuusi keehippe maalaalissiya hanotan denttiis! Yesuusa keehippe morkkiyaageetuura ubbay i he maalaalissiyaabaa polidoogaa ammanidosona.—Yohaannisa 11:38-48; 12:9-11.

Yesuusi maalaalissiya oosota ubbaa oottidoy aybissee? Hegaa bollan qassi, i denttido asati wurssettan hayqqibookkonaa? Ee hayqqidosona; shin Yesuusi oottido maalaalissiyaabay daro wodiyau goꞌees. He maalaalissiyaabati Masiyaa Kawuwaa haaruwaa xeelliyaagan odettida ufayssiya hiraaga ubbay polettanaagaa qonccissoosona. Xoossay sunttido Kawoy namisaanne saamuwaa, harggiyaa, iita carkkuwaa, iita ayyaanata woykko hayquwaa xayssana danddayiyoogaa siranau koshshenna. He ubbabaa oottiyo wolqqaa Xoossay ayyo immidoogaa i kasetidi bessiis.

—Maatiyoosa, Marqqoosa, Luqaasanne Yohaannisa maxaafan baasettidaagaa.

◼ Yesuusi namisaanne saamuwaa, harggiyaa, iita carkkuwaa, iita ayyaanatunne hayquwaa bolli wolqqay deꞌiyoogaa waatidi bessidee?

◼ Yesuusi oottido maalaalissiyaabati i sinttappe saꞌaa haariyo wode hananabaa ay malaatiyoonaa?

SHaahuwaa 19

Yesuusi Alame Ubban Polettiyaabaa Yootiis

Yesuusi kawo gididi qoncciyo wodiyaabaanne alamiyaa wurssettau malaata gidiyaabaa yootiis

DABIRA ZAYTE deriyaa bollan uttidi, Yerusalaamenne beeta maqidasiyaa duge xeelliiddi, Yesuusi kiittidoogeetuppe oyddati banttarkka he malaatatuppe amaridaageetubaa a oychidosona. Yerusalaame beeta maqidasee xayanaagaa Yesuusi etayyo yootiis. Hegaappe kase etayyo ‘wodiyaa wurssettaabaa’ yootiis. (Maatiyoosa 13:40, 49) I kiittidoogeeti he wode a: “Ne yuussaayyoonne wodiyaa wurssettaayyo malaatai aiba gidanee?” yaagidi oychidosona.—Maatiyoosa 24:3.

Yesuusi he oyshaa zaariyo wode, Yerusalaamee xayanaappe kase aybi hananaakko yootiis. SHin i yootidobay he wode hanettiyaabaappekka aadhiyaabaa oyqqiis. I yootidobay hegaappe simmin kumetta alamiyan aahuwan polettiyaaba. Yesuusi malaata gidiya, alamiyan polettana dantto hanotata kasetidi yootiis. He malaatati Yesuusi saluwan Kawo gididi qoncciyoogaa doommidoogaa saꞌan deꞌiya asaa akeekissoosona. Hara baggaara, he malaatati daro wodiyau naagido Mase Kawotettaa Kawo oottidi Xoossaa Yihooway Yesuusa sunttidoogaa qonccissoosona. He malaatati he Kawotettay mata wodiyan iitatettaa xayssidi, asaa naatuyyo tumu sarotettaa ehaanaagaa qonccissoosona. Yaatiyo gishshau, Yesuusi kasetidi yootidobay wodiyaa wurssettaa, giishin haꞌꞌi deꞌiya haymaanootee, polotikaynne deretettaa duussay xayin oorattaa siraatay doommanaagaa malaatees.

Yesuusi Kawo gididi saluwan qoncciyo wode saꞌan hananabaa yootiiddi, alame yuushuwan olay, koshay, wolqqaama biittaa qaattaynne wurssiya harggee deꞌanaagaa yootiis. Makkalay darana. Yesuusi erissiyo tumu ashkkarati Xoossaa Kawotettaa mishiraachuwaa saꞌa ubban sabbakana. Ha ubbabay hagaappe kase mule hani erenna ‘iita waayiyan’ kuuyettana.—Maatiyoosa 24:21.

Iita waayee matattidoogaa Yesuusa kaalliyaageeti waati erana danddayiyoonaa? Yesuusi, “balasiyo giyo mitteeppe akeekite” yaagiis. (Maatiyoosa 24:32) Balasiyaa mittaa hayttay aaciyo wode bonee matattidoogaa asay akeekees. Hegaadan, Yesuusi kasetidi odido ubbabay issi wode polettiyoogee, wurssettay matattidoogaa akeekanaadan oottiya malaata. Aawaappe attin ooninne iita waayee doommana gallassaanne saatiyaa erenna. Hegaa gishshau, Yesuusi ba erissiyo ashkkarata: “He wodee aude gidanaakko, intte erenna gishshau, naagettite” yaagidi zoriis.—Marqqoosa 13:33.

—Maatiyoosa shemppo 24⁠ninne 25n; Marqqoosa shemppo 13n; Luqaasa shemppo 21n baasettidaagaa.

◼ Yesuusi kiittidoogeeti loytti eranau koyidobay aybee?

◼ Yesuusi yootido malaataa birshshettay aybee? He malaatati waani polettiyoonaa?

◼ Yesuusi ba erissiyo ashkkaratuyyo ayba zore immidee?