Kawotettaa Tumaa​—Ayyaanaabaa Qumaa Immiyoogaa

GEESHSHA MAXAAFAA tamaaree neeni aara issippe nabbabido xiqisiyaa birshshettaa akeekidi keehippe ufayttiyoogaa beꞌaasa. Qassi i, “Nuuni ha saꞌan Gannatiyan merinawu deꞌana danddayiyoogaa Geeshsha Maxaafay tamaarissees yaagay?” yaagees. Nenaara haggaaziya uri pashkki giidi, “Geeshsha Maxaafaappe ay akeekadii?” yaagees. Xinaatee maalaalettidi, “Hagaa taani hagaappe kase tamaarabeennaagee garamiyaaba!” yaagees. Amarida saaminttaappe kase Xoossaa sunttay Yihoowa gidiyoogaa i erido wode hegaa malabaa giidoogaa neeni hassayaasa.

Neeni hegaadan giida ura xannaꞌissa eray? Xoossaa asaappe daroti hegaadan giida ura xannaꞌissidosona. Nuuyyo imettida tumaa eraa imotay alꞌꞌoba gidiyoogaa akeekanaadan oottiya hegaa malabay daro gidenna. Ane issitoo qoppa, he imotaa neeni waata demmadii? Ha shaahuwan ha oyshaa pilggana. Xoossaa asay demmido ayyaanaabaa eray gujji gujji biido ogee Xoossaa Kawotettay beettiyaagaa keena qoncce gidiyoogaa bessiya naqaasha. Xeetu layttawu, he Kawotettaa Kawoy, Yesuus Kiristtoosi Xoossaa asay tumaa tamaaranaadan oottiis.