Kawotettaa Xoonuwaa Mishiraachoy Higgiyan Minni Eqqanaadan Oottiyoogaa

NEENI sooppe soo haggaazaydda poliseti haahuwaara yiyaageeta beꞌadasa. Neeni kaalliya keettaawaa haasayissishin, poliseti inttekko yiyoogaa nenaara haggaaziyaagee akeekido gishshawu, a qofay shaahettiis. Issi polisee inttekko gakkidi, “Sooppe soo biidi Geeshsha Maxaafaabaa yootiyaageeti inttenee? Nuuni asay inttena amassalin yiida!” yaagiis. Intte Yihoowa Markka gidiyoogaa shonggaara deꞌiya qaalan yooteeta. Hegaappe simmin aybi hananee?

Hegaa zaaroy intte biittan deꞌiya Yihoowa Markkatu taarikiyaara gayttidaba. Hegaappe kase intte biittan kawotettay Yihoowa Markkata waatidee? Intte biittan haymaanootiyaa asay ba koyiyoogaadan kaallii? Yaatikko, hegaadan hanidoy ne ishanttinne michontti aadhida unddenna layttawu ‘mishiraachoy higgiyan minni eqqanaadan oottanawu mootettido’ gishshataassa gidennan aggenna. (Pili. 1:7, NW) Neeni deꞌiyoy awaana gidinkka, Yihoowa Markkati higgiyan shatimmidobaa wotta dentta qoppiyoogee ammanuwan minnanaadan maaddiyaaba. Ha shaahuwan, he maalaalissiya taarikiyaappe amaridaagaa nuuni beꞌana. Nuuni hegaa mala keehi gitabaa mule oottana danddayenna gishshawu, shatimmidobay Xoossaa Kawotettay qoncci beettiyaaba gidiyoogaa maalaalissiya hanotan qonccissiyaaba!