Ha Alamee Xayiyo Wode Nuuni Attanaagaa Ammanettoos

Yihooway ha alamiyaa danddayiyoogaa mata wode aggana. Worddo haymaanootee xayana, issippe denddiya kawotettati Xoossaa asaa qohanawu denddana, qassi Yihooway Armmageedoonan iitata xayssana. Kiristtaaneti ha keehi gitabaa yeemuwan naagoosona.

Gita waayiyaabaa nuuni ubbabaa erennaagee tuma. Leemisuwawu, gita waayee awude doommanaakko erokko. Kawotettati haymaanootiyaa xayssanaadan oottiya gaasoy aybakko nuuni erokko. He kawotettati Xoossaa asaa ay keena wodiyawu qohanaakko woy hegee ay gujjiyaakko nuuni erokko. Qassi Yihooway Armmageedoona olan iitata xayssanawu goꞌettanabay aybakko erokko.

Gidoppe attin, sinttappe gakkanabaa nuuni ammanettidi xalatettan naaganawu nuussi koshshiya ubbabaa Geeshsha Maxaafay yootees. Leemisuwawu, ‘wurssetta gallassay’ wuranawu keehi matido wodiyan nuuni deꞌiyoogaa eroos. (2Xim 3:1) Tumu haymaanootee xayenna mala haymaanooteti xayiyo ‘gallassatu qooday guuxxanaagaa’ eroos. (Maa 24:22) Yihooway ba asaa ashshanaagaa eroos. (2PHe 2:9) Qassi Armmageedoona olan iitata xayssanawunne zawi baynna daro asaa ashshanawu Yihooway dooridoogee xillonne wolqqaama gidiyoogaa nuuni eroos.—Ajj 19:11, 15, 16

Sinttappe gakkanabay asay ‘yashshan daafuranaadan’ oottanaagee qoncce. SHin Yihooway ba asaa beni wode waati ashshidaakko, qassi sinttanaabaa xeelliyaagan I ay yootidaakko, nabbabiyoogaaninne wotti dentti qoppiyoogan, nu atotettay matidoogaa ammanettidi ‘xoqqu giidi pude xeellana’ danddayoos.—Luq 21:26, 28.