Xoossay Asawu Halchidobay Aybee?

1. Xoossay asawu halchidobay aybee?

XOOSSAY asawu keehi loꞌꞌobaa halchiis. I Addaamanne Hewaano medhidi loꞌꞌiya gannatiyan wottiis. Xoossay eti naata yelanaadan, kumetta saꞌaa gannate oottanaadaaninne mehiyaa doꞌaa haaranaadan halchiis.—Doomettaabaa 1:28; 2:8, 9, 15; Wurssetta Qofaa 6 xeella.

2. (a) Xoossay ba halchidobaa polanaagaa nuuni waati eriyoo? (b) Merinaa deꞌuwaa xeelliyaagan Geeshsha Maxaafay woygii?

² Nuuni gannatiyan deꞌana gaada qoppa eray? Yihooway, “Taani halchchidobaakka taani oottana” yaagiis. (Isiyaasa 46:9-11; 55:11) Ee, i halchidobaa polana; qassi i hegaa oottennaadan aybinne teqqenna. Yihooway saꞌaa medhidoy halchuwaana. I “biittaa coo medhdhibeenna.” (Isiyaasa 45:18) I asay kumetta saꞌan deꞌanaadan koyees. Xoossay ay mala asay ha saꞌan deꞌanaadan koyii? Qassi ay keena wodiyawu deꞌanaadan koyii? Geeshsha Maxaafay, “Xilloti [woy, azazettiyaageeti] biittaa laattananne yan merinau de7ana” yaagees.—Mazamure 37:29; Ajjuutaa 21:3, 4.

3. Asay harggiyo gishshawunne hayqqiyo gishshawu, neeni woygada qoppana danddayay?

³ SHin ha wodiyan asay harggeesinne hayqqees. Darosan asay oletteesinne issoy issuwaa worees. Hegee Xoossay halchidoba gidenna. Yaanin, hanidabay aybee, aybissi? Hegaayyo zaaruwaa yootana danddayiyay Geeshsha Maxaafaa xalla.

XOOSSAA MORKKIYAA

4, 5. (a) Edene gannatiyan Hewaano shooshshan eqqidi haasayissiday oonee? (b) Ammanettiya uri waanidi kayso gidana danddayii?

⁴ Geeshsha Maxaafay “xalahe halaqaa woikko Seexaanaa” giyo morkkee Xoossaayyo deꞌiyoogaa yootees. Edene gannatiyan Seexaanay shooshshan eqqidi Hewaano haasayissiis. (Ajjuutaa 12:9; Doomettaabaa 3:1) I shooshshay haasayiyaaba milatissiis.—Wurssetta Qofaa 7 xeella.

⁵ Yaatin, Seexaanaa Dabloosa medhiday oonee? Xoossay Addaameyyoonne Hewaaniyyo saꞌaa giigissiyo wode saluwan deꞌiya issi kiitanchay guyyeppe bana Dabloosa oottiis. (Iyyooba 38:4, 7) Hegee waanidi hanana danddayii? Leemisuwawu, ammanettiya uri waanidi kayso gidii? I kayso gididi yelettibeenna. SHin i babaa gidennabaa amottees woy koyees. I hegaa aggennan qoppiyo wode, iitabaa oottanawu keehippe amottees. Qassi hanotay injjetiyo wode wuuqqees. Yaatiyoogan, bana kayso kessees.—Yaaqooba 1:13-15; Wurssetta Qofaa 8 xeella.

6. Issi kiitanchay waanidi Xoossaa morkke gididee?

⁶ He kiitanchaykka hegaadan haniis. Yihooway Addaamanne Hewaano medhi simmidi, eti naata yelanaadaaninne ‘saꞌaa kumanaadan’ yootiis. (Doomettaabaa 1:27, 28) He kiitanchay, ‘Asay ubbay Yihoowayyo goynniyoogaappe tawu goynnana!’ giidi qoppennan aggenna. I hegaabaa keehi qoppiyo wode, Yihoowabaa keehi amottiis. He kiitanchay asay bawu goynnanaadan koyiis. Hegaa gishshawu, i Hewaaniyyo wordduwaa yootidi o balettiis. (Doomettaabaa 3:1-5 nabbaba.) Yaatiyoogan, i Xoossaa morkkiyaa, Seexaanaa Dabloosa gidiis.

7. (a) Addaameenne Hewaana ayssi hayqqidonaa? (b) Nuuni ceeggiyoynne hayqqiyoy aybissee?

⁷ Addaameenne Hewaana Xoossaayyo azazettennan ixxidi mittaa teeraa miidosona. (Doomettaabaa 2:17; 3:6) Eti Yihoowa bolli nagaraa oottidi, Yihooway kasetidi yootidoogaadan hayqqidosona. (Doomettaabaa 3:17-19) Addaamenne Hewaani naatikka nagarancha gidiyo gishshawu, hayqqoosona. (Roome 5:12 nabbaba.) Eta naati nagarancha gididoy aybissakko akeekanawu, ane issi leemisuwaa beꞌoos. Zaꞌꞌida bashiyan buddeenaa tigiyoogaa qoppa. He bashiyan tigiyo buddeennan zaꞌuwaa malaatay kiyees. Addaamee Xoossaayyo azazettennan ixxido wode nagarancha gidiis. Nuuni Addaame naata gidiyo gishshawu, ubbaykka nagarancha woykko aagaadan nu bollikka “zaꞌuwaa” malaatay deꞌees. Ubbay nagarancha gidiyo gishshawu, ceeggoosinne hayqqoos.—Roome 3:23; Wurssetta Qofaa 9 xeella.

8, 9. (a) Seexaanay Addaameenne Hewaana ay ammananaadan koyidee? (b) Yihooway makkalanchata sohuwaara woribeennay aybissee?

⁸ Seexaanay Addaameenne Hewaana Xoossaayyo azazettennaadan oottiyoogan, Yihoowa bolli makkaliyoogaa doommiis. I Addaameenne Hewaana Yihooway worddancha, banttawu kehabaa amottennaagaanne iita ogiyan haariyaagaa giidi ammananaadan koyiis. Seexaanay asay oottana bessiyoobaa Xoossay etawu odana koshshennaagaanne suure woy suure gidennabaa Addaamessinne Hewaanissi kuuyana bessennaagaa yootiis giyoogaa mala. Yaatin, Yihooway ay oottanee? I makkalanchata woridi, he makkalaa xayssana danddayees. SHin hegaadan oottiyoogee Seexaanay worddancha gidiyoogaa bessii? CHii, bessenna.

⁹ Hegaa gishshawu, Yihooway makkalanchata sohuwaara woribeenna. SHin i asay asaa haaranaadan wodiyaa immiis. Hegee Seexaanay worddancha gidiyoogeenne Yihooway asaassi loꞌꞌobaa eriyoogee qonccanaadan oottiis. SHemppo 11n hegaabaa gujjidi tamaarana. SHin Addaameenne Hewaana kuuyidobaa xeelliyaagan neessi aybi siyettii? Eti Seexaanaa ammanidi Yihoowayyo azazettennan aggidoogee bessiyaabee? Addaameyyoonne Hewaaniyyo deꞌiyaabaa ubbaa immiday Yihoowa. I etawu wottiyoobi baynna deꞌuwaa, eti deꞌanawu keehi loꞌꞌiya sohuwaanne etawu ufayssiya oosuwaa immiis. Gidoppe attin, Seexaanay etawu loꞌꞌobaa mule oottibeenna. He wode neeni yan deꞌiyaakko, waatuutee?

10. Nuuni doorana bessiyo keehi koshshiyaabay aybee?

¹⁰ Ha wodiyan nuunikka dooriyo hegaa malabay deꞌees; hegee nu deꞌuwaara gayttidaba. Yihooway nuna haaranaadan dooridi, Seexaanay worddancha gidiyoogaa bessiyaabaa oottana danddayoos. Woy Seexaanay nuna haaranaadan doorana danddayoos. (Mazamure 73:28; Leemiso 27:11 nabbaba.) Ha alamiyan Xoossawu azazettiya asay keehi guutta. Ha alamiyaa haariyay Xoossaa gidenna. A gidana xayikko, yaatin oonee?

ALAMIYAA HAARIYAY OONEE?

11, 12. (a) Seexaanay Yesuusawu immana giidobaa xeelliyaagan ay akeekiyoo? (b) Seexaanay alamiyaa haariyoogaa bessiya xiqiseti awugeetee?

¹¹ Yesuusi ha alamiyaa woykko saꞌaa haariyay oonakko erees. Issi wode, Seexaanay Yesuusa “sa7an de7iya kawotetta ubbaanne eta bonchchuwaa bessiis.” Bessidi, Seexaanay Yesuusa, “Neeni taayyo gulbbatada goinnikko, taani hagaa ubbaa neeyyo immana” yaagiis. (Maatiyoosa 4:8, 9; Luqaasa 4:5, 6) He kawotettati Seexaanaabaa gidennaakko, i Yesuusawu immana gii? Akkay. Kawotettati ubbay Seexaanaaba.

¹² ‘Seexaanay ha alamiyaa haariyaagaa gidana danddayenna. Saluwaa saꞌaa medhidaagee Ubbaa Danddayiya Xoossaa, Yihoowa gidiyoogee tuma’ gaada qoppana danddayaasa. (Ajjuutaa 4:11) SHin “ha sa7aa haariyaagee” Seexaanaa gidiyoogaa Yesuusi qoncciyan yootiis. (Yohaannisa 12:31; 14:30; 16:11) Kiitettida PHawuloosi “ha sa7aa Xoossai” Seexaanaa Dabloosa gidiyoogaa yootiis. (2 Qoronttoosa 4:3, 4) Qassi kiitettida Yohaannisi “ha mule sa7aikka xalahe halaqan haarettidoogaa” yootiis.—1 Yohaannisa 5:19.

SEEXAANAA ALAMEE WAANIDI XAYANEE?

13. Ooratta alamee koshshiyoy aybissee?

¹³ Ha alamee yaa iiti iiti bees. Ha alamiyan olay, mussinnay, loꞌꞌo milatiya iitatettaynne makkalay kumiis. Asay ay keena baaxetiyaaba gidikkokka, ha metuwaa xayssana danddayenna. SHin Xoossay Armmageedoona olan ha iita alamiyaa mata wode xayssidi, xillotettay kumido ooratta alamiyaa ehaana.—Ajjuutaa 16:14-16; Wurssetta Qofaa 10 xeella.

14. Xoossay ba Kawotettaa Kawo gidanaadan dooridoy oonee? Geeshsha Maxaafay Yesuusabaa kasetidi ay yootidee?

¹⁴ Yihooway saluwan deꞌiya ba Kawotettaa Kawo gidanaadan Yesuus Kiristtoosa dooriis. Yesuusi “Sarotettaa Halaqaa” gididi haaranaagaanne a aysoy merinawu deꞌanaagaa Geeshsha Maxaafay shaꞌan qoodettiya layttappe kasetidi yootiis. (Isiyaasa 9:6, 7) Yesuusi bana kaalliyaageeti he Kawotettaa xeelliyaagan, “Ne kawotettai yo; ne shenee saluwan hanidoogaadan, sa7ankka hano” yaagidi woossanaadan tamaarissiis. (Maatiyoosa 6:10) SHemppo 8n, Xoossaa Kawotettay asa kawotettaa xayssidi a sohuwan haaranaagaa tamaarana. (Daaneela 2:44 nabbaba.) Hegaappe simmin, Xoossaa Kawotettay ha saꞌaa loꞌꞌiya gannate oottana.—Wurssetta Qofaa 11 xeella.

OORATTA ALAMEE MATATTIIS!

15. ‘Ooratta saꞌay’ aybee?

¹⁵ Geeshsha Maxaafay hagaadan gees: “Nuuni . . . ooratta saluwaanne ooratta sa7aa xilloi de7anasaa naagoos.” (2 PHeexiroosa 3:13; Isiyaasa 65:17) Issi issitoo, Geeshsha Maxaafay asaabaa yootanawu ‘biittaa’ woy saꞌaa giya qaalaa goꞌettees. (Zaarettido Wogaa 32:1) Yaatiyo gishshawu, xilloy deꞌana ‘ooratta saꞌay’ Xoossaayyo azazettiyoogan anjjettiya asa ubbaa bessees.

16. Xoossay ehaana ooratta alamiyan deꞌanaageetuyyo i ay mala imotaa immanee, qassi nuuni he imotaa demmanawu ay oottana bessii?

¹⁶ Xoossay ehaana ooratta alamiyan deꞌana asay “merinaa de7uwaa” demmanaagaa Yesuusi yootiis. (Marqqoosa 10:30) Nuuni he imotaa demmanawu ay oottana bessii? Hegaa zaaruwaa eranawu hayyanaa, Yohaannisa 3:16⁠nne 17:3 nabbaba. Saꞌay Gannate gidiyo wode deꞌoy ay mala gidanaakko Geeshsha Maxaafay yootiyoobaa ane beꞌoos.

17, 18. Kumetta saꞌan sarotettay deꞌanaagaanne nuuni hirggennan woppu giidi deꞌanaagaa waati eriyoo?

¹⁷ Iitatettay, olay, danoynne makkalay xayana. Iita asi issoynne saꞌan attenna. (Mazamure 37:10, 11) Xoossay “sa7aa gaxaa gakkanaassi de7iya olaa teqqees.” (Mazamure 46:9; Isiyaasa 2:4) Xoossaa siiqiyaageetinne ayyo azazettiyaageeti saꞌan deꞌana. Asay yan sarotettan merinawu deꞌana.—Mazamure 72:7.

¹⁸ Yihoowa asay woppu giidi deꞌana. Beni, Israaꞌeelati Xoossaayyo azazettiyo wode, i eta naagiyo gishshawu sarotettan deꞌidosona. (Wogaabaa 25:18, 19) Gannatiyan nuuni aybiyyookka woy ooyyookka yayyokko. Nuuni ubba wode hirggennan woppu giidi deꞌana!—Isiyaasa 32:18; Mikiyaasa 4:4 nabbaba.

19. Xoossay ehaana ooratta alamiyan kattay kumi palahanaagaa ammanettana danddayiyoy aybissee?

¹⁹ Kattay kumi palahana. “Biittan daro kattai mokko; dereti kattan kamettona.” (Mazamure 72:16) “Biittai kattaa mokkiis”; qassi Yihooway, “nu Xoossai nuna anjjiis.”—Mazamure 67:6.

20. Saꞌay gannate gidanaagaa waati eriyoo?

²⁰ Kumetta saꞌay gannate gidana. Asawu loꞌꞌiya keettaynne ataakiltte sohoy deꞌana. (Isiyaasa 65:21-24; Ajjuutaa 11:18 nabbaba.) Kumetta saꞌay Edene ataakiltte sohuwaadan loꞌꞌiyaagaa gidana. Yihooway nuussi koshshiya ubbabaa muletoo immana. Geeshsha Maxaafay, “Neeni ne kushiyaappe yeggada, paxa de7iyaageeta ubbaa amuwaa alaasa” yaagees.—Mazamure 145:16.

21. Meheenne doꞌay asaara saruwan deꞌanaagaa waati eriyoo?

²¹ Meheenne doꞌay asaara saruwan deꞌana. Mehee doꞌay he wode asaa qohenna. Guutta naati haꞌꞌi nuna qohiya doꞌatakka he wode yayyokkona.—Isiyaasa 11:6-9; 65:25 nabbaba.

22. Yesuusi harggiyaageeta waatanee?

²² Yan ooninne harggenna. Yesuusi saꞌan deꞌiyo wode daro asaa pattiis. (Maatiyoosa 9:35; Marqqoosa 1:40-42; Yohaannisa 5:5-9) SHin Yesuusi Xoossaa Kawotettaa Kawo gidiyo gishshawu, asa ubbaa pattana. He wode ooninne, “Taani harggais” geenna.—Isiyaasa 33:24; 35:5, 6.

23. Xoossay hayqqidaageeta waatanee?

²³ Hayqqidaageeti denddana. Hayqqida miilooniyan qoodettiyaageeta denttanawu Xoossay qaalaa geliis. “Asai ubbai, worddoikka xilloikka haiquwaappe denddana.”—Yohaannisa 5:28, 29 nabbaba; Oosuwaa 24:15.

24. Gannatiyan deꞌanaagaa qoppiyo wode neeyyo aybi siyettii?

²⁴ Nuuni ubbay doorana koshshiyaabay deꞌees. Nuuni Yihoowabaa eranawunne ayyo haggaazanawu woy nu koyiyo harabaa oottanawu doorana danddayoos. Nuuni Yihoowayyo haggaazanawu doorikko, sinttappe ufayssiya deꞌuwaa deꞌana danddayoos. Issi bitanee hayqqanaappe kase, Yesuusi a hassayana mala oychin, Yesuusi, “Neeni tanaara gannatiyan de7ana” yaagidi qaalaa geliis. (Luqaasa 23:43) Yesuus Kiristtoosabaanne Xoossay qaalaa gelido ufayssiyaabaa Yesuusi waati polanaakko ane gujjidikka beꞌana.