Kiristtaanetu Deꞌuwaanne Haggaazuwaa SHiiquwaa Xannaꞌiyo Xuufiyan Odettida Xuufeta
© 2023 Watch Tower Bible and Tract Society of Pennsylvania
UDDUFUNE 1-7
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 17-19
“Harata Yihooway Xeelliyoogaadan Xeellite”
Xaafettidabaa Ne Wozanan Wottuutee?
7 Asa naꞌaa Yoosaafixabaa shin? I ufayssiya daro eeshshay deꞌiyo asa. Yoosaafixi Yihoowan ammanettidi daro loꞌꞌobaa oottiis. Gidoppe attin, ikka bawu eri paccidoogaa bessiyaabaa kuuyiis. Leemisuwawu, i huuphessa kawotettaa iita Kawuwaa Akaabaara bollotiis. Qassi hananabaa yootiya Mikaayi seerishinkka ixxidi, Yoosaafixi Akaabayyo exatidi Sooretuura olettiis. Yoosaafixi he olan hayqqiichi qii xeeran attiis. Hegaappe Yerusalaame simmiis. (2 Odi. 18:1-32) He wode, hananabaa yootiya Yeehu a, “Neeni iitata maaddanau woikko GODAA ixxiyaageeta siiqanau bessii?” yaagidi oychiis.—2 Hanidabaa Odiya 19:1-3 nabbaba.
Yihoowa Aggenna Siiquwaabaa Wotta Dentta Qoppa
8 Yihooway nuna siiqiyoogaanne nuuni nagarancha gidiyoogaa i xeellennaagaa nuuni akeekanaadan koyees. I nu wozanan deꞌiya loꞌꞌobaa xeellees. (2 Odiya 16:9) Leemisuwawu, Yihudaa Kawuwaa Yoosaafixaara gayttidaagan i hegaadan oottiis. Issi wode, Israaꞌeela Kawoy Akaabi Galaꞌaaden deꞌiya Raamoota Sooretuppe zaarissanawu olettiyo wode, Yoosaafixi ayyo exatanawu maayettiyoogan iitabaa oottiis. Wordduwaa hananabaa yootiya 400 asati iita kawoy Akaabi xoonanaagaa yootikkonne, i xoonettiyoogee attennaagaa Yihooway kiittin hananabaa yootiya Mikaayi yootiis. Olan Akaabi hayqqiis; qassi Yoosaafixi hayqqiichi attiis. I Yerusalaame simmin, Akaabaara exatido gishshawu awu seeray imettiis. Gidikkokka, hananabaa yootiya Hanaana naꞌay Yeehu Yoosaafixi ‘oottido loꞌꞌobay’ deꞌiyoogaa yootiis.—2 Odiya 18:4, 5, 18-22, 33, 34; 19:1-3.
9 Yoosaafixi ba haaruwaa doommido heeran sunttati, Leewatinne qeeseti Yihudaa katamatu ubbaa yuuyidi Yihoowa Higgiyaa asaa tamaarissanaadan azaziis. He zamachay muruta gidiyo gishshawu, Yihudaa biittaa yuushuwan deꞌiya kawotettaa asay Yihoowa yayyiyoogaa doommiis. (2 Odiya 17:3-10) Ee, Yoosaafixi eeyyabaa oottiis; shin kase i oottido loꞌꞌobaa Yihooway beꞌiis. Geeshsha Maxaafan deꞌiya ha qofay, nuuni nagarancha gidikkokka kumetta wozanaappe Yihoowa ufayssanawu koyikko, i aggennan nuna siiqiyoogaa hassayissees.
Ayyaanaaban Alꞌꞌobaa
Kumetta Wozanaappe Yihoowawu Ootta!
10 Asa naꞌay Yoosaafixi “ba aawaa Asa ogiyan hemettiis.” (2 Odi. 20:31, 32) Waatidi? Yoosaafixi asay Yihoowa koyanaadan ba aawaagaadan minttettiis. Yihudaa katama ubban deꞌiya asaa ‘Yihoowa Higgiyaa Maxaafaappe’ tamaarissanaadan i ba asata kiittiis. (2 Odi. 17:7-10) Ubba qassi, i asaa ‘Yihoowakko zaaranawu’ huuphessa Israaꞌeela kawotettan deꞌiya Efireema gezziyaa gakkanaashin biis. (2 Odi. 19:4) Yoosaafixi “ba kumetta wozanaappe GODAA koyida” kawo.—2 Odi. 22:9.
11 Yihooway ha wodiyan oottissiiddi deꞌiyo tamaarissiyo gita oosuwaa nuuni ubbaykka oottana danddayoos. Neeni ubba wode harata Xoossaa Qaalaa tamaarissanawunne eti Xoossawu oottanaadan eta wozanaa denttettanawu halchadii? Hegaadan baaxetiyoogaaninne Yihooway anjjiyoogan Geeshsha Maxaafaa xinaatiyaa doomissana danddayaasa. Ne halchoy polettanaadan woossay? Neeni shemppanawu koyiyo saatiyankka gidin Geeshsha Maxaafaa xannaꞌanawu koyiya ura demmikko xannaꞌissanawu eeno guutee? Yoosaafixi asay tumu goynuwawu simmanaadan maaddanawu Efireema biittaa gakkanaashin biidoogaadan, nuunikka ayyaanaaban shuggidaageeta maaddanawu baaxetana danddayoos. Gubaaꞌe cimati qassi bantta moottan deꞌiya, bohettidaba gidikkokka nagaraa oottiyoogaa aggidaageeta xomoosanawunne maaddanawu hanotaa giigissoosona.
UDDUFUNE 8-14
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 20-21
“GODAN, Intte Xoossan, Ammanettite”
Ha Iita Alamiyaa Wurssettaa Issippe Gencciyoogaa
8 Kawuwaa Yoosaafixa wodiyan, Xoossaa asaa eta yuushuwan deꞌiya “daro olanchchati” yashissidosona. (2 Odi. 20:1, 2) Xoossaa asay bantta wolqqan xoonanawu baaxetibeennaagee ufayssiyaaba. Eti banttana maaddanaadan Yihoowakko xeellidosona. (2 Hanidabaa Odiya 20:3, 4 nabbaba.) Israaꞌeelati bantta koyido ogiyan he metuwaa giigissanawu koyibookkona; shin eti ubbay issippe shiiqidosona. Geeshsha Maxaafay hagaadan gees: “Yihudaa asai ubbai bantta yiira naatuura, bantta maccaasatuuranne bantta naatuura issippe gididi, GODAA sinttan eqqidosona.” (2 Odi. 20:13) Yelagatikka cimatikka ammanettidi Yihoowa kaaletuwaa kaallidosona; Yihoowaykka bantta morkketuppe ashshiyoogan eta naagiis. (2 Odi. 20:20-27) Hegee Xoossaa asa gidiya nuuni metiyaabaa waani genccanaakko akeekissiya loꞌꞌo leemiso gidennee?
Mati Aqo Oyqqidaageetoo, Yihoowawu Haggaaziyoogaa Intte Deꞌuwan Kaseyite
7 Leewa zare gidida Yahaaziꞌeela baggaara Yihooway Yoosaafixa haasayissiis. Yihooway hagaadan giis: “Intte sohuwaa sohuwaa oiqqi eqqidi, GODAI inttena ashshiyoogaa be7eeta.” (2 Odi. 20:13-17) Yaatiyoogee olaa olettiyo wode meeze gididaba gidenna! SHin, ha azazoti yiidoy asappe gidennan, Yihoowappe yiidosona. Yoosaafixi Xoossan wozanappe ammanettidi he azazota azazettiis. Inne A asay bantta morkketuura gayttanawu kiyido wode, I wotaaddaratu sinttan eqqiis, eti olaa miishshaa gixxennan mazamuriyaa yexxiyaageetappe attin, gooba olanchchata gidokkona. Yihooway Yoosaafixassi gelido ba qaalaa naagiis; Yoosaafixi morkketu olanchchata xooniis.—2 Odi. 20:18-23.
Ayyaanaaban Alꞌꞌobaa
it-1 1271 ¶1-2
Yoraama
Yoraama machchiya Ataala amarida ogiyan awu iita leemiso gidido gishshawu, A aaway Yoosaafixi hemettido suure ogiyaa I kaallibeenna. (2Kaw 8:18) Yoraami ba ishantta usuppunatanne Yihudan deꞌiya amarida halaqata woriis; qassi I haariyo asati worddo xoossatussi goynnanaadan oottiyoogan Yihoowa sinttan iitabaa oottiis. (2Odi. 21:1-6, 11-14) I haarido wode ubban Yihuuda biittaaninne hegaa heeran metoynne ooshshay appe shaahettibeenna. Koyro, Eedooma asay Yihudaa bolli makkaliis; qassi guyyeppe Liibina asaykka makkaliis. (2Kaw 8:20-22) Yoraami naagettanaadan hananabaa yootiya Eelaasappe yiida dabddaabbe hagaadan gees: “Hegaa gishshau, GODAI ne asaa, ne naata, ne maccaasatanne neeyyo de7iya ubbabaa wolqqaama boshan shocana.” Hegaa bollikka, Kawuwaa Yoraama ‘maracciyaa harggee oiqqin, ayyo sahoi yaa goobi goobidi baana.’—2Odi 21:12-15.
He ubbabaykka odettidoogaadan A bolli gakkiis. Yoraama machchotanne A naata ubbaa Arabatinne Pilisxxeemati omooddidi efaanaadan Yihooway paqqadiis. Xoossay Kawuwaa Daawitassi gelido qaalaa gishshawu Yoraama naatu ubbaappe kaaloy Yoꞌakaazi (Akaaziyaasa geetettidikka xeegettiis) attanaadan Yihooway oottiis. “He ubbaappe guyyiyan, paxanau danddayenna maracciyaa harggiyan Yoraama GODAI shociis.” Naaꞌꞌu layttaappe guyyiyan “a maraccee kare kiyiis;” qassi I guyyeppe hayqqiis. Yaatiyo gishshawu, “ooninne azzanibeenna” he iita bitaniyaa taarikee hagaadan polettiis. I Daawita Kataman moogettiisippe attin, “kawotu makkaanan moogettibeenna.” Yoraama na7ai Akaaziyaasi A sohuwan kawotiis.—2Odi 21:7, 16-20; 22:1; 1Odi 3:10, 11.
UDDUFUNE 15-21
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 22-24
“Xalatettan Oottiyoobaa Yihooway Anjjees”
w09 4/1 24 ¶1-2
Yoꞌaashi Iitatuura Laggetido Gishshawu Yihoowa Aggiis
HEGEE Yihoowa beeta maqidase deꞌiyo Yerusalaamen hanotay keehi iitido wode. Kawuwaa Akaaziyaasa wori simmin daro takkennan Akaaziyaasa aayyiyaa Ataala oottidobay qoppanawu keehi deexxiyaaba. A ba naꞌaa Akaaziyaasa naata worissaasu. A hegaadan oottidoy aybissakko ereetii?— A bawu kawotana koyido gishshataassa.
SHin Ataali naꞌaa naatuppe issoy Yoꞌaashi attiis; qassi I waani attidaakko akka erukku. I waani attidaakko eranawu koyeetii? Yoꞌaasha aawaa michchiya Yihoshebaaꞌa guutta naꞌaa Yoꞌaasha Xoossaa beeta maqidasiyan qosaasu. A hegaadan oottana danddayidoy I azinay Yoodaahe Qeese Ubbatu Halaqa gidiyo gishshataassa. Yaatiyo gishshawu, eti Yoꞌaashi attanaadan issippe maayettidosona.
w09 4/1 24 ¶3-5
Yoꞌaashi Iitatuura Laggetido Gishshawu Yihoowa Aggiis
Yoꞌaasha usuppun layttawu beeta maqidasiyan qosidi naagidosona. I Xoossaa Yihoowabaanne A higgeta xeelliyaagan ubbabaa tamaariis. Wurssettan, Yoꞌaashawu layttay laappunaa gidido wode, Yoodaahe Yoꞌaasha kawoyanawu koshshiyaabaa oottiis. Yoodaahe hegaa waati oottidaakkonne Yoꞌaashawu aawaa aayo gidida iita Kawiyaa Ataala waanidaakko eranawu koyay?—
Yoodaahe Yerusalaamen deꞌiya mato halaqata hara asi erennan issippe xeesidi shiishshiis. Kawuwaa Akaaziyaasa naꞌaa inne A machchiya waati ashshidaakko etawu yootiis. Yaatidi Yoodaahe Yoꞌaasha he mato halaqatussi bessin eti I kawo gidana bessiyoogaa akeekidosona. Qassi hegaadan oottanawu eti halchchidosona.
Yoodaahe Yoꞌaasha asaa sintti aattidi A huuphiyan kallachchaa wottiis. Yaatin, “asai kushiyaa baqqidi: ba qaalaa xoqqu oottidi ‘kawoi shemppo gam77o!’” yaagiis. Yoꞌaasha naaganawu olanchchatu halaqati A lanqqiyan doosona. Ataala he ufayssaa siyido wode, asaakko baada hanqqettaasu. SHin Yoodaahe azazin olanchchatu halaqati Ataalo woridosona.—2 Kawotu Maxaafaa 11:1-16.
it-1 379 ¶5
Mooguwaa, Makkaanaa
Xoossaa sinttan xillobaa oottida Yoodaahe hayqqido wode, kawo gidennan “Daawita Kataman kawotu makkaanan” moogettida asi A xalla.—2Odi 24:15, 16.
Ayyaanaaban Alꞌꞌobaa
it-2 1223 ¶13
Zakkaariyaasa
12. Qeese Ubbatu Halaqaa Yoodaahe naꞌa. Yoodaahee hayqqi simmin, Kawuwaa Yoꞌaashi tumu goynuwaa aggibayiis; qassi I Yihooway kiittin hananabaa yootiyaageeta siyennan ixxidi worddo zoriyaa siyiis. Hegaappe denddidaagan, Yoꞌaashawu aawaa michchee naꞌay Zakkaariyaasi (2Odi 22:11), asaa minttidi zoriis; shin asay ba nagaraappe simmiyoogaa aggidi, A beeta maqidasiyaa gibbiyaa giddon shuchchan caddiis. Zakkaariyaasi hayqqiiddi, “GODAI hagaa be7idi, halo kesso” yaagiis. He hiraagay polettiis; Sooriyaa olanchchati Yoꞌaasha qohidoogaa xalla gidennan, “Qeesiyaa Yoodaahe na7aa suuttaa gishshau” A naaꞌꞌu oosanchchati Yoꞌaasha woridosona. Giriiketto Septujentteenne Laatin Bulggeet giyo Geeshsha Maxaafati Yoodaahe “na7aa” suuttaa haluwaa kessanawu Yoꞌaasha woridoogaa yootoosona. SHin Masooreti xaafidonne Siriyak Peshitaa xuufeti, Yoodaahe naꞌaa hananabaa yootiyaanne qeese gidida Zakkaariyaasa, “naata” giidi cora qoodan yootiyoy I keehi bonchchettida asa gidiyo gishshaassa gidana danddayees.—2Odi 24:17-22, 25.
UDDUFUNE 22-28
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 25-27
“GODAI Neeyyo Hegaappe Aattidi Immanau Danddayees”
it-1 1266 ¶6
Yoꞌaasha
Yoꞌaashi Yihudaa kawuwaa maaddidi Eedoomatuura olettanawu xeetu shaꞌan qoodettiya ba olanchchatakka immiis. Gidoppe attin, “Xoossaa asi” he olanchchata eta soo soo zaaridi yeddana mala A zoriis; etawu xeetu biraa taalanttiyaa (660,600 Amarkkaa doolaariyaa) qanxxidaba gidikkonne kawoy he zoriyaa siyidi olanchchati soo simmanaadan oottin eti keehi hanqqettidosona. Eti hanqqettidoy omooddidi ekkanawu qoppidobay attido gishshataassa gidana danddayees. Yaatiyo gishshawu, eti Samaariyaappe biidi Beeti-Horoona gakkanawu he kawotettan deꞌiya katamata (geella eti olettidi gidennan aggenna) bonqqidosona.—2Odi 25:6-10, 13.
Yihooway Loꞌꞌo Gidiyoogaa Waata ‘Xeella Beꞌuutee?’
16 Yihoowawu oottanawu ne goꞌꞌaa aggabaya. Yihoowa ufayssanawu giidi nuna ufayssiya ubbabaa aggana koshshenna. (Era. 5:19, 20) Gidoppe attin, nuuni dosiyo amaridabaa agganawu koyibeennaagaa gaasuwan Yihoowawu loytti haggaazana xayikko, baayyo loꞌꞌo gidida darobay deꞌanaadan minni oottiyaaba gidikkonne Xoossaabaa qoppibeenna leemisuwan Yesuusi odido bitaniyaagaa mala balabaa oottana danddayoos. (Luqaasa 12:16-21 nabbaba.) Paransaayen deꞌiya Kirstiyan giyo ishay hagaadan giis: “Yihoowayyoonne ta soo asawu ta wodiyaanne wolqqaa loytta goꞌettabeykke.” Inne A keettaayyiyaa aqinye gidanawu kuuyidosona. Gidikkonne, he halchchidobaa polanawu, eti bantta oosuwaa aggibayidosona. Eti banttawu koshshiyaabaa kunttanawu geeshshiyo oosuwaa oottiyoogaa doommidosona, yaatidi eti guutta miishshan ufayttidi deꞌiyoogaa meezetidosona. Eti amaridabaa aggidi aqinye gidido gishshawu ufayttidonaa? Kirstiyani hagaadan giis, “Nuuni haꞌꞌi loꞌꞌo haggaazuwaa haggaaziyoogan, Geeshsha Maxaafaa nu xannaꞌissiyoogeetinne zaarettidi oychchiyoogeeti Yihoowabaa tamaariyoogaa beꞌiyoogan ufayttoos.”
Ayyaanaaban Alꞌꞌobaa
w07 12/15 10 ¶1-2
Ayyaanaaban Nena Maaddiya Zoriya Immiya Asi Deꞌii?
OOZIYAANAYYO layttay 16 gidiyo wode tohossa baggan deꞌiya Yihudaa Kawotettawu kawo gidiis. Uddufun xeetaa K.K. wurssettaa heeraappe doommidi hosppun xeetaa K.K. doomettaa gakkanawu deꞌiya 50ppe dariya layttawu haariis. Ooziyaani yelagatettaa layttaappe doommidi “GODAA sinttan suurebaa oottiis.” I suurebaa oottanaadan aybi maaddidee? Geeshsha Maxaafay hagaadan gees: “[Ooziyaani] Xoossaa yashshatettaa bana tamaarissida Zakkaariyaasi paxa de7ido wodiyan, Xoossaassi i ammanettidi oottiis. GODAASSI i oottido wode ubban, Xoossai a anjjiis.”—2 Hanidabaa Odiya 26:1, 4, 5.
Ha sohuwaanappe attin kawuwaa zoriyaa Zakkaariyaasa xeelliyaagan Geeshsha Maxaafan daro odettibeenna. Gidoppe attin, “Xoossaa yashshatettaa,” tamaarissiya Zakkaariyaasi yelaga kawoy suurebaa oottanaadan A keehi maaddiis. Zi Ekispoziters Baybil giyo maxaafay yootiyoogaadan, Zakkaariyaasi “Xoossaa Qaalaa loytti tamaaridanne ayyaanaaban kaymida asa, qassi haraata tamaarissanawu eray deꞌiyoogaa.” Issi Geeshsha Maxaafaa eranchchay Zakkaariyaasa xeelliyaagan hagaadan giis: “I hiraagata loytti eriyaanne . . . akeekanchcha, ammanettidanne loꞌꞌo asa gidiyoogee Ooziyaana keehi maaddidaba milatees.”
UDDUFUNE 29–TAMME 4
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 28-29
“Inttena Yelidaageeti Loꞌꞌo Leemiso Gidana Xayikkonne, Yihoowawu Haggaazana Danddayeeta”
Yihoowayyo Mata Dabbota Milata
8 Urutippe dumma hanotan, Hizqqiyaasi Yihoowaara maacettida zariyaappe yelettiis. SHin ubba Israaꞌeelati he maachaadan deꞌibookkona. Hizqqiyaasa aaway, Kawuwaa Akaazi hegaa mala asa. He iita bitanee Yihudaa kawotettay eeqawu goynnanaadan, ubba Yerusalaamen deꞌiya Yihoowa beeta maqidasee tunanaadan oottiis. Hizqqiyaasi naatettan deꞌishin, a ishanttuppe issota issota a aaway meqetti baynna hanotan woriis, ubba taman xuuggidi eeqawu yarshshiis!—2 Kaw. 16:2-4, 10-17; 2 Odi. 28:1-3.
Yihoowayyo Mata Dabbota Milata
9 Hizqqiyaasi Xoossaa bolli hanqqettiyaanne yiillotiya asa gididi diccana danddayees shin. Aagaara gatti xeelliyo wode, guutta metoy gakkiyo issi issi asati Yihoowa bolli woy a dirijjitiyaa bolli ‘yiillotana’ danddayiyaabadan qoppana danddayoosona. (Lee. 19:3) Qassi harati eta soo asay oottido iitabaa gaasuwan eta deꞌoy moorettidoogaa, geella bantta aawati oottido balabaa etikka zaarettidi oottiyoy hegaa gishshataassa giidi qoppana danddayoosona. (Hiz. 18:2, 3) SHin hegaa mala qofay tumee?
10 Hizqqiyaasa deꞌoy hegee tuma gidennaagaa bessees! Ha iita alamiyan asaa bolli gakkiya metuwawu pulttoy Yihoowa gidenna gishshawu, a bolli yiillotiyo gaasoy baawa. (Iyy. 34:10) Aaway woy ayyiyaa bantta naati loꞌꞌobaa woy iitabaa oottanaadan tamaarissana danddayiyoogee tuma. (Lee. 22:6; Qol. 3:21) SHin hegee nu soo asaa hanotay nuuni loꞌꞌo woy iita gidanaadan oottees giyoogaa gidenna. Hegaappe dumma hanotan, nuuni loꞌꞌobaa woy iitabaa dooridi oottiyo maataa Yihooway nu ubbaassi immiis. (Zaa. 30:19) Hizqqiyaasi he imotaa waati goꞌettidee?
11 Hizqqiyaasi Yihudaa iita kawotuppe issuwaa naꞌaa gidikkokka, i keehi suure naꞌa gididi dicciis. (2 Kawotu 18:5, 6 nabbaba.) Ee, a aaway iita gidikkonne, i eta leemisuwaa kaallana danddayiyo loꞌꞌo asati deꞌoosona. He wode, Isiyaasi, Mikiyaasinne Hooseꞌi hananabaa yootoosona. Kawuwaa Hizqqiyaasi he ammanettida asati ayyaanaa kaaletuwan zoriyoobaanne yootiyoobaa akeekan siyiis. Hegaa gishshawu, i ba aaway oottido keehi iitabaa xayssiis. I beeta maqidasiyaa geeshshiis, asaa nagaray atto geetettanaadan oottiis, qassi biitta ubbaappe eeqa goynuwaa xayssiis. (2 Odi. 29:1-11, 18-24; 31:1) Guyyeppe, Asoore kawuwaa Sanaakireebi Yerusalaame xayssanawu yiido wode, Hizqqiyaasi xala gidiyoogaanne mino ammanoy deꞌiyoogaa bessiis. I Xoossay ashshanaagaa ammanettiis; qassi haasayiyoobaaninne oottiyooban ba asaa minttettiis. (2 Odi. 32:7, 8) Takkidi, Hizqqiyaasi otorettido wode zoree imettin, ba huuphiyaa kawushshidi ba nagaraappe simmiis. (2 Odi. 32:24-26) Hizqqiyaasi diccido hanotay iita gidiyo gishshawu, iita asa gidibeenna. Ubba, i Yihoowa dabbo gidiis; qassi nuuni kaalliyo leemiso gidiis.
Ayyaanaaban Alꞌꞌobaa
w12 2/15 24-25
Naataani—Tumu Goynuwawu Exatiis
Naataani Yihoowawu ammanettidi goynniya asa gidiyo gishshawu, Daawiti hegaappe kase saꞌan baynna geeshsha goynuwaa ubbatoo goynniyo sohuwaa keexxanawu halchchidoogaa maaddiis. SHin he wode Naataani Yihoowa qofaa gidennan baappe haasayiis. Gidoppe attin, Yihoowawu beeta maqidasiyaa keexxiyay Daawita gidennaagaa Naataani awu yootanaadan Xoossay he qammi azaziis. Hegaa keexxanay Daawita naꞌaa. Gidoppe attin, Xoossay ‘A kawotaa araataa merinawu mintti essanawu’ qaalaa gelidoogaa Naataani Daawitawu yootiis.—2 Sam. 7:4-16.
Beeta maqidasiyaa keexuwaara gayttidaagan Yihooway qoppidobay Naataani qoppidoogaappe dummatees. SHin hananabaa yootiya ammanettidaagee zuuzummennan Yihoowa sheniyaara maayettiis. Issi issi ogiyan Xoossay nuna zoriyo wode he zoriya ekkanawu hegee nuuyyo loꞌꞌo leemiso! Naataani hegaappe simminkka hananabaa yootiyaagaa gididi oottidoogee Yihooway A siiqiyoogaa aggibeennaagaa bessees. Beeta maqidasiyan yetta miishshan oottiya 4,000 asata Daawiti daraajjayanaadan odanawu hananabaa yootiya Naataana hiraagaa odiya Gaadaara issippe Yihooway ba ayyanan kaalettennan aggenna.—1 Odi. 23:1-5; 2 Odi. 29:25.
TAMME 5-11
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 30-31
“Issippe SHiiqiyoogee Nuna Maaddees”
it-1 1103 ¶2
Hizqqiyaasa
Tumu Goynuwawu Mishettiis. Hizqqiyaasawu 25 laytta gidin I kawotido wode Yihoowa goynuwawu mishettiyoogaa bessiis. I harabaappe kasetidi, beeta maqidasee zaarettidi dooyettanaadaaninne bottokonettanaadan oottiis. Hegaappe simmin I qeesetanne leewata xeesidi hagaadan giis: “Taani GODAARA, Israa7eela Xoossaara maachchaa maacettanau ta wozanan qoppais.” Hegee ammanettanawu maacettiyo maachchaa; he maachchay Higgiyaa maachchaa gidikkonne asay sheneho giis; shin Yihudaa biittan deꞌiyaageeti zaarettidi azazettanaadan I koyiis. Leewati bantta sohuwan haggaazanaadaaninne yettaa miishshaa kaaꞌiyaageetanne yettaa yexxiyaageeta I gita minotettan darajjayiis. Hegee Paasikaa baalaa bonchchiyo Niisaana aginaa, shin beeta maqidase, qeesetinne Leewati geeyibookkona. Niisaana aginan 16tta gallassan beeta maqidase geeyiis, qassi yan deꞌiya miishshatakka giigissidosona. Hegaappe simmin, Israaꞌeelaa asaa ubbaa nagaraa atto giissanawu dummabay oosettiis. Koyro daannati kawotettaa nagaraa atto giissanawu xuuggiyo yarshshota ehiidosona, qassi asay kaallidi shaꞌan qoodettiya xuuggiyo yarshshota ehiis.—2Odi 29:1-36.
it-1 1103 ¶3
Hizqqiyaasa
Asay geeshsha gidennaagee Paasikaa baalay ubbatoo bonchchettennaadan diggees, shin Hizqqiyaasi geeshsha gidenna asay issi aginaappe guyyiyan Paasikaa baalaa bonchchanaadan higgee paqqadiyoogaa eriyo gishshawu I he injjiyaa goꞌettiis. I Yihuuda biittaa asaa xallawu gidennan Daanappe Berssaabeha gakkanaashin Israaꞌeela biitta ubbawu dabddaabbiyaa kiittiis. Dabddaabbiyaa efiyaageeta daro asay qilliicciis; shin Aseera asatuppe, Minaase asatuppenne Zaabiloona asatuppe banttana ziqqi oottidaageeti yiidosona; qassi Efireemappenne Yisaakoorappekka amaridaageeti yiidosona. Hegaa bolli, Yihoowassi goynniya Israaꞌeelaa asa gidenna darotikka shiiqidosona. SHin tumu goynuwawu exatiya huuphessa kawotettan deꞌiyaageetussi hegee waayissiyaaba gidana danddayees. Asooreti hambbalaashido eeqawu goynniya tammu yarati deꞌiyo huuphessa baggaa kawotettaa asay dabddaabbiyaa gattiyaageeta qilliiccennaaninne eta kawushshennan aggenna.—2Odi 30:1-20; Qoo 9:10-13.
it-1 1103 ¶4-5
Hizqqiyaasa
Paasikaa Baalaa bonchchi simmin Oyttaa Baalay laappun gallassawu bonchchettin asay keehi ufayttido gishshawu, baalaa hara laappun gallassaa gujjidi bonchchanawu kuuyiis. He iita wodiyankka Yihooway anjjido gishshawu, “Daawita na7aa, Israa7eela Kawuwaa Solomona wodiyaasappe doommin, hachchi gakkanaassi, Yerusalaamen hagaa milatiya baali bonchchetti erenna gishshau, Yerusalaamen asai keehippe ufaittiis.”—2Odi 30:21-27.
Tumu goynuwaa zaarettidi essidoogee guutta wodiyawu ufayttidi aggiyooba gidennan asay ubbay ubbatoo xoqqu ootti xeelliyooba. SHiiqida asati bantta soo simmanaappe kase eeqaa tuussata kinchcherettidosona; xoqqa sohotanne yarshshiyo sohota laalidosona; Asheero giyo xoossee misiliyaa qanxxi olidosona; Yihudaa biittaaninne Biniyaama biittan ubban, qassi Efireema biittaaninne Minaase biittan deꞌiya goynniyo sohota xayssidosona. (2Odi 31:1) Qassi he wodee gakkanaashinkka Israaꞌeela asay ayyo ixaanaa cuwayiiddi takkido Muusee nahaasiyaappe medhdhido shooshshaakka mentterettidi xayssiyoogan Hizqqiyaasi loꞌꞌo leemiso gidiis. (2Kaw 18:4) He gita baalay bonchchetti simmin Hizqqiyaasi tumu goynuwan ubbatoo oottiya qeeseta eta oosuwaa maaran citan citan shaakkidi essiis; qassi beeta maqidasiyaa oosuwaa koshshiyaaban maaddiyo hanotaa giigissiis; yaatidi Leewatuyyoonne qeesetuyyo asirataa immiyoonne asay bantta gaden mokkidabaappe koyruwaa immanaadan yootiya Higgiyaa azazettanaadan mintti yootin asay ufayssan hegaa poliis.—2Odi 31:2-12.
Ayyaanaaban Alꞌꞌobaa
‘Neeni Hegaa Erada Oottikko Ufayttaasa’
14 Nuna ziqqi oottiyoogaa bessiya harabay hara uri haasayiyo wode kelttiyaa gelennan siyiyoogaa. Yaaqooba 1:19y nuuni ‘siyanawu eesotana’ bessiyoogaa yootees. Hegaara gayttidaagan Yihooway ooppenne aadhdhiya leemiso. (Doo. 18:32; Yaas. 10:14) Kessaabaa 32:11-14n (nabbaba) deꞌiya haasayaappe nuuni ay tamaarana danddayiyaakko qoppa. Hegee Yihoowassi koshshiyaaba gidana xayikkonne, Muusee baassi siyettiyaabaa yootanaadan Yihooway eeno giis. Balabaa qoppiya uri haasayiyoobaa danddayan siyidi he uri yootidobaa oottana asi deꞌii? SHin, Yihooway ammanuwan woossiya asaa woosaa danddayan siyees.
15 Nuuni ubbay nuna hagaadan oychchana koshshees: ‘Yihooway Abrahaama, Raaheelo, Muusa, Yaasa, Maanuha, Eelaasanne Hizqqiyaasa haasayissido wodiyaagaadan asaa haasayissiyo wode bana ziqqi oottikko, taani hegaappe aaruwan ta ishantta ubbaa bonchchana, eta loꞌꞌo qofaa ezggananne eti yootidoogaadan oottana koshshennee? I yootiyoobaa taani loytta siyana koshshiyo uri nu gubaaꞌiyan woy nu son deꞌii? Hegaara gayttidaagan taani waatana koshshii, qassi taani ay oottanee?’—Doo. 30:6; Daan. 13:9; 1 Kaw. 17:22; 2 Odi. 30:20.
TAMME 12-18
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 32-33
“Intte Ishantti Waayettiyo Wode Minttettite”
it-1 204 ¶5
Asoore
Sanaakireeba. Sargoona Naaꞌꞌanttuwaa naꞌaa Sanaakireebi, Hizqqiyaasi kawotoosappe 14tta layttan (732 K.K.) Yihuuda kawotettaa oliis. (2Kaw 18:13 Isi 36:1) Hizqqiyaasi A aaway Akaazi oottidoogaadan oottennan ixxidi Asoore kawuwaa bolli makkaliisinne ayyo haarettennan ixxiis. (2Kaw 18:7) Yaatin Sanaakireebi 46 katamata xoonidi Yihuuda biittaakka olanawu yiis (Isi 36:1, 2ra gatta xeella); qassi Hizqqiyaasi 30 worqqaa taalanttiyaa (11,560,000 Amarkkaa doolaariyaa gidennan aggenna) qassi 300 biraa taalanttiyaa (1,982,000 Amarkkaa doolaariyaa gidennan aggenna) yeddanaadan Laakishappe asa kiittiis. (2Kaw 18:14-16; 2Odi 32:1; Isi 8:5-8ra gatta xeella.) Hegaa immiyaaba gidikkonne Yerusalaama katamaa dooddanaagaa Sanaakireebi kiittido bitanee yootiis. (2Kaw 18:17–19:34; 2Odi 32:2-20) Gidoppe attin, 185,000 A wotaaddarata Yihooway issi qammi worido gishshawu he otorettiya bitanee simmidi Nanawe biis. (2Kaw 19:35, 36) Yan A naaꞌꞌu naati A woridosona; yaatin A naatuppe issoy Asiraadooni A sohuwan kawotiis. (2Kaw 19:37; 2Odi 32:21, 22; Isi 37:36-38) Asoore wotaaddarati xayidoogee xaafettibeennappe attin hara ubbabay Sanaakireebanne Asiraadoona prizimiyan xaafettiis.—POTOTA, SHaaho 1, sinttaa 957.
Heemmiyaanne Kaalettiya Asati Nuna Waatidi Goꞌꞌiyoonaa?
12 Nuuni nuuyyo oottana danddayennabaa Yihooway nuussi ubbatoo oottanau koyiyaaba gidikkokka, nuussi danddayettiyaabaa oottanaadan koyees. Hizqqiyaasi “ba oosanchchatanne ba mino asata zoretaa bessiis”; yaatin etaara issippe “katamaappe kareera goggiya pultto haattaa [zeeridosona]; . . . Hegaappe guyyiyan, Hizqqiyaasi minni oottidi, laalettida dirssaa gimbbiyaa ubbaa zaarettidi gimbbiis; yaatidi a bolli adussa gimbbiyaa gimbbiis. He dirssaa gimbbiyaappe kare baggaara hara dirssaa gimbbiyaa gimbbiis; . . . Daro ola miishshaakka gonddalliyaakka medhdhiis.” (2 Odiya 32:3-5) Yihooway mino asatu darotu baggaara, hegeetikka Hizqqiyaasa, a oosanchatanne ayyaanaaban mino gidida hananabaa yootiyaageetu baggaara he wode deꞌiya ba asaa naagiisinne heemmiis.
Heemmiyaanne Kaalettiya Asati Nuna Waatidi Goꞌꞌiyoonaa?
13 Hegaappe simmin Hizqqiyaasi oottidobay haattaa zeeriyoogaappe woy katamaa dirssaa gimbbiyoogaappe keehi maaddiyaaba. Hizqqiyaasi asaa siiqiya henttancha gidiyo gishshau, eta shiishshidi hagaadan giidi ayyaanaaban eta minttettiis: “Asoore kawuwaara de7iyaagaappe nunaara de7iyaagee aadhdhees. Hegaa gishshau, Asoore [kawuwaayyo] . . . yayyoppite! Dagammoppite! Aara asa wolqqi de7ees; shin nunaara GODAI nu Xoossai nuna maaddanaunne nuuyyo olettanau de7ees.” Yihooway ba asaa gishshaa olettanaagaa hegaadan yootidoogee eta ammanuwaa keehi minttiyaaba! Yihudaa asay hegaa siyidi, “Yihudaa Kawoi Hizqqiyaasi haasayidoban . . . minettiis.” Asay “Hizqqiyaasi haasayidoban” minettidoogaa akeeka. I, a oosanchatinne a mino asati, qassi hananabaa yootiya Mikiyaasinne Isiyaasi Yihooway hananabaa yootiyaagaa baggaara kasetidi odidoogaadan loꞌꞌo henttancha gidiyoogee qoncciis.—2 Odiya 32:7, 8; Mikiyaasa 5:5, 6 nabbaba.
Ayyaanaaban Alꞌꞌobaa
Nagaraappe Tumuppe Simmiyoogaa Giyoogee Woygiyoogee?
11 Guyyeppe, Yihooway Minaase woosaa zaariis. Minaase wozanay laamettidoogaa Yihooway A woosaappe akeekiis. Minaasee Yihooway atto gaanaadan oychchido wode I atto giis; yaatidi zaarettidi kawo gidanaadan oottiis. Minaasee nagaraappe tumuppe simmidoogaa bessanawu bawu danddayettida ubbaabaa oottiis. Akaabi mule oottibeennabaa I oottiis. I ba eeshshaa laammiis. I worddo goynuwaa eqettiisinne asay Yihoowawu goynnanaadan minttettiis. (2 Hanidabaa Odiya 33:15, 16 nabbaba.) Yaatanawu Minaaseyyo xalatettaanne ammanuwaa koshshiis; ayssi giikko, I ba nagaraappe simmanaappe kase ba soo asawu, halaqatussi, ba deriyawu daro layttawu iitaban leemiso gidiis. Minaasee cimido wode, I oottidobaa gaasuwan gakkidabaappe amaridaagaa giigissanawu baaxetiis. Guyyeppe kawotidi keehi loꞌꞌo kawo gidida ba naꞌaa naꞌaa Yoosiyaasawu I loꞌꞌo leemiso gidennan waayi aggana.—2 Kaw. 22:1, 2.
12 Minaasee hanotaappe nu ay tamaarana danddayiyoo? I bana ziqqi oottidi darobaa oottiis. I Yihooway maaranaadan mintti woossiis. Qassi I ba eeshshaa laammiis. Minaasee ba oottidobaa gaasuwan gakkidabaa giigissanawu minni oottiis, qassi Yihoowawu goynnanawunne harati hegaadan oottanaadan maaddanawu bawu danddayettida ubbabaa oottiis. Minaase hanotay wolqqaama nagaraa oottidaageeta maaddees. Xoossaa Yihooway “kehanne atto giyaagaa” gidiyoogaa Minaase hanotay qonccissees. (Maz. 86:5) Bantta nagaraappe tumuppe simmiyaageeta Yihooway atto gees.
TAMME 19-25
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 34-36
“Xoossaa Qaalaappe Loytti Goꞌettiiddi Deꞌeetii?”
it-1 1157 ¶4
Hulddo
Yoosiyaasi beeta maqidasiyaa bottokonishin qeese ubbatu halaqaa Hilqqee demmido ‘higgiyaa maxaafay’ nabbabettishin siyido wode hegaabaa Yihoowa oychchanawu asaa kiittiis. Eti Hulddikko bin, Israaꞌeela asay he ‘maxaafan’ xaafettidabawu azazettibeenna gishshawu, hegani odettida boshay he biittaa bolli yaanaagaa A etawu yootaasu. Huldda gujjada Yoosiyaasawu hagaadan gaasu, neeni ta sinttan ne huuphiyaa kawushshido gishshawu, saro ne mayzzan gayttananne moogettana; yaana boshaa ne ayfee beꞌenna.—2Kaw 22:8-20; 2Odi 34:14-28.
Yihoowa Keettau Mishettiyaageeta Gidite!
20 Kawuwaa Yoosiyaasi beeta maqidasiyaa bottokonissiyo wode, Qeese Ubbatu Halaqaa Hilqqee “GODAI Muuse baggaara immido Higgiyaa Maxaafaa demmiis.” I kawuwaa xaafiyaa Saafaanayyo immin, Saafaani Yoosiyaasayyo nabbabiyoogaa doommiis. (2 Odiya 34:14-18 nabbaba.) Hegaappe hanidabay aybee? Kawoy azzanidi sohuwaara ba maayuwaa pooshshiisinne asati Yihoowa oychanaadan azaziis. Yihudaa biittan oosettida issi issi haymaanoote oosota ixxiyoogaa Xoossay hananabaa yootiya Hulddi baggaara yootiis. Gidikkokka, ubba asaa bolli bashshay gakkanaagee odettidaashin, Yoosiyaasi eeqaa goynuwaa xayssiyoogan loꞌꞌo oosuwaa oottiisinne Yihoowa ufayssiya ogiyan deꞌiis. (2 Odiya 34:19-28) Nuuni hagaappe ay tamaarana danddayiyoo? Nu koshshay Yoosiyaasaagaara issi mala gidiyoogee qoncce. Kaddiyo hanotaynne ammanettenna hanotay nu goynuwan deꞌanaadan oottiyaaba gidikko, aybi hanana danddayiyaakko akeekidi, Yihoowa kaaletuwau sohuwaara zaaruwaa immanau koshshees. Qassi Yihooway Yoosiyaasaara gayttidaagan oottidoogaadan, nuuni tumu goynuwau mishettiyoogaa i akeekidi hegan ufayttiyoogaa ammanettana danddayoos.
Ayyaanaaban Alꞌꞌobaa
Xaafettidabaa Ne Wozanan Wottuutee?
15 Wurssettan, loꞌꞌo Kawuwaa Yoosiyaasa gakkidabaappe nuussi seera gidiyaabaa ay akeekana danddayiyoo? I xoonettanaadaaninne hayqqanaadan oottidabaa qoppa. (2 Hanidabaa Odiya 35:20-22 nabbaba.) Gibxxe Kawoy Nakoy aara ooshshiyaabi baynnaagaa yootikkonne, Yoosiyaasi a “teqqanau kiyiis.” Geeshsha Maxaafay “GODAI Nako baggaara odidoogaa” yootees. Yaatin Yoosiyaasi ayssi olettanawu kiyidee? Geeshsha Maxaafay aybissakko yootenna.
16 SHin Nakoy yootidobay Xoossaappe yiidaba gidiyoogaa Yoosiyaasi waatidi erana danddayii? I hananabaa yootiya ammanettidaageetuppe issuwaa gidida Ermmaasa oychana danddayees. (2 Odi. 35:23, 25) SHin i hegaadan oottidoogee odettibeenna. Qassi Nakoy Yerusalaama gidennan, hara biittaa olanawu Karkkamiisha katamaa bees. Hegaa bollikka, Nakoy Yihoowakka a asaakka cayibeenna gishshawu, hegee Xoossaa sunttaara gayttiyaabakka gidenna. Yaatiyo gishshawu, Yoosiyaasi Nakoora olettanawu kuuyidoogee bessennaba. Hagaappe nuuni tamaarana danddayiyoobaa akeekiyoo? Issi metoy nuna gakkiyo wode, hegaara gayttidaagan Yihooway koyiyoobay aybakko nuuni qoppana koshshees.
17 Metoy merettikko, nuuni hegaara gayttida Geeshsha Maxaafaa maaraa qoppananne hegaa bessiyaagaadan oosuwan peeshshana koshshees. Issi issi hanotan cimatuura zorettana danddayoos. He yohuwaa xeelliyaagan nuuni eriyoobaa kasetidi loytti qoppidi ubba nu xuufetakka pilggana danddayoos. Gidikkokka, nuuni akeekanaadan issi cimay maaddana danddayiyo, nu qoppana koshshiyo Geeshsha Maxaafaa maarati harati deꞌennan waayi aggana. Leemisuwawu, issi michiyaa a mishiraachuwaa yootana koshshiyoogaa erawusu. (Oos. 4:20) SHin, issi galla a haggaazuwawu kiyanawu halcha uttidaashin ammanenna i azinay a son takkanaadan koyiis giidi qoppoos. I mata wode iira daro wodiyaa issippe aattibeenna gishshawu, naaꞌꞌay issippe issibaa oottanaadan koyidoogaa yootees. A Xoossawu azazettiyoogaanne asaa erissiyo ashkkara oottiyo azazuwaa mala, he hanotan maaddiya xiqiseta qoppana danddayawusu. (Maa. 28:19, 20; Oos. 5:29) Gidoppe attin, a macho gidiyo gishshawu haarettiyoogaaranne bessiyaabaa haniyoogaara gayttidabaakka qoppana koshshees. (Efi. 5:22-24; Pili. 4:5) I azinay a mule haggaazuwawu beennaadan koyiiyye, a he galla xalaalan issibaa oottanaadan oychii? Nuuni Xoossay koyiyoobaa oottanawunne nu kahay nuna qumꞌꞌennan deꞌanawu koyiyo wode bessiyaabaa hanana koshshees.
TAMME 26–ISIINE 2
XOOSSAA QAALAN DEꞌIYA ALꞌꞌOBAA | EZRA 1-3
“Yihooway Inttena Goꞌettanaadan Eeno Giite”
Neeni Zakkaariyaasi Beꞌidobaa Beꞌay?
AYHUDATI keehi ufayttidosona. Baabiloone biittan daro layttawu omooddettidi takkida Israaꞌeelata yeddanaadan, Xoossaa Yihooway ‘Parsse Kawuwaa Qiiroosa ayyaanaa denttettiis.’ Ayhudati bantta biitti simmidi ‘Yihoowa, Israaꞌeela Xoossaa beeta maqidasiyaa zaarettidi keexxanaadan’ kawoy awaajjiis. (Izi. 1:1, 3) Hegee keehi ufayssiya awaajjo! Hegaa giyoogee Ayhudati tumu Xoossay etawu immido biittan zaarettidi awu goynnana danddayoosona giyoogaa.
Saragallatinne Kallachay Nena Naagona
2 Yerusalaame simmida Ayhudati mino ammanoy deꞌiyo asata gidiyoogaa Zakkaariyaasi erees. He asati kase deꞌiyo loꞌꞌo deꞌuwaa aggidi baanaadan “Xoossai eta wozanaa denttettido” asata. (Izi. 1:2, 3, 5) Etappe daroti mule beꞌi erenna biitti baanawu, kase meezetido biittaappe kiyidosona. Yihoowa beeta maqidasiyaa zaarettidi keexxiyoogee keehi koshshiyaaba gidennaakko, eti metoy dariyo 1,600 kilo meetire ogiyaa baana koshshenna.
Ayyaanaaban Alꞌꞌobaa
w06 1/15 19 ¶1
Izira Maxaafan Deꞌiya Kulkka Qofata
1:3-6. Baabiloonen attida amarida Israaꞌeelatuugaadan, Yihoowa Markkatuppe daroti maadoy koshshiyo sohuwaa biidi kumetta wodiyawu haggaazana danddayokkona. Gidoppe attin, maadoy koshshiyo sohuwaa biidi kumetta wodiyaa haggaaziyaageeta minttettana, qassi sabbakiyoonne erissiyo ashkkara oottiyo oosuwaa miishshan maaddana danddayoosona.