SHaahuwaa 22

Kiitettidaageeti Xalatettan Sabbakidosona

Yedetay deꞌishinkka Kiristtaane gubaaꞌee eesuwaara dicciis

YESUUSI saluwaa bi simmin tammu gallassappe guyyiyan, i erissiyo ashkkaratuppe 120 gidiyaageeti 33 M.L., Ayhudatu Baalaa PHenxxaqosxxe wode, Yerusalaamen issi keettan issippe shiiqidosona. Gotiyaadan guummiya gunttay akeekennan eti deꞌiyo keettaa kumiis. Maalaalissiya hanotan, erissiyo ashkkarati kase erenna qaalaa haasayiyoogaa doommidosona. Ha oorattabay hanidoy ayba gaasuwaanee? Xoossay erissiyo ashkkaratussi geeshsha ayyaanaa immido gishshataassa.

Daro biittaappe baalaa bonchanau yiida daro asay karen deꞌees. He asati bantta qaalaa Yesuusi erissiyo ashkkarati geeshshidi haasayiyoogaa siyidi garamettidosona. PHeexiroosi hanidabaa qonccissiiddi, Yuuꞌeela hiraagaa yootiis. He hiraagay, Xoossay ba ayyaanaa ‘gussanaagaanne’ hegaa ekkiyaageeti maalaalissiya imotaa demmanaagaa yootees. (Yuu7eela 2:28, 29) Geeshsha ayyaanaa baggaara demmido ha wolqqaama naqaashay keehippe koshshiya laamee oosettidoogaa, giishin Xoossay Israaꞌeeleta aggidi ooratta eqqida Kiristtaane gubaaꞌiyan ufayttiyoogaa qonccissees. Xoossaa ufayssiya ogiyan ayyo oottana koyiyaageeti Kiristtoosa kaallana bessees.

Gidoshin, yedetay wolqqaamiis; morkketi qassi erissiyo ashkkarata qasho keettan yeggidosona. SHin Yihoowa kiitanchay qamman qasho keettaa kariyaa dooyiis; qassi erissiyo ashkkarati sabbakiyoogaa aggennaadan yootiis. Saꞌay wonttiyo wode eti kiitanchay giidoogaadan oottidosona. Eti beeta maqidasiyaa gelidi, Yesuusabaa mishiraachuwaa yootiyoogaa doommidosona. Eta ixxiya haymaanootiyaa asati yiillotidi, eti sabbakiyoogaa agganaadan azazidosona. Kiitettidaageeti xalatettan: “Nuuni asau azazettanaappe Xoossau azazettanau bessees” yaagidi zaaridosona.—Oosuwaa 5:28, 29.

Yedetay yaa gujjiis. Issi issi Ayhudati Xoossaa cayiis giidi, erissiyo ashkkaraa Isxxifaanoosa shuchan caddidi woridosona. Xarsseese Saaꞌoola giyo issi yelagay, isxxifaanoosa woriyoogan maayidi, eqqidi xeelliis. Hegaappe simmidi, i Kiristtoosa kaalliya ubbaa qachanau Damasqqo biis. Saaꞌooli biiddi ogiyan deꞌishin a yuushuwan saluwaappe poꞌoy poꞌiis; qassi: “Saa7oolaa Saa7oolaa, aissi tana waissai woykko yedettay?” yaagiya cenggurssay siyettiis. Poꞌuwaappe denddidaagan ayfee qooqido Saaꞌooli: “Neeni oonee?” yaagidi oychiis. He cenggurssay: ‘Taani Yesuusa’ yaagidi zaariis.—Oosuwaa 9:3-5.

Heezzu gallassappe guyyiyan Yesuusi Hanaaniyaa giyo erissiyo ashkkaraa Saaꞌoola ayfiyaa pattanaadan kiittiis. Saaꞌooli xammaqettidi, Yesuusabaa xalatettan sabbakiyoogaa doommiis. Saaꞌooli guyyeppe kiitettida PHauloosa geetettiis; qassi Kiristtaane gubaaꞌiyan mishettidi oottiyaagaa gidiis.

Yesuusi erissiyo ashkkarati Xoossaa Kawotettaa mishiraachuwaa Ayhudatunne Samaaretu xallaassi sabbakiiddi takkidosona. He wode, Xoossau yayyiya Rooma mato halaqaa Qornneliyoosassi issi kiitanchay PHeexiroosakko asa kiittanaadan yootiis. PHeexiroosi haratuura gididi Qornneliyoosassinne a soo asaassi sabbakiis. PHeexiroosi haasayishin, Ayhuda gidenna, ammaniya he asatu bolli geeshsha ayyaanay wodhiis; qassi eti Yesuusa sunttan xammaqettana mala PHeexiroosi yootiis. Asa zeretta ubbau merinaa deꞌo ogee he wode dooyettiis. Gubaaꞌee mishiraachuwaa darosan sabbakanau giigiis.

—Oosuwaa 1:1–11:21n baasettidaagaa.

◼ PHenxxaqosxxe Baalaa wode aybi hanidee?

◼ Yesuusi erissiyo ashkkarati sabbakiyo wode eta morkketi waatidonaa?

◼ Ubba asayyo merinaa deꞌuwaa ogee dooyettidoy ayba ogiyaanee?

SHaahuwaa 23

Mishiraachoy Aahuwan Sabbakettiis

PHauloosi sabbakiyo oosuwau markkabiyaaninne tohuwan biis

PAULOOSI Kiristtaane gidi simmidi, Xoossaa Kawotettaa mishiraachuwaa ufayttidi sabbakiis; issi wode yedettiyaagaa gidida a, hegaa gaasuwan darotoo wolqqaama yedetay gakkiis. Ha daafuri baynna kiitettidaagee, doomettan Xoossay asaa naatussi halchidobaa poliya Xoossaa Kawotettaabaa mishiraachuwaa sabbakanau darosaa biis.

PHauloosi ba koyro sibikate hemetan, yelettoosappe doommidi tohoy silido issi bitaniyaa Lisxxiran pattiis. Cora asay shiiqidi bantta qaalaa xoqqu oottidi, PHauloosinne aara issippe sabbakiya Barnnaabaasi xoossa yaagidosona. He naaꞌꞌu asati asay etassi yarshshana hanishin diggidosona. Gidikkokka, guyyeppe PHauloosa morkketi he asata denttettin, eti PHauloosa shuchan caddidi, hayqqidaba milatin aggidi biidosona. PHauloosi hegaappe attidi, guyyeppe erissiyo ashkkarata minttettanau he katamaa simmidi biis.

Ayhuda gidenna ammaniyaageeti Muuse higgiyaappe issota issota naagana bessees giidi Ayhuda gidida issi issi Kiristtaaneti palamettidosona. PHauloosi he yohuwaa giigissanau Yerusalaamen deꞌiya kiitettidaageetukkonne cimatukko biis. He asati Geeshsha Maxaafaa akeekan pilggiyoogaaninne Xoossaa geeshsha ayyaanaa kaaletuwan, eeqaappe, suuttaa uyiyoogaappe, sulettida mehe asho miyoogaappenne shaaramuxiyoogaappe haakkanaadan zoridi dabddaabbiyaa xaafidosona. Hegaa mala azazoti ‘koshshiyaageeta;’ shin he azazota polanau Muuse Higgiyaa naagana koshshenna.—Oosuwaa 15:28, 29.

PHauloosi ba naaꞌꞌantto sibikate hemetan, ha wodiyan Giriiken deꞌiya Beeriyaa giyoosaa biis. Yan deꞌiya Ayhudati PHauloosi yootidobay tuma gidiyoogaa eranau Geeshsha Maxaafaa ubbatoo pilggiyoogan qaalaa ufayssan ekkidosona. He wodekka a bolli yedetay denddin, he sohuwaappe Ateena biis. PHauloosi hiillaa, akeekaanne ammanttiyaaba goꞌettiyoogan leemiso gidiya ogiyan Ateenan deꞌiya erancha asatussi loꞌꞌo haasayaa haasayiis.

Heezzantto sibikate hemetaappe simmin, PHauloosi Yerusalaame biis. Yan i beeta maqidasiyaa biidaashin, issi issi Ayhudati PHauloosa woranau koyidi wocamaa denttidosona. Rooma wotaaddarati kelttiyaa gelidi, PHauloosa qoridi oychidosona. PHauloosi Rooma biitta asa gidiyoogaadan, Rooma asa gidida, biittaa ayssiya Pilikisa sintta shiiqidi, a mootidobau guyyeppe zaaruwaa immiis. Ayhudati PHauloosa mootiyoobau naqaasha shiishshana danddayokkona. Pilikisa sohuwan haariya, Rooma asa gidida Pisxxoosi Ayhudatussi aattidi immenna mala PHauloosi: “Qeesaari tabaa pirddo gaada oichchais” yaagiis. Pisxxoosi: “Qeesaarakko baasa” yaagidi zaariis.—Oosuwaa 25:11, 12.

Hegaappe simmin, PHauloosi shilootan eqqanau markkabiyan Xaaliyaa biis. Ogiyan markkabee meqqin, i balgguwaa Maltta giyo haruuruwan takkiis. Wurssettan i Roome gakkidi, keraa ekkido issi keettan naaꞌꞌu laytta deꞌiis. Ubbatoo mishettidi sabbakiya PHauloosi, wotaaddaray a naagiyaaba gidikkokka, bana oychanau yiya ubbaassi Xoossaa Kawotettaabaa sabbakiyoogaa aggibeenna.

—Oosuwaa 11:22–28:31n baasettidaagaa.

◼ Lisxxiran PHauloosi gedee silido bitaniyaa patti simmin aybi hanidee?

◼ Muuse Higgiyaa naagiyoogaa xeelliyaagan denddida oyshay ayba ogiyan zaaro demmidee?

◼ PHauloosi waanidi Roome biidee? Yan deꞌiiddi ay oottidee?